| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၆. တူလောနဒ္ဓသိက္ခာပဒဝဏ္ဏနာ
6. Tūlonaddhasikkhāpadavaṇṇanā
စိမိလိကံ ပတ္ထရိတ္ဝာ တူလံ ပက္ခိပိတ္ဝာတိ မဉ္စပီဌာနံ ဥပရိ စိမိလိကံ ပတ္ထရိတ္ဝာ တသ္သ ဥပရိ တူလံ ပက္ခိပိတ္ဝာတိ အတ္ထော။ ဥပရိ စိမိလိကာယာတိ ဥပရိမဘာဂေ စိမိလိကာယ။
Cimilikaṃpattharitvā tūlaṃ pakkhipitvāti mañcapīṭhānaṃ upari cimilikaṃ pattharitvā tassa upari tūlaṃ pakkhipitvāti attho. Upari cimilikāyāti uparimabhāge cimilikāya.
သီသပ္ပမာဏန္တိ (စူဠဝ. အဋ္ဌ. ၂၉၇; သာရတ္ထ. ဋီ. စူဠဝဂ္ဂ ၃.၂၉၇) ယတ္ထ ဂလဝာဋကတော ပဋ္ဌာယ သဗ္ဗသီသံ ဥပဒဟန္တိ, တံ သီသပ္ပမာဏံ။ တဉ္စ ဥက္ကဋ္ဌပရိစ္ဆေဒတော တိရိယံ မုဋ္ဌိရတနံ ဟောတိ, ဒီဃတော ဒ္ဝိရတနန္တိ ဒသ္သေတုံ ‘‘ယသ္သ ဝိတ္ထာရတော တီသု ကောဏေသူ’’တိအာဒိမာဟ။ ဒ္ဝိန္နံ အန္တရံ ဝိဒတ္ထိ စတုရင္ဂုလံ ဟောတီတိ ဒ္ဝိန္နံ ကောဏာနံ အန္တရံ မိနိယမာနံ ဝိဒတ္ထိ စေဝ စတုရင္ဂုလဉ္စ ဟောတိ။ မဇ္ဈေ မုဋ္ဌိရတနန္တိ ဗိဗ္ဗောဟနသ္သ မဇ္ဈံ တိရိယတော မုဋ္ဌိရတနပ္ပမာဏံ ဟောတိ။ အယဉ္ဟိ သီသပ္ပမာဏသ္သ ဥက္ကဋ္ဌပရိစ္ဆေဒော။ တတော ဥဒ္ဓံ န ဝဋ္ဋတိ, ဟေဋ္ဌာ ဝဋ္ဋတိ။ အဂိလာနသ္သ သီသူပဓာနဉ္စ ပာဒူပဓာနဉ္စာတိ ဒ္ဝယမေဝ ဝဋ္ဋတိ။ ဂိလာနသ္သ ဗိဗ္ဗောဟနာနိ သန္ထရိတ္ဝာ ဥပရိ ပစ္စတ္ထရဏံ ဒတ္ဝာ နိပဇ္ဇိတုမ္ပိ ဝဋ္ဋတိ။
Sīsappamāṇanti (cūḷava. aṭṭha. 297; sārattha. ṭī. cūḷavagga 3.297) yattha galavāṭakato paṭṭhāya sabbasīsaṃ upadahanti, taṃ sīsappamāṇaṃ. Tañca ukkaṭṭhaparicchedato tiriyaṃ muṭṭhiratanaṃ hoti, dīghato dviratananti dassetuṃ ‘‘yassa vitthārato tīsu koṇesū’’tiādimāha. Dvinnaṃ antaraṃ vidatthi caturaṅgulaṃ hotīti dvinnaṃ koṇānaṃ antaraṃ miniyamānaṃ vidatthi ceva caturaṅgulañca hoti. Majjhe muṭṭhiratananti bibbohanassa majjhaṃ tiriyato muṭṭhiratanappamāṇaṃ hoti. Ayañhi sīsappamāṇassa ukkaṭṭhaparicchedo. Tato uddhaṃ na vaṭṭati, heṭṭhā vaṭṭati. Agilānassa sīsūpadhānañca pādūpadhānañcāti dvayameva vaṭṭati. Gilānassa bibbohanāni santharitvā upari paccattharaṇaṃ datvā nipajjitumpi vaṭṭati.
တူလောနဒ္ဓသိက္ခာပဒဝဏ္ဏနာ နိဋ္ဌိတာ။
Tūlonaddhasikkhāpadavaṇṇanā niṭṭhitā.
