| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၅. မာနတ္ထဒ္ဓသုတ္တဝဏ္ဏနာ
5. Mānatthaddhasuttavaṇṇanā
၂၀၁. ပဉ္စမေ မာနတ္ထဒ္ဓောတိ ဝာတဘရိတဘသ္တာ ဝိယ မာနေန ထဒ္ဓော။ အာစရိယန္တိ သိပ္ပုဂ္ဂဟဏကာလေ အာစရိယော အနဘိဝာဒေန္တသ္သ သိပ္ပံ န ဒေတိ, အညသ္မိံ ပန ကာလေ တံ န အဘိဝာဒေတိ, အတ္ထိဘာဝမ္ပိသ္သ န ဇာနာတိ။ နာယံ သမဏောတိ ဧဝံ ကိရသ္သ အဟောသိ – ‘‘ယသ္မာ အယံ သမဏော မာဒိသေ ဇာတိသမ္ပန္နဗ္ရာဟ္မဏေ သမ္ပတ္တေ ပဋိသန္ထာရမတ္တမ္ပိ န ကရောတိ, တသ္မာ န ကိဉ္စိ ဇာနာတီ’’တိ။
201. Pañcame mānatthaddhoti vātabharitabhastā viya mānena thaddho. Ācariyanti sippuggahaṇakāle ācariyo anabhivādentassa sippaṃ na deti, aññasmiṃ pana kāle taṃ na abhivādeti, atthibhāvampissa na jānāti. Nāyaṃ samaṇoti evaṃ kirassa ahosi – ‘‘yasmā ayaṃ samaṇo mādise jātisampannabrāhmaṇe sampatte paṭisanthāramattampi na karoti, tasmā na kiñci jānātī’’ti.
အဗ္ဘုတဝိတ္တဇာတာတိ အဘူတပုဗ္ဗာယ တုဋ္ဌိယာ သမန္နာဂတာ။ ကေသု စသ္သာတိ ကေသု ဘဝေယ္ယ။ က္ယသ္သာတိ ကေ အသ္သ ပုဂ္ဂလသ္သ။ အပစိတာ အသ္သူတိ အပစိတိံ ဒသ္သေတုံ ယုတ္တာ ဘဝေယ္ယုံ။ အရဟန္တေတိ ဣမာယ ဂာထာယ ဒေသနာကုသလတ္တာ အတ္တာနံ အန္တောကတ္ဝာ ပူဇနေယ္ယံ ဒသ္သေတိ။ ပဉ္စမံ။
Abbhutavittajātāti abhūtapubbāya tuṭṭhiyā samannāgatā. Kesu cassāti kesu bhaveyya. Kyassāti ke assa puggalassa. Apacitā assūti apacitiṃ dassetuṃ yuttā bhaveyyuṃ. Arahanteti imāya gāthāya desanākusalattā attānaṃ antokatvā pūjaneyyaṃ dasseti. Pañcamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. မာနတ္ထဒ္ဓသုတ္တံ • 5. Mānatthaddhasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. မာနတ္ထဒ္ဓသုတ္တဝဏ္ဏနာ • 5. Mānatthaddhasuttavaṇṇanā
