| Library / Tipiṭaka / ཏིཔིཊཀ • Tipiṭaka / ཝིནཡཝིནིཙྪཡ-ཊཱིཀཱ • Vinayavinicchaya-ṭīkā |
མཧཱཝིབྷངྒསངྒཧཀཐཱཝཎྞནཱ
Mahāvibhaṅgasaṅgahakathāvaṇṇanā
༤. ཨེཝཾ སོཏུཛནཾ སཝནེ ནིཡོཛེཏྭཱ ཡཐཱཔཊིཉྙཱཏཾ ཨུཏྟརཝིནིཙྪཡཾ དསྶེཏུམཱཧ ‘‘མེཐུན’’ནྟིཨཱདི། ‘‘ཀཏི ཨཱཔཏྟིཡོ’’ཏི ཨཡཾ དིཊྛསཾསནྡནཱ, ཨདིཊྛཛོཏནཱ, ཝིམཏིཙྪེདནཱ, ཨནུམཏི, ཀཐེཏུཀམྱཏཱཔུཙྪཱཏི པཉྩནྣཾ པུཙྪཱནཾ ཀཐེཏུཀམྱཏཱཔུཙྪཱ། ཏིསྶོ ཨཱཔཏྟིཡོ ཕུསེཏི ཏསྶཱ སངྑེཔཏོ ཝིསྶཛྫནཾ།
4. Evaṃ sotujanaṃ savane niyojetvā yathāpaṭiññātaṃ uttaravinicchayaṃ dassetumāha ‘‘methuna’’ntiādi. ‘‘Kati āpattiyo’’ti ayaṃ diṭṭhasaṃsandanā, adiṭṭhajotanā, vimaticchedanā, anumati, kathetukamyatāpucchāti pañcannaṃ pucchānaṃ kathetukamyatāpucchā. Tisso āpattiyo phuseti tassā saṅkhepato vissajjanaṃ.
༥. ཨེཝཾ གཎནཱཝསེན དསྶིཏཱནཾ ‘‘བྷཝེ’’ཏིཨཱདི སརཱུཔཏོ དསྶནཾ། ཁེཏྟེཏི ཏིཎྞཾ མགྒཱནཾ ཨཉྙཏརསྨིཾ ཨལློཀཱསེ ཏིལབཱིཛམཏྟེཔི པདེསེ། མེཐུནཾ པཊིསེཝནྟསྶ པཱརཱཛིཀཾ བྷཝེཏི སམྦནྡྷོ། ‘‘ཐུལླཙྩཡ’’ནྟི ཝུཏྟནྟི ཡོཛནཱ། ‘‘ཡེབྷུཡྻཀྑཱཡིཏེ’’ཏི ཨིདཾ ནིདསྶནམཏྟཾ, ཨུཔཌྜྷཀྑཱཡིཏེཔི ཐུལླཙྩཡསྶ ཧེཊྛཱ ཝུཏྟཏྟཱ། ཝཊྚཀཏེ མུཁེ ཨཕུསནྟཾ ཨངྒཛཱཏཾ པཝེསེནྟསྶ དུཀྐཊཾ ཝུཏྟནྟི ཡོཛནཱ།
5. Evaṃ gaṇanāvasena dassitānaṃ ‘‘bhave’’tiādi sarūpato dassanaṃ. Khetteti tiṇṇaṃ maggānaṃ aññatarasmiṃ allokāse tilabījamattepi padese. Methunaṃ paṭisevantassa pārājikaṃ bhaveti sambandho. ‘‘Thullaccaya’’nti vuttanti yojanā. ‘‘Yebhuyyakkhāyite’’ti idaṃ nidassanamattaṃ, upaḍḍhakkhāyitepi thullaccayassa heṭṭhā vuttattā. Vaṭṭakate mukhe aphusantaṃ aṅgajātaṃ pavesentassa dukkaṭaṃ vuttanti yojanā.
༦. ‘‘ཨདིནྣཾ ཨཱདིཡནྟོ’’ཏིཨཱདཡོཔི ཝུཏྟནཡཱཡེཝ།
6.‘‘Adinnaṃādiyanto’’tiādayopi vuttanayāyeva.
༧. པཉྩམཱསགྒྷནེ ཝཱཔཱིཏི པོརཱཎཀསྶ ནཱིལཀཧཱཔཎསྶ ཙཏུཏྠབྷཱགསངྑཱཏེ པཉྩམཱསེ, ཏདགྒྷནཀེ ཝཱ། ཨདྷིཀེ ཝཱཏི ཨཏིརེཀཔཉྩམཱསཀེ ཝཱ ཏདགྒྷནཀེ ཝཱ། ཨདིནྣེ པཉྩཝཱིསཏིཡཱ ཨཝཧཱརཱནཾ ཨཉྙཏརེན ཨཝཧཊེ པརཱཛཡོ ཧོཏཱིཏི ཨཏྠོ། མཱསེ ཝཱ ཨཱུནམཱསེ ཝཱ ཏདགྒྷནཀེ ཝཱ དུཀྐཊཾ། ཏཏོ མཛ྄ཛྷེཏི པཉྩམཱསཀཏོ མཛ྄ཛྷེ། པཉྩ མཱསཱ སམཱཧཊཱ, པཉྩནྣཾ མཱསཱནཾ སམཱཧཱརོཏི ཝཱ པཉྩམཱསཾ, པཉྩམཱསཾ ཨགྒྷཏཱིཏི པཉྩམཱསགྒྷནཾ, པཉྩམཱསཉྩ པཉྩམཱསགྒྷནཉྩ པཉྩམཱསགྒྷནཾ, ཨེཀདེསསརཱུཔེཀསེསོཡཾ, ཏསྨིཾ། མཱསེ ཝཱཏི ཨེཏྠཱཔི མཱསོ ཙ མཱསགྒྷནཀཉྩ མཱསམཱསགྒྷནཀོཏི ཝཏྟབྦེ ‘‘མཱསེ’’ཏི ཨེཀདེསསརཱུཔེཀསེསོ, ཨུཏྟརཔདལོཔོ ཙ དཊྛབྦོ།
7.Pañcamāsagghane vāpīti porāṇakassa nīlakahāpaṇassa catutthabhāgasaṅkhāte pañcamāse, tadagghanake vā. Adhike vāti atirekapañcamāsake vā tadagghanake vā. Adinne pañcavīsatiyā avahārānaṃ aññatarena avahaṭe parājayo hotīti attho. Māse vā ūnamāse vā tadagghanake vā dukkaṭaṃ. Tato majjheti pañcamāsakato majjhe. Pañca māsā samāhaṭā, pañcannaṃ māsānaṃ samāhāroti vā pañcamāsaṃ, pañcamāsaṃ agghatīti pañcamāsagghanaṃ, pañcamāsañca pañcamāsagghanañca pañcamāsagghanaṃ, ekadesasarūpekasesoyaṃ, tasmiṃ. Māse vāti etthāpi māso ca māsagghanakañca māsamāsagghanakoti vattabbe ‘‘māse’’ti ekadesasarūpekaseso, uttarapadalopo ca daṭṭhabbo.
‘‘པཉྩམཱསགྒྷནེ’’ཏི སཱམཉྙེན ཝུཏྟེཔི པོརཱཎཀསྶ ནཱིལཀཧཱཔཎསྶེཝ ཙཏུཏྠབྷཱགཝསེན པཉྩམཱསནིཡམོ ཀཱཏབྦོ། ཏཐཱ ཧི བྷགཝཏཱ དུཏིཡཔཱརཱཛིཀཾ པཉྙཱཔེནྟེན བྷིཀྑཱུསུ པབྦཛིཏཾ པུརཱཎཝོཧཱརིཀམཧཱམཏྟཾ བྷིཀྑུཾ ‘‘ཀིཏྟཀེན ཝཏྠུནཱ རཱཛཱ མཱགདྷོ སེནིཡོ བིམྦིསཱརོ ཙོརཾ གཧེཏྭཱ ཧནཏི ཝཱ བནྡྷཏི ཝཱ པབྦཱཛེཏི ཝཱ’’ཏི པུཙྪིཏྭཱ ཏེན ‘‘པཱདེན ཝཱ པཱདཱརཧེན ཝཱ’’ཏི ཝུཏྟེ ཏེནེཝ པམཱཎེན ཨདིནྣཾ ཨཱདིཡནྟསྶ པཉྙཏྟཾ། ཨཊྛཀཐཱཡཉྩ –
‘‘Pañcamāsagghane’’ti sāmaññena vuttepi porāṇakassa nīlakahāpaṇasseva catutthabhāgavasena pañcamāsaniyamo kātabbo. Tathā hi bhagavatā dutiyapārājikaṃ paññāpentena bhikkhūsu pabbajitaṃ purāṇavohārikamahāmattaṃ bhikkhuṃ ‘‘kittakena vatthunā rājā māgadho seniyo bimbisāro coraṃ gahetvā hanati vā bandhati vā pabbājeti vā’’ti pucchitvā tena ‘‘pādena vā pādārahena vā’’ti vutte teneva pamāṇena adinnaṃ ādiyantassa paññattaṃ. Aṭṭhakathāyañca –
‘‘པཉྩམཱསཀོ པཱདོཏི པཱལི༹ཾ ཨུལླིངྒིཏྭཱ ‘ཏདཱ རཱཛགཧེ ཝཱིསཏིམཱསཀོ ཀཧཱཔཎོ ཧོཏི, ཏསྨཱ པཉྩམཱསཀོ པཱདོ’། ཨེཏེན ལཀྑཎེན སབྦཛནཔདེསུ ཀཧཱཔཎསྶ ཙཏུཏྠོ བྷཱགོ ‘པཱདོ’ཏི ཝེདིཏབྦོ། སོ ཙ ཁོ པོརཱཎཀསྶ ནཱིལཀཧཱཔཎསྶ ཝསེན, ན ཨིཏརེསཾ དུདྲདཱམཀཱདཱིནཾ། ཏེན ཧི པཱདེན ཨཏཱིཏཱ བུདྡྷཱཔི པཱརཱཛིཀཾ པཉྙཔེསུཾ, ཨནཱགཏཱཔི པཉྙཔེསྶནྟི། སབྦབུདྡྷཱནཉྷི པཱརཱཛིཀཝཏྠུམྷི ཝཱ པཱརཱཛིཀེ ཝཱ ནཱནཏྟཾ ནཏྠི, ཨིམཱནེཝ ཙཏྟཱརི པཱརཱཛིཀཝཏྠཱུནི, ཨིམཱནེཝ ཙཏྟཱརི པཱརཱཛིཀཱནི, ཨིཏོ ཨཱུནཾ ཝཱ ཨཏིརེཀཾ ཝཱ ནཏྠི། ཏསྨཱ བྷགཝཱཔི དྷནིཡཾ ཝིགརཧིཏྭཱ པཱདེནེཝ དུཏིཡཔཱརཱཛིཀཾ པཉྙཔེནྟོ ‘ཡོ པན བྷིཀྑུ ཨདིནྣཾ ཐེཡྻསངྑཱཏ’ནྟིཨཱདིམཱཧཱ’’ཏི (པཱརཱ॰ ཨཊྛ॰ ༡.༨༨) ཝུཏྟཾ།
‘‘Pañcamāsako pādoti pāḷiṃ ulliṅgitvā ‘tadā rājagahe vīsatimāsako kahāpaṇo hoti, tasmā pañcamāsako pādo’. Etena lakkhaṇena sabbajanapadesu kahāpaṇassa catuttho bhāgo ‘pādo’ti veditabbo. So ca kho porāṇakassa nīlakahāpaṇassa vasena, na itaresaṃ dudradāmakādīnaṃ. Tena hi pādena atītā buddhāpi pārājikaṃ paññapesuṃ, anāgatāpi paññapessanti. Sabbabuddhānañhi pārājikavatthumhi vā pārājike vā nānattaṃ natthi, imāneva cattāri pārājikavatthūni, imāneva cattāri pārājikāni, ito ūnaṃ vā atirekaṃ vā natthi. Tasmā bhagavāpi dhaniyaṃ vigarahitvā pādeneva dutiyapārājikaṃ paññapento ‘yo pana bhikkhu adinnaṃ theyyasaṅkhāta’ntiādimāhā’’ti (pārā. aṭṭha. 1.88) vuttaṃ.
སཱརཏྠདཱིཔནིཡཉྩ –
Sāratthadīpaniyañca –
‘‘ཙཏུཏྠོ བྷཱགོ པཱདོཏི ཝེདིཏབྦོཏི ཨིམིནཱཝ སབྦཛནཔདེསུ ཀཧཱཔཎསྶེཝ ཝཱིསཏིམོ བྷཱགོམཱསཀོཏི ཨིདཉྩ ཝུཏྟམེཝ ཧོཏཱིཏི དཊྛབྦཾ། པོརཱཎསཏྠཱནུརཱུཔཾ ལཀྑཎསམྤནྣཱ ཨུཔྤཱདིཏཱ ནཱིལཀཧཱཔཎཱཏི ཝེདིཏབྦཱ། དུདྲདཱམེན ཨུཔྤཱདིཏོ དུདྲདཱམཀོ། སོ ཀིར ནཱིལཀཧཱཔཎསྶ ཏིབྷཱགཾ ཨགྒྷཏཱི’ཏི ཝཏྭཱ ‘ཡསྨིཾ པདེསེ ནཱིལཀཧཱཔཎཱ ན སནྟི, ཏཏྠཱཔི ནཱིལཀཧཱཔཎཝསེནེཝ པརིཙྪེདོ ཀཱཏབྦོ། ཀཐཾ? ནཱིལཀཧཱཔཎཱནཾ ཝལ༹ཉྫནཊྛཱནེ ཙ ཨཝལ༹ཉྫནཊྛཱནེ ཙ སམཱནཨགྒྷཝསེན པཝཏྟམཱནཾ བྷཎྜཾ ནཱིལཀཧཱཔཎེན སམཱནགྒྷཾ གཧེཏྭཱ ཏསྶ ཙཏུཏྠབྷཱགགྒྷནཀཾ ནཱིལཀཧཱཔཎསྶ པཱདགྒྷནཀནྟི པརིཙྪིནྡིཏྭཱ ཝིནིཙྪཡོ ཀཱཏབྦོ’’ཏི (སཱརཏྠ॰ ཊཱི॰ ༢.༨༨) ཨཡམཏྠོཝ ཝུཏྟོ།
‘‘Catuttho bhāgo pādoti veditabboti imināva sabbajanapadesu kahāpaṇasseva vīsatimo bhāgomāsakoti idañca vuttameva hotīti daṭṭhabbaṃ. Porāṇasatthānurūpaṃ lakkhaṇasampannā uppāditā nīlakahāpaṇāti veditabbā. Dudradāmena uppādito dudradāmako. So kira nīlakahāpaṇassa tibhāgaṃ agghatī’ti vatvā ‘yasmiṃ padese nīlakahāpaṇā na santi, tatthāpi nīlakahāpaṇavaseneva paricchedo kātabbo. Kathaṃ? Nīlakahāpaṇānaṃ vaḷañjanaṭṭhāne ca avaḷañjanaṭṭhāne ca samānaagghavasena pavattamānaṃ bhaṇḍaṃ nīlakahāpaṇena samānagghaṃ gahetvā tassa catutthabhāgagghanakaṃ nīlakahāpaṇassa pādagghanakanti paricchinditvā vinicchayo kātabbo’’ti (sārattha. ṭī. 2.88) ayamatthova vutto.
ཨེཏྠ ཀཧཱཔཎཾ ནཱམ ཀརོནྟཱ སུཝཎྞེནཔི ཀརོནྟི རཛཏེནཔི ཏམྦེནཔི སུཝཎྞརཛཏཏམྦམིསྶཀེནཔི ། ཏེསུ ཀཏརཾ ཀཧཱཔཎཾ ནཱིལཀཧཱཔཎནྟི? ཀེཙི ཏཱཝ ‘‘སུཝཎྞཀཧཱཔཎ’’ནྟི། ཀེཙི ‘‘མིསྶཀཀཧཱཔཎ’’ནྟི། ཏཏྠ ‘‘སུཝཎྞཀཧཱཔཎ’’ནྟི ཝདནྟཱནཾ ཨཡམདྷིཔྤཱཡོ – པཱརཱཛིཀཝཏྠུནཱ པཱདེན སབྦཏྠ ཨེཀལཀྑཎེན བྷཝིཏབྦཾ, ཀཱལདེསཔརིབྷོགཱདིཝསེན ཨགྒྷནཱནཏྟཾ པཱདསྶེཝ བྷཝིཏབྦཾ། བྷགཝཏཱ ཧི དྷམྨིཀརཱཛཱུཧི ཧནནབནྡྷནཔབྦཱཛནཱནུརཱུཔེནེཝ ཨདིནྣཱདཱནེ པཱརཱཛིཀཾ པཉྙཏྟཾ, ན ཨིཏརཐཱ། ཏསྨཱ ཨེསཱ སབྦདཱ སབྦཏྠ ཨབྱབྷིཙཱརཱིཏི སུཝཎྞམཡསྶ ཀཧཱཔཎསྶ ཙཏུཏྠེན པཱདེན བྷཝིཏབྦནྟི།
Ettha kahāpaṇaṃ nāma karontā suvaṇṇenapi karonti rajatenapi tambenapi suvaṇṇarajatatambamissakenapi . Tesu kataraṃ kahāpaṇaṃ nīlakahāpaṇanti? Keci tāva ‘‘suvaṇṇakahāpaṇa’’nti. Keci ‘‘missakakahāpaṇa’’nti. Tattha ‘‘suvaṇṇakahāpaṇa’’nti vadantānaṃ ayamadhippāyo – pārājikavatthunā pādena sabbattha ekalakkhaṇena bhavitabbaṃ, kāladesaparibhogādivasena agghanānattaṃ pādasseva bhavitabbaṃ. Bhagavatā hi dhammikarājūhi hananabandhanapabbājanānurūpeneva adinnādāne pārājikaṃ paññattaṃ, na itarathā. Tasmā esā sabbadā sabbattha abyabhicārīti suvaṇṇamayassa kahāpaṇassa catutthena pādena bhavitabbanti.
‘‘མིསྶཀཀཧཱཔཎ’’ནྟི ཝདནྟཱནཾ པན ཨཡམདྷིཔྤཱཡོ –
‘‘Missakakahāpaṇa’’nti vadantānaṃ pana ayamadhippāyo –
ཨཊྛཀཐཱཡཾ –
Aṭṭhakathāyaṃ –
‘‘ཏདཱ རཱཛགཧེ ཝཱིསཏིམཱསཀོ ཀཧཱཔཎོ ཧོཏི, ཏསྨཱ པཉྩམཱསཀོ པཱདོ། ཨེཏེན ལཀྑཎེན སབྦཛནཔདེསུ ཀཧཱཔཎསྶ ཙཏུཏྠོ བྷཱགོ ‘པཱདོ’ཏི ཝེདིཏབྦོ། སོ ཙ ཁོ པོརཱཎཀསྶ ནཱིལཀཧཱཔཎསྶ ཝསེན, ན ཨིཏརེསཾ དུདྲདཱམཀཱདཱིན’’ནྟི (པཱརཱ॰ ཨཊྛ॰ ༡.༨༨) –
‘‘Tadā rājagahe vīsatimāsako kahāpaṇo hoti, tasmā pañcamāsako pādo. Etena lakkhaṇena sabbajanapadesu kahāpaṇassa catuttho bhāgo ‘pādo’ti veditabbo. So ca kho porāṇakassa nīlakahāpaṇassa vasena, na itaresaṃ dudradāmakādīna’’nti (pārā. aṭṭha. 1.88) –
ཝུཏྟཏྟཱ, སཱརཏྠདཱིཔནིཡཉྩ –
Vuttattā, sāratthadīpaniyañca –
‘‘པོརཱཎསཏྠཱནུརཱུཔཾ ལཀྑཎསམྤནྣཱ ཨུཔྤཱདིཏཱ ནཱིལཀཧཱཔཎཱཏི ཝེདིཏབྦཱ’’ཏི (སཱརཏྠ॰ ཊཱི॰ ༢.༨༨) –
‘‘Porāṇasatthānurūpaṃ lakkhaṇasampannā uppāditā nīlakahāpaṇāti veditabbā’’ti (sārattha. ṭī. 2.88) –
ཝུཏྟཏྟཱ ཙ ‘‘ཝིནཡཝིནིཙྪཡཾ པཏྭཱ གརུཀེ ཋཱཏབྦ’’ནྟི ཝཙནཏོ ཙ མིསྶཀཀཧཱཔཎོཡེཝ ནཱིལཀཧཱཔཎོ། ཏཏྠེཝ ཧི པོརཱཎསཏྠཝིཧིཏཾ ལཀྑཎཾ དིསྶཏི། ཀཐཾ? པཉྩ མཱསཱ སུཝཎྞསྶ, ཏཐཱ རཛཏསྶ, དས མཱསཱ ཏམྦསྶཱཏི ཨེཏེ ཝཱིསཏི མཱསེ མིསྶེཏྭཱ བནྡྷནཏྠཱཡ ཝཱིཧིམཏྟཾ ལོཧཾ པཀྑིཔིཏྭཱ ཨཀྑརཱནི ཙ ཧཏྠིཨཱདཱིནམཉྙཏརཉྩ རཱུཔཾ དསྶེཏྭཱ ཀཏོ ནིདྡོསཏྟཱ ནཱིལཀཧཱཔཎོ ནཱམ ཧོཏཱིཏི།
Vuttattā ca ‘‘vinayavinicchayaṃ patvā garuke ṭhātabba’’nti vacanato ca missakakahāpaṇoyeva nīlakahāpaṇo. Tattheva hi porāṇasatthavihitaṃ lakkhaṇaṃ dissati. Kathaṃ? Pañca māsā suvaṇṇassa, tathā rajatassa, dasa māsā tambassāti ete vīsati māse missetvā bandhanatthāya vīhimattaṃ lohaṃ pakkhipitvā akkharāni ca hatthiādīnamaññatarañca rūpaṃ dassetvā kato niddosattā nīlakahāpaṇo nāma hotīti.
སིཀྑཱབྷཱཛནཝིནིཙྪཡེ ཙ ཀེསུཙི པོཏྠཀེསུ ‘‘པཱདོ ནཱམ པཉྩ མཱསཱ སུཝཎྞསྶཱ’’ཏི པུརིམཔཀྑཝཱདཱིནཾ མཏེན པཱཋོ ལིཁིཏོ། ཀེསུཙི པོཏྠཀེསུ དུཏིཡཔཀྑཝཱདཱིནཾ མཏེན ‘‘པཉྩ མཱསཱ ཧིརཉྙསྶཱ’’ཏི པཱཋོ ལིཁིཏོ། སཱིཧལ༹བྷཱསཱཡ པོརཱཎཀེཧི ལིཁིཏཱཡ སཱམཎེརསིཀྑཱཡ པན –
Sikkhābhājanavinicchaye ca kesuci potthakesu ‘‘pādo nāma pañca māsā suvaṇṇassā’’ti purimapakkhavādīnaṃ matena pāṭho likhito. Kesuci potthakesu dutiyapakkhavādīnaṃ matena ‘‘pañca māsā hiraññassā’’ti pāṭho likhito. Sīhaḷabhāsāya porāṇakehi likhitāya sāmaṇerasikkhāya pana –
‘‘པོརཱཎཀསྶ ནཱིལཀཧཱཔཎསྶཱཏི ཝུཏྟཨཊྛཀཐཱཝཙནསྶ, པོརཱཎཀེ རཏནསུཏྟཱབྷིདྷཱནཀསུཏྟེ ཝུཏྟཀཧཱཔཎལཀྑཎསྶ ཙ ཨནུརཱུཔཏོ ‘སུཝཎྞརཛཏཏམྦཱནི མིསྶེཏྭཱ ཨུཊྛཱཔེཏྭཱ ཀཏཀཧཱཔཎཾ ཀཧཱཔཎཾ ནཱམཱ’ཏི ཙ ‘སཱམཎེརཱནམུཔསམྤནྣཱནཉྩ ཨདིནྣཱདཱནཔཱརཱཛིཀཝཏྠུམྷི ཀོ ཝིསེསོ’ཏི པུཙྪཾ ཀཏྭཱ ‘སཱམཎེརཱནཾ དསིཀསུཏྟེནཱཔི པཱརཱཛིཀོ ཧོཏི, ཨུཔསམྤནྣཱནཾ པན སུཝཎྞསྶ ཝཱིསཏིཝཱིཧིམཏྟེནཱ’’ཏི –
‘‘Porāṇakassa nīlakahāpaṇassāti vuttaaṭṭhakathāvacanassa, porāṇake ratanasuttābhidhānakasutte vuttakahāpaṇalakkhaṇassa ca anurūpato ‘suvaṇṇarajatatambāni missetvā uṭṭhāpetvā katakahāpaṇaṃ kahāpaṇaṃ nāmā’ti ca ‘sāmaṇerānamupasampannānañca adinnādānapārājikavatthumhi ko viseso’ti pucchaṃ katvā ‘sāmaṇerānaṃ dasikasuttenāpi pārājiko hoti, upasampannānaṃ pana suvaṇṇassa vīsativīhimattenā’’ti –
ཙ ཝིསེསོ དསྶིཏོ།
Ca viseso dassito.
ཏཾ པན སུཝཎྞམཱསཀཝསེན ཨཌྜྷཏིཡམཱསཀཾ ཧོཏི, པཉྩམཱསཀེན ཙ བྷགཝཏཱ པཱརཱཛིཀཾ པཉྙཏྟཾ། ཏསྨཱ ཏསྶ ཡཐཱཝུཏྟལཀྑཎསྶ ཀཧཱཔཎསྶ སབྦདེསེསུ ཨལབྦྷམཱནཏྟཱ སབྦདེསསཱདྷཱརཎེན ཏསྶ མིསྶཀཀཧཱཔཎསྶ པཉྩམཱསཔཱདགྒྷནཀེན སུཝཎྞེནེཝ པཱརཱཛིཀཝཏྠུམྷི ནིཡམིཏེ སབྦདེསཝཱསཱིནཾ ཨུཔཀཱརཱཡ ཧོཏཱིཏི ཨེཝཾ སུཝཎྞེནེཝ པཱརཱཛིཀཝཏྠུཔརིཙྪེདོ ཀཏོ། ཨཡམེཝ ནིཡམོ སཱིཧལཱ༹ཙརིཡཝཱདེཧི སཱརོཏི གཧིཏོ། ཏསྨཱ སིཀྑཱགརུཀེཧི སབྦཏྠ པེསལེཧི ཝིནཡདྷརེཧི ཨཡམེཝ ཝིནིཙྪཡོ སཱརཏོ པཙྩེཏབྦོ། ཧོནྟི ཙེཏྠ –
Taṃ pana suvaṇṇamāsakavasena aḍḍhatiyamāsakaṃ hoti, pañcamāsakena ca bhagavatā pārājikaṃ paññattaṃ. Tasmā tassa yathāvuttalakkhaṇassa kahāpaṇassa sabbadesesu alabbhamānattā sabbadesasādhāraṇena tassa missakakahāpaṇassa pañcamāsapādagghanakena suvaṇṇeneva pārājikavatthumhi niyamite sabbadesavāsīnaṃ upakārāya hotīti evaṃ suvaṇṇeneva pārājikavatthuparicchedo kato. Ayameva niyamo sīhaḷācariyavādehi sāroti gahito. Tasmā sikkhāgarukehi sabbattha pesalehi vinayadharehi ayameva vinicchayo sārato paccetabbo. Honti cettha –
‘‘ཧེམརཛཏཏམྦེཧི, སཏྠེ ནིདྡིཊྛལཀྑཎཾ།
‘‘Hemarajatatambehi, satthe niddiṭṭhalakkhaṇaṃ;
ཨཧཱཔེཏྭཱ ཀཏོ ཝཱིས-མཱསོ ནཱིལཀཧཱཔཎོ༎
Ahāpetvā kato vīsa-māso nīlakahāpaṇo.
ཧེམཔཱདཾ སཛ྄ཛྷུཔཱདཾ, ཏམྦཔཱདདྭཡཉྷི སོ།
Hemapādaṃ sajjhupādaṃ, tambapādadvayañhi so;
མིསྶེཏྭཱ རཱུཔམཔྤེཏྭཱ, ཀཱཏུཾ སཏྠེསུ དསྶིཏོ༎
Missetvā rūpamappetvā, kātuṃ satthesu dassito.
‘ཨེལཱ’ཏི ཝུཙྩཏེ དོསོ, ནིདྡོསཏྟཱ ཏཐཱིརིཏོ།
‘Elā’ti vuccate doso, niddosattā tathīrito;
ཏསྶ པཱདོ སུཝཎྞསྶ, ཝཱིསཝཱིཧགྒྷནོ མཏོ༎
Tassa pādo suvaṇṇassa, vīsavīhagghano mato.
ཡསྨིཾ པན པདེསེ སོ, ན ཝཏྟཏི ཀཧཱཔཎོ།
Yasmiṃ pana padese so, na vattati kahāpaṇo;
ཝཱིསསོཝཎྞཝཱིཧགྒྷཾ, ཏཔྤཱདགྒྷནྟི ཝེདིཡཾ༎
Vīsasovaṇṇavīhagghaṃ, tappādagghanti vediyaṃ.
ཝཱིསསོཝཎྞཝཱིཧགྒྷཾ, ཐེནེནྟཱ བྷིཀྑཝོ ཏཏོ།
Vīsasovaṇṇavīhagghaṃ, thenentā bhikkhavo tato;
ཙཝནྟི སཱམཉྙགུཎཱ, ཨིཙྩཱཧུ ཝིནཡཉྙུནོ’’ཏི༎
Cavanti sāmaññaguṇā, iccāhu vinayaññuno’’ti.
༩. ཨོཔཱཏནྟི ཨཱཝཱཊཾ། དུཀྑེ ཛཱཏེཏི ཡོཛནཱ།
9.Opātanti āvāṭaṃ. Dukkhe jāteti yojanā.
༡༠. ཨུཏྟརིཾ དྷམྨནྟི ཨེཏྠ ‘‘ཨུཏྟརིམནུསྶདྷམྨ’’ནྟི ཝཏྟབྦེ ནིརུཏྟིནཡེན མཛ྄ཛྷཔདལོཔཾ, ནིགྒཧཱིཏཱགམཉྩ ཀཏྭཱ ‘‘ཨུཏྟརིཾ དྷམྨ’’ནྟི ཝུཏྟཾ། ཨུཏྟརིམནུསྶཱནཾ ཛྷཱཡཱིནཉྩེཝ ཨརིཡཱནཉྩ དྷམྨཾ ཨུཏྟརིམནུསྶདྷམྨཾ། ཨཏྟུཔནཱཡིཀནྟི ཨཏྟནི ཏཾ ཨུཔནེཏི ‘‘མཡི ཨཏྠཱི’’ཏི སམུདཱཙརནྟོ, ཨཏྟཱནཾ ཝཱ ཏཏྠ ཨུཔནེཏི ‘‘ཨཧཾ ཨེཏྠ སནྡིསྶཱམཱི’’ཏི སམུདཱཙརནྟོཏི ཨཏྟུཔནཱཡིཀོ, ཏཾ ཨཏྟུཔནཱཡིཀཾ, ཨེཝཾ ཀཏྭཱ ཝདནྟོཏི སམྦནྡྷོ།
10.Uttariṃ dhammanti ettha ‘‘uttarimanussadhamma’’nti vattabbe niruttinayena majjhapadalopaṃ, niggahītāgamañca katvā ‘‘uttariṃ dhamma’’nti vuttaṃ. Uttarimanussānaṃ jhāyīnañceva ariyānañca dhammaṃ uttarimanussadhammaṃ. Attupanāyikanti attani taṃ upaneti ‘‘mayi atthī’’ti samudācaranto, attānaṃ vā tattha upaneti ‘‘ahaṃ ettha sandissāmī’’ti samudācarantoti attupanāyiko, taṃ attupanāyikaṃ, evaṃ katvā vadantoti sambandho.
༡༡. པརིཡཱཡེཏི ‘‘ཡོ ཏེ ཝིཧཱརེ ཝསཏི, སོ བྷིཀྑུ ཨརཧཱ’’ཏིཨཱདིནཱ (པརི॰ ༢༨༧) པརིཡཱཡབྷཎནེ། ཉཱཏེཏི ཡཾ ཨུདྡིསྶ བྷཎཏི, ཏསྨིཾ ཝིཉྙུམྷི མནུསྶཛཱཏིཀེ ཨཙིརེན ཉཱཏེ། ནོ ཙེཏི ནོ ཙེ ཛཱནཱཏི།
11.Pariyāyeti ‘‘yo te vihāre vasati, so bhikkhu arahā’’tiādinā (pari. 287) pariyāyabhaṇane. Ñāteti yaṃ uddissa bhaṇati, tasmiṃ viññumhi manussajātike acirena ñāte. No ceti no ce jānāti.
ཨིཏི ཨུཏྟརེ ལཱིནཏྠཔཀཱསནིཡཱ
Iti uttare līnatthapakāsaniyā
པཱརཱཛིཀཀཐཱཝཎྞནཱ ནིཊྛིཏཱ།
Pārājikakathāvaṇṇanā niṭṭhitā.
༡༣. ཙེཏེཏི, ཨུཔཀྐམཏི, མུཙྩཏི, ཨེཝཾ ཨངྒཏྟཡེ པུཎྞེ གརུཀཾ ཝུཏྟཾ། དྭངྒེ ཙེཏེཏི, ཨུཔཀྐམཏི ཡདི ན མུཙྩཏི, ཨེཝཾ ཨངྒདྭཡེ ཐུལླཙྩཡནྟི ཡོཛནཱ། པཡོགེཏི པཡོཛེཏྭཱ ཨུཔཀྐམིཏུཾ ཨངྒཛཱཏཱམསནཾ, པརསྶ ཨཱཎཱཔནནྟི ཨེཝརཱུཔེ སཱཧཏྠིཀཱཎཏྟིཀཔཡོགེ།
13. Ceteti, upakkamati, muccati, evaṃ aṅgattaye puṇṇe garukaṃ vuttaṃ. Dvaṅge ceteti, upakkamati yadi na muccati, evaṃ aṅgadvaye thullaccayanti yojanā. Payogeti payojetvā upakkamituṃ aṅgajātāmasanaṃ, parassa āṇāpananti evarūpe sāhatthikāṇattikapayoge.
༡༤. ཝུཏྟནཡེནེཝ ཨུཔརཱུཔརི པཉྷཱཔུཙྪནཾ ཉཱཏུཾ སཀྐཱཏི ཏཾ ཨཝཏྟུཀཱམོ ཨཱཧ ‘‘ཨིཏོ པཊྛཱཡཱ’’ཏིཨཱདི། མཡམྤི ཡདེཏྠ པུབྦེ ཨཝུཏྟམནུཏྟཱནཏྠཉྩ, ཏདེཝ ཝཎྞཡིསྶཱམ།
14. Vuttanayeneva uparūpari pañhāpucchanaṃ ñātuṃ sakkāti taṃ avattukāmo āha ‘‘ito paṭṭhāyā’’tiādi. Mayampi yadettha pubbe avuttamanuttānatthañca, tadeva vaṇṇayissāma.
༡༥. ཀཱཡེནཱཏི ཨཏྟནོ ཀཱཡེན། ཀཱཡནྟི ཨིཏྠིཡཱ ཀཱཡཾ། ཨེས ནཡོ ‘‘ཀཱཡབདྡྷ’’ནྟི ཨེཏྠཱཔི།
15.Kāyenāti attano kāyena. Kāyanti itthiyā kāyaṃ. Esa nayo ‘‘kāyabaddha’’nti etthāpi.
༡༦. ཨཏྟནོ ཀཱཡེན པཊིབདྡྷེན ཨིཏྠིཡཱ ཀཱཡཔཊིབདྡྷེ ཕུཊྛེ ཏུ དུཀྐཊནྟི ཡོཛནཱ།
16. Attano kāyena paṭibaddhena itthiyā kāyapaṭibaddhe phuṭṭhe tu dukkaṭanti yojanā.
༡༧. ཏིསྶོ ཨཱཔཏྟིཡོ སིཡུནྟི ཡོཛནཱ། དྭིནྣཾ མགྒཱནནྟི ཝཙྩམགྒཔསྶཱཝམགྒཱནཾ།
17.Tisso āpattiyo siyunti yojanā. Dvinnaṃ maggānanti vaccamaggapassāvamaggānaṃ.
༡༨. ཝཎྞཱདིབྷཉྙེཏི ཝཎྞཱདིནཱ བྷཎནེ། ཀཱཡཔཊིབདྡྷེ ཝཎྞཱདིནཱ བྷཉྙེ དུཀྐཊནྟི ཡོཛནཱ།
18.Vaṇṇādibhaññeti vaṇṇādinā bhaṇane. Kāyapaṭibaddhe vaṇṇādinā bhaññe dukkaṭanti yojanā.
༡༩. ཨཏྟཀཱམཙརིཡཱཡཱཏི ཨཏྟཀཱམཔཱརིཙརིཡཱཡ།
19.Attakāmacariyāyāti attakāmapāricariyāya.
༢༠. པཎྜཀསྶ སནྟིཀེཔི ཨཏྟཀཱམཔཱརིཙརིཡཱཡ ཝཎྞཾ ཝདཏོ ཏསྶ བྷིཀྑུནོཏི ཡོཛནཱ། ཏིརཙྪཱནགཏསྶཱཔི སནྟིཀེཏི ཨེཏྠཱཔི ཨེསེཝ ནཡོ།
20. Paṇḍakassa santikepi attakāmapāricariyāya vaṇṇaṃ vadato tassa bhikkhunoti yojanā. Tiracchānagatassāpi santiketi etthāpi eseva nayo.
༢༡. ཨིཏྠིཔུརིསཱནམནྟརེ སཉྩརིཏྟཾ སཉྩརཎབྷཱཝཾ སམཱཔནྣེ བྷིཀྑུམྷི པཊིགྒཎྷནཝཱིམཾསཱཔཙྩཱཧརཎཀཏྟིཀེ སམྤནྣེ ཏསྶ བུདྷོ གརུཀཾ ནིདྡིསེཏི ཡོཛནཱ།
21. Itthipurisānamantare sañcarittaṃ sañcaraṇabhāvaṃ samāpanne bhikkhumhi paṭiggaṇhanavīmaṃsāpaccāharaṇakattike sampanne tassa budho garukaṃ niddiseti yojanā.
༢༢. དྭངྒསམཱཡོགེཏི ཏཱིསྭེཏེསུ དྭིནྣཾ ཨངྒཱནཾ ཡཐཱཀཐཉྩི སམཱཡོགེ། ཨངྒེ སཏི པནེཀསྨིནྟི ཏིཎྞམེཀསྨིཾ པན ཨངྒེ སཏི།
22.Dvaṅgasamāyogeti tīsvetesu dvinnaṃ aṅgānaṃ yathākathañci samāyoge. Aṅge sati panekasminti tiṇṇamekasmiṃ pana aṅge sati.
༢༤. པཡོགེཏི ‘‘ཨདེསིཏཝཏྠུཀཾ པམཱཎཱཏིཀྐནྟཾ ཀུཊིཾ, ཨདེསིཏཝཏྠུཀཾ མཧལླཀཝིཧཱརཉྩ ཀཱརེསྶཱམཱི’’ཏི ཨུཔཀརཎཏྠཾ ཨརཉྙགམནཏོ པཊྛཱཡ སབྦཔཡོགེ། ཨེཀཔིཎྜེ ཨནཱགཏེཏི སབྦཔརིཡནྟིམཾ པིཎྜཾ སནྡྷཱཡ ཝུཏྟཾ།
24.Payogeti ‘‘adesitavatthukaṃ pamāṇātikkantaṃ kuṭiṃ, adesitavatthukaṃ mahallakavihārañca kāressāmī’’ti upakaraṇatthaṃ araññagamanato paṭṭhāya sabbapayoge. Ekapiṇḍe anāgateti sabbapariyantimaṃ piṇḍaṃ sandhāya vuttaṃ.
༢༥. ཨིདྷ ཡོ བྷིཀྑུ ཨམཱུལཀེན པཱརཱཛིཀེན དྷམྨེན ཨནུདྡྷཾསེཏཱིཏི ཡོཛནཱ།
25. Idha yo bhikkhu amūlakena pārājikena dhammena anuddhaṃsetīti yojanā.
༢༦. ཨོཀཱསཾ ན ཙ ཀཱརེཏྭཱཏི ‘‘ཀརོཏུ མེ, ཨཱཡསྨཱ, ཨོཀཱསཾ, ཨཧཾ ཏེ ཝཏྟུཀཱམོ’’ཏི ཨེཝཾ ཏེན བྷིཀྑུནཱ ཨོཀཱསཾ ཨཀཱརཱཔེཏྭཱ།
26.Okāsaṃna ca kāretvāti ‘‘karotu me, āyasmā, okāsaṃ, ahaṃ te vattukāmo’’ti evaṃ tena bhikkhunā okāsaṃ akārāpetvā.
༢༨. ཨཉྙབྷཱགིཡེཏི ཨཉྙབྷཱགིཡཔདེན ཨུཔལཀྑིཏསིཀྑཱཔདེ། ཨེཝཾ ཨཉྙཏྲཔི ཨཱིདིསེསུ ཋཱནེསུ ཨཏྠོ ཝེདིཏབྦོ།
28.Aññabhāgiyeti aññabhāgiyapadena upalakkhitasikkhāpade. Evaṃ aññatrapi īdisesu ṭhānesu attho veditabbo.
༢༩. ‘‘སམནུབྷཱསནཱཡ ཨེཝཱ’’ཏི པདཙྪེདོ། ན པཊིནིསྶཛནྟི ཨཔྤཊིནིསྶཛནྟོ།
29. ‘‘Samanubhāsanāya evā’’ti padacchedo. Na paṭinissajanti appaṭinissajanto.
༣༠. ཉཏྟིཡཱ དུཀྐཊཾ ཨཱཔནྣོ སིཡཱ, དྭཱིཧི ཀམྨཝཱཙཱཧི ཐུལླཏཾ ཨཱཔནྣོ སིཡཱ, ཀམྨཝཱཙཱཡ ཨོསཱནེ གརུཀཾ ཨཱཔནྣོ སིཡཱཏི ཡོཛནཱ། ‘‘ཐུལླཏ’’ནྟི ཨིདཾ ཐུལླཙྩཡཱཔཏྟིཨུཔལཀྑཎཝཙནཾ།
30. Ñattiyā dukkaṭaṃ āpanno siyā, dvīhi kammavācāhi thullataṃ āpanno siyā, kammavācāya osāne garukaṃ āpanno siyāti yojanā. ‘‘Thullata’’nti idaṃ thullaccayāpattiupalakkhaṇavacanaṃ.
༣༡. ཙཏཱུསུ ཡཱཝཏཏིཡཀེསུ པཋམེ ཨཱཔཏྟིཔརིཙྪེདཾ དསྶེཏྭཱ ཨིཏརེསཾ ཏིཎྞཾ ཏེནཔི ཨེཀཔརིཙྪེདཏྟཱ ཏཏྠ ཝུཏྟནཡམེཝ ཏེསུ ཨཏིདིསནྟོ ཨཱཧ ‘‘བྷེདཱནུཝཏྟཀེ’’ཏིཨཱདི།
31. Catūsu yāvatatiyakesu paṭhame āpattiparicchedaṃ dassetvā itaresaṃ tiṇṇaṃ tenapi ekaparicchedattā tattha vuttanayameva tesu atidisanto āha ‘‘bhedānuvattake’’tiādi.
ཨིཏི ཨུཏྟརེ ལཱིནཏྠཔཀཱསནིཡཱ
Iti uttare līnatthapakāsaniyā
སངྒྷཱདིསེསཀཐཱཝཎྞནཱ ནིཊྛིཏཱ།
Saṅghādisesakathāvaṇṇanā niṭṭhitā.
༣༢. ཨཏིརེཀཙཱིཝརནྟི ཨནདྷིཊྛིཏཾ, ཨཝིཀཔྤིཏཾ ཝིཀཔྤནུཔགཔམཱཎཾ ཙཱིཝརཾ ལདྡྷཱ དསཱཧཾ ཨཏིཀྐམནྟོ ཨེཀམེཝ ནིསྶགྒིཡཾ པཱཙིཏྟིཡཾ ཨཱཔཛྫཏི། ཏིཙཱིཝརེན ཨེཀརཏྟིམྤི ཝིནཱ ཝསནྟོ ཨེཀམེཝ ནིསྶགྒིཡཾ པཱཙིཏྟིཡཾ ཨཱཔཛྫཏི། ཨིདཉྩ ཛཱཏིཝསེན ཨེཀཏྟཾ སནྡྷཱཡ ཝུཏྟཾ ཝཏྠུགཎནཱཡ ཨཱཔཏྟཱིནཾ པརིཙྪིནྡིཏབྦཏྟཱ།
32.Atirekacīvaranti anadhiṭṭhitaṃ, avikappitaṃ vikappanupagapamāṇaṃ cīvaraṃ laddhā dasāhaṃ atikkamanto ekameva nissaggiyaṃ pācittiyaṃ āpajjati. Ticīvarena ekarattimpi vinā vasanto ekameva nissaggiyaṃ pācittiyaṃ āpajjati. Idañca jātivasena ekattaṃ sandhāya vuttaṃ vatthugaṇanāya āpattīnaṃ paricchinditabbattā.
༣༣. གཧེཏྭཱཀཱལཙཱིཝརནྟི ཨཀཱལཙཱིཝརཾ པཊིགྒཧེཏྭཱ། མཱསནྟི སཏིཡཱ པཙྩཱསཱཡ ནིཀྑིཔིཏུཾ ཨནུཉྙཱཏཾ མཱསཾ། ཨཏིཀྐམནྟོཏི སཏིཡཱཔི པཙྩཱསཱཡ ཝཱིཏིཀྐམནྟོ ཨནྟོམཱསེ ཨནདྷིཊྛཧིཏྭཱ, ཨཝིཀཔྤེཏྭཱ ཝཱ ཏིཾསདིཝསཱནི ཨཏིཀྐམནྟོ, ཙཱིཝརུཔྤཱདདིཝསཾ ཨརུཎཾ ཨཱདིཾ ཀཏྭཱ ཨེཀཏིཾསམཾ ཨརུཎཾ ཨུཊྛཱཔེནྟོཏི ཨཏྠོ། ཨེཀཾ ནིསྶགྒིཡཾ ཨཱཔཏྟིཾ ཨཱཔཛྫཏཱིཏི ཨུདཱིརིཏནྟི ཡོཛནཱ།
33.Gahetvākālacīvaranti akālacīvaraṃ paṭiggahetvā. Māsanti satiyā paccāsāya nikkhipituṃ anuññātaṃ māsaṃ. Atikkamantoti satiyāpi paccāsāya vītikkamanto antomāse anadhiṭṭhahitvā, avikappetvā vā tiṃsadivasāni atikkamanto, cīvaruppādadivasaṃ aruṇaṃ ādiṃ katvā ekatiṃsamaṃ aruṇaṃ uṭṭhāpentoti attho. Ekaṃ nissaggiyaṃ āpattiṃ āpajjatīti udīritanti yojanā.
༣༤. ཨཉྙཱཏིཀཱཡ བྷིཀྑུནིཡཱ། ཡཾཀིཉྩི པུརཱཎཙཱིཝརནྟི ཨེཀཝཱརམྤི པརིབྷུཏྟཾ སངྒྷཱཊིཨཱདཱིནམཉྙཏརཾ ཙཱིཝརཾ།
34.Aññātikāya bhikkhuniyā. Yaṃkiñci purāṇacīvaranti ekavārampi paribhuttaṃ saṅghāṭiādīnamaññataraṃ cīvaraṃ.
༣༥. པཡོགསྨིནྟི ‘‘དྷོཝཱ’’ཏིཨཱདིཀེ བྷིཀྑུནོ ཨཱཎཏྟིཀཔཡོགེ, ཨེཝཾ ཨཱཎཏྟཱཡ ཙ བྷིཀྑུནིཡཱ ཨུདྡྷནཱདིཀེ སབྦསྨིཾ པཡོགེ ཙ། ‘‘ནིསྶགྒིཡཱཝ པཱཙིཏྟི ཧོཏཱིཏི ནིསྶགྒིཡཱ པཱཙིཏྟི ཙ ཧོཏཱིཏི ཡོཛནཱ།
35.Payogasminti ‘‘dhovā’’tiādike bhikkhuno āṇattikapayoge, evaṃ āṇattāya ca bhikkhuniyā uddhanādike sabbasmiṃ payoge ca. ‘‘Nissaggiyāva pācitti hotīti nissaggiyā pācitti ca hotīti yojanā.
༣༦. པཊིགཎྷཏོཏི ཨེཏྠ ‘‘ཨཉྙཏྲ པཱརིཝཏྟཀཱ’’ཏི ཡོཛནཱ།
36.Paṭigaṇhatoti ettha ‘‘aññatra pārivattakā’’ti yojanā.
༣༨. པཡོགསྨིནྟི ཝིཉྙཱཔནཔཡོགེ། ཝིཉྙཱཔིཏེཏི ཝིཉྙཱཔིཏཙཱིཝརེ པཊིལདྡྷེ།
38.Payogasminti viññāpanapayoge. Viññāpiteti viññāpitacīvare paṭiladdhe.
༣༩. བྷིཀྑཱུཏི ཨཙྪིནྣཙཱིཝརོ ཝཱ ནཊྛཙཱིཝརོ ཝཱ བྷིཀྑུ། ཏདུཏྟརིནྟི སནྟརུཏྟརཔརམཏོ ཨུཏྟརིཾ།
39.Bhikkhūti acchinnacīvaro vā naṭṭhacīvaro vā bhikkhu. Taduttarinti santaruttaraparamato uttariṃ.
༤༡. པཡོགེཏི ཝིཀཔྤནཱཔཛྫནཔཡོགེ།
41.Payogeti vikappanāpajjanapayoge.
༤༢. དུཝེཏི དུཀྐཊཔཱཙིཏྟིཡཝསེན དུཝེ ཨཱཔཏྟིཡོ ཕུསེཏི ཡོཛེཏབྦཾ།
42.Duveti dukkaṭapācittiyavasena duve āpattiyo phuseti yojetabbaṃ.
༤༤. པཡོགེཏི ཨནུཉྙཱཏཔཡོགཏོ ཨཏིརེཀཱབྷིནིཔྥཱདནཔཡོགེ། ལཱབྷེཏི ཙཱིཝརསྶ པཊིལཱབྷེ།
44.Payogeti anuññātapayogato atirekābhinipphādanapayoge. Lābheti cīvarassa paṭilābhe.
ཀཐིནཝགྒཝཎྞནཱ པཋམཱ།
Kathinavaggavaṇṇanā paṭhamā.
༤༥. ཀོསིཡཝགྒསྶ ཨཱདཱིསུ པཉྩསུ སིཀྑཱཔདེསུ དྭེ དྭེ ཨཱཔཏྟིཡོཏི ཡོཛནཱ། པཡོགེཏི ཀརཎཀཱརཱཔནཔཡོགེ། ལཱབྷེཏི ཀཏྭཱ ཝཱ ཀཱརེཏྭཱ ཝཱ པརིནིཊྛཱཔནེ།
45. Kosiyavaggassa ādīsu pañcasu sikkhāpadesu dve dve āpattiyoti yojanā. Payogeti karaṇakārāpanapayoge. Lābheti katvā vā kāretvā vā pariniṭṭhāpane.
༤༦. ‘‘གཧེཏྭཱ ཨེལ༹ཀལོམཱནཱི’’ཏི པདཙྪེདོ། ཨཏིཀྐམནྟི ཨཏིཀྐམནྟོ།
46. ‘‘Gahetvā eḷakalomānī’’ti padacchedo. Atikkamanti atikkamanto.
༤༧. ཨཉྙཱཡཱཏི ཨཉྙཱཏིཀཱཡ བྷིཀྑུནིཡཱ། ‘‘དྷོཝཱཔེཏི ཨེལ༹ལོམཀ’’ནྟི པདཙྪེདོ། ཨེལ༹ལོམཀནྟི ཨེལ༹ཀལོམཱནི། ནིརུཏྟིནཡེན ཀ-ཀཱརསྶ ཝིཔརིཡཱཡོ། པཡོགེཏི དྷོཝཱཔནཔཡོགེ།
47.Aññāyāti aññātikāya bhikkhuniyā. ‘‘Dhovāpeti eḷalomaka’’nti padacchedo. Eḷalomakanti eḷakalomāni. Niruttinayena ka-kārassa vipariyāyo. Payogeti dhovāpanapayoge.
༤༨. པཡོགེཏི པཊིགྒཎྷནཔཡོགེ།
48.Payogeti paṭiggaṇhanapayoge.
༤༩. ནཱནཱཀཱརནྟི ནཱནཔྤཀཱརཾ། སམཱཔཛྫནྟི སམཱཔཛྫནྟོ བྷིཀྑུ། སམཱཔནྣེཏི སཾཝོཧཱརེ སམཱཔནྣེ སཏི། པཡོགེཏི སམཱཔཛྫནཔཡོགེ།
49.Nānākāranti nānappakāraṃ. Samāpajjanti samāpajjanto bhikkhu. Samāpanneti saṃvohāre samāpanne sati. Payogeti samāpajjanapayoge.
༥༠. པཡོགེཏི ཀཡཝིཀྐཡཱཔཛྫནཔཡོགེ། ཏསྨིཾ ཀཏེཏི ཏསྨིཾ བྷཎྜེ ཨཏྟནོ སནྟཀབྷཱཝཾ ནཱིཏེ།
50.Payogeti kayavikkayāpajjanapayoge. Tasmiṃ kateti tasmiṃ bhaṇḍe attano santakabhāvaṃ nīte.
ཀོསིཡཝགྒཝཎྞནཱ དུཏིཡཱ།
Kosiyavaggavaṇṇanā dutiyā.
༥༡. ཨཏིརེཀཀནྟི ཨནདྷིཊྛིཏཾ, ཨཝིཀཔྤིཏཾ ཝཱ པཏྟཾ། དསཱཧཾ ཨཏིཀྐམེནྟསྶ ཏསྶ བྷིཀྑུནོ ཨེཀཱཝ ནིསྶགྒིཡཱཔཏྟི ཧོཏཱིཏི ཡོཛནཱ།
51.Atirekakanti anadhiṭṭhitaṃ, avikappitaṃ vā pattaṃ. Dasāhaṃ atikkamentassa tassa bhikkhuno ekāva nissaggiyāpatti hotīti yojanā.
༥༢-༣. ནཏྠི ཨེཏསྶ པཉྩ བནྡྷནཱནཱིཏི ཨཔཉྩབནྡྷནོ, ཏསྨིཾ, ཨཱུནཔཉྩབནྡྷནེ པཏྟེཏི ཨཏྠོ། པཡོགེཏི ཝིཉྙཱཔནཔཡོགེ། ཏསྶ པཏྟསྶ ལཱབྷེ པཊིལཱབྷེ།
52-3. Natthi etassa pañca bandhanānīti apañcabandhano, tasmiṃ, ūnapañcabandhane patteti attho. Payogeti viññāpanapayoge. Tassa pattassa lābhe paṭilābhe.
༥༤. བྷེསཛྫནྟི སཔྤིཨཱདིཀཾ།
54.Bhesajjanti sappiādikaṃ.
༥༥. པཡོགེཏི པརིཡེསནཔཡོགེ།
55.Payogeti pariyesanapayoge.
༥༦. པཡོགེཏི ཨཙྪིནྡནཨཙྪིནྡཱཔནཔཡོགེ། ཧཊེཏི ཨཙྪིནྡིཏྭཱ གཧིཏེ།
56.Payogeti acchindanaacchindāpanapayoge. Haṭeti acchinditvā gahite.
༥༧. དྭེ པནཱཔཏྟིཡོ ཕུསེཏི ཝཱཡཱཔནཔཡོགེ དུཀྐཊཾ, ཝིཀཔྤནུཔགཔཙྪིམཙཱིཝརཔམཱཎེན ཝཱིཏེ ནིསྶགྒིཡནྟི དྭེ ཨཱཔཏྟིཡོ ཨཱཔཛྫཏཱིཏི ཨཏྠོ།
57.Dve panāpattiyo phuseti vāyāpanapayoge dukkaṭaṃ, vikappanupagapacchimacīvarapamāṇena vīte nissaggiyanti dve āpattiyo āpajjatīti attho.
༥༨-༩. ཡོ པན བྷིཀྑུ ཨཔྤཝཱརིཏོ ཨཉྙཱཏཀསྶེཝ ཏནྟཝཱཡེ སམེཙྩ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫནྟོ ཧོཏི། སོཏི སོ བྷིཀྑུ། དྭེ ཨཱཔཏྟིཡོ ཨཱཔཛྫཏི, ན སཾསཡོཏི ཡོཛནཱ། པཡོགེཏི ཝིཀཔྤཱཔཛྫནཔཡོགེ།
58-9. Yo pana bhikkhu appavārito aññātakasseva tantavāye samecca upasaṅkamitvā cīvare vikappaṃ āpajjanto hoti. Soti so bhikkhu. Dve āpattiyo āpajjati, na saṃsayoti yojanā. Payogeti vikappāpajjanapayoge.
༦༠. ཨཙྩེཀསཉྙིཏཾ ཙཱིཝརཾ པཊིགྒཧེཏྭཱཏི ཡོཛནཱ། ཀཱལནྟི ཙཱིཝརཀཱལཾ།
60. Accekasaññitaṃ cīvaraṃ paṭiggahetvāti yojanā. Kālanti cīvarakālaṃ.
༦༡. ཏིཎྞམཉྙཏརཾ ཝཏྠནྟི ཏིཎྞཾ ཙཱིཝརཱནཾ ཨཉྙཏརཾ ཙཱིཝརཾ། གྷརེཏི ཨནྟརགྷརེ། ནིདཧིཏྭཱཏི ནིཀྑིཔིཏྭཱ། ཏེན ཙཱིཝརེན ཝིནཱ ཚཱརཏྟཏོ ཨདྷིཀཾ དིཝསཾ ཡསྶ ཨཱརཉྙཀསྶ ཝིཧཱརསྶ གོཙརགཱམེ ཏཾ ཙཱིཝརཾ ནིཀྑིཏྟཾ, ཏམྷཱ ཝིཧཱརཱ ཨཉྙཏྲ ཝསནྟོ ནིསྶགྒིཡཾ ཕུསེཏི ཡོཛནཱ།
61.Tiṇṇamaññataraṃ vatthanti tiṇṇaṃ cīvarānaṃ aññataraṃ cīvaraṃ. Ghareti antaraghare. Nidahitvāti nikkhipitvā. Tena cīvarena vinā chārattato adhikaṃ divasaṃ yassa āraññakassa vihārassa gocaragāme taṃ cīvaraṃ nikkhittaṃ, tamhā vihārā aññatra vasanto nissaggiyaṃ phuseti yojanā.
༦༢. སངྒྷིཀཾ ལཱབྷཾ པརིཎཏཾ ཛཱནཾ ཛཱནནྟོ།
62. Saṅghikaṃ lābhaṃ pariṇataṃ jānaṃ jānanto.
༦༣. པཡོགེཏི པརིཎཱམནཔཡོགེ། སབྦཏྠཱཏི པཱརཱཛིཀཱདཱིསུ སབྦསིཀྑཱཔདེསུ། ཨཔྤནཱཝཱརཔརིཧཱནཱིཏི པརིཝཱརེ པཋམཾ ཝུཏྟཀཏྠཔཉྙཏྟིཝཱརསྶ པརིཧཱཔནཾ, ཨིདྷ ཨཝཙནནྟི ཨཏྠོ, ཏསྶ ཝཱརསྶ པརིཝཱརེ སབྦཔཋམཏྟཱ པཋམཾ ཝཏྟབྦབྷཱཝེཔི ཏཏྠ ཝཏྟབྦཾ པཙྪཱ གཎྷིཏུཀཱམེན མཡཱ ཏཾ ཋཔེཏྭཱ པཋམཾ ཨཱཔཏྟིདསྶནཏྠཾ ཏདནནྟརོ ཀཏཱཔཏྟིཝཱརོ པཋམཾ ཝུཏྟོཏི ཨདྷིཔྤཱཡོ།
63.Payogeti pariṇāmanapayoge. Sabbatthāti pārājikādīsu sabbasikkhāpadesu. Appanāvāraparihānīti parivāre paṭhamaṃ vuttakatthapaññattivārassa parihāpanaṃ, idha avacananti attho, tassa vārassa parivāre sabbapaṭhamattā paṭhamaṃ vattabbabhāvepi tattha vattabbaṃ pacchā gaṇhitukāmena mayā taṃ ṭhapetvā paṭhamaṃ āpattidassanatthaṃ tadanantaro katāpattivāro paṭhamaṃ vuttoti adhippāyo.
པཏྟཝགྒཝཎྞནཱ ཏཏིཡཱ།
Pattavaggavaṇṇanā tatiyā.
ཨིཏི ཨུཏྟརེ ལཱིནཏྠཔཀཱསནིཡཱ
Iti uttare līnatthapakāsaniyā
ཏིཾསནིསྶགྒིཡཀཐཱཝཎྞནཱ ནིཊྛིཏཱ།
Tiṃsanissaggiyakathāvaṇṇanā niṭṭhitā.
༦༤. མནུསྶུཏྟརིདྷམྨེཏི ཨུཏྟརིམནུསྶདྷམྨེ། ཨབྷཱུཏསྨིཾ ཨུཏྟརིམནུསྶདྷམྨེ སམུལླཔིཏེ པརཱཛཡོ པཱརཱཛིཀཱཔཏྟི།
64.Manussuttaridhammeti uttarimanussadhamme. Abhūtasmiṃ uttarimanussadhamme samullapite parājayo pārājikāpatti.
༦༥. ཨམཱུལནྟིམཝཏྠུནཱ ཨམཱུལཀེན པཱརཱཛིཀེན དྷམྨེན བྷིཀྑུཾ ཙོདནཱཡ གརུ སངྒྷཱདིསེསོ ཧོཏཱིཏི ཡོཛནཱ། པརིཡཱཡཝཙནེཏི ‘‘ཡོ ཏེ ཝིཧཱརེ ཝསཏཱི’’ཏིཨཱདིནཱ (པརི॰ ༢༨༧) པརིཡཱཡེན ཀཐནེ། ཉཱཏེཏི ཡསྶ ཀཐེཏི, ཏསྨིཾ ཝཙནཱནནྟརམེཝ ཉཱཏེ།
65.Amūlantimavatthunā amūlakena pārājikena dhammena bhikkhuṃ codanāya garu saṅghādiseso hotīti yojanā. Pariyāyavacaneti ‘‘yo te vihāre vasatī’’tiādinā (pari. 287) pariyāyena kathane. Ñāteti yassa katheti, tasmiṃ vacanānantarameva ñāte.
༦༦. ནོ ཙེ པན ཝིཛཱནཱཏཱིཏི ཨཐ ཏཾ པརིཡཱཡེན ཝུཏྟཾ ཝཙནཱནནྟརམེཝ སཙེ ན ཛཱནཱཏི། སམུདཱཧཊནྟི ཀཐིཏཾ།
66.Noce pana vijānātīti atha taṃ pariyāyena vuttaṃ vacanānantarameva sace na jānāti. Samudāhaṭanti kathitaṃ.
༦༧. ཨོམསཏོ བྷིཀྑུསྶ དུཝེ ཨཱཔཏྟིཡོ ཝུཏྟཱ། ཨུཔསམྤནྣཾ ཨོམསཏོ པཱཙིཏྟི སིཡཱ། ཨིཏརཾ ཨནུཔསམྤནྣཾ ཨོམསཏོ དུཀྐཊཾ སིཡཱཏི ཡོཛནཱ།
67. Omasato bhikkhussa duve āpattiyo vuttā. Upasampannaṃ omasato pācitti siyā. Itaraṃ anupasampannaṃ omasato dukkaṭaṃ siyāti yojanā.
༦༨. པེསུཉྙཧརཎེཔི དྭེ ཨཱཔཏྟིཡོ ཧོནྟི།
68. Pesuññaharaṇepi dve āpattiyo honti.
༦༩. པཡོགེཏི པདསོ དྷམྨཾ ཝཱཙེནྟསྶ ཝཙནཀིརིཡཱརམྦྷཏོ པཊྛཱཡ ཡཱཝ པདཱདཱིནཾ པརིསམཱཔནཾ, ཨེཏྠནྟརེ ཨཀྑརུཙྩཱརཎཔཡོགེ དུཀྐཊཾ། པདཱནཾ པརིསམཏྟིཡཾ པཱཙིཏྟིཡཾ།
69.Payogeti padaso dhammaṃ vācentassa vacanakiriyārambhato paṭṭhāya yāva padādīnaṃ parisamāpanaṃ, etthantare akkharuccāraṇapayoge dukkaṭaṃ. Padānaṃ parisamattiyaṃ pācittiyaṃ.
༧༠. ‘‘ཏིརཏྟཱ ཨནུཔསམྤནྣསཧསེཡྻཱཡཱ’’ཏི པདཙྪེདོ། ཨནུཔསམྤནྣེན སཧསེཡྻཱ ཨནུཔསམྤནྣསཧསེཡྻཱ, ཏཱཡ། ཏིརཏྟཱ ཨུཏྟརིཾ ཨནུཔསམྤནྣསཧསེཡྻཱཡཱཏི ཡོཛནཱ། པཡོགེཏི སཡནཏྠཱཡ སེཡྻཱཔཉྙཱཔནཀཱཡཱཝཛྫནཱདིཔུབྦཔཡོགེ། པནྣེཏི ཀཱཡཔསཱརཎལཀྑཎེན སཡནེན ནིཔནྣེ།
70. ‘‘Tirattā anupasampannasahaseyyāyā’’ti padacchedo. Anupasampannena sahaseyyā anupasampannasahaseyyā, tāya. Tirattā uttariṃ anupasampannasahaseyyāyāti yojanā. Payogeti sayanatthāya seyyāpaññāpanakāyāvajjanādipubbapayoge. Panneti kāyapasāraṇalakkhaṇena sayanena nipanne.
༧༡. ཡོ པན བྷིཀྑུ ཨེཀརཏྟིཡཾ མཱཏུགཱམེན སཧསེཡྻཾ ཀཔྤེཏི། དུཀྐཊཱདཡོཏི ‘‘པཡོགེ དུཀྐཊཾ, ནིཔནྣེ པཱཙིཏྟིཡ’’ནྟི ཡཐཱཝུཏྟདྭེཨཱཔཏྟིཡོ ཨཱཔཛྫཏཱིཏི ཡོཛནཱ།
71. Yo pana bhikkhu ekarattiyaṃ mātugāmena sahaseyyaṃ kappeti. Dukkaṭādayoti ‘‘payoge dukkaṭaṃ, nipanne pācittiya’’nti yathāvuttadveāpattiyo āpajjatīti yojanā.
༧༢. པཡོགེཏི ཡཐཱཝུཏྟལཀྑཎཔཡོགེ།
72.Payogeti yathāvuttalakkhaṇapayoge.
༧༣. ཨནུཔསམྤནྣེཏི སམཱིཔཏྠེ ཙེཏཾ བྷུམྨཾ། ཨནུཔསམྤནྣསྶ སནྟིཀེ བྷཱུཏཾ ཨུཏྟརིམནུསྶདྷམྨཾ ཡོ སཙེ ཨཱརོཙེཏཱིཏི ཡོཛནཱ། དུཀྐཊཱདཡོཏི ཡསྶ ཨཱརོཙེཏི, སོ ནཔྤཊིཝིཛཱནཱཏི, དུཀྐཊཾ, པཊིཝིཛཱནཱཏི, པཱཙིཏྟིཡནྟི ཨེཝཾ དྭེ ཨཱཔཏྟིཡོ ཏསྶ ཧོནྟི།
73.Anupasampanneti samīpatthe cetaṃ bhummaṃ. Anupasampannassa santike bhūtaṃ uttarimanussadhammaṃ yo sace ārocetīti yojanā. Dukkaṭādayoti yassa āroceti, so nappaṭivijānāti, dukkaṭaṃ, paṭivijānāti, pācittiyanti evaṃ dve āpattiyo tassa honti.
༧༤. ཨཉྙཏོ ཨཉྙསྶ ཨུཔསམྤནྣསྶ དུཊྛུལླསྶ ཨཱཔཏྟིཾ ཨནུཔསམྤནྣེ ཨནུཔསམྤནྣསྶ སནྟིཀེ ཝདཾ ཝདནྟོཏི ཡོཛནཱ། པཡོགེཏི ཨཱརམྦྷཏོ པཊྛཱཡ པུབྦཔཡོགེ དུཀྐཊཾ ཨཱགཙྪཏི དུཀྐཊཾ ཨཱཔཛྫཏི། ཨཱརོཙིཏེ པཱཙིཏྟི སིཡཱཏི ཡོཛནཱ།
74.Aññato aññassa upasampannassa duṭṭhullassa āpattiṃ anupasampanne anupasampannassa santike vadaṃ vadantoti yojanā. Payogeti ārambhato paṭṭhāya pubbapayoge dukkaṭaṃ āgacchati dukkaṭaṃ āpajjati. Ārocite pācitti siyāti yojanā.
༧༥. པཡོགེཏི ‘‘ཨཀཔྤིཡཔཐཝིཾ ཁཎིསྶཱམཱི’’ཏི ཀུདཱལ པརིཡེསནཱདིསབྦཔཡོགེཏི།
75.Payogeti ‘‘akappiyapathaviṃ khaṇissāmī’’ti kudāla pariyesanādisabbapayogeti.
མུསཱཝཱདཝགྒཝཎྞནཱ པཋམཱ།
Musāvādavaggavaṇṇanā paṭhamā.
༧༦. པཱཏེནྟོཏི ཝིཀོཔེནྟོ། ཏསྶཱཏི བྷཱུཏགཱམསྶ། པཱཏེཏི ཝིཀོཔནེ།
76.Pātentoti vikopento. Tassāti bhūtagāmassa. Pāteti vikopane.
༧༧. ཨཉྙཝཱདཀཝིཧེསཀཱནཾ ཨེཀཡོགནིདྡིཊྛཏྟཱ ཏཏྠ ཝུཏྟནཡེནེཝ ཝིཧེསཀེ ཙ ཉཱཏུཾ སཀྐཱཏི ཏཏྠ ཝིསུཾ ཨཱཔཏྟིབྷེདོ ན ཝུཏྟོ།
77. Aññavādakavihesakānaṃ ekayoganiddiṭṭhattā tattha vuttanayeneva vihesake ca ñātuṃ sakkāti tattha visuṃ āpattibhedo na vutto.
༧༨. པརནྟི ཨཉྙཾ སངྒྷེན སམྨཏསེནཱསནཔཉྙཱཔཀཱདིཀཾ ཨུཔསམྤནྣཾ། ཨུཛ྄ཛྷཱཔེནྟོཏི ཏསྶ ཨཡསཾ ཨུཔྤཱདེཏུཀཱམཏཱཡ བྷིཀྑཱུཧི ཨཝཛཱནཱཔེཏུཾ ‘‘ཚནྡཱཡ ཨིཏྠནྣཱམོ ཨིདཾ ནཱམ ཀརོཏཱི’’ཏིཨཱདཱིནི ཝཏྭཱ ཨཝཉྙཱཡ ཨོལོཀཱཔེནྟོ, ལཱམཀཏོ ཝཱ ཙིནྟཱཔེནྟོ། པཡོགེཏི ཨུཛ྄ཛྷཱཔནཏྠཱཡ ཏསྶ ཨཝཎྞབྷཎནཱདིཀེ པུབྦཔཡོགེ།
78.Paranti aññaṃ saṅghena sammatasenāsanapaññāpakādikaṃ upasampannaṃ. Ujjhāpentoti tassa ayasaṃ uppādetukāmatāya bhikkhūhi avajānāpetuṃ ‘‘chandāya itthannāmo idaṃ nāma karotī’’tiādīni vatvā avaññāya olokāpento, lāmakato vā cintāpento. Payogeti ujjhāpanatthāya tassa avaṇṇabhaṇanādike pubbapayoge.
༨༣. སངྒྷིཀེ ཝིཧཱརེ པུབྦཱུཔགཏཾ བྷིཀྑུཾ ཛཱནཾ ཛཱནནྟོ ཨནུཔཁཛྫ སེཡྻཾ ཀཔྤེཏི, ཏསྶེཝཾ སེཡྻཾ ཀཔྤཡཏོཏི ཡོཛནཱ། པཡོགེདུཀྐཊཱདཡོཏི ཨེཏྠ ཨལུཏྟསམཱསོ། ཨཱདི-སདྡེན སེཡྻཱཀཔྤནེ པཱཙིཏྟིཡཾ སངྒཎྷཱཏི།
83. Saṅghike vihāre pubbūpagataṃ bhikkhuṃ jānaṃ jānanto anupakhajja seyyaṃ kappeti, tassevaṃ seyyaṃ kappayatoti yojanā. Payogedukkaṭādayoti ettha aluttasamāso. Ādi-saddena seyyākappane pācittiyaṃ saṅgaṇhāti.
༨༤. པཡོགེཏི ‘‘ནིཀྐཌྜྷཐ ཨིམ’’ནྟིཨཱདིཀེ ཨཱཎཏྟིཀེ ཝཱ ‘‘ཡཱཧི ཡཱཧཱི’’ཏིཨཱདིཀེ ཝཱཙསིཀེ ཝཱ ཧཏྠེན ཏསྶ ཨངྒཔརཱམསནཱདིཝསེན ཀཏེ ཀཱཡིཀེ ཝཱ ནིཀྐཌྜྷནཔཡོགེ། སེསནྟི པཱཙིཏྟིཡཾ།
84.Payogeti ‘‘nikkaḍḍhatha ima’’ntiādike āṇattike vā ‘‘yāhi yāhī’’tiādike vācasike vā hatthena tassa aṅgaparāmasanādivasena kate kāyike vā nikkaḍḍhanapayoge. Sesanti pācittiyaṃ.
༨༥. ‘‘ཝེཧཱསཀུཊིཡཱ ཨུཔརཱི’’ཏི པདཙྪེདོ། ཨཱཧཙྩཔཱདཀེཏི ཨེཏྠ ‘‘མཉྩེ ཝཱ པཱིཋེ ཝཱ’’ཏི སེསོ། སཱིདནྟི ནིསཱིདནྟོ། དུཀྐཊཱདཡོཏི པཡོགེ དུཀྐཊཾ, ནིཔཛྫཱཡ པཱཙིཏྟིཡནྟི ཨིམཱ ཨཱཔཏྟིཡོ ཕུསེཏི ཨཏྠོ།
85. ‘‘Vehāsakuṭiyā uparī’’ti padacchedo. Āhaccapādaketi ettha ‘‘mañce vā pīṭhe vā’’ti seso. Sīdanti nisīdanto. Dukkaṭādayoti payoge dukkaṭaṃ, nipajjāya pācittiyanti imā āpattiyo phuseti attho.
༨༦. ཨསྶ པཛྫསྶ པཋམཔཱདཾ དསཀྑརཔཱདཀཾ ཚནྡོཝིཙིཏིཡཾ ཝུཏྟགཱཐཱ, ‘‘གཱཐཱཚནྡོ ཨཏཱིཏདྭཡ’’ནྟི ཨིམིནཱ ཚནྡོཝིཙིཏིལཀྑཎེན གཱཐཱཚནྡཏྟཱ ཨདྷིཊྛིཏྭཱ དྭཏྟིཔརིཡཱཡེཏི ཨེཏྠ ཨཀྑརདྭཡཾ ཨདྷིཀཾ ཝུཏྟནྟི དཊྛབྦཾ། པཡོགེཏི ཨདྷིཊྛཱནཔཡོགེ། ཨདྷིཊྛིཏེཏི དྭཏྟིཔརིཡཱཡཱནཾ ཨུཔརི ཨདྷིཊྛཱནེ ཀཏེ།
86. Assa pajjassa paṭhamapādaṃ dasakkharapādakaṃ chandovicitiyaṃ vuttagāthā, ‘‘gāthāchando atītadvaya’’nti iminā chandovicitilakkhaṇena gāthāchandattā adhiṭṭhitvā dvattipariyāyeti ettha akkharadvayaṃ adhikaṃ vuttanti daṭṭhabbaṃ. Payogeti adhiṭṭhānapayoge. Adhiṭṭhiteti dvattipariyāyānaṃ upari adhiṭṭhāne kate.
༨༧. པཡོགེཏི སིཉྩནསིཉྩཱཔནཔཡོགེ། སིཏྟེཏི སིཉྩནཀིརིཡཔརིཡོསཱནེ།
87.Payogeti siñcanasiñcāpanapayoge. Sitteti siñcanakiriyapariyosāne.
བྷཱུཏགཱམཝགྒཝཎྞནཱ དུཏིཡཱ།
Bhūtagāmavaggavaṇṇanā dutiyā.
༨༨. དུཀྐཊཾ ཕུསེཏི ཡོཛནཱ། ཨོཝདིཏེ པཱཙིཏྟི སིཡཱཏི ཡོཛནཱ།
88. Dukkaṭaṃ phuseti yojanā. Ovadite pācitti siyāti yojanā.
༨༩. ཝིབྷཱགོཡེཝ ཝིབྷཱགཏཱ།
89. Vibhāgoyeva vibhāgatā.
༩༠. ཨཉྙཱཏིཀཱཡ བྷིཀྑུནིཡཱ ཨཉྙཏྲ པཱརིཝཏྟཀཱ ཙཱིཝརཾ དེནྟོ བྷིཀྑུ དུཝེ ཨཱཔཏྟིཡོ ཕུསེཏི ཡོཛནཱ། པཡོགེཏི དཱནཔཡོགེ།
90.Aññātikāya bhikkhuniyā aññatra pārivattakā cīvaraṃ dento bhikkhu duve āpattiyo phuseti yojanā. Payogeti dānapayoge.
༩༣. ‘‘ནཱཝཾ ཨེཀ’’ནྟི པདཙྪེདོ། པཡོགེཏི ཨབྷིརུཧཎཔཡོགེ། དུཀྐཊཱདཡོཏི ཨཱདི-སདྡེན ཨབྷིརུལ༹ྷེ པཱཙིཏྟིཡཾ སངྒཎྷཱཏི།
93. ‘‘Nāvaṃ eka’’nti padacchedo. Payogeti abhiruhaṇapayoge. Dukkaṭādayoti ādi-saddena abhiruḷhe pācittiyaṃ saṅgaṇhāti.
༩༤. ‘‘དུཝིདྷཾ ཨཱཔཏྟི’’ནྟི པདཙྪེདོ།
94. ‘‘Duvidhaṃ āpatti’’nti padacchedo.
༩༦. བྷིཀྑུནིཡཱ སདྡྷིཾ རཧོ ནིསཛྫཾ ཀཔྤེནྟོ བྷིཀྑུ པཡོགེདུཀྐཊཱདཡོ དྭེཔི ཨཱཔཏྟིཡོ ཕུསེཏི ཡོཛནཱ།
96. Bhikkhuniyā saddhiṃ raho nisajjaṃ kappento bhikkhu payogedukkaṭādayo dvepi āpattiyo phuseti yojanā.
ཨོཝཱདཝགྒཝཎྞནཱ ཏཏིཡཱ།
Ovādavaggavaṇṇanā tatiyā.
༩༧. ཏདུཏྟརིནྟི ཏཏོ བྷུཉྫིཏུཾ ཨནུཉྙཱཏཨེཀདིཝསཏོ ཨུཏྟརིཾ དུཏིཡདིཝསཏོ པཊྛཱཡ། ཨནནྟརསྶ ཝགྒསྶཱཏི ཨོཝཱདཝགྒསྶ། ནཝམེནཱཏི བྷིཀྑུནིཡཱ པརིཔཱཙིཏཔིཎྜཔཱཏསིཀྑཱཔདེན།
97.Taduttarinti tato bhuñjituṃ anuññātaekadivasato uttariṃ dutiyadivasato paṭṭhāya. Anantarassa vaggassāti ovādavaggassa. Navamenāti bhikkhuniyā paripācitapiṇḍapātasikkhāpadena.
༩༩. དྭཏྟིཔཏྟེཏི དྭཏྟིཔཏྟཔཱུརེ། ཏདུཏྟརིནྟི དྭཏྟིཔཏྟཔཱུརཏོ ཨུཏྟརིཾ། པཡོགེཏི པཊིགྒཧཎཔཡོགེ།
99.Dvattipatteti dvattipattapūre. Taduttarinti dvattipattapūrato uttariṃ. Payogeti paṭiggahaṇapayoge.
༡༠༡. ཨབྷིཧཊྛུནྟི ཨབྷིཧརིཏྭཱ།
101.Abhihaṭṭhunti abhiharitvā.
༡༠༢. ཏསྶཱཏི ཨབྷིཧརནྟསྶ། པིཊཀེཏི ཝིནཡཔིཊཀེ།
102.Tassāti abhiharantassa. Piṭaketi vinayapiṭake.
༡༠༣. དསམེཔཱིཏི ཨེཏྠ ‘‘དསམེ ཨཔཱི’’ཏི པདཙྪེདོ།
103.Dasamepīti ettha ‘‘dasame apī’’ti padacchedo.
བྷོཛནཝགྒཝཎྞནཱ ཙཏུཏྠཱ།
Bhojanavaggavaṇṇanā catutthā.
༡༠༤. ཨཙེལཀཱདིནོཏི ཨཱདི-སདྡེན ‘‘པརིབྦཱཛཀསྶ ཝཱ པརིབྦཱཛིཀཱཡ ཝཱ’’ཏི (པཱཙི॰ ༢༧༠) ཝུཏྟེ སངྒཎྷཱཏི། བྷོཛནཱདིཀནྟི ཨཱདི-སདྡེན ཁཱདནཱིཡཾ སངྒཎྷཱཏི། པཡོགེཏི སཧཏྠཱ དཱནཔཡོགེ།
104.Acelakādinoti ādi-saddena ‘‘paribbājakassa vā paribbājikāya vā’’ti (pāci. 270) vutte saṅgaṇhāti. Bhojanādikanti ādi-saddena khādanīyaṃ saṅgaṇhāti. Payogeti sahatthā dānapayoge.
༡༠༥. དཱཔེཏྭཱ ཝཱ ཨདཱཔེཏྭཱ ཝཱ ཀིཉྩི ཨཱམིསཾ། པཡོགེཏི ཨུཡྻོཛནཔཡོགེ། ཏསྨིནྟི ཏསྨིཾ བྷིཀྑུམྷི། ཨུཡྻོཛིཏེ པཱཙིཏྟི སིཡཱཏི ཡོཛནཱ།
105.Dāpetvā vā adāpetvā vā kiñci āmisaṃ. Payogeti uyyojanapayoge. Tasminti tasmiṃ bhikkhumhi. Uyyojite pācitti siyāti yojanā.
༡༠༩. ཨུམྨཱརཱཏིཀྐམེཏི ཨིནྡཁཱིལཱཏིཀྐམེ།
109.Ummārātikkameti indakhīlātikkame.
༡༡༠. ཏདུཏྟརིནྟི ཏཏོ པརིཙྪིནྣརཏྟིཔརིཡནྟཏོ ཝཱ པརིཙྪིནྣབྷེསཛྫཔརིཡནྟཏོ ཝཱ ཨུཏྟརིཾ།
110.Taduttarinti tato paricchinnarattipariyantato vā paricchinnabhesajjapariyantato vā uttariṃ.
༡༡༡. ཨུཡྻུཏྟཾ དསྶནཏྠཱཡ གཙྪནྟོ དྭེ ཨཱཔཏྟིཡོ ཕུསེཏི ཡོཛནཱ།
111. Uyyuttaṃ dassanatthāya gacchanto dve āpattiyo phuseti yojanā.
ཨཙེལཀཝགྒཝཎྞནཱ པཉྩམཱ།
Acelakavaggavaṇṇanā pañcamā.
༡༡༤. མེརེཡྻནྟི མེརཡཾ། ནིརུཏྟིནཡེན ཨ-ཀཱརསྶ ཨེ-ཀཱརོ, ཡ-ཀཱརསྶ ཙ དྭིཏྟཾ། མེརཡ-སདྡཔརིཡཱཡོ ཝཱ མེརེཡྻ-སདྡོ། མུནཱིཏི བྷིཀྑུ།
114.Mereyyanti merayaṃ. Niruttinayena a-kārassa e-kāro, ya-kārassa ca dvittaṃ. Meraya-saddapariyāyo vā mereyya-saddo. Munīti bhikkhu.
༡༡༥. ‘‘བྷིཀྑུ ཨངྒུལིཔཏོདེནཱ’’ཏི པདཙྪེདོ། པཡོགེཏི ཧཱསཱཔནཔཡོགེ། ཏསྶཱཏི ཧཱསཱཔེནྟསྶ།
115. ‘‘Bhikkhu aṅgulipatodenā’’ti padacchedo. Payogeti hāsāpanapayoge. Tassāti hāsāpentassa.
༡༡༦. གོཔྥཀཱ ཧེཊྛཱ ཨུདཀེ དུཀྐཊཾ། གོཔྥཀཏོ ཨུཔརི ཨུཔརིགོཔྥཀཾ, ཨུདཀཾ, ཏསྨིཾ, གོཔྥཀཏོ ཨདྷིཀཔྤམཱཎེ ཨུདཀེཏི ཨཏྠོ།
116. Gopphakā heṭṭhā udake dukkaṭaṃ. Gopphakato upari uparigopphakaṃ, udakaṃ, tasmiṃ, gopphakato adhikappamāṇe udaketi attho.
༡༡༧. ཨནཱདརིཡནྟི པུགྒལཱནཱདརིཡཾ, དྷམྨཱནཱདརིཡཾ ཝཱ། པཡོགེཏི ཨནཱདརིཡཝསེན པཝཏྟེ ཀཱཡཔཡོགེ ཝཱ ཝཙཱིཔཡོགེ ཝཱ། ཀཏེ ཨནཱདརིཡེ།
117.Anādariyanti puggalānādariyaṃ, dhammānādariyaṃ vā. Payogeti anādariyavasena pavatte kāyapayoge vā vacīpayoge vā. Kate anādariye.
༡༡༨. པཡོགེཏི བྷིཾསཱཔནཔཡོགེ།
118.Payogeti bhiṃsāpanapayoge.
༡༡༩. ཛོཏིནྟི ཨགྒིཾ། སམཱདཧིཏྭཱནཱཏི ཛཱལེཏྭཱ། ‘‘ཝིསིབྦེནྟོ’’ཏི ཨིམིནཱ ཕལཱུཔཙཱརེན ཀཱརཎཾ ཝུཏྟཾ། ཝིསིབྦནཀིརིཡཱ ཧི སམཱདཧནཀིརིཡཱཡ ཕལནྟི ཝིསིབྦནཀིརིཡཱཝོཧཱརེན སམཱདཧནཀིརིཡཱཝ། ཏསྨཱ ཝིསིབྦེནྟོཏི ཨེཏྠ སམཱདཧནྟོཏི ཨཏྠོ། པཡོགེཏི སམཱདཧནསམཱདཧཱཔནཔཡོགེ། ཝིསཱིཝིཏེཏི ཝུཏྟནཡེན སམཱདཧིཏེཏི ཨཏྠོ།
119.Jotinti aggiṃ. Samādahitvānāti jāletvā. ‘‘Visibbento’’ti iminā phalūpacārena kāraṇaṃ vuttaṃ. Visibbanakiriyā hi samādahanakiriyāya phalanti visibbanakiriyāvohārena samādahanakiriyāva. Tasmā visibbentoti ettha samādahantoti attho. Payogeti samādahanasamādahāpanapayoge. Visīviteti vuttanayena samādahiteti attho.
༡༢༠. པཡོགེཏི ཙུཎྞམཏྟིཀཱབྷིསངྑརཎཱདིསབྦཔཡོགེ། ཨིཏརནྟི པཱཙིཏྟིཡཾ།
120.Payogeti cuṇṇamattikābhisaṅkharaṇādisabbapayoge. Itaranti pācittiyaṃ.
༡༢༡. ཏིཎྞཾ དུབྦཎྞཀརཎཱནནྟི ཀཾསནཱིལཔཏྟནཱིལཀདྡམསངྑཱཏཱནཾ ཏིཎྞཾ དུབྦཎྞཀརཎཱནཾ། ཨེཀཾ ཨཉྙཏརཾ ཨནཱདིཡ ཨདཏྭཱ། ཙཱིཝརནྟི ནཝཙཱིཝརཾ།
121.Tiṇṇaṃ dubbaṇṇakaraṇānanti kaṃsanīlapattanīlakaddamasaṅkhātānaṃ tiṇṇaṃ dubbaṇṇakaraṇānaṃ. Ekaṃ aññataraṃ anādiya adatvā. Cīvaranti navacīvaraṃ.
༡༢༢. ནཏྠི ཨེཏསྶ ཨུདྡྷཱརནྟི ཨནུདྡྷཱརོ, ཏཾ ཨནུདྡྷཱརནྟི ཝཏྟབྦེ གཱཐཱབནྡྷཝསེན རསྶཏྟཾ, ཨཀཏཔཙྩུདྡྷཱརནྟི ཨཏྠོ།
122. Natthi etassa uddhāranti anuddhāro, taṃ anuddhāranti vattabbe gāthābandhavasena rassattaṃ, akatapaccuddhāranti attho.
༡༢༣. ཨཔནིདྷེནྟོཏི ཨཔནེཏྭཱ ནིདྷེནྟོ ནིཀྑིཔེནྟོ། པཏྟཱདིཀནྟི ཨཱདི-སདྡེན ཙཱིཝརནིསཱིདནསཱུཙིགྷརཀཱཡབནྡྷནཱནཾ གཧཎཾ། པཡོགེཏི ཨཔནིདྷཱནཔཡོགེ། ཏསྨིཾ པཏྟཱདིཀེ པཉྩཝིདྷེ པརིཀྑཱརེ། ཨཔནིཧིཏེ སེསཱ པཱཙིཏྟིཡཱཔཏྟི སིཡཱཏི ཡོཛནཱ།
123.Apanidhentoti apanetvā nidhento nikkhipento. Pattādikanti ādi-saddena cīvaranisīdanasūcigharakāyabandhanānaṃ gahaṇaṃ. Payogeti apanidhānapayoge. Tasmiṃ pattādike pañcavidhe parikkhāre. Apanihite sesā pācittiyāpatti siyāti yojanā.
སུརཱཔཱནཝགྒཝཎྞནཱ ཚཊྛཱ།
Surāpānavaggavaṇṇanā chaṭṭhā.
༡༢༤. ཏཔོདྷནོཏི པཱཏིམོཀྑསཾཝརསཱིལསངྑཱཏཾ ཏཔོདྷནམསྶཱཏི ཏཔོདྷནོ, བྷིཀྑུ།
124.Tapodhanoti pātimokkhasaṃvarasīlasaṅkhātaṃ tapodhanamassāti tapodhano, bhikkhu.
༡༢༥. ཏསྨིཾ ཨོཔཱཏེ།
125.Tasmiṃ opāte.
༡༢༦. མནུསྶཝིགྒཧོ མནུསྶསརཱིརོ། ཏིརཙྪཱནགཏོ ནཱགོ ཝཱ སུཔཎྞོ ཝཱ། ཏསྶ ཨོཔཱཏཁཎཀསྶ།
126.Manussaviggaho manussasarīro. Tiracchānagato nāgo vā supaṇṇo vā. Tassa opātakhaṇakassa.
༡༢༧. པཊུབུདྡྷིནཱཏི སབྦེསུ ཉེཡྻདྷམྨེསུ ནིཔུནཉཱཎེན བྷགཝཏཱ།
127.Paṭubuddhināti sabbesu ñeyyadhammesu nipunañāṇena bhagavatā.
༡༢༨. པཡོགེཏི པརིབྷོགཏྠཱཡ གཧཎཱདིཀེ པཡོགེ། ཏསྶཱཏི བྷིཀྑུསྶ།
128.Payogeti paribhogatthāya gahaṇādike payoge. Tassāti bhikkhussa.
༡༢༩. ཨུཀྐོཊེནྟོཏི ཨུཙྩཱལེནྟོ ཡཐཱཋཱནེ ཋཱཏུཾ ཨདེནྟོ། པཡོགེཏི ཨུཀྐོཊནཔཡོགེ། ཨུཀྐོཊིཏེ པཱཙིཏྟིཡཾ སིཡཱཏི ཡོཛནཱ།
129.Ukkoṭentoti uccālento yathāṭhāne ṭhātuṃ adento. Payogeti ukkoṭanapayoge. Ukkoṭite pācittiyaṃ siyāti yojanā.
༡༣༠. དུཊྛུལླཾ ཝཛྫཀནྟི སངྒྷཱདིསེསཱདིཀེ། ཨེཀཾ པཱཙིཏྟིཡཾ ཨཱཔཏྟིཾ ཨཱཔཛྫཏི ཨིཏི དཱིཔིཏནྟི ཡོཛནཱ།
130.Duṭṭhullaṃ vajjakanti saṅghādisesādike. Ekaṃ pācittiyaṃ āpattiṃ āpajjati iti dīpitanti yojanā.
༡༣༡. པཡོགེཏི གཎཔརིཡེསནཱདིཔཡོགེ། དུཀྐཊཾ པཏྟོ སིཡཱ དུཀྐཊཱཔཏྟིཾ ཨཱཔནྣོ བྷཝེཡྻཱཏི ཨཏྠོ། སེསཱཏི པཱཙིཏྟིཡཱཔཏྟི ཨུཔསམྤཱདིཏེ སིཡཱ། གཱཐཱབནྡྷཝསེན ཨུཔསགྒལོཔོ།
131.Payogeti gaṇapariyesanādipayoge. Dukkaṭaṃ patto siyā dukkaṭāpattiṃ āpanno bhaveyyāti attho. Sesāti pācittiyāpatti upasampādite siyā. Gāthābandhavasena upasaggalopo.
༡༣༢-༣. ཛཱནཾ ཐེཡྻསཏྠེན སཧ སཾཝིདྷཱཡ མགྒཾ པཊིཔཛྫཏོ ཙ ཏཐེཝ མཱཏུགཱམེན སཧ སཾཝིདྷཱཡ མགྒཾ པཊིཔཛྫཏོ ཙཱཏི ཡོཛནཱ། པཡོགེཏི སཾཝིདྷཱཡ གནྟུཾ པཊིཔུཙྪཱདིཀརཎཔཡོགེ། པཊིཔནྣེཏི མགྒཔཊིཔནྣེ། ཨནནྟརནྟི ཨདྡྷཡོཛནགཱམནྟརཱཏིཀྐམནཱནནྟརཾ།
132-3. Jānaṃ theyyasatthena saha saṃvidhāya maggaṃ paṭipajjato ca tatheva mātugāmena saha saṃvidhāya maggaṃ paṭipajjato cāti yojanā. Payogeti saṃvidhāya gantuṃ paṭipucchādikaraṇapayoge. Paṭipanneti maggapaṭipanne. Anantaranti addhayojanagāmantarātikkamanānantaraṃ.
༡༣༤. ཉཏྟིཡཱ ཨོསཱནེ དུཀྐཊཾ ཕུསེཏི ཡོཛནཱ།
134. Ñattiyā osāne dukkaṭaṃ phuseti yojanā.
༡༣༥. ཨཀཏཱནུདྷམྨེནཱཏི ཨནུདྷམྨོ ཝུཙྩཏི ཨཱཔཏྟིཡཱ ཨདསྶནེ ཝཱ ཨཔྤཊིཀམྨེ ཝཱ པཱཔིཀཱཡ དིཊྛིཡཱ ཨཔྤཊིནིསྶགྒེ ཝཱ དྷམྨེན ཝིནཡེན སཏྠུསཱསནེན ཨུཀྑིཏྟཀསྶ ཨནུལོམཝཏྟཾ དིསྭཱ ཀཏྭཱ ཨོསཱརཎཱ, སོ ཨོསཱརཎསངྑཱཏོ ཨནུདྷམྨོ ཡསྶ ན ཀཏོ, ཨཡཾ ཨཀཏཱནུདྷམྨོ ནཱམ, ཏཱདིསེན བྷིཀྑུནཱ སདྡྷིནྟི ཨཏྠོ། སམྦྷུཉྫནྟོཏི ཨཱམིསསམྦྷོགཾ ཀརོནྟོ བྷིཀྑུ། པཡོགེཏི བྷུཉྫིཏུཾ ཨཱམིསཔཊིགྒཧཎཱདིཔཡོགེ། བྷུཏྟེཏི སམྦྷུཏྟེ, ཨུབྷཡསམྦྷོགེ, ཏདཉྙཏརེ ཝཱ ཀཏེཏི ཨཏྠོ།
135.Akatānudhammenāti anudhammo vuccati āpattiyā adassane vā appaṭikamme vā pāpikāya diṭṭhiyā appaṭinissagge vā dhammena vinayena satthusāsanena ukkhittakassa anulomavattaṃ disvā katvā osāraṇā, so osāraṇasaṅkhāto anudhammo yassa na kato, ayaṃ akatānudhammo nāma, tādisena bhikkhunā saddhinti attho. Sambhuñjantoti āmisasambhogaṃ karonto bhikkhu. Payogeti bhuñjituṃ āmisapaṭiggahaṇādipayoge. Bhutteti sambhutte, ubhayasambhoge, tadaññatare vā kateti attho.
༡༣༦. ཨུཔལཱཔེནྟོཏི པཏྟཙཱིཝརཨུདྡེསཔརིཔུཙྪནཱདིཝསེན སངྒཎྷནྟོ། པཡོགེཏི ཨུཔལཱཔནཔཡོགེ།
136.Upalāpentoti pattacīvarauddesaparipucchanādivasena saṅgaṇhanto. Payogeti upalāpanapayoge.
སཔྤཱཎཀཝགྒཝཎྞནཱ སཏྟམཱ།
Sappāṇakavaggavaṇṇanā sattamā.
༡༣༧. སཧདྷམྨིཀནྟི ཀརཎཏྠེ ཨུཔཡོགཝཙནཾ, པཉྩཧི སཧདྷམྨིཀེཧི སིཀྑིཏབྦཏྟཱ, ཏེསཾ ཝཱ སནྟཀཏྟཱ ‘‘སཧདྷམྨིཀ’’ནྟི ལདྡྷནཱམེན བུདྡྷཔཉྙཏྟེན སིཀྑཱཔདེན ཝུཙྩམཱནསྶཱཏི ཨཏྠོ། བྷཎཏོཏི ‘‘བྷིཀྑུསྶཱ’’ཏི ཨིམིནཱ སམཱནཱདྷིཀརཎཾ།
137.Sahadhammikanti karaṇatthe upayogavacanaṃ, pañcahi sahadhammikehi sikkhitabbattā, tesaṃ vā santakattā ‘‘sahadhammika’’nti laddhanāmena buddhapaññattena sikkhāpadena vuccamānassāti attho. Bhaṇatoti ‘‘bhikkhussā’’ti iminā samānādhikaraṇaṃ.
༡༣༨. ཝིཝཎྞེནྟོཏི ‘‘ཀིཾ པནིམེཧི ཁུདྡཱནུཁུདྡཀེཧི སིཀྑཱཔདེཧི ཨུདྡིཊྛེཧཱི’’ཏིཨཱདིནཱ གརཧནྟོ། པཡོགེཏི ‘‘ཀིཾ ཨིམེཧཱི’’ཏིཨཱདིནཱ གརཧཎཝསེན པཝཏྟེ ཝཙཱིཔཡོགེ། ཝིཝཎྞིཏེ གརཧིཏེ།
138.Vivaṇṇentoti ‘‘kiṃ panimehi khuddānukhuddakehi sikkhāpadehi uddiṭṭhehī’’tiādinā garahanto. Payogeti ‘‘kiṃ imehī’’tiādinā garahaṇavasena pavatte vacīpayoge. Vivaṇṇite garahite.
༡༣༩. མོཧེནྟོཏི ‘‘ཨིདཱནེཝ ཁོ ཨཧཾ, ཨཱཝུསོ, ཛཱནཱམཱི’’ཏིཨཱདིནཱ ཨཏྟནོ ཨཛཱནནཏྟེན ཨཱཔནྣབྷཱཝཾ དཱིཔེཏྭཱ བྷིཀྑུཾ མོཧེནྟོ, ཝཉྩེནྟོཏི ཨཏྠོ། མོཧེཏི མོཧཱརོཔནཀམྨེ། ཨརོཔིཏེ ཀཏེ།
139.Mohentoti ‘‘idāneva kho ahaṃ, āvuso, jānāmī’’tiādinā attano ajānanattena āpannabhāvaṃ dīpetvā bhikkhuṃ mohento, vañcentoti attho. Moheti mohāropanakamme. Aropite kate.
༡༤༠. བྷིཀྑུསྶ ཀུཔིཏོ པཧཱརཾ དེནྟོ ཕུསེཏི ཡོཛནཱ། པཡོགེཏི དཎྜཱདཱནཱདིཔཡོགེ།
140. Bhikkhussa kupito pahāraṃ dento phuseti yojanā. Payogeti daṇḍādānādipayoge.
༡༤༡. པཡོགེཏི ཨུགྒིརཎཔཡོགེ། ཨུགྒིརིཏེཏི ཨུཙྩཱརིཏེ།
141.Payogeti uggiraṇapayoge. Uggiriteti uccārite.
༡༤༢. ཨམཱུལེནེཝཱཏི དིཊྛཱདིམཱུལཝིརཧིཏེནེཝ། ཡོགེཏི ཨོཀཱསཀཱརཱཔནཱདིཔཡོགེ། ཨུདྡྷཾསིཏེཏི ཙོདིཏེ།
142.Amūlenevāti diṭṭhādimūlavirahiteneva. Yogeti okāsakārāpanādipayoge. Uddhaṃsiteti codite.
༡༤༣. ཀུཀྐུཙྩཾ ཛནཡནྟོཏི ‘‘ཨཱུནཝཱིསཏིཝསྶོ ཏྭཾ མཉྙེ ཨུཔསམྤནྣོ’’ཏིཨཱདིནཱ ཀུཀྐུཙྩཾ ཨུཔདཧནྟོ། ཡོགེཏི ཀུཀྐུཙྩུཔྤཱདནཔཡོགེ། ཨུཔྤཱདིཏེཏི ཀུཀྐུཙྩེ ཨུཔྤཱདིཏེ།
143.Kukkuccaṃ janayantoti ‘‘ūnavīsativasso tvaṃ maññe upasampanno’’tiādinā kukkuccaṃ upadahanto. Yogeti kukkuccuppādanapayoge. Uppāditeti kukkucce uppādite.
༡༤༤. ‘‘ཏིཊྛནྟོ ཨུཔསྶུཏི’’ནྟི པདཙྪེདོ། སུཏིཡཱ སམཱིཔཾ ཨུཔསྶུཏི, སཝནཱུཔཙཱརེཏི ཨཏྠོ།
144. ‘‘Tiṭṭhanto upassuti’’nti padacchedo. Sutiyā samīpaṃ upassuti, savanūpacāreti attho.
༡༤༥. དྷམྨིཀཱནཾ ཏུ ཀམྨཱནནྟི དྷམྨེན ཝིནཡེན སཏྠུསཱསནེན ཀཏཱནཾ ཨཔལོཀནཱདཱིནཾ ཙཏུནྣཾ ཀམྨཱནཾ། ཏཏོ པུནཱཏི ཚནྡདཱནཏོ པཙྪཱ། ཁཱིཡནདྷམྨནྟི ཨཏྟནོ ཨདྷིཔྤེཏབྷཱཝཝིབྷཱཝནམནྟནཾ། དྭེ ཕུསེ དུཀྐཊཱདཡོཏི ཁཱིཡནདྷམྨཱཔཛྫནཔཡོགེ དུཀྐཊཾ, ཁཱིཡནདྷམྨེ ཨཱཔནྣེ པཱཙིཏྟིཡནྟི ཨེཝཾ དུཀྐཊཱདཡོ དྭེ ཨཱཔཏྟིཡོ ཨཱཔཛྫེཡྻཱཏི ཨཏྠོ།
145.Dhammikānaṃ tu kammānanti dhammena vinayena satthusāsanena katānaṃ apalokanādīnaṃ catunnaṃ kammānaṃ. Tato punāti chandadānato pacchā. Khīyanadhammanti attano adhippetabhāvavibhāvanamantanaṃ. Dve phuse dukkaṭādayoti khīyanadhammāpajjanapayoge dukkaṭaṃ, khīyanadhamme āpanne pācittiyanti evaṃ dukkaṭādayo dve āpattiyo āpajjeyyāti attho.
༡༤༦. སངྒྷེ སངྒྷམཛ྄ཛྷེ། ཝིནིཙྪཡེཏི ཝཏྠུཏོ ཨོཏིཎྞཝིནིཙྪཡེ། ནིཊྛཾ ཨགཏེཏི ཝཏྠུམྷི ཨཝིནིཙྪིཏེ, ཉཏྟིཾ ཋཔེཏྭཱ ཀམྨཝཱཙཱཡ ཝཱ ཨཔརིཡོསིཏཱཡ།
146.Saṅghe saṅghamajjhe. Vinicchayeti vatthuto otiṇṇavinicchaye. Niṭṭhaṃ agateti vatthumhi avinicchite, ñattiṃ ṭhapetvā kammavācāya vā apariyositāya.
༡༤༨. སམགྒེན སངྒྷེནཱཏི སམཱནསཾཝཱསཀེན སམཱནསཱིམཱཡཾ ཋིཏེན སངྒྷེན།
148.Samaggena saṅghenāti samānasaṃvāsakena samānasīmāyaṃ ṭhitena saṅghena.
སཧདྷམྨིཀཝགྒཝཎྞནཱ ཨཊྛམཱ།
Sahadhammikavaggavaṇṇanā aṭṭhamā.
༡༥༠. ཨཝིདིཏོ ཧུཏྭཱཏི རཉྙོ ཨཝིདིཏཱགམནོ ཧུཏྭཱ།
150.Aviditohutvāti rañño aviditāgamano hutvā.
༡༥༢. རཏནནྟི མུཏྟཱདིདསཝིདྷཾ རཏནཾ། པཡོགེཏི རཏནགྒཧཎཔཡོགེ།
152.Ratananti muttādidasavidhaṃ ratanaṃ. Payogeti ratanaggahaṇapayoge.
༡༥༣. ཝིཀཱལེཏི མཛ྄ཛྷནྟིཀཱཏིཀྐམཏོ པཊྛཱཡ ཨརུཎེ།
153.Vikāleti majjhantikātikkamato paṭṭhāya aruṇe.
༡༥༥. ཨཊྛིདནྟཝིསཱཎཱབྷིནིབྦཏྟནྟི ཨཊྛིདནྟཝིསཱཎམཡཾ། པཡོགེཏི ཀཱརཱཔནཔཡོགེ།
155.Aṭṭhidantavisāṇābhinibbattanti aṭṭhidantavisāṇamayaṃ. Payogeti kārāpanapayoge.
༡༥༦. ཏསྨིཾ མཉྩཱདིམྷི ཀཱརཱཔིཏེ སེསཱ པཱཙིཏྟིཡཱཔཏྟི སིཡཱཏི ཡོཛནཱ།
156. Tasmiṃ mañcādimhi kārāpite sesā pācittiyāpatti siyāti yojanā.
རཏནཝགྒཝཎྞནཱ ནཝམཱ།
Ratanavaggavaṇṇanā navamā.
ཨིཏི ཨུཏྟརེ ལཱིནཏྠཔཀཱསནིཡཱ
Iti uttare līnatthapakāsaniyā
པཱཙིཏྟིཡཀཐཱཝཎྞནཱ ནིཊྛིཏཱ།
Pācittiyakathāvaṇṇanā niṭṭhitā.
༡༥༩. ཙཏཱུསུ པཱཊིདེསནཱིཡེསུཔི ཨཝིསེསེན ཨཱདིཙྩབནྡྷུནཱ བུདྡྷེན དྭིདྷཱ ཨཱཔཏྟི ནིདྡིཊྛཱཏི ཡོཛནཱ།
159. Catūsu pāṭidesanīyesupi avisesena ādiccabandhunā buddhena dvidhā āpatti niddiṭṭhāti yojanā.
༡༦༠. སབྦཏྠཱཏི སབྦེསུ ཙཏཱུསུ།
160.Sabbatthāti sabbesu catūsu.
པཱཊིདེསནཱིཡཀཐཱཝཎྞནཱ།
Pāṭidesanīyakathāvaṇṇanā.
༡༦༡. སེཁིཡཀཐཱ ཨུཏྟཱནཏྠཱཡེཝ།
161. Sekhiyakathā uttānatthāyeva.
སེཁིཡཀཐཱཝཎྞནཱ།
Sekhiyakathāvaṇṇanā.
༡༦༢. པརིཝཱརེ པཋམཾ དསྶིཏསོལ༹སཝཱརཔྤབྷེདེ མཧཱཝིབྷངྒེ ‘‘པཋམཾ པཱརཱཛིཀཾ ཀཏྠ པཉྙཏྟ’’ནྟིཨཱདིཔྤབྷེདོ (པརི॰ ༡) ཀཏྠཔཉྙཏྟིཝཱརོ , ‘‘མེཐུནཾ དྷམྨཾ པཊིསེཝནྟོ ཀཏི ཨཱཔཏྟིཡོ ཨཱཔཛྫཏཱི’’ཏིཨཱདིཔྤབྷེདོ (པརི॰ ༡༥༧) ཀཏཱཔཏྟིཝཱརོ, ‘‘མེཐུནཾ དྷམྨཾ པཊིསེཝནྟསྶ ཨཱཔཏྟིཡོ ཙཏུནྣཾ ཝིཔཏྟཱིནཾ ཀཏི ཝིཔཏྟིཡོ བྷཛནྟཱི’’ཏིཨཱདིཔྤབྷེདོ (པརི॰ ༡༨༢) ཝིཔཏྟིཝཱརོ, ‘‘མེཐུནཾ དྷམྨཾ པཊིསེཝནྟསྶ ཨཱཔཏྟིཡོ སཏྟནྣཾ ཨཱཔཏྟིཀྑནྡྷཱནཾ ཀཏིཧི ཨཱཔཏྟིཀྑནྡྷེཧི སངྒཧིཏཱ’’ཏིཨཱདིཔྤབྷེདོ (པརི॰ ༡༨༢) སངྒཧཝཱརོ, ‘‘མེཐུནཾ དྷམྨཾ པཊིསེཝནྟསྶ ཨཱཔཏྟིཡོ ཚནྣཾ ཨཱཔཏྟིསམུཊྛཱནཱནཾ ཀཏིཧི སམུཊྛཱནེཧི སམུཊྛཧནྟཱི’’ཏིཨཱདིཔྤབྷེདོ (པརི॰ ༡༨༤) སམུཊྛཱནཝཱརོ, ‘‘མེཐུནཾ དྷམྨཾ པཊིསེཝནྟསྶ ཨཱཔཏྟིཡོ ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎ’’ནྟིཨཱདིཔྤབྷེདོ (པརི॰ ༡༨༥) ཨདྷིཀརཎཝཱརོ, ‘‘མེཐུནཾ དྷམྨཾ པཊིསེཝནྟསྶ ཨཱཔཏྟིཡོ སཏྟནྣཾ སམཐཱནཾ ཀཏིཧི སམཐེཧི སམྨནྟཱི’’ཏིཨཱདིཔྤབྷེདོ (པརི॰ ༡༨༦) སམཐཝཱརོ, ཏདནནྟརོ ཨིམེཧི སཏྟཧི ཝཱརེཧི མིསྶོ ཨཊྛམོ སམུཙྩཡཝཱརོཏི ཨིམེསུ ཨཊྛསུ ཝཱརེསུ ཨཱདིབྷཱུཏེ ཀཏྠཔཉྙཏྟིནཱམདྷེཡྻེ ཨཔྤནཱཝཱརེ སངྒཧེཏབྦཱནཾ ནིདཱནཱདིསཏྟརསལཀྑཎཱནཾ ཨུབྷཡཝིབྷངྒསཱདྷཱརཎཏོ ཨུཔརི ཝཀྑམཱནཏྟཱ ཏཾ ཝཱརཾ ཋཔེཏྭཱ ཏདནནྟརཾ ཨསཱདྷཱརཎཾ ཀཏཱཔཏྟིཝཱརཾ སེཁིཡཱཝསཱནཾ པཱལི༹ཀྐམཱནུརཱུཔཾ དསྶེཏྭཱ ཏདནནྟརཱ ཝིཔཏྟིཝཱརཱདཡོ ཚ ཝཱརཱ ཨུབྷཡཝིབྷངྒསཱདྷཱརཎཏོ ཝཀྑམཱནཱཏི ཀཏྭཱ ཏེཔི ཋཔེཏྭཱ ཨིམེ པཙྩཡསདྡེན ཨཡོཛེཏྭཱ དསྶིཏཱ ཨཊྛེཝ ཝཱརཱ, པུན ‘‘མེཐུནཾ དྷམྨཾ པཊིསེཝནཔཙྩཡཱ པཱརཱཛིཀཾ ཀཏྠ པཉྙཏྟ’’ནྟིཨཱདིནཱ (པརི॰ ༡༨༨) པཙྩཡ-སདྡཾ ཡོཛེཏྭཱ དསྶིཏཱ ཨཔརེ ཨཊྛ ཝཱརཱ ཡོཛིཏཱཏི ཏཏྠཱཔི དུཏིཡཾ ཀཏཱཔཏྟིཔཙྩཡཝཱརཾ ཨིམིནཱ ཀཏཱཔཏྟིཝཱརེན ཨེཀཔརིཙྪེདཾ ཀཏྭཱ དསྶེཏུམཱཧ ‘‘པཉྙཏྟཱ’’ཏིཨཱདི། པཊིསེཝནཔཙྩཡཱཏི པཊིསེཝནཧེཏུནཱ།
162. Parivāre paṭhamaṃ dassitasoḷasavārappabhede mahāvibhaṅge ‘‘paṭhamaṃ pārājikaṃ kattha paññatta’’ntiādippabhedo (pari. 1) katthapaññattivāro , ‘‘methunaṃ dhammaṃ paṭisevanto kati āpattiyo āpajjatī’’tiādippabhedo (pari. 157) katāpattivāro, ‘‘methunaṃ dhammaṃ paṭisevantassa āpattiyo catunnaṃ vipattīnaṃ kati vipattiyo bhajantī’’tiādippabhedo (pari. 182) vipattivāro, ‘‘methunaṃ dhammaṃ paṭisevantassa āpattiyo sattannaṃ āpattikkhandhānaṃ katihi āpattikkhandhehi saṅgahitā’’tiādippabhedo (pari. 182) saṅgahavāro, ‘‘methunaṃ dhammaṃ paṭisevantassa āpattiyo channaṃ āpattisamuṭṭhānānaṃ katihi samuṭṭhānehi samuṭṭhahantī’’tiādippabhedo (pari. 184) samuṭṭhānavāro, ‘‘methunaṃ dhammaṃ paṭisevantassa āpattiyo catunnaṃ adhikaraṇānaṃ katamaṃ adhikaraṇa’’ntiādippabhedo (pari. 185) adhikaraṇavāro, ‘‘methunaṃ dhammaṃ paṭisevantassa āpattiyo sattannaṃ samathānaṃ katihi samathehi sammantī’’tiādippabhedo (pari. 186) samathavāro, tadanantaro imehi sattahi vārehi misso aṭṭhamo samuccayavāroti imesu aṭṭhasu vāresu ādibhūte katthapaññattināmadheyye appanāvāre saṅgahetabbānaṃ nidānādisattarasalakkhaṇānaṃ ubhayavibhaṅgasādhāraṇato upari vakkhamānattā taṃ vāraṃ ṭhapetvā tadanantaraṃ asādhāraṇaṃ katāpattivāraṃ sekhiyāvasānaṃ pāḷikkamānurūpaṃ dassetvā tadanantarā vipattivārādayo cha vārā ubhayavibhaṅgasādhāraṇato vakkhamānāti katvā tepi ṭhapetvā ime paccayasaddena ayojetvā dassitā aṭṭheva vārā, puna ‘‘methunaṃ dhammaṃ paṭisevanapaccayā pārājikaṃ kattha paññatta’’ntiādinā (pari. 188) paccaya-saddaṃ yojetvā dassitā apare aṭṭha vārā yojitāti tatthāpi dutiyaṃ katāpattipaccayavāraṃ iminā katāpattivārena ekaparicchedaṃ katvā dassetumāha ‘‘paññattā’’tiādi. Paṭisevanapaccayāti paṭisevanahetunā.
༡༦༣. ཨལློཀཱསཔྤཝེསནེཏི ཛཱིཝམཱནསརཱིརེ ཏིཎྞཾ མགྒཱནཾ ཨཉྙཏརསྨིཾ མགྒེ ཨལློཀཱསཔྤཝེསནེ། མཏེ ཨཀྑཱཡིཏེ ཝཱ པི-སདྡེན ཡེབྷུཡྻཨཀྑཱཡིཏེ པཝེསནེ པཝེསནནིམིཏྟཾ མེཐུནཾ དྷམྨཾ པཊིསེཝནྟོ བྷིཀྑུ པཱརཱཛིཀཾ ཕུསེཏི སམྦནྡྷོ།
163.Allokāsappavesaneti jīvamānasarīre tiṇṇaṃ maggānaṃ aññatarasmiṃ magge allokāsappavesane. Mate akkhāyite vā pi-saddena yebhuyyaakkhāyite pavesane pavesananimittaṃ methunaṃ dhammaṃ paṭisevanto bhikkhu pārājikaṃ phuseti sambandho.
༡༦༤. ཏཐཱ ཡེབྷུཡྻཀྑཱཡིཏེ, ཨུཔཌྜྷཀྑཱཡིཏེ ཙ མེཐུནཾ དྷམྨཾ པཊིསེཝནྟོ བྷིཀྑུ ཐུལླཙྩཡཾ ཕུསེཏི ཡོཛནཱ། ཝཊྚཀཏེ མུཁེ དུཀྐཊཾ ཝུཏྟནྟི སམྦནྡྷོ། ཛཏུམཊྛཀེཏི བྷིཀྑུནིཡཱ ཛཏུམཊྛཀེ དིནྣེ པཱཙིཏྟི ཝུཏྟཱཏི སམྦནྡྷོ།
164. Tathā yebhuyyakkhāyite, upaḍḍhakkhāyite ca methunaṃ dhammaṃ paṭisevanto bhikkhu thullaccayaṃ phuseti yojanā. Vaṭṭakate mukhe dukkaṭaṃ vuttanti sambandho. Jatumaṭṭhaketi bhikkhuniyā jatumaṭṭhake dinne pācitti vuttāti sambandho.
༡༦༦. ཨཝསྶུཏསྶཱཏི ཀཱཡསཾསགྒརཱགེན ཏིནྟསྶ། པོསསྶཱཏི གཧཎཀིརིཡཱསམྦནྡྷེ སཱམིཝཙནཾ། བྷིཀྑུནིཡཱཏི ཨཏྟསམྦནྡྷེ སཱམིཝཙནཾ། ‘‘ཨཏྟནོ’’ཏི སེསོ། ཨཝསྶུཏེན པོསེན ཨཏྟནོ ཨདྷཀྑཀཱདིགཧཎཾ སཱདིཡནྟིཡཱ ཏཐཱ ཨཝསྶུཏཱཡ བྷིཀྑུནིཡཱ པཱརཱཛིཀནྟི ཡོཛནཱ།
166.Avassutassāti kāyasaṃsaggarāgena tintassa. Posassāti gahaṇakiriyāsambandhe sāmivacanaṃ. Bhikkhuniyāti attasambandhe sāmivacanaṃ. ‘‘Attano’’ti seso. Avassutena posena attano adhakkhakādigahaṇaṃ sādiyantiyā tathā avassutāya bhikkhuniyā pārājikanti yojanā.
༡༦༧. ཀཱཡེནཱཏི ཨཏྟནོ ཀཱཡེན། ཀཱཡནྟི མཱཏུགཱམསྶ ཀཱཡཾ། ཕུསཏོཏི ཀཱཡསཾསགྒརཱགེན ཕུསཏོ། ཀཱཡེན ཀཱཡབདྡྷནྟི ཨེཏྠཱཔི ཨེསེཝ ནཡོ།
167.Kāyenāti attano kāyena. Kāyanti mātugāmassa kāyaṃ. Phusatoti kāyasaṃsaggarāgena phusato. Kāyena kāyabaddhanti etthāpi eseva nayo.
༡༦༨. ཀཱཡེན པཊིབདྡྷེནཱཏི ཨཏྟནོ ཀཱཡཔཊིབདྡྷེན། པཊིབདྡྷནྟི ཨིཏྠིཡཱ ཀཱཡཔཊིབདྡྷཾ ཕུསནྟསྶ དུཀྐཊཾ། ཏསྶ བྷིཀྑུསྶ།
168.Kāyena paṭibaddhenāti attano kāyapaṭibaddhena. Paṭibaddhanti itthiyā kāyapaṭibaddhaṃ phusantassa dukkaṭaṃ. Tassa bhikkhussa.
‘‘མཧཱཝིབྷངྒསངྒཧོ ནིཊྛིཏོ’’ཏི ཀསྨཱ ཝུཏྟཾ, ནནུ སོལ༹སཝཱརསངྒཧེ མཧཱཝིབྷངྒེ ཀཏཱཔཏྟིཝཱརོཡེཝེཏྠ ཝུཏྟོ, ན ཨིཏརེ ཝཱརཱཏི? སཙྩཾ, ཨཝཡཝེ པན སམུདཱཡོཔཙཱརེན ཝུཏྟཾ། སཱདྷཱརཎཱསཱདྷཱརཎཱནཾ མཧཱཝིབྷངྒེ གཏཱནཾ སབྦཱཔཏྟིཔབྷེདཱནཾ དསྶནོཔཙཱརབྷཱུཏོ ཀཏཱཔཏྟིཝཱརོ དསྶིཏོཏི ཏཾདསྶནེན ཨཔྤདྷཱནཱ ཨིཏརེཔི ཝཱརཱ ཨུཔཙཱརཏོ དསྶིཏཱ ཧོནྟཱིཏི ཙ ཏཐཱ ཝུཏྟནྟི ཝེདིཏབྦཾ།
‘‘Mahāvibhaṅgasaṅgaho niṭṭhito’’ti kasmā vuttaṃ, nanu soḷasavārasaṅgahe mahāvibhaṅge katāpattivāroyevettha vutto, na itare vārāti? Saccaṃ, avayave pana samudāyopacārena vuttaṃ. Sādhāraṇāsādhāraṇānaṃ mahāvibhaṅge gatānaṃ sabbāpattipabhedānaṃ dassanopacārabhūto katāpattivāro dassitoti taṃdassanena appadhānā itarepi vārā upacārato dassitā hontīti ca tathā vuttanti veditabbaṃ.
ཨིཏི ཨུཏྟརེ ལཱིནཏྠཔཀཱསནིཡཱ
Iti uttare līnatthapakāsaniyā
མཧཱཝིབྷངྒསངྒཧཝཎྞནཱ ནིཊྛིཏཱ།
Mahāvibhaṅgasaṅgahavaṇṇanā niṭṭhitā.
