| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៧. មហាបេសការសិក្ខាបទវណ្ណនា
7. Mahāpesakārasikkhāpadavaṇṇanā
៦៤១. តេន សមយេនាតិ មហាបេសការសិក្ខាបទំ។ តត្ថ សុត្តំ ធារយិត្វាតិ សុត្តំ តុលេត្វា បលបរិច្ឆេទំ កត្វា។ អប្បិតន្តិ ឃនំ។ សុវីតន្តិ សុដ្ឋុ វីតំ, សព្ពដ្ឋានេសុ សមំ កត្វា វីតំ។ សុប្បវាយិតន្តិ សុដ្ឋុ បវាយិតំ សព្ពដ្ឋានេសុ សមំ កត្វា តន្តេ បសារិតំ។ សុវិលេខិតន្តិ លេខនិយា សុដ្ឋុ វិលិខិតំ។ សុវិតច្ឆិតន្តិ កោច្ឆេន សុដ្ឋុ វិតច្ឆិតំ, សុនិទ្ធោតន្តិ អត្ថោ។ បដិពទ្ធន្តិ វេកល្លំ ។ តន្តេតិ តន្តេ ទីឃតោ បសារណេយេវ ឧបនេត្វាតិ អត្ថោ។
641.Tena samayenāti mahāpesakārasikkhāpadaṃ. Tattha suttaṃ dhārayitvāti suttaṃ tuletvā palaparicchedaṃ katvā. Appitanti ghanaṃ. Suvītanti suṭṭhu vītaṃ, sabbaṭṭhānesu samaṃ katvā vītaṃ. Suppavāyitanti suṭṭhu pavāyitaṃ sabbaṭṭhānesu samaṃ katvā tante pasāritaṃ. Suvilekhitanti lekhaniyā suṭṭhu vilikhitaṃ. Suvitacchitanti kocchena suṭṭhu vitacchitaṃ, suniddhotanti attho. Paṭibaddhanti vekallaṃ . Tanteti tante dīghato pasāraṇeyeva upanetvāti attho.
៦៤២. តត្រ ចេ សោ ភិក្ខូតិ យត្រ គាមេ វា និគមេ វា តេ តន្តវាយា តត្រ។ វិកប្បំ អាបជ្ជេយ្យាតិ វិសិដ្ឋំ កប្បំ អធិកវិធានំ អាបជ្ជេយ្យ។ បាឡិយំ បន យេនាការេន វិកប្បំ អាបន្នោ ហោតិ, តំ ទស្សេតុំ ‘‘ឥទំ ខោ, អាវុសោ’’តិអាទិ វុត្តំ។
642.Tatra ce so bhikkhūti yatra gāme vā nigame vā te tantavāyā tatra. Vikappaṃ āpajjeyyāti visiṭṭhaṃ kappaṃ adhikavidhānaṃ āpajjeyya. Pāḷiyaṃ pana yenākārena vikappaṃ āpanno hoti, taṃ dassetuṃ ‘‘idaṃ kho, āvuso’’tiādi vuttaṃ.
ធម្មម្បិ ភណតីតិ ធម្មកថម្បិ កថេតិ, ‘‘តស្ស វចនេន អាយតំ វា វិត្ថតំ វា អប្បិតំ វា’’តិ សុត្តវឌ្ឍនអាការមេវ ទស្សេតិ។
Dhammampi bhaṇatīti dhammakathampi katheti, ‘‘tassa vacanena āyataṃ vā vitthataṃ vā appitaṃ vā’’ti suttavaḍḍhanaākārameva dasseti.
បុព្ពេ អប្បវារិតោតិ ចីវរសាមិកេហិ បុព្ពេ អប្បវារិតោ ហុត្វា។ សេសំ ឧត្តានត្ថមេវាតិ។
Pubbeappavāritoti cīvarasāmikehi pubbe appavārito hutvā. Sesaṃ uttānatthamevāti.
ឆសមុដ្ឋានំ, កិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មវចីកម្មំ,
Chasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ,
តិចិត្តំ, តិវេទនន្តិ។
Ticittaṃ, tivedananti.
មហាបេសការសិក្ខាបទវណ្ណនា និដ្ឋិតា។
Mahāpesakārasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៧. មហាបេសការសិក្ខាបទំ • 7. Mahāpesakārasikkhāpadaṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៧. មហាបេសការសិក្ខាបទវណ្ណនា • 7. Mahāpesakārasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៧. មហាបេសការសិក្ខាបទវណ្ណនា • 7. Mahāpesakārasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៧. មហាបេសការសិក្ខាបទវណ្ណនា • 7. Mahāpesakārasikkhāpadavaṇṇanā
