| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৩.মক্খপরিঞ্ঞাসুত্তং
3.Makkhapariññāsuttaṃ
১৩. ৰুত্তঞ্হেতং ভগৰতা, ৰুত্তমরহতাতি মে সুতং –
13. Vuttañhetaṃ bhagavatā, vuttamarahatāti me sutaṃ –
‘‘মক্খং, ভিক্খৰে, অনভিজানং অপরিজানং তত্থ চিত্তং অৰিরাজযং অপ্পজহং অভব্বো দুক্খক্খযায। মক্খঞ্চ খো, ভিক্খৰে, অভিজানং পরিজানং তত্থ চিত্তং ৰিরাজযং পজহং ভব্বো দুক্খক্খযাযা’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Makkhaṃ, bhikkhave, anabhijānaṃ aparijānaṃ tattha cittaṃ avirājayaṃ appajahaṃ abhabbo dukkhakkhayāya. Makkhañca kho, bhikkhave, abhijānaṃ parijānaṃ tattha cittaṃ virājayaṃ pajahaṃ bhabbo dukkhakkhayāyā’’ti. Etamatthaṃ bhagavā avoca. Tatthetaṃ iti vuccati –
‘‘যেন মক্খেন মক্খাসে, সত্তা গচ্ছন্তি দুগ্গতিং।
‘‘Yena makkhena makkhāse, sattā gacchanti duggatiṃ;
তং মক্খং সম্মদঞ্ঞায, পজহন্তি ৰিপস্সিনো।
Taṃ makkhaṃ sammadaññāya, pajahanti vipassino;
পহায ন পুনাযন্তি, ইমং লোকং কুদাচন’’ন্তি॥
Pahāya na punāyanti, imaṃ lokaṃ kudācana’’nti.
অযম্পি অত্থো ৰুত্তো ভগৰতা, ইতি মে সুতন্তি। ততিযং।
Ayampi attho vutto bhagavatā, iti me sutanti. Tatiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ১-৩. মোহপরিঞ্ঞাদিসুত্তৰণ্ণনা • 1-3. Mohapariññādisuttavaṇṇanā
