| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৮. মনসিকারলক্খণপঞ্হো
8. Manasikāralakkhaṇapañho
৮. রাজা আহ ‘‘কিংলক্খণো, ভন্তে নাগসেন, মনসিকারো, কিংলক্খণা পঞ্ঞা’’তি? ‘‘ঊহনলক্খণো খো, মহারাজ, মনসিকারো, ছেদনলক্খণা পঞ্ঞা’’তি।
8. Rājā āha ‘‘kiṃlakkhaṇo, bhante nāgasena, manasikāro, kiṃlakkhaṇā paññā’’ti? ‘‘Ūhanalakkhaṇo kho, mahārāja, manasikāro, chedanalakkhaṇā paññā’’ti.
‘‘কথং ঊহনলক্খণো মনসিকারো, কথং ছেদনলক্খণা পঞ্ঞা, ওপম্মং করোহী’’তি। ‘‘জানাসি, ত্ৰং মহারাজ, যৰলাৰকে’’তি। ‘‘আম , ভন্তে, জানামী’’তি । ‘‘কথং, মহারাজ, যৰলাৰকা যৰং লুনন্তী’’তি? ‘‘ৰামেন, ভন্তে, হত্থেন যৰকলাপং গহেত্ৰা দক্খিণেন হত্থেন দাত্তং গহেত্ৰা দাত্তেন ছিন্দন্তী’’তি।
‘‘Kathaṃ ūhanalakkhaṇo manasikāro, kathaṃ chedanalakkhaṇā paññā, opammaṃ karohī’’ti. ‘‘Jānāsi, tvaṃ mahārāja, yavalāvake’’ti. ‘‘Āma , bhante, jānāmī’’ti . ‘‘Kathaṃ, mahārāja, yavalāvakā yavaṃ lunantī’’ti? ‘‘Vāmena, bhante, hatthena yavakalāpaṃ gahetvā dakkhiṇena hatthena dāttaṃ gahetvā dāttena chindantī’’ti.
‘‘যথা, মহারাজ, যৰলাৰকো ৰামেন হত্থেন যৰকলাপং গহেত্ৰা দক্খিণেন হত্থেন দাত্তং গহেত্ৰা যৰং ছিন্দতি, এৰমেৰ খো, মহারাজ, যোগাৰচরো মনসিকারেন মানসং গহেত্ৰা পঞ্ঞায কিলেসে ছিন্দতি, এৰং খো, মহারাজ, ঊহনলক্খণো মনসিকারো, এৰং ছেদনলক্খণা পঞ্ঞা’’তি।
‘‘Yathā, mahārāja, yavalāvako vāmena hatthena yavakalāpaṃ gahetvā dakkhiṇena hatthena dāttaṃ gahetvā yavaṃ chindati, evameva kho, mahārāja, yogāvacaro manasikārena mānasaṃ gahetvā paññāya kilese chindati, evaṃ kho, mahārāja, ūhanalakkhaṇo manasikāro, evaṃ chedanalakkhaṇā paññā’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
মনসিকারলক্খণপঞ্হো অট্ঠমো।
Manasikāralakkhaṇapañho aṭṭhamo.
