| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
៧. មហាបេសការសិក្ខាបទវណ្ណនា
7. Mahāpesakārasikkhāpadavaṇṇanā
៦៤២. សត្តមេ កិញ្ចិមត្តំ អនុបទជ្ជេយ្យាតិ ឥទំ តស្ស កត្តព្ពាការមត្តទស្សនំ, ទានំ បនេត្ថ អង្គំ ន ហោតិ សុត្តវឌ្ឍនវសេនេវ អាបជ្ជិតព្ពត្តា។ តេនេវ បទភាជនេបិ ‘‘តស្ស វចនេន អាយតំ វា វិត្ថតំ វា អប្បិតំ វា ករោតិ, បយោគេ ទុក្កដំ, បដិលាភេន និស្សគ្គិយ’’ន្តិ សុត្តវឌ្ឍនាការមេវ ទស្សេត្វា អាបត្តិ វុត្តា។ មាតិកាដ្ឋកថាយម្បិ (កង្ខា. អដ្ឋ. មហាបេសការសិក្ខាបទវណ្ណនា) វុត្តំ ‘‘ន ភិក្ខុនោ បិណ្ឌបាតទានមត្តេន តំ និស្សគ្គិយំ ហោតិ។ សចេ បន តេ តស្ស វចនេន ចីវរសាមិកានំ ហត្ថតោ សុត្តំ គហេត្វា ឦសកម្បិ អាយតំ វា វិត្ថតំ វា អប្បិតំ វា ករោន្តិ, អថ តេសំ បយោគេ ភិក្ខុនោ ទុក្កដំ, បដិលាភេន និស្សគ្គិយំ ហោតី’’តិ។ អាយតាទីសុ សត្តសុ អាការេសុ អាទិម្ហិ តយោ អាការេ សុត្តវឌ្ឍនេន វិនា ន សក្កា កាតុន្តិ អាហ ‘‘សុត្តវឌ្ឍនអាការមេវ ទស្សេតី’’តិ។ សុវីតាទយោ ហិ អាការេ វិនាបិ សុត្តវឌ្ឍនេន សក្កា កាតុំ។ សេសមេត្ថ ឧត្តានមេវ។ អញ្ញាតកអប្បវារិតានំ តន្តវាយេ ឧបសង្កមិត្វា វិកប្បមាបជ្ជនតា, ចីវរស្ស អត្តុទ្ទេសិកតា, តស្ស វចនេន សុត្តវឌ្ឍនំ, ចីវរស្ស បដិលាភោតិ ឥមានេត្ថ ចត្តារិ អង្គានិ។
642. Sattame kiñcimattaṃ anupadajjeyyāti idaṃ tassa kattabbākāramattadassanaṃ, dānaṃ panettha aṅgaṃ na hoti suttavaḍḍhanavaseneva āpajjitabbattā. Teneva padabhājanepi ‘‘tassa vacanena āyataṃ vā vitthataṃ vā appitaṃ vā karoti, payoge dukkaṭaṃ, paṭilābhena nissaggiya’’nti suttavaḍḍhanākārameva dassetvā āpatti vuttā. Mātikāṭṭhakathāyampi (kaṅkhā. aṭṭha. mahāpesakārasikkhāpadavaṇṇanā) vuttaṃ ‘‘na bhikkhuno piṇḍapātadānamattena taṃ nissaggiyaṃ hoti. Sace pana te tassa vacanena cīvarasāmikānaṃ hatthato suttaṃ gahetvā īsakampi āyataṃ vā vitthataṃ vā appitaṃ vā karonti, atha tesaṃ payoge bhikkhuno dukkaṭaṃ, paṭilābhena nissaggiyaṃ hotī’’ti. Āyatādīsu sattasu ākāresu ādimhi tayo ākāre suttavaḍḍhanena vinā na sakkā kātunti āha ‘‘suttavaḍḍhanaākārameva dassetī’’ti. Suvītādayo hi ākāre vināpi suttavaḍḍhanena sakkā kātuṃ. Sesamettha uttānameva. Aññātakaappavāritānaṃ tantavāye upasaṅkamitvā vikappamāpajjanatā, cīvarassa attuddesikatā, tassa vacanena suttavaḍḍhanaṃ, cīvarassa paṭilābhoti imānettha cattāri aṅgāni.
មហាបេសការសិក្ខាបទវណ្ណនា និដ្ឋិតា។
Mahāpesakārasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៧. មហាបេសការសិក្ខាបទំ • 7. Mahāpesakārasikkhāpadaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៧. មហាបេសការសិក្ខាបទវណ្ណនា • 7. Mahāpesakārasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៧. មហាបេសការសិក្ខាបទវណ្ណនា • 7. Mahāpesakārasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៧. មហាបេសការសិក្ខាបទវណ្ណនា • 7. Mahāpesakārasikkhāpadavaṇṇanā
