| Library / Tipiṭaka / д̇ибидага • Tipiṭaka / винаяавинижчаяа-уд̇д̇аравинижчаяа • Vinayavinicchaya-uttaravinicchaya |
махаавибхан̇г̇асан̇г̇ахагат̇аа
Mahāvibhaṅgasaṅgahakathā
4.
4.
мзт̇унам̣ бадисзванд̇о, гад̇и аабад̇д̇ияо пусз;
Methunaṃ paṭisevanto, kati āpattiyo phuse;
мзт̇унам̣ бадисзванд̇о, д̇иссо аабад̇д̇ияо пусз.
Methunaṃ paṭisevanto, tisso āpattiyo phuse.
5.
5.
бхавз баарааж̇игам̣ кзд̇д̇з, язбхуяяагкааяид̇з бана;
Bhave pārājikaṃ khette, yebhuyyakkhāyite pana;
т̇уллажжаяам̣ мукз вадда-гад̇з вуд̇д̇ам̣ д̇у д̣̇уггадам̣.
Thullaccayaṃ mukhe vaṭṭa-kate vuttaṃ tu dukkaṭaṃ.
6.
6.
ад̣̇иннам̣ аад̣̇ияанд̇о яо;
Adinnaṃ ādiyanto yo;
гад̇и аабад̇д̇ияо пусз;
Kati āpattiyo phuse;
ад̣̇иннам̣ аад̣̇ияанд̇о со;
Adinnaṃ ādiyanto so;
д̇иссо аабад̇д̇ияо пусз.
Tisso āpattiyo phuse.
7.
7.
бан̃жамаасаг̇гханз вааби, ад̇хигз ваа барааж̇аяо;
Pañcamāsagghane vāpi, adhike vā parājayo;
маасз ваа д̣̇уггадам̣ уунз, маж̇жхз т̇уллажжаяам̣ д̇ад̇о.
Māse vā dukkaṭaṃ ūne, majjhe thullaccayaṃ tato.
8.
8.
мануссаж̇аад̇им̣ маарзнд̇о;
Manussajātiṃ mārento;
гад̇и аабад̇д̇ияо пусз;
Kati āpattiyo phuse;
мануссаж̇аад̇им̣ маарзнд̇о;
Manussajātiṃ mārento;
д̇иссо аабад̇д̇ияо пусз.
Tisso āpattiyo phuse.
9.
9.
мануссамуд̣̇д̣̇иссобаад̇ам̣, кан̣анз д̣̇уггадам̣ сияаа;
Manussamuddissopātaṃ, khaṇane dukkaṭaṃ siyā;
д̣̇угкз т̇уллажжаяам̣ ж̇аад̇з, мад̇з баарааж̇игам̣ сияаа.
Dukkhe thullaccayaṃ jāte, mate pārājikaṃ siyā.
10.
10.
асанд̇ам̣ уд̇д̇арим̣ д̇хаммам̣, вад̣̇амад̇д̇уубанааяигам̣;
Asantaṃ uttariṃ dhammaṃ, vadamattūpanāyikaṃ;
гад̇и аабаж̇ж̇ад̇аабад̇д̇ий? д̇иссо аабад̇д̇ияо пусз.
Kati āpajjatāpattī? Tisso āpattiyo phuse.
11.
11.
асанд̇ам̣ уд̇д̇арим̣ д̇хаммам̣, бхан̣анд̇асса барааж̇аяо;
Asantaṃ uttariṃ dhammaṃ, bhaṇantassa parājayo;
т̇уллажжаяам̣ барияааяз, н̃аад̇з, но жз д̇у д̣̇уггадам̣.
Thullaccayaṃ pariyāye, ñāte, no ce tu dukkaṭaṃ.
баарааж̇игагат̇аа.
Pārājikakathā.
12.
12.
бхан̣а суггам̣ виможзнд̇о;
Bhaṇa sukkaṃ vimocento;
гад̇и аабад̇д̇ияо пусз;
Kati āpattiyo phuse;
сун̣а суггам̣ виможзнд̇о;
Suṇa sukkaṃ vimocento;
д̇иссо аабад̇д̇ияо пусз.
Tisso āpattiyo phuse.
13.
13.
г̇аругам̣ яад̣̇и жзд̇зд̇и, убаггамад̇и мужжад̇и;
Garukaṃ yadi ceteti, upakkamati muccati;
д̣̇ван̇г̇з т̇уллажжаяам̣ вуд̇д̇ам̣, баяог̇з д̣̇уггадам̣ сияаа.
Dvaṅge thullaccayaṃ vuttaṃ, payoge dukkaṭaṃ siyā.
14.
14.
ид̇о бадтааяа мун̃жид̇ваа, бан̃хаабужчанамад̇д̇агам̣;
Ito paṭṭhāya muñcitvā, pañhāpucchanamattakaṃ;
виссаж̇ж̇анавасзнзва, ход̇и ад̇т̇авинижчаяо.
Vissajjanavaseneva, hoti atthavinicchayo.
15.
15.
ид̇т̇ияаа гааяасам̣саг̇г̇з, д̇иссо аабад̇д̇ияо пусз;
Itthiyā kāyasaṃsagge, tisso āpattiyo phuse;
аамасанд̇асса гааязна, гааяам̣ д̇у г̇аругам̣ сияаа.
Āmasantassa kāyena, kāyaṃ tu garukaṃ siyā.
16.
16.
гааязна гааяаб̣ад̣̇д̇хам̣ д̇у, пусам̣ т̇уллажжаяам̣ пусз;
Kāyena kāyabaddhaṃ tu, phusaṃ thullaccayaṃ phuse;
бадиб̣ад̣̇д̇хзна гааязна, бадиб̣ад̣̇д̇хз д̇у д̣̇уггадам̣.
Paṭibaddhena kāyena, paṭibaddhe tu dukkaṭaṃ.
17.
17.
ид̇т̇им̣ д̣̇удтуллаваажаахи, д̇иссо обхаасад̇о сияум̣;
Itthiṃ duṭṭhullavācāhi, tisso obhāsato siyuṃ;
ван̣н̣ааван̣н̣ам̣ вад̣̇ам̣ д̣̇виннам̣, маг̇г̇аанам̣ г̇аругам̣ пусз.
Vaṇṇāvaṇṇaṃ vadaṃ dvinnaṃ, maggānaṃ garukaṃ phuse.
18.
18.
ван̣н̣аад̣̇ибхан̃н̃з аад̣̇исса, уб̣бхаж̇аан̣умад̇хагкагам̣;
Vaṇṇādibhaññe ādissa, ubbhajāṇumadhakkhakaṃ;
ход̇и т̇уллажжаяам̣, гааяа-бадиб̣ад̣̇д̇хз д̇у д̣̇уггадам̣.
Hoti thullaccayaṃ, kāya-paṭibaddhe tu dukkaṭaṃ.
19.
19.
ад̇д̇агаамажарияааяа, вад̣̇ад̇о ван̣н̣амид̇т̇ияаа;
Attakāmacariyāya, vadato vaṇṇamitthiyā;
санд̇игз г̇аругам̣ ход̇и, сажз ж̇аанаад̇и саа бана.
Santike garukaṃ hoti, sace jānāti sā pana.
20.
20.
санд̇игз бан̣д̣агассааби, д̇асса т̇уллажжаяам̣ сияаа;
Santike paṇḍakassāpi, tassa thullaccayaṃ siyā;
д̇иражчаанаг̇ад̇ассааби, санд̇игз д̣̇уггадам̣ мад̇ам̣.
Tiracchānagatassāpi, santike dukkaṭaṃ mataṃ.
21.
21.
бадиг̇г̇ан̣ханавиймам̣саа, бажжаахаран̣агад̇д̇игз;
Paṭiggaṇhanavīmaṃsā, paccāharaṇakattike;
сан̃жарид̇д̇ам̣ самаабаннз, г̇аругам̣ нид̣̇д̣̇исз б̣уд̇хо.
Sañcarittaṃ samāpanne, garukaṃ niddise budho.
22.
22.
д̇асса д̣̇ван̇г̇асамааяог̇з, ход̇и т̇уллажжаяам̣ д̇ат̇аа;
Tassa dvaṅgasamāyoge, hoti thullaccayaṃ tathā;
ан̇г̇з сад̇и банзгасмим̣, ход̇и аабад̇д̇и д̣̇уггадам̣.
Aṅge sati panekasmiṃ, hoti āpatti dukkaṭaṃ.
23.
23.
сам̣яаажигааяа жа гудим̣;
Saṃyācikāya ca kuṭiṃ;
вихааран̃жа махаллагам̣;
Vihārañca mahallakaṃ;
гаараабзд̇и сажз бхигку;
Kārāpeti sace bhikkhu;
д̇иссо аабад̇д̇ияо пусз.
Tisso āpattiyo phuse.
24.
24.
баяог̇з д̣̇уггадам̣ вуд̇д̇ам̣, згабин̣д̣з анааг̇ад̇з;
Payoge dukkaṭaṃ vuttaṃ, ekapiṇḍe anāgate;
ход̇и т̇уллажжаяам̣, д̇асмим̣, бин̣д̣з г̇аругамааг̇ад̇з.
Hoti thullaccayaṃ, tasmiṃ, piṇḍe garukamāgate.
25.
25.
баарааж̇игзна д̇хаммзна, бхигкум̣ амуулагзнид̇ха;
Pārājikena dhammena, bhikkhuṃ amūlakenidha;
ануд̣̇д̇хам̣сзд̇и яо д̇асса, д̇иссо аабад̇д̇ияо сияум̣.
Anuddhaṃseti yo tassa, tisso āpattiyo siyuṃ.
26.
26.
огаасам̣ на жа гаарзд̇ваа, худ̇ваа жааванажзд̇ано;
Okāsaṃ na ca kāretvā, hutvā cāvanacetano;
сажз жод̣̇зд̇и сан̇гхаад̣̇и-сзсзна саха д̣̇уггадам̣.
Sace codeti saṅghādi-sesena saha dukkaṭaṃ.
27.
27.
огаасам̣ бана гаарзд̇ваа, худ̇ваа аггосажзд̇ано;
Okāsaṃ pana kāretvā, hutvā akkosacetano;
жод̣̇зд̇и омасаваад̣̇з, баажид̇д̇им̣ барид̣̇ийбаяз.
Codeti omasavāde, pācittiṃ paridīpaye.
28.
28.
ананд̇арасамаанова , навамз ан̃н̃абхааг̇ияз;
Anantarasamānova , navame aññabhāgiye;
саб̣б̣о аабад̇д̇ибхзд̣̇о хи, над̇т̇и гаажи висзсад̇аа.
Sabbo āpattibhedo hi, natthi kāci visesatā.
29.
29.
сан̇гхасса бхзд̣̇аго бхигку, яаавад̇ад̇ияагам̣ бана;
Saṅghassa bhedako bhikkhu, yāvatatiyakaṃ pana;
саманубхаасанааязва, г̇аахам̣ на бадиниссаж̇ам̣.
Samanubhāsanāyeva, gāhaṃ na paṭinissajaṃ.
30.
30.
н̃ад̇д̇ияаа д̣̇уггадам̣, д̣̇вийхи, гаммаваажаахи т̇уллад̇ам̣;
Ñattiyā dukkaṭaṃ, dvīhi, kammavācāhi thullataṃ;
гаммаваажааяа осаанз, аабад̇д̇и г̇аругам̣ сияаа.
Kammavācāya osāne, āpatti garukaṃ siyā.
31.
31.
бхзд̣̇аанувад̇д̇агз жзва, д̣̇уб̣б̣ажз гулад̣̇уусагз;
Bhedānuvattake ceva, dubbace kuladūsake;
сан̇гхабхзд̣̇агад̇уляова, ход̇и аабад̇д̇инижчаяо.
Saṅghabhedakatulyova, hoti āpattinicchayo.
сан̇гхаад̣̇исзсагат̇аа.
Saṅghādisesakathā.
32.
32.
ад̇иггаманд̇о ад̇ирзгажийварам̣;
Atikkamanto atirekacīvaraṃ;
д̣̇асаахамаабаж̇ж̇ад̇и згамзва;
Dasāhamāpajjati ekameva;
ниссаг̇г̇ибаажид̇д̇ияамзгарад̇д̇им̣;
Nissaggipācittiyamekarattiṃ;
д̇ижийварзнааби винаа васанд̇о.
Ticīvarenāpi vinā vasanto.
33.
33.
маасам̣ ад̇иггаманд̇о хи, г̇ахзд̇ваа гаалажийварам̣;
Māsaṃ atikkamanto hi, gahetvā kālacīvaraṃ;
згам̣ аабаж̇ж̇ад̇аабад̇д̇им̣, ниссаг̇г̇ияамуд̣̇ийрид̇ам̣.
Ekaṃ āpajjatāpattiṃ, nissaggiyamudīritaṃ.
34.
34.
ан̃н̃аад̇игааяа яам̣ гин̃жи;
Aññātikāya yaṃ kiñci;
бураан̣ажийварам̣ бана;
Purāṇacīvaraṃ pana;
д̇ховаабзд̇и сажз д̇асса;
Dhovāpeti sace tassa;
хонд̇и аабад̇д̇ияо д̣̇увз.
Honti āpattiyo duve.
35.
35.
д̇ховаабзд̇и баяог̇асмим̣, д̣̇уггадам̣ самуд̣̇аахадам̣;
Dhovāpeti payogasmiṃ, dukkaṭaṃ samudāhaṭaṃ;
ниссаг̇г̇ияаава баажид̇д̇и, ход̇и д̇ховаабид̇з бана.
Nissaggiyāva pācitti, hoti dhovāpite pana.
36.
36.
ан̃н̃аад̇игааяа хад̇т̇амхаа, жийварам̣ бадиг̇ан̣хад̇о;
Aññātikāya hatthamhā, cīvaraṃ paṭigaṇhato;
г̇ахан̣з д̣̇уггадам̣ вуд̇д̇ам̣, баажид̇д̇и г̇ахид̇з сияаа.
Gahaṇe dukkaṭaṃ vuttaṃ, pācitti gahite siyā.
37.
37.
ан̃н̃аад̇агам̣ г̇ахабад̇им̣, г̇ахабад̇аанимзва ваа;
Aññātakaṃ gahapatiṃ, gahapatānimeva vā;
жийварам̣ вин̃н̃аабзнд̇о д̣̇вз, бхигку аабад̇д̇ияо пусз.
Cīvaraṃ viññāpento dve, bhikkhu āpattiyo phuse.
38.
38.
вин̃н̃аабзд̇и баяог̇асмим̣, д̣̇уггадам̣ баригид̇д̇ид̇ам̣;
Viññāpeti payogasmiṃ, dukkaṭaṃ parikittitaṃ;
вин̃н̃аабид̇з жа ниссаг̇г̇и, баажид̇д̇и барияаабуд̇аа.
Viññāpite ca nissaggi, pācitti pariyāputā.
39.
39.
бхигку жийвараман̃н̃аад̇им̣, вин̃н̃аабзнд̇о д̇ад̣̇уд̇д̇арим̣;
Bhikkhu cīvaramaññātiṃ, viññāpento taduttariṃ;
баяог̇з д̣̇уггадам̣, вин̃н̃аа-бид̇з ниссаг̇г̇ияам̣ пусз.
Payoge dukkaṭaṃ, viññā-pite nissaggiyaṃ phuse.
40.
40.
ан̃н̃аад̇агам̣ ган̃жи убаасагам̣ ваа;
Aññātakaṃ kañci upāsakaṃ vā;
убаасигам̣ ваа убасан̇гамид̇ваа;
Upāsikaṃ vā upasaṅkamitvā;
буб̣б̣зва худ̇ваа бана аббаваарид̇о;
Pubbeva hutvā pana appavārito;
вад̇т̇з вигаббам̣ бадибаж̇ж̇амаано.
Vatthe vikappaṃ paṭipajjamāno.
41.
41.
д̣̇увз аабаж̇ж̇ад̇аабад̇д̇ий, баяог̇з д̣̇уггадам̣ сияаа;
Duve āpajjatāpattī, payoge dukkaṭaṃ siyā;
вигаббам̣ бана аабаннз, ниссаг̇г̇ияамуд̣̇ийрид̇ам̣.
Vikappaṃ pana āpanne, nissaggiyamudīritaṃ.
42.
42.
ан̃н̃аад̇им̣ убасан̇гамма, буб̣б̣зязваббаваарид̇о;
Aññātiṃ upasaṅkamma, pubbeyevappavārito;
вигаббам̣ жийварз бхигку, аабаж̇ж̇анд̇о д̣̇увз пусз.
Vikappaṃ cīvare bhikkhu, āpajjanto duve phuse.
43.
43.
д̇ат̇аад̇ирзгад̇игкад̇д̇ум̣, жод̣̇анааяа жа бхигку жз;
Tathātirekatikkhattuṃ, codanāya ca bhikkhu ce;
г̇анд̇ваад̇ирзгачагкад̇д̇ум̣, таанзнаби жа жийварам̣.
Gantvātirekachakkhattuṃ, ṭhānenapi ca cīvaraṃ.
44.
44.
нибпаад̣̇зд̇и сажз д̇асса, хонд̇и аабад̇д̇ияо д̣̇увз;
Nipphādeti sace tassa, honti āpattiyo duve;
баяог̇з д̣̇уггадам̣, д̇асса, лаабхз ниссаг̇г̇ияам̣ сияаа.
Payoge dukkaṭaṃ, tassa, lābhe nissaggiyaṃ siyā.
гат̇инаваг̇г̇о батамо.
Kathinavaggo paṭhamo.
45.
45.
д̣̇осаа госияаваг̇г̇асса, д̣̇взд̣̇взаад̣̇ийсу бан̃жасу;
Dosā kosiyavaggassa, dvedveādīsu pañcasu;
баяог̇з д̣̇уггадам̣ вуд̇д̇ам̣, лаабхз ниссаг̇г̇ияам̣ сияаа.
Payoge dukkaṭaṃ vuttaṃ, lābhe nissaggiyaṃ siyā.
46.
46.
г̇ахзд̇взл̣агаломаани, д̇ияож̇анамад̇иггамам̣;
Gahetveḷakalomāni, tiyojanamatikkamaṃ;
д̣̇уггадам̣ батамз баад̣̇з, ниссаг̇г̇им̣ д̣̇уд̇ияз пусз.
Dukkaṭaṃ paṭhame pāde, nissaggiṃ dutiye phuse.
47.
47.
бхигку бхигкунияан̃н̃ааяа, д̇ховаабзд̇зл̣аломагам̣;
Bhikkhu bhikkhuniyaññāya, dhovāpeteḷalomakaṃ;
баяог̇з д̣̇уггадам̣, д̇асса, д̇ход̇з ниссаг̇г̇ияам̣ сияаа.
Payoge dukkaṭaṃ, tassa, dhote nissaggiyaṃ siyā.
48.
48.
руубияам̣ бадиг̇ан̣ханд̇о, д̣̇вз банаабад̇д̇ияо пусз;
Rūpiyaṃ paṭigaṇhanto, dve panāpattiyo phuse;
баяог̇з д̣̇уггадам̣ вуд̇д̇ам̣, ниссаг̇г̇и г̇ахид̇з сияаа.
Payoge dukkaṭaṃ vuttaṃ, nissaggi gahite siyā.
49.
49.
наанаагаарам̣ самаабаж̇ж̇ам̣, сам̣вохааран̃жа руубияз;
Nānākāraṃ samāpajjaṃ, saṃvohārañca rūpiye;
самаабаннз жа ниссаг̇г̇им̣, баяог̇з д̣̇уггадам̣ пусз.
Samāpanne ca nissaggiṃ, payoge dukkaṭaṃ phuse.
50.
50.
наанаббагаарагам̣ бхигку, аабаж̇ж̇з гаяавиггаяам̣;
Nānappakārakaṃ bhikkhu, āpajje kayavikkayaṃ;
баяог̇з д̣̇уггадам̣, д̇асмим̣, гад̇з ниссаг̇г̇ияам̣ пусз.
Payoge dukkaṭaṃ, tasmiṃ, kate nissaggiyaṃ phuse.
госияаваг̇г̇о д̣̇уд̇ияо.
Kosiyavaggo dutiyo.
51.
51.
бад̇д̇ам̣ ад̇иггамзнд̇асса, д̣̇асаахамад̇ирзгагам̣;
Pattaṃ atikkamentassa, dasāhamatirekakaṃ;
д̇асса ниссаг̇г̇ияаабад̇д̇и, ход̇и згаава бхигкуно.
Tassa nissaggiyāpatti, hoti ekāva bhikkhuno.
52.
52.
абан̃жаб̣анд̇ханз бад̇д̇з, виж̇ж̇амаанзби бхигкуно;
Apañcabandhane patte, vijjamānepi bhikkhuno;
ан̃н̃ам̣ бана навам̣ бад̇д̇ам̣, жзд̇аабзд̇и сажз бана.
Aññaṃ pana navaṃ pattaṃ, cetāpeti sace pana.
53.
53.
д̣̇вз банаабад̇д̇ияо бхигку, аабаж̇ж̇ад̇и, на сам̣саяо;
Dve panāpattiyo bhikkhu, āpajjati, na saṃsayo;
баяог̇з д̣̇уггадам̣, д̇асса, лаабхз ниссаг̇г̇ияам̣ пусз.
Payoge dukkaṭaṃ, tassa, lābhe nissaggiyaṃ phuse.
54.
54.
бадиг̇г̇ахзд̇ваа бхзсаж̇ж̇ам̣, сад̇д̇аахам̣ яо ад̇иггамз;
Paṭiggahetvā bhesajjaṃ, sattāhaṃ yo atikkame;
згам̣ ниссаг̇г̇ияаабад̇д̇им̣, аабаж̇ж̇ад̇и хи со бана.
Ekaṃ nissaggiyāpattiṃ, āpajjati hi so pana.
55.
55.
агаалз бариязсанд̇о, вассасаадигажийварам̣;
Akāle pariyesanto, vassasāṭikacīvaraṃ;
баяог̇з д̣̇уггадам̣, д̇асса, лаабхз ниссаг̇г̇ияам̣ пусз.
Payoge dukkaṭaṃ, tassa, lābhe nissaggiyaṃ phuse.
56.
56.
бхигкуно жийварам̣ д̣̇ад̇ваа, ажчинд̣̇анд̇о д̣̇увз пусз;
Bhikkhuno cīvaraṃ datvā, acchindanto duve phuse;
баяог̇з д̣̇уггадам̣ вуд̇д̇ам̣, хадз ниссаг̇г̇ияам̣ сияаа.
Payoge dukkaṭaṃ vuttaṃ, haṭe nissaggiyaṃ siyā.
57.
57.
вин̃н̃аабзд̇ваа саяам̣ суд̇д̇ам̣, д̇анд̇авааязхи жийварам̣;
Viññāpetvā sayaṃ suttaṃ, tantavāyehi cīvaraṃ;
вааяаабзд̇и сажз бхигку, д̣̇вз банаабад̇д̇ияо пусз.
Vāyāpeti sace bhikkhu, dve panāpattiyo phuse.
58.
58.
яо банан̃н̃аад̇агассзва, д̇анд̇авааяз самзжжа жз;
Yo panaññātakasseva, tantavāye samecca ce;
вигаббам̣ жийварз бхигку, аабаж̇ж̇ам̣ аббаваарид̇о.
Vikappaṃ cīvare bhikkhu, āpajjaṃ appavārito.
59.
59.
д̣̇вз банаабад̇д̇ияо со хи, аабаж̇ж̇ад̇и, на сам̣саяо;
Dve panāpattiyo so hi, āpajjati, na saṃsayo;
баяог̇з д̣̇уггадам̣, д̇асса, лаабхз ниссаг̇г̇ияам̣ сияаа.
Payoge dukkaṭaṃ, tassa, lābhe nissaggiyaṃ siyā.
60.
60.
бадиг̇г̇ахзд̇ваа ажжзга-сан̃н̃ид̇ам̣ бана жийварам̣;
Paṭiggahetvā acceka-saññitaṃ pana cīvaraṃ;
гаалам̣ ад̇иггамзнд̇о д̇ам̣, згам̣ ниссаг̇г̇ияам̣ пусз.
Kālaṃ atikkamento taṃ, ekaṃ nissaggiyaṃ phuse.
61.
61.
д̇ин̣н̣аман̃н̃ад̇арам̣ вад̇т̇ам̣, нид̣̇ахид̇ваа гхарзд̇хигам̣;
Tiṇṇamaññataraṃ vatthaṃ, nidahitvā gharedhikaṃ;
чаарад̇д̇ад̇о винаа д̇зна, васам̣ ниссаг̇г̇ияам̣ пусз.
Chārattato vinā tena, vasaṃ nissaggiyaṃ phuse.
62.
62.
ж̇аанам̣ барин̣ад̇ам̣ лаабхам̣, сан̇гхигам̣ ад̇д̇ано бана;
Jānaṃ pariṇataṃ lābhaṃ, saṅghikaṃ attano pana;
барин̣аамзд̇и жз бхигку, д̣̇вз банаабад̇д̇ияо пусз.
Pariṇāmeti ce bhikkhu, dve panāpattiyo phuse.
63.
63.
баяог̇з д̣̇уггадам̣ ход̇и, ниссаг̇г̇и барин̣аамид̇з;
Payoge dukkaṭaṃ hoti, nissaggi pariṇāmite;
саб̣б̣ад̇т̇а аббанааваара-барихаани гад̇аа маяаа.
Sabbattha appanāvāra-parihāni katā mayā.
бад̇д̇аваг̇г̇о д̇ад̇ияо.
Pattavaggo tatiyo.
д̇им̣саниссаг̇г̇ияагат̇аа.
Tiṃsanissaggiyakathā.
64.
64.
вад̣̇анд̇асса мусааваад̣̇ам̣, бан̃жа аабад̇д̇ияо сияум̣;
Vadantassa musāvādaṃ, pañca āpattiyo siyuṃ;
мануссуд̇д̇арид̇хаммз д̇у, абхууд̇асмим̣ барааж̇аяо.
Manussuttaridhamme tu, abhūtasmiṃ parājayo.
65.
65.
жод̣̇анааяа г̇арум̣ бхигкум̣, амууланд̇имавад̇т̇унаа;
Codanāya garuṃ bhikkhuṃ, amūlantimavatthunā;
барияааяаважанз н̃аад̇з, т̇уллажжаяамуд̣̇ийрид̇ам̣.
Pariyāyavacane ñāte, thullaccayamudīritaṃ.
66.
66.
но жз бадивиж̇аанаад̇и, д̣̇уггадам̣ самуд̣̇аахадам̣;
No ce paṭivijānāti, dukkaṭaṃ samudāhaṭaṃ;
самбаж̇аанамусааваад̣̇з, баажид̇д̇и барид̣̇ийбид̇аа.
Sampajānamusāvāde, pācitti paridīpitā.
67.
67.
аабад̇д̇ияо д̣̇увз вуд̇д̇аа, бхигкуссомасад̇о бана;
Āpattiyo duve vuttā, bhikkhussomasato pana;
баажид̇д̇и убасамбаннам̣, д̣̇уггадам̣ ид̇арам̣ сияаа.
Pācitti upasampannaṃ, dukkaṭaṃ itaraṃ siyā.
68.
68.
бзсун̃н̃ахаран̣з д̣̇взби, хонд̇и, баажид̇д̇ияам̣ бана;
Pesuññaharaṇe dvepi, honti, pācittiyaṃ pana;
убасамбаннабзсун̃н̃з, сзсз аабад̇д̇и д̣̇уггадам̣.
Upasampannapesuññe, sese āpatti dukkaṭaṃ.
69.
69.
бад̣̇асонубасамбаннам̣ , д̇хаммам̣ ваажзд̇и жз д̣̇увз;
Padasonupasampannaṃ , dhammaṃ vāceti ce duve;
баяог̇з д̣̇уггадам̣, баад̣̇з, баад̣̇з баажид̇д̇ияам̣ сияаа.
Payoge dukkaṭaṃ, pāde, pāde pācittiyaṃ siyā.
70.
70.
д̇ирад̇д̇аанубасамбанна-сахасзяяааяа уд̇д̇арим̣;
Tirattānupasampanna-sahaseyyāya uttariṃ;
баяог̇з д̣̇уггадам̣ вуд̇д̇ам̣, баннз баажид̇д̇ияам̣ сияаа.
Payoge dukkaṭaṃ vuttaṃ, panne pācittiyaṃ siyā.
71.
71.
габбзд̇и маад̇уг̇аамзна, сахасзяяам̣ сажз бана;
Kappeti mātugāmena, sahaseyyaṃ sace pana;
д̣̇вз со аабаж̇ж̇ад̇аабад̇д̇ий, рад̇д̇ияам̣ д̣̇уггадаад̣̇аяо.
Dve so āpajjatāpattī, rattiyaṃ dukkaṭādayo.
72.
72.
уд̣̇д̇хам̣ чаббан̃жаваажаахи, д̇хаммам̣ д̣̇зсзд̇и ид̇т̇ияаа;
Uddhaṃ chappañcavācāhi, dhammaṃ deseti itthiyā;
баяог̇з д̣̇уггадам̣, баад̣̇з, баад̣̇з баажид̇д̇ияам̣ сияаа.
Payoge dukkaṭaṃ, pāde, pāde pācittiyaṃ siyā.
73.
73.
бхууд̇ам̣ анубасамбаннз, мануссуд̇д̇арид̇хаммагам̣;
Bhūtaṃ anupasampanne, manussuttaridhammakaṃ;
аарожзд̇и сажз д̇асса, хонд̇и д̣̇вз д̣̇уггадаад̣̇аяо.
Āroceti sace tassa, honti dve dukkaṭādayo.
74.
74.
вад̣̇ам̣ анубасамбаннз, д̣̇удтуллаабад̇д̇иман̃н̃ад̇о;
Vadaṃ anupasampanne, duṭṭhullāpattimaññato;
баяог̇з д̣̇уггадам̣ д̇асса, баажид̇д̇аарожид̇з сияаа.
Payoge dukkaṭaṃ tassa, pācittārocite siyā.
75.
75.
бат̇авим̣ кан̣ад̇о д̇асса, баяог̇з д̣̇уггадам̣ мад̇ам̣;
Pathaviṃ khaṇato tassa, payoge dukkaṭaṃ mataṃ;
бахаарз жа бахаарз жа, баажид̇д̇и барияаабуд̇аа.
Pahāre ca pahāre ca, pācitti pariyāputā.
мусааваад̣̇аваг̇г̇о батамо.
Musāvādavaggo paṭhamo.
76.
76.
бхууд̇аг̇аамам̣ д̇у баад̇знд̇о, д̣̇вз банаабад̇д̇ияо пусз;
Bhūtagāmaṃ tu pātento, dve panāpattiyo phuse;
баяог̇з д̣̇уггадам̣, д̇асса, баад̇з баажид̇д̇и д̣̇ийбид̇аа.
Payoge dukkaṭaṃ, tassa, pāte pācitti dīpitā.
77.
77.
ан̃н̃знан̃н̃ам̣ вад̣̇анд̇асса, д̣̇вз сияум̣ ан̃н̃аваад̣̇агз;
Aññenaññaṃ vadantassa, dve siyuṃ aññavādake;
аробид̇з д̣̇уггадам̣ д̇у, ход̇и баажид̇д̇и робид̇з.
Aropite dukkaṭaṃ tu, hoti pācitti ropite.
78.
78.
уж̇жхаабзнд̇о барам̣ бхигкум̣, д̣̇вз банаабад̇д̇ияо пусз;
Ujjhāpento paraṃ bhikkhuṃ, dve panāpattiyo phuse;
баяог̇з д̣̇уггадам̣, уж̇жхаа-бид̇з баажид̇д̇ияам̣ сияаа.
Payoge dukkaṭaṃ, ujjhā-pite pācittiyaṃ siyā.
79.
79.
аж̇жхогаасз д̇у ман̃жаад̣̇им̣, сант̇арид̇ваана сан̇гхигам̣;
Ajjhokāse tu mañcādiṃ, santharitvāna saṅghikaṃ;
баггаманд̇о анаабужчаа, аабад̇д̇им̣ д̣̇увид̇хам̣ пусз.
Pakkamanto anāpucchā, āpattiṃ duvidhaṃ phuse.
80.
80.
лзд̣д̣убаад̇з ад̇игганд̇з, баад̣̇зна батамзна д̇у;
Leḍḍupāte atikkante, pādena paṭhamena tu;
д̣̇уггадам̣, д̣̇уд̇иязнааби, баажид̇д̇и барид̣̇ийбаяз.
Dukkaṭaṃ, dutiyenāpi, pācitti paridīpaye.
81.
81.
вихаарз сан̇гхигз сзяяам̣, сант̇арид̇ваа ануд̣̇д̇харам̣;
Vihāre saṅghike seyyaṃ, santharitvā anuddharaṃ;
анаабужчаа баггаманд̇о, д̣̇увид̇хаабад̇д̇ияо пусз.
Anāpucchā pakkamanto, duvidhāpattiyo phuse.
82.
82.
баригкзбз ад̇игганд̇з, баад̣̇зна батамзна д̇у;
Parikkhepe atikkante, pādena paṭhamena tu;
д̣̇уггадам̣ бана уд̣̇д̣̇идтам̣, баажид̇д̇и д̣̇уд̇иязна д̇у.
Dukkaṭaṃ pana uddiṭṭhaṃ, pācitti dutiyena tu.
83.
83.
вихаарз сан̇гхигз ж̇аанам̣, буб̣б̣уубаг̇ад̇абхигкугам̣;
Vihāre saṅghike jānaṃ, pubbūpagatabhikkhukaṃ;
сзяяам̣ габбаяад̇о хонд̇и, баяог̇з д̣̇уггадаад̣̇аяо.
Seyyaṃ kappayato honti, payoge dukkaṭādayo.
84.
84.
сан̇гхигаа губид̇о бхигкум̣, ниггад̣дхад̇и вихаарад̇о;
Saṅghikā kupito bhikkhuṃ, nikkaḍḍhati vihārato;
баяог̇з д̣̇уггадам̣ вуд̇д̇ам̣, сзсам̣ ниггад̣дхид̇з сияаа.
Payoge dukkaṭaṃ vuttaṃ, sesaṃ nikkaḍḍhite siyā.
85.
85.
вихаарз сан̇гхигз бхигку, взхаасагудияуубари;
Vihāre saṅghike bhikkhu, vehāsakuṭiyūpari;
аахажжабаад̣̇агз сийд̣̇ам̣, пусз д̣̇вз д̣̇уггадаад̣̇аяо.
Āhaccapādake sīdaṃ, phuse dve dukkaṭādayo.
86.
86.
ад̇хидтид̇ваа д̣̇вад̇д̇ибарияааяз, уд̇д̇аримби ад̇хидтад̇о;
Adhiṭṭhitvā dvattipariyāye, uttarimpi adhiṭṭhato;
баяог̇з д̣̇уггадам̣ ход̇и, баажид̇д̇и банад̇хидтид̇з.
Payoge dukkaṭaṃ hoti, pācitti panadhiṭṭhite.
87.
87.
ж̇аанам̣ саббаан̣агам̣ д̇ояам̣, д̇ин̣ам̣ ваа син̃жад̇о бана;
Jānaṃ sappāṇakaṃ toyaṃ, tiṇaṃ vā siñcato pana;
баяог̇з д̣̇уггадам̣ ход̇и, сид̇д̇з баажид̇д̇ияам̣ сияаа.
Payoge dukkaṭaṃ hoti, sitte pācittiyaṃ siyā.
бхууд̇аг̇аамаваг̇г̇о д̣̇уд̇ияо.
Bhūtagāmavaggo dutiyo.
88.
88.
пусз бхигкунияо бхигку, овад̣̇анд̇о асаммад̇о;
Phuse bhikkhuniyo bhikkhu, ovadanto asammato;
баяог̇з д̣̇уггадам̣, д̇асса, баажид̇д̇овад̣̇ид̇з сияаа.
Payoge dukkaṭaṃ, tassa, pācittovadite siyā.
89.
89.
д̣̇уд̇ияз д̇ад̇ияз жзва, жад̇уд̇т̇зби жа саб̣б̣асо;
Dutiye tatiye ceva, catutthepi ca sabbaso;
батамзна самаанаава, аабад̇д̇ийнам̣ вибхааг̇ад̇аа.
Paṭhamena samānāva, āpattīnaṃ vibhāgatā.
90.
90.
жийварам̣ бхигку ан̃н̃аад̇и-гааяа д̣̇знд̇о д̣̇увз пусз;
Cīvaraṃ bhikkhu aññāti-kāya dento duve phuse;
баяог̇з д̣̇уггадам̣ вуд̇д̇ам̣, д̣̇иннз баажид̇д̇ияам̣ сияаа.
Payoge dukkaṭaṃ vuttaṃ, dinne pācittiyaṃ siyā.
91.
91.
ан̃н̃аад̇игабхигкунияаа , бхигку сиб̣б̣зяяа жийварам̣;
Aññātikabhikkhuniyā , bhikkhu sibbeyya cīvaraṃ;
баяог̇з д̣̇уггадам̣ д̇асса, баажид̇д̇и бана сиб̣б̣ид̇з.
Payoge dukkaṭaṃ tassa, pācitti pana sibbite.
92.
92.
ад̣̇д̇хаанан̃н̃ад̇ра самаяаа, бхигку бхигкунияаа саха;
Addhānaññatra samayā, bhikkhu bhikkhuniyā saha;
сам̣вид̇хааяа д̇у г̇ажчанд̇о, пусз д̣̇вз д̣̇уггадаад̣̇аяо.
Saṃvidhāya tu gacchanto, phuse dve dukkaṭādayo.
93.
93.
наавзгам̣ абхирууханд̇о, бхигку бхигкунияаа саха;
Nāvekaṃ abhirūhanto, bhikkhu bhikkhuniyā saha;
сам̣вид̇хааяа пусз д̣̇взби, баяог̇з д̣̇уггадаад̣̇аяо.
Saṃvidhāya phuse dvepi, payoge dukkaṭādayo.
94.
94.
ж̇аанам̣ бхигкунияаа бин̣д̣а-баад̇ам̣ д̇у барибаажид̇ам̣;
Jānaṃ bhikkhuniyā piṇḍa-pātaṃ tu paripācitaṃ;
бхун̃ж̇анд̇о д̣̇увид̇хаабад̇д̇и-маабаж̇ж̇ад̇и, на сам̣саяо.
Bhuñjanto duvidhāpatti-māpajjati, na saṃsayo.
95.
95.
‘‘бхун̃ж̇иссаамий’’д̇и жз бхад̇д̇ам̣, бадиг̇г̇ан̣хаад̇и д̣̇уггадам̣;
‘‘Bhuñjissāmī’’ti ce bhattaṃ, paṭiggaṇhāti dukkaṭaṃ;
аж̇жхохаарабаяог̇зсу, баажид̇д̇и барид̣̇ийбид̇аа.
Ajjhohārapayogesu, pācitti paridīpitā.
96.
96.
бхигку бхигкунияаа сад̣̇д̇хим̣, нисаж̇ж̇ам̣ д̇у рахо бана;
Bhikkhu bhikkhuniyā saddhiṃ, nisajjaṃ tu raho pana;
габбзнд̇о хи пусз д̣̇взби, баяог̇з д̣̇уггадаад̣̇аяо.
Kappento hi phuse dvepi, payoge dukkaṭādayo.
оваад̣̇аваг̇г̇о д̇ад̇ияо.
Ovādavaggo tatiyo.
97.
97.
д̇ад̣̇уд̇д̇арим̣ аавасат̇а-бин̣д̣ам̣ д̇у барибхун̃ж̇ад̇о;
Taduttariṃ āvasatha-piṇḍaṃ tu paribhuñjato;
ананд̇арасса ваг̇г̇асса, навамзна само наяо.
Anantarassa vaggassa, navamena samo nayo.
98.
98.
д̣̇уд̇ияз д̇ад̇ияз жааби, висзсо над̇т̇и гожиби;
Dutiye tatiye cāpi, viseso natthi kocipi;
ананд̇арасамаанаава, аабад̇д̇ийнам̣ вибхааг̇ад̇аа.
Anantarasamānāva, āpattīnaṃ vibhāgatā.
99.
99.
д̣̇вад̇д̇ибад̇д̇з г̇ахзд̇ваана, г̇ан̣хад̇о хи д̇ад̣̇уд̇д̇арим̣;
Dvattipatte gahetvāna, gaṇhato hi taduttariṃ;
баяог̇з д̣̇уггадам̣ вуд̇д̇ам̣, баажид̇д̇и г̇ахид̇з сияаа.
Payoge dukkaṭaṃ vuttaṃ, pācitti gahite siyā.
100.
100.
бан̃жамз батамзнзва, само аабад̇д̇инижчаяо;
Pañcame paṭhameneva, samo āpattinicchayo;
чадтз анад̇ирид̇д̇зна, бхуд̇д̇аавим̣ д̇у баваарид̇ам̣.
Chaṭṭhe anatirittena, bhuttāviṃ tu pavāritaṃ.
101.
101.
абхихадтум̣ баваарзнд̇о, д̣̇вз банаабад̇д̇ияо пусз;
Abhihaṭṭhuṃ pavārento, dve panāpattiyo phuse;
важанзна жа д̇ассзва, ‘‘бхун̃ж̇иссаамий’’д̇и г̇ан̣хад̇и.
Vacanena ca tasseva, ‘‘bhuñjissāmī’’ti gaṇhati.
102.
102.
г̇ахан̣з д̣̇уггадам̣ д̇асса, бидагз самуд̣̇аахадам̣;
Gahaṇe dukkaṭaṃ tassa, piṭake samudāhaṭaṃ;
бхож̇анасса баносаанз, баажид̇д̇и барияаабуд̇аа.
Bhojanassa panosāne, pācitti pariyāputā.
103.
103.
сад̇д̇амз адтамз жзва, навамз д̣̇асамзби жа;
Sattame aṭṭhame ceva, navame dasamepi ca;
батамзна самаанаава, аабад̇д̇ийнам̣ вибхааг̇ад̇аа.
Paṭhamena samānāva, āpattīnaṃ vibhāgatā.
бхож̇анаваг̇г̇о жад̇уд̇т̇о.
Bhojanavaggo catuttho.
104.
104.
ажзлагаад̣̇ино д̣̇знд̇о, сахад̇т̇аа бхож̇анаад̣̇игам̣;
Acelakādino dento, sahatthā bhojanādikaṃ;
баяог̇з д̣̇уггадам̣ бад̇д̇о, д̣̇иннз баажид̇д̇ияам̣ пусз.
Payoge dukkaṭaṃ patto, dinne pācittiyaṃ phuse.
105.
105.
д̣̇аабзд̇ваа ваа ад̣̇аабзд̇ваа, уяяож̇знд̇о д̣̇увз пусз;
Dāpetvā vā adāpetvā, uyyojento duve phuse;
баяог̇з д̣̇уггадам̣, д̇асмим̣, баажид̇д̇уяяож̇ид̇з сияаа.
Payoge dukkaṭaṃ, tasmiṃ, pācittuyyojite siyā.
106.
106.
нисаж̇ж̇ам̣ бхигку габбзнд̇о, гулз бана сабхож̇анз;
Nisajjaṃ bhikkhu kappento, kule pana sabhojane;
аабад̇д̇ияо пусз д̣̇взби, баяог̇з д̣̇уггадаад̣̇аяо.
Āpattiyo phuse dvepi, payoge dukkaṭādayo.
107.
107.
жад̇уд̇т̇з бан̃жамз вааби, висзсо над̇т̇и гожиби;
Catutthe pañcame vāpi, viseso natthi kocipi;
д̇ад̇иязна самаанаава, аабад̇д̇иг̇ан̣анаа сияаа.
Tatiyena samānāva, āpattigaṇanā siyā.
108.
108.
санд̇ам̣ бхигкум̣ анаабужчаа, сабхад̇д̇о жа ниманд̇ид̇о;
Santaṃ bhikkhuṃ anāpucchā, sabhatto ca nimantito;
гулзсу бана жаарид̇д̇ам̣, аабаж̇ж̇анд̇о д̣̇увз пусз.
Kulesu pana cārittaṃ, āpajjanto duve phuse.
109.
109.
батамзна жа баад̣̇зна, уммаараад̇иггамз бана;
Paṭhamena ca pādena, ummārātikkame pana;
д̣̇уггадам̣ бидагз вуд̇д̇ам̣, баажид̇д̇и д̣̇уд̇иязна д̇у.
Dukkaṭaṃ piṭake vuttaṃ, pācitti dutiyena tu.
110.
110.
д̇ад̣̇уд̇д̇арим̣ д̇у бхзсаж̇ж̇ам̣, вин̃н̃аабзнд̇о д̣̇увз пусз;
Taduttariṃ tu bhesajjaṃ, viññāpento duve phuse;
баяог̇з д̣̇уггадам̣, вин̃н̃аа-бид̇з баажид̇д̇ияам̣ сияаа.
Payoge dukkaṭaṃ, viññā-pite pācittiyaṃ siyā.
111.
111.
уяяуд̇д̇ам̣ д̣̇ассанад̇т̇ааяа, г̇ажчанд̇о д̣̇вз пусз б̣алам̣;
Uyyuttaṃ dassanatthāya, gacchanto dve phuse balaṃ;
г̇ажчад̇о д̣̇уггадам̣ вуд̇д̇ам̣, ход̇и баажид̇д̇и бассад̇о.
Gacchato dukkaṭaṃ vuttaṃ, hoti pācitti passato.
112.
112.
ад̇ирзгад̇ирад̇д̇ам̣ д̇у, сзнааяа васад̇о д̣̇увз;
Atirekatirattaṃ tu, senāya vasato duve;
баяог̇з д̣̇уггадам̣ вуд̇д̇ам̣, баажид̇д̇и васид̇з сияаа.
Payoge dukkaṭaṃ vuttaṃ, pācitti vasite siyā.
113.
113.
уяяод̇хигам̣ д̇у г̇ажчанд̇о, д̣̇вз банаабад̇д̇ияо пусз;
Uyyodhikaṃ tu gacchanto, dve panāpattiyo phuse;
г̇ажчанд̇о д̣̇уггадам̣ вуд̇д̇ам̣, ход̇и баажид̇д̇и бассад̇о.
Gacchanto dukkaṭaṃ vuttaṃ, hoti pācitti passato.
ажзлагаваг̇г̇о бан̃жамо.
Acelakavaggo pañcamo.
114.
114.
сурам̣ ваа бана мзрзяяам̣, биванд̇о д̣̇вз пусз муни;
Suraṃ vā pana mereyyaṃ, pivanto dve phuse muni;
г̇ан̣хад̇о д̣̇уггадам̣ баад̇ум̣, бийд̇з баажид̇д̇ияам̣ сияаа.
Gaṇhato dukkaṭaṃ pātuṃ, pīte pācittiyaṃ siyā.
115.
115.
бхигкан̇г̇улибад̇од̣̇зна, хаасзнд̇о д̣̇вз пусз хавз;
Bhikkhaṅgulipatodena, hāsento dve phuse have;
баяог̇з д̣̇уггадам̣ д̇асса, баажид̇д̇и хасид̇з сияаа.
Payoge dukkaṭaṃ tassa, pācitti hasite siyā.
116.
116.
гийл̣анд̇о уд̣̇агз бхигку, д̣̇вз банаабад̇д̇ияо пусз;
Kīḷanto udake bhikkhu, dve panāpattiyo phuse;
д̣̇уггадам̣ г̇обпагаа хздтаа, баажид̇д̇убариг̇обпагз.
Dukkaṭaṃ gopphakā heṭṭhā, pācittuparigopphake.
117.
117.
яо банаад̣̇арияам̣ бхигку, гаронд̇о д̣̇вз пусз хавз;
Yo panādariyaṃ bhikkhu, karonto dve phuse have;
баяог̇з д̣̇уггадам̣ вуд̇д̇ам̣, гад̇з баажид̇д̇ияам̣ сияаа.
Payoge dukkaṭaṃ vuttaṃ, kate pācittiyaṃ siyā.
118.
118.
бхим̣саабзнд̇о хавз бхигку, д̣̇вз банаабад̇д̇ияо пусз;
Bhiṃsāpento have bhikkhu, dve panāpattiyo phuse;
баяог̇з д̣̇уггадам̣, бхим̣саа-бид̇з баажид̇д̇ияам̣ сияаа.
Payoge dukkaṭaṃ, bhiṃsā-pite pācittiyaṃ siyā.
119.
119.
ж̇од̇им̣ самаад̣̇ахид̇ваана, висиб̣б̣знд̇о д̣̇увз пусз;
Jotiṃ samādahitvāna, visibbento duve phuse;
баяог̇з д̣̇уггадам̣ вуд̇д̇ам̣, баажид̇д̇ияам̣ висийвид̇з.
Payoge dukkaṭaṃ vuttaṃ, pācittiyaṃ visīvite.
120.
120.
орасо ад̣̇д̇хамаасасса, нхааяанд̇о д̣̇вз пусз хавз;
Oraso addhamāsassa, nhāyanto dve phuse have;
баяог̇з д̣̇уггадам̣, нхаана-ссосаанз ид̇арам̣ сияаа.
Payoge dukkaṭaṃ, nhāna-ssosāne itaraṃ siyā.
121.
121.
д̣̇уб̣б̣ан̣н̣агаран̣аанам̣ д̇у, д̇ин̣н̣амзгаманаад̣̇ияа;
Dubbaṇṇakaraṇānaṃ tu, tiṇṇamekamanādiya;
жийварам̣ барибхун̃ж̇анд̇о, д̣̇вз пусз д̣̇уггадаад̣̇аяо.
Cīvaraṃ paribhuñjanto, dve phuse dukkaṭādayo.
122.
122.
жийварам̣ бхигкуаад̣̇ийнам̣, вигаббзд̇ваа ануд̣̇д̇харам̣;
Cīvaraṃ bhikkhuādīnaṃ, vikappetvā anuddharaṃ;
д̣̇вз пусз барибхун̃ж̇анд̇о, баяог̇з д̣̇уггадаад̣̇аяо.
Dve phuse paribhuñjanto, payoge dukkaṭādayo.
123.
123.
бхигкуссаабанид̇хзнд̇о д̣̇вз, пусз бад̇д̇аад̣̇игам̣ бана;
Bhikkhussāpanidhento dve, phuse pattādikaṃ pana;
баяог̇з д̣̇уггадам̣, д̇асмим̣, сзсаабанихид̇з сияаа.
Payoge dukkaṭaṃ, tasmiṃ, sesāpanihite siyā.
сураабаанаваг̇г̇о чадто.
Surāpānavaggo chaṭṭho.
124.
124.
сан̃жижжа ж̇ийвид̇аа баан̣ам̣, воробзнд̇о д̇абод̇хано;
Sañcicca jīvitā pāṇaṃ, voropento tapodhano;
аабад̇д̇ияо жад̇ассова, аабаж̇ж̇ад̇и, на сам̣саяо.
Āpattiyo catassova, āpajjati, na saṃsayo.
125.
125.
анод̣̇иссагамобаад̇ам̣, кан̣ад̇о ход̇и д̣̇уггадам̣;
Anodissakamopātaṃ, khaṇato hoti dukkaṭaṃ;
мануссо марад̇и д̇асмим̣, бад̇ид̇ваа жз барааж̇аяо.
Manusso marati tasmiṃ, patitvā ce parājayo.
126.
126.
яагко вааби д̇иражчаана-г̇ад̇о мануссавиг̇г̇ахо;
Yakkho vāpi tiracchāna-gato manussaviggaho;
бад̇ид̇ваа марад̇ий бзд̇о, д̇асса т̇уллажжаяам̣ сияаа.
Patitvā maratī peto, tassa thullaccayaṃ siyā.
127.
127.
д̇иражчаанаг̇ад̇з д̇асмим̣, нибад̇ид̇ваа мад̇з бана;
Tiracchānagate tasmiṃ, nipatitvā mate pana;
д̇асса баажид̇д̇ияаабад̇д̇и, бан̃н̃ад̇д̇аа бадуб̣уд̣̇д̇хинаа.
Tassa pācittiyāpatti, paññattā paṭubuddhinā.
128.
128.
ж̇аанам̣ саббаан̣агам̣ д̇ояам̣, барибхун̃ж̇ам̣ д̣̇увз пусз;
Jānaṃ sappāṇakaṃ toyaṃ, paribhuñjaṃ duve phuse;
баяог̇з д̣̇уггадам̣ д̇асса, бхуд̇д̇з баажид̇д̇ияам̣ сияаа.
Payoge dukkaṭaṃ tassa, bhutte pācittiyaṃ siyā.
129.
129.
нихад̇аад̇хигаран̣ам̣ ж̇аанам̣, уггодзнд̇о д̣̇увз пусз;
Nihatādhikaraṇaṃ jānaṃ, ukkoṭento duve phuse;
баяог̇з д̣̇уггадам̣ вуд̇д̇ам̣, баажид̇д̇уггодид̇з сияаа.
Payoge dukkaṭaṃ vuttaṃ, pācittukkoṭite siyā.
130.
130.
ж̇аанам̣ бхигкусса д̣̇удтуллам̣, чаад̣̇знд̇о бана важ̇ж̇агам̣;
Jānaṃ bhikkhussa duṭṭhullaṃ, chādento pana vajjakaṃ;
згамаабаж̇ж̇ад̇аабад̇д̇им̣, баажид̇д̇имид̇и д̣̇ийбид̇ам̣.
Ekamāpajjatāpattiṃ, pācittimiti dīpitaṃ.
131.
131.
уунавийсад̇ивассам̣ д̇у, гаронд̇о убасамбад̣̇ам̣;
Ūnavīsativassaṃ tu, karonto upasampadaṃ;
баяог̇з д̣̇уггадам̣ бад̇д̇о, сзсаа самбаад̣̇ид̇з сияаа.
Payoge dukkaṭaṃ patto, sesā sampādite siyā.
132.
132.
ж̇аанам̣ д̇у т̇зяяасад̇т̇зна, сам̣вид̇хааяа сахзва жа;
Jānaṃ tu theyyasatthena, saṃvidhāya saheva ca;
д̇ат̇зва маад̇уг̇аамзна, маг̇г̇ам̣ д̇у бадибаж̇ж̇ад̇о.
Tatheva mātugāmena, maggaṃ tu paṭipajjato.
133.
133.
д̣̇вз банаабад̇д̇ияо хонд̇и, баяог̇з д̣̇уггадам̣ мад̇ам̣;
Dve panāpattiyo honti, payoge dukkaṭaṃ mataṃ;
бадибаннз бануд̣̇д̣̇идтам̣, баажид̇д̇ияамананд̇арам̣.
Paṭipanne panuddiṭṭhaṃ, pācittiyamanantaraṃ.
134.
134.
ажжаж̇ам̣ баабигам̣ д̣̇идтим̣, н̃ад̇д̇ияаа д̣̇уггадам̣ пусз;
Accajaṃ pāpikaṃ diṭṭhiṃ, ñattiyā dukkaṭaṃ phuse;
гаммаваажааяа осаанз, ход̇и баажид̇д̇и бхигкуно.
Kammavācāya osāne, hoti pācitti bhikkhuno.
135.
135.
д̇ат̇аагадаануд̇хаммзна, сам̣бхун̃ж̇анд̇о д̣̇увз пусз;
Tathākaṭānudhammena, saṃbhuñjanto duve phuse;
баяог̇з д̣̇уггадам̣ д̇асса, бхуд̇д̇з баажид̇д̇ияам̣ сияаа.
Payoge dukkaṭaṃ tassa, bhutte pācittiyaṃ siyā.
136.
136.
наасид̇ам̣ саман̣уд̣̇д̣̇зсам̣балаабзнд̇о д̣̇увз пусз;
Nāsitaṃ samaṇuddesaṃpalāpento duve phuse;
баяог̇з д̣̇уггадам̣ вуд̇д̇ам̣, баажид̇д̇и убалаабид̇з.
Payoge dukkaṭaṃ vuttaṃ, pācitti upalāpite.
саббаан̣агаваг̇г̇о сад̇д̇амо.
Sappāṇakavaggo sattamo.
137.
137.
вужжамаанасса бхигкусса, бхигкуухи сахад̇хаммигам̣;
Vuccamānassa bhikkhussa, bhikkhūhi sahadhammikaṃ;
‘‘на сагкиссаами’’ижжзвам̣, бхан̣ад̇о д̣̇уггадаад̣̇аяо.
‘‘Na sakkhissāmi’’iccevaṃ, bhaṇato dukkaṭādayo.
138.
138.
винаяам̣ д̇у виван̣н̣знд̇о, д̣̇вз банаабад̇д̇ияо пусз;
Vinayaṃ tu vivaṇṇento, dve panāpattiyo phuse;
баяог̇з д̣̇уггадам̣ д̇асса, баажид̇д̇зва виван̣н̣ид̇з.
Payoge dukkaṭaṃ tassa, pācitteva vivaṇṇite.
139.
139.
мохзнд̇о д̣̇вз пусз, мохз, д̣̇уггадам̣ д̇у аробид̇з;
Mohento dve phuse, mohe, dukkaṭaṃ tu aropite;
робид̇з бана мохасмим̣, баажид̇д̇ияамуд̣̇ийрид̇ам̣.
Ropite pana mohasmiṃ, pācittiyamudīritaṃ.
140.
140.
бахаарам̣ губид̇о д̣̇знд̇о, бхигкусса д̣̇вз пусз хавз;
Pahāraṃ kupito dento, bhikkhussa dve phuse have;
баяог̇з д̣̇уггадам̣ вуд̇д̇ам̣, баажид̇д̇и бахадз сияаа.
Payoge dukkaṭaṃ vuttaṃ, pācitti pahaṭe siyā.
141.
141.
бхигкусса губид̇о бхигку, уг̇г̇ирам̣ д̇аласад̇д̇игам̣;
Bhikkhussa kupito bhikkhu, uggiraṃ talasattikaṃ;
д̣̇вз пусз д̣̇уггадам̣ яог̇з, баажид̇д̇уг̇г̇ирид̇з сияаа.
Dve phuse dukkaṭaṃ yoge, pācittuggirite siyā.
142.
142.
бхигку сан̇гхаад̣̇исзсзна, амуулзнзва жод̣̇аяам̣;
Bhikkhu saṅghādisesena, amūleneva codayaṃ;
д̣̇вз пусз д̣̇уггадам̣ яог̇з, баажид̇д̇уд̣̇д̇хам̣сид̇з сияаа.
Dve phuse dukkaṭaṃ yoge, pācittuddhaṃsite siyā.
143.
143.
бхигку сан̃жижжа гуггужжам̣, ж̇анаяанд̇о хи бхигкуно;
Bhikkhu sañcicca kukkuccaṃ, janayanto hi bhikkhuno;
д̣̇вз пусз д̣̇уггадам̣ яог̇з, баажид̇д̇уббаад̣̇ид̇з сияаа.
Dve phuse dukkaṭaṃ yoge, pācittuppādite siyā.
144.
144.
д̇идтанд̇убассуд̇им̣ бхигку, д̣̇вз банаабад̇д̇ияо пусз;
Tiṭṭhantupassutiṃ bhikkhu, dve panāpattiyo phuse;
г̇ажчад̇о д̣̇уггадам̣ сод̇ум̣, баажид̇д̇и сун̣ад̇о сияаа.
Gacchato dukkaṭaṃ sotuṃ, pācitti suṇato siyā.
145.
145.
д̇хаммигаанам̣ д̇у гаммаанам̣, чанд̣̇ам̣ д̣̇ад̇ваа д̇ад̇о буна;
Dhammikānaṃ tu kammānaṃ, chandaṃ datvā tato puna;
кийяанад̇хаммамаабаж̇ж̇ам̣, д̣̇вз пусз д̣̇уггадаад̣̇аяо.
Khīyanadhammamāpajjaṃ, dve phuse dukkaṭādayo.
146.
146.
сан̇гхз винижчаяз нидтам̣, аг̇ад̇з чанд̣̇амад̇д̇ано;
Saṅghe vinicchaye niṭṭhaṃ, agate chandamattano;
ад̣̇ад̇ваа г̇ажчад̇о д̇асса, д̣̇вз банаабад̇д̇ияо сияум̣.
Adatvā gacchato tassa, dve panāpattiyo siyuṃ.
147.
147.
хад̇т̇абаасам̣ д̇у сан̇гхасса, ж̇ахад̇о ход̇и д̣̇уггадам̣;
Hatthapāsaṃ tu saṅghassa, jahato hoti dukkaṭaṃ;
ж̇ахид̇з хад̇т̇абаасасмим̣, ход̇и баажид̇д̇и бхигкуно.
Jahite hatthapāsasmiṃ, hoti pācitti bhikkhuno.
148.
148.
самаг̇г̇зна жа сан̇гхзна, д̣̇ад̇ваана саха жийварам̣;
Samaggena ca saṅghena, datvāna saha cīvaraṃ;
кийяанд̇о д̣̇вз пусз бажчаа, баяог̇з д̣̇уггадаад̣̇аяо.
Khīyanto dve phuse pacchā, payoge dukkaṭādayo.
149.
149.
лаабхам̣ барин̣ад̇ам̣ ж̇аанам̣, сан̇гхигам̣ буг̇г̇аласса хи;
Lābhaṃ pariṇataṃ jānaṃ, saṅghikaṃ puggalassa hi;
д̣̇вз пусз барин̣аамзнд̇о, баяог̇з д̣̇уггадаад̣̇аяо.
Dve phuse pariṇāmento, payoge dukkaṭādayo.
сахад̇хаммигаваг̇г̇о адтамо.
Sahadhammikavaggo aṭṭhamo.
150.
150.
буб̣б̣з авид̣̇ид̇о худ̇ваа, ран̃н̃о анд̇збурам̣ бана;
Pubbe avidito hutvā, rañño antepuraṃ pana;
бависанд̇асса бхигкуно, д̣̇вз банаабад̇д̇ияо сияум̣.
Pavisantassa bhikkhuno, dve panāpattiyo siyuṃ.
151.
151.
батамзна жа баад̣̇зна, уммаараад̇иггамз бана;
Paṭhamena ca pādena, ummārātikkame pana;
д̣̇уггадам̣ бана уд̣̇д̣̇идтам̣, баажид̇д̇и д̣̇уд̇иязна д̇у.
Dukkaṭaṃ pana uddiṭṭhaṃ, pācitti dutiyena tu.
152.
152.
рад̇анам̣ бана г̇ан̣ханд̇о, д̣̇вз банаабад̇д̇ияо пусз;
Ratanaṃ pana gaṇhanto, dve panāpattiyo phuse;
баяог̇з д̣̇уггадам̣ д̇асса, баажид̇д̇и г̇ахид̇з сияаа.
Payoge dukkaṭaṃ tassa, pācitti gahite siyā.
153.
153.
санд̇ам̣ бхигкум̣ анаабужчаа, вигаалз г̇аамагам̣ бана;
Santaṃ bhikkhuṃ anāpucchā, vikāle gāmakaṃ pana;
саман̣о бависам̣ д̣̇осз, аабаж̇ж̇ад̇и д̣̇увз бана.
Samaṇo pavisaṃ dose, āpajjati duve pana.
154.
154.
батамзна жа баад̣̇зна, баригкзбам̣ ад̇иггамз;
Paṭhamena ca pādena, parikkhepaṃ atikkame;
д̣̇уггадам̣ д̇асса нид̣̇д̣̇идтам̣, баажид̇д̇и д̣̇уд̇иязна д̇у.
Dukkaṭaṃ tassa niddiṭṭhaṃ, pācitti dutiyena tu.
155.
155.
адтид̣̇анд̇ависаан̣аабхи-ниб̣б̣ад̇д̇ам̣ суужияаа гхарам̣;
Aṭṭhidantavisāṇābhi-nibbattaṃ sūciyā gharaṃ;
гаараабзнд̇о пусз д̣̇взби, баяог̇з д̣̇уггадаад̣̇аяо.
Kārāpento phuse dvepi, payoge dukkaṭādayo.
156.
156.
бамаан̣аад̇ийд̇аман̃жаад̣̇им̣ , гаараабзнд̇о д̣̇увз пусз;
Pamāṇātītamañcādiṃ , kārāpento duve phuse;
баяог̇з д̣̇уггадам̣ вуд̇д̇ам̣, сзсаа гаараабид̇з сияаа.
Payoge dukkaṭaṃ vuttaṃ, sesā kārāpite siyā.
157.
157.
д̇уулонад̣̇д̇хам̣ д̇у ман̃жаад̣̇им̣, гаараабзнд̇о д̣̇увз пусз;
Tūlonaddhaṃ tu mañcādiṃ, kārāpento duve phuse;
баяог̇з д̣̇уггадам̣, д̇асмим̣, сзсаа гаараабид̇з сияаа.
Payoge dukkaṭaṃ, tasmiṃ, sesā kārāpite siyā.
158.
158.
сад̇д̇амз адтамз жзва, навамз д̣̇асамзби жа;
Sattame aṭṭhame ceva, navame dasamepi ca;
ананд̇арасамоязва, аабад̇д̇ийнам̣ винижчаяо.
Anantarasamoyeva, āpattīnaṃ vinicchayo.
рад̇анаваг̇г̇о навамо.
Ratanavaggo navamo.
баажид̇д̇ияагат̇аа.
Pācittiyakathā.
159.
159.
жад̇уусу д̣̇увид̇хаабад̇д̇и, баадид̣̇зсаниязсуби;
Catūsu duvidhāpatti, pāṭidesaniyesupi;
ависзсзна нид̣̇д̣̇идтаа, б̣уд̣̇д̇хзнаад̣̇ижжаб̣анд̇хунаа.
Avisesena niddiṭṭhā, buddhenādiccabandhunā.
160.
160.
‘‘бхун̃ж̇иссаамий’’д̇и бхигкусса, д̣̇уггадам̣ бадиг̇ан̣хад̇о;
‘‘Bhuñjissāmī’’ti bhikkhussa, dukkaṭaṃ paṭigaṇhato;
аж̇жхохаарзсу саб̣б̣ад̇т̇а, баадид̣̇зсанияам̣ сияаа.
Ajjhohāresu sabbattha, pāṭidesaniyaṃ siyā.
баадид̣̇зсанийяагат̇аа.
Pāṭidesanīyakathā.
161.
161.
сзкиязсу жа д̇хаммзсу, згааваабад̇д̇и д̣̇ийбид̇аа;
Sekhiyesu ca dhammesu, ekāvāpatti dīpitā;
анаад̣̇аравасзнзва, д̣̇уггадам̣ самуд̣̇аахадам̣.
Anādaravaseneva, dukkaṭaṃ samudāhaṭaṃ.
сзкияагат̇аа.
Sekhiyakathā.
162.
162.
бан̃н̃ад̇д̇аа мзт̇унам̣ д̇хаммам̣, бадисзванабажжаяаа;
Paññattā methunaṃ dhammaṃ, paṭisevanapaccayā;
гад̇и аабад̇д̇ияо хонд̇и? жад̇ассова бхаванд̇и хи.
Kati āpattiyo honti? Catassova bhavanti hi.
163.
163.
мзт̇унам̣ бадисзванд̇о, аллогаасаббавзсанз;
Methunaṃ paṭisevanto, allokāsappavesane;
мад̇з агкааяид̇з вааби, бхигку баарааж̇игам̣ пусз.
Mate akkhāyite vāpi, bhikkhu pārājikaṃ phuse.
164.
164.
т̇уллажжаяам̣ д̇у язбхуяяа-гкааяид̇з, д̣̇уггадам̣ д̇ат̇аа;
Thullaccayaṃ tu yebhuyya-kkhāyite, dukkaṭaṃ tathā;
мукз ваддагад̇з вуд̇д̇ам̣, баажид̇д̇и ж̇ад̇умадтагз.
Mukhe vaṭṭakate vuttaṃ, pācitti jatumaṭṭhake.
165.
165.
бан̃н̃ад̇д̇аа гааяасам̣саг̇г̇ам̣, самаабаж̇ж̇анабажжаяаа;
Paññattā kāyasaṃsaggaṃ, samāpajjanapaccayā;
гад̇и аабад̇д̇ияо хонд̇и? бан̃жа аабад̇д̇ияо сияум̣.
Kati āpattiyo honti? Pañca āpattiyo siyuṃ.
166.
166.
авассуд̇асса босасса, д̇ат̇аа бхигкунияааби жа;
Avassutassa posassa, tathā bhikkhuniyāpi ca;
баарааж̇игамад̇хагкаад̣̇и-г̇ахан̣ам̣ саад̣̇ияанд̇ияаа.
Pārājikamadhakkhādi-gahaṇaṃ sādiyantiyā.
167.
167.
гааязна пусад̇о гааяам̣, бхигкусса г̇аругам̣ сияаа;
Kāyena phusato kāyaṃ, bhikkhussa garukaṃ siyā;
гааязна гааяаб̣ад̣̇д̇хам̣ д̇у, пусам̣ т̇уллажжаяам̣ сияаа.
Kāyena kāyabaddhaṃ tu, phusaṃ thullaccayaṃ siyā.
168.
168.
бадиб̣ад̣̇д̇хзна гааязна, бадиб̣ад̣̇д̇хам̣ д̇у д̣̇уггадам̣;
Paṭibaddhena kāyena, paṭibaddhaṃ tu dukkaṭaṃ;
баажид̇д̇ияам̣ бануд̣̇д̣̇идтам̣, д̇ассан̇г̇улибад̇од̣̇агз.
Pācittiyaṃ panuddiṭṭhaṃ, tassaṅgulipatodake.
169.
169.
сзсзсу сзкияанд̇зсу, аабад̇д̇ийнам̣ винижчаяо;
Sesesu sekhiyantesu, āpattīnaṃ vinicchayo;
хздтаа вуд̇д̇анаязнзва, взд̣̇ид̇аб̣б̣о вибхаавинаа.
Heṭṭhā vuttanayeneva, veditabbo vibhāvinā.
махаавибхан̇г̇асан̇г̇ахо нидтид̇о.
Mahāvibhaṅgasaṅgaho niṭṭhito.
