| Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi |
๕. มหิํสราชจริยา
5. Mahiṃsarājacariyā
๓๗.
37.
‘‘ปุนาปรํ ยทา โหมิ, มหิํโส ปวนจารโก;
‘‘Punāparaṃ yadā homi, mahiṃso pavanacārako;
ปวฑฺฒกาโย พลวา, มหโนฺต ภีมทสฺสโนฯ
Pavaḍḍhakāyo balavā, mahanto bhīmadassano.
๓๘.
38.
โหเตตฺถ ฐานํ มหิํสานํ, โกจิ โกจิ ตหิํ ตหิํฯ
Hotettha ṭhānaṃ mahiṃsānaṃ, koci koci tahiṃ tahiṃ.
๓๙.
39.
‘‘วิจรโนฺต พฺรหารเญฺญ, ฐานํ อทฺทส ภทฺทกํ;
‘‘Vicaranto brahāraññe, ṭhānaṃ addasa bhaddakaṃ;
ตํ ฐานํ อุปคนฺตฺวาน, ติฎฺฐามิ จ สยามิ จฯ
Taṃ ṭhānaṃ upagantvāna, tiṭṭhāmi ca sayāmi ca.
๔๐.
40.
‘‘อเถตฺถ กปิมาคนฺตฺวา, ปาโป อนริโย ลหุ;
‘‘Athettha kapimāgantvā, pāpo anariyo lahu;
ขเนฺธ นลาเฎ ภมุเก, มุเตฺตติ โอหเนติตํฯ
Khandhe nalāṭe bhamuke, mutteti ohanetitaṃ.
๔๑.
41.
‘‘สกิมฺปิ ทิวสํ ทุติยํ, ตติยํ จตุตฺถมฺปิ จ;
‘‘Sakimpi divasaṃ dutiyaṃ, tatiyaṃ catutthampi ca;
ทูเสติ มํ สพฺพกาลํ, เตน โหมิ อุปทฺทุโตฯ
Dūseti maṃ sabbakālaṃ, tena homi upadduto.
๔๒.
42.
‘‘มมํ อุปทฺทุตํ ทิสฺวา, ยโกฺข มํ อิทมพฺรวิ;
‘‘Mamaṃ upaddutaṃ disvā, yakkho maṃ idamabravi;
‘นาเสเหตํ ฉวํ ปาปํ, สิเงฺคหิ จ ขุเรหิ จ’ฯ
‘Nāsehetaṃ chavaṃ pāpaṃ, siṅgehi ca khurehi ca’.
๔๓.
43.
‘‘เอวํ วุเตฺต ตทา ยเกฺข, อหํ ตํ อิทมพฺรวิํ;
‘‘Evaṃ vutte tadā yakkhe, ahaṃ taṃ idamabraviṃ;
‘กิํ ตฺวํ มเกฺขสิ กุณเปน, ปาเปน อนริเยน มํฯ
‘Kiṃ tvaṃ makkhesi kuṇapena, pāpena anariyena maṃ.
๔๔.
44.
‘‘‘ยทิหํ ตสฺส ปกุเปฺปยฺยํ, ตโต หีนตโร ภเว;
‘‘‘Yadihaṃ tassa pakuppeyyaṃ, tato hīnataro bhave;
สีลญฺจ เม ปภิเชฺชยฺย, วิญฺญู จ ครเหยฺยุ มํฯ
Sīlañca me pabhijjeyya, viññū ca garaheyyu maṃ.
๔๕.
45.
‘‘‘หีฬิตา ชีวิตา วาปิ, ปริสุเทฺธน มตํ วรํ;
‘‘‘Hīḷitā jīvitā vāpi, parisuddhena mataṃ varaṃ;
กฺยาหํ ชีวิตเหตูปิ, กาหามิํ ปรเหฐนํ’ฯ
Kyāhaṃ jīvitahetūpi, kāhāmiṃ paraheṭhanaṃ’.
๔๖.
46.
‘‘มเมวายํ มญฺญมาโน, อเญฺญเปวํ กริสฺสติ;
‘‘Mamevāyaṃ maññamāno, aññepevaṃ karissati;
เตว ตสฺส วธิสฺสนฺติ, สา เม มุตฺติ ภวิสฺสติฯ
Teva tassa vadhissanti, sā me mutti bhavissati.
๔๗.
47.
‘‘หีนมชฺฌิมอุกฺกเฎฺฐ, สหโนฺต อวมานิตํ;
‘‘Hīnamajjhimaukkaṭṭhe, sahanto avamānitaṃ;
เอวํ ลภติ สปฺปโญฺญ, มนสา ยถา ปตฺถิต’’นฺติฯ
Evaṃ labhati sappañño, manasā yathā patthita’’nti.
มหิํสราชจริยํ ปญฺจมํฯ
Mahiṃsarājacariyaṃ pañcamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๕. มหิํสราชจริยาวณฺณนา • 5. Mahiṃsarājacariyāvaṇṇanā
