| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೨. ಸಮುದ್ದವಗ್ಗೋ
2. Samuddavaggo
೧. ಲಾಬುಲತಙ್ಗಪಞ್ಹೋ
1. Lābulataṅgapañho
೧. ‘‘ಭನ್ತೇ ನಾಗಸೇನ, ‘ಲಾಬುಲತಾಯ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ಲಾಬುಲತಾ ತಿಣೇ ವಾ ಕಟ್ಠೇ ವಾ ಲತಾಯ ವಾ ಸೋಣ್ಡಿಕಾಹಿ ಆಲಮ್ಬಿತ್ವಾ ತಸ್ಸೂಪರಿ ವಡ್ಢತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಅರಹತ್ತೇ ಅಭಿವಡ್ಢಿತುಕಾಮೇನ ಮನಸಾ ಆರಮ್ಮಣಂ ಆಲಮ್ಬಿತ್ವಾ ಅರಹತ್ತೇ ಅಭಿವಡ್ಢಿತಬ್ಬಂ। ಇದಂ, ಮಹಾರಾಜ, ಲಾಬುಲತಾಯ ಏಕಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಸಾರಿಪುತ್ತೇನ ಧಮ್ಮಸೇನಾಪತಿನಾ –
1. ‘‘Bhante nāgasena, ‘lābulatāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, lābulatā tiṇe vā kaṭṭhe vā latāya vā soṇḍikāhi ālambitvā tassūpari vaḍḍhati, evameva kho, mahārāja, yoginā yogāvacarena arahatte abhivaḍḍhitukāmena manasā ārammaṇaṃ ālambitvā arahatte abhivaḍḍhitabbaṃ. Idaṃ, mahārāja, lābulatāya ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘ಯಥಾ ಲಾಬುಲತಾ ನಾಮ, ತಿಣೇ ಕಟ್ಠೇ ಲತಾಯ ವಾ।
‘‘‘Yathā lābulatā nāma, tiṇe kaṭṭhe latāya vā;
ಆಲಮ್ಬಿತ್ವಾ ಸೋಣ್ಡಿಕಾಹಿ, ತತೋ ವಡ್ಢತಿ ಉಪ್ಪರಿ॥
Ālambitvā soṇḍikāhi, tato vaḍḍhati uppari.
‘‘‘ತಥೇವ ಬುದ್ಧಪುತ್ತೇನ, ಅರಹತ್ತಫಲಕಾಮಿನಾ।
‘‘‘Tatheva buddhaputtena, arahattaphalakāminā;
ಆರಮ್ಮಣಂ ಆಲಮ್ಬಿತ್ವಾ, ವಡ್ಢಿತಬ್ಬಂ ಅಸೇಕ್ಖಫಲೇ’’’ತಿ॥
Ārammaṇaṃ ālambitvā, vaḍḍhitabbaṃ asekkhaphale’’’ti.
ಲಾಬುಲತಙ್ಗಪಞ್ಹೋ ಪಠಮೋ।
Lābulataṅgapañho paṭhamo.
