| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೧೦. ಮಕ್ಕಟಙ್ಗಪಞ್ಹೋ
10. Makkaṭaṅgapañho
೧೦. ‘‘ಭನ್ತೇ ನಾಗಸೇನ, ‘ಮಕ್ಕಟಸ್ಸ ದ್ವೇ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ದ್ವೇ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಮಕ್ಕಟೋ ವಾಸಮುಪಗಚ್ಛನ್ತೋ ತಥಾರೂಪೇ ಓಕಾಸೇ ಮಹತಿಮಹಾರುಕ್ಖೇ ಪವಿವಿತ್ತೇ ಸಬ್ಬಟ್ಠಕಸಾಖೇ 1 ಭೀರುತ್ತಾಣೇ ವಾಸಮುಪಗಚ್ಛತಿ, ಏವಮೇವ ಖೋ, ಮಹಾರಾಜ , ಯೋಗಿನಾ ಯೋಗಾವಚರೇನ ಲಜ್ಜಿಂ ಪೇಸಲಂ ಸೀಲವನ್ತಂ ಕಲ್ಯಾಣಧಮ್ಮಂ ಬಹುಸ್ಸುತಂ ಧಮ್ಮಧರಂ ವಿನಯಧರಂ ಪಿಯಂ ಗರುಭಾವನೀಯಂ ವತ್ತಾರಂ ವಚನಕ್ಖಮಂ ಓವಾದಕಂ ವಿಞ್ಞಾಪಕಂ ಸನ್ದಸ್ಸಕಂ ಸಮಾದಪಕಂ ಸಮುತ್ತೇಜಕಂ ಸಮ್ಪಹಂಸಕಂ ಏವರೂಪಂ ಕಲ್ಯಾಣಮಿತ್ತಂ ಆಚರಿಯಂ ನಿಸ್ಸಾಯ ವಿಹರಿತಬ್ಬಂ। ಇದಂ, ಮಹಾರಾಜ, ಮಕ್ಕಟಸ್ಸ ಪಠಮಂ ಅಙ್ಗಂ ಗಹೇತಬ್ಬಂ।
10. ‘‘Bhante nāgasena, ‘makkaṭassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, makkaṭo vāsamupagacchanto tathārūpe okāse mahatimahārukkhe pavivitte sabbaṭṭhakasākhe 2 bhīruttāṇe vāsamupagacchati, evameva kho, mahārāja , yoginā yogāvacarena lajjiṃ pesalaṃ sīlavantaṃ kalyāṇadhammaṃ bahussutaṃ dhammadharaṃ vinayadharaṃ piyaṃ garubhāvanīyaṃ vattāraṃ vacanakkhamaṃ ovādakaṃ viññāpakaṃ sandassakaṃ samādapakaṃ samuttejakaṃ sampahaṃsakaṃ evarūpaṃ kalyāṇamittaṃ ācariyaṃ nissāya viharitabbaṃ. Idaṃ, mahārāja, makkaṭassa paṭhamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಮಕ್ಕಟೋ ರುಕ್ಖೇ ಯೇವ ಚರತಿ ತಿಟ್ಠತಿ ನಿಸೀದತಿ, ಯದಿ ನಿದ್ದಂ ಓಕ್ಕಮತಿ, ತತ್ಥೇವ ರತ್ತಿಂ ವಾಸಮನುಭವತಿ। ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಪವನಾಭಿಮುಖೇನ ಭವಿತಬ್ಬಂ, ಪವನೇ ಯೇವ ಠಾನಚಙ್ಕಮನಿಸಜ್ಜಾಸಯನಂ ನಿದ್ದಂ ಓಕ್ಕಮಿತಬ್ಬಂ, ತತ್ಥೇವ ಸತಿಪಟ್ಠಾನಮನುಭವಿತಬ್ಬಂ। ಇದಂ, ಮಹಾರಾಜ, ಮಕ್ಕಟಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಸಾರಿಪುತ್ತೇನ ಧಮ್ಮಸೇನಾಪತಿನಾ –
‘‘Puna caparaṃ, mahārāja, makkaṭo rukkhe yeva carati tiṭṭhati nisīdati, yadi niddaṃ okkamati, tattheva rattiṃ vāsamanubhavati. Evameva kho, mahārāja, yoginā yogāvacarena pavanābhimukhena bhavitabbaṃ, pavane yeva ṭhānacaṅkamanisajjāsayanaṃ niddaṃ okkamitabbaṃ, tattheva satipaṭṭhānamanubhavitabbaṃ. Idaṃ, mahārāja, makkaṭassa dutiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘ಚಙ್ಕಮನ್ತೋಪಿ ತಿಟ್ಠನ್ತೋ, ನಿಸಜ್ಜಾಸಯನೇನ ವಾ।
‘‘‘Caṅkamantopi tiṭṭhanto, nisajjāsayanena vā;
ಪವನೇ ಸೋಭತೇ ಭಿಕ್ಖು, ಪವನನ್ತಂವ ವಣ್ಣಿತ’’’ನ್ತಿ॥
Pavane sobhate bhikkhu, pavanantaṃva vaṇṇita’’’nti.
ಮಕ್ಕಟಙ್ಗಪಞ್ಹೋ ದಸಮೋ।
Makkaṭaṅgapañho dasamo.
ಗದ್ರಭವಗ್ಗೋ ಪಠಮೋ।
Gadrabhavaggo paṭhamo.
ತಸ್ಸುದ್ದಾನಂ –
Tassuddānaṃ –
ಕುಮ್ಮೋ ವಂಸೋ ಚ ಚಾಪೋ ಚ, ವಾಯಸೋ ಅಥ ಮಕ್ಕಟೋತಿ॥
Kummo vaṃso ca cāpo ca, vāyaso atha makkaṭoti.
Footnotes:
