| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៨. អច្ចេកចីវរសិក្ខាបទវណ្ណនា
8. Accekacīvarasikkhāpadavaṇṇanā
៦៤៦-៩. តេន សមយេនាតិ អច្ចេកចីវរសិក្ខាបទំ។ តត្ថ ទសាហានាគតន្តិ ទស អហានិ ទសាហំ, តេន ទសាហេន អនាគតា ទសាហានាគតា, ទសាហេន អសម្បត្តាតិ អត្ថោ, តំ ទសាហានាគតំ, អច្ចន្តសំយោគវសេន ភុម្មត្ថេ ឧបយោគវចនំ, តេនេវស្ស បទភាជនេ ‘‘ទសាហានាគតាយា’’តិ វុត្តំ។ បវារណាយាតិ ឥទំ បន យា សា ទសាហានាគតាតិ វុត្តា, តំ សរូបតោ ទស្សេតុំ អសម្មោហត្ថំ អនុបយោគវចនំ។
646-9.Tena samayenāti accekacīvarasikkhāpadaṃ. Tattha dasāhānāgatanti dasa ahāni dasāhaṃ, tena dasāhena anāgatā dasāhānāgatā, dasāhena asampattāti attho, taṃ dasāhānāgataṃ, accantasaṃyogavasena bhummatthe upayogavacanaṃ, tenevassa padabhājane ‘‘dasāhānāgatāyā’’ti vuttaṃ. Pavāraṇāyāti idaṃ pana yā sā dasāhānāgatāti vuttā, taṃ sarūpato dassetuṃ asammohatthaṃ anupayogavacanaṃ.
កត្តិកតេមាសិកបុណ្ណមន្តិ បឋមកត្តិកតេមាសិកបុណ្ណមំ។ ឥធាបិ បឋមបទស្ស អនុបយោគត្តា បុរិមនយេនេវ ភុម្មត្ថេ ឧបយោគវចនំ។ ឥទំ វុត្តំ ហោតិ – ‘‘‘យតោ បដ្ឋាយ បឋមមហាបវារណា ទសាហានាគតា’តិ វុច្ចតិ, សចេបិ តានិ ទិវសានិ អច្ចន្តមេវ ភិក្ខុនោ អច្ចេកចីវរំ ឧប្បជ្ជេយ្យ, ‘អច្ចេកំ ឥទ’ន្តិ ជានមានេន ភិក្ខុនា សព្ពម្បិ បដិគ្គហេតព្ព’’ន្តិ។ តេន បវារណាមាសស្ស ជុណ្ហបក្ខបញ្ចមិតោ បឋាយ ឧប្បន្នស្ស ចីវរស្ស និធានកាលោ ទស្សិតោ ហោតិ។ កាមញ្ចេស ‘‘ទសាហបរមំ អតិរេកចីវរំ ធារេតព្ព’’ន្តិ ឥមិនាវ សិទ្ធោ, អត្ថុប្បត្តិវសេន បន អបុព្ពំ វិយ អត្ថំ ទស្សេត្វា សិក្ខាបទំ ឋបិតំ។
Kattikatemāsikapuṇṇamanti paṭhamakattikatemāsikapuṇṇamaṃ. Idhāpi paṭhamapadassa anupayogattā purimanayeneva bhummatthe upayogavacanaṃ. Idaṃ vuttaṃ hoti – ‘‘‘yato paṭṭhāya paṭhamamahāpavāraṇā dasāhānāgatā’ti vuccati, sacepi tāni divasāni accantameva bhikkhuno accekacīvaraṃ uppajjeyya, ‘accekaṃ ida’nti jānamānena bhikkhunā sabbampi paṭiggahetabba’’nti. Tena pavāraṇāmāsassa juṇhapakkhapañcamito paṭhāya uppannassa cīvarassa nidhānakālo dassito hoti. Kāmañcesa ‘‘dasāhaparamaṃ atirekacīvaraṃ dhāretabba’’nti imināva siddho, atthuppattivasena pana apubbaṃ viya atthaṃ dassetvā sikkhāpadaṃ ṭhapitaṃ.
អច្ចេកចីវរន្តិ អច្ចាយិកចីវរំ វុច្ចតិ, តស្ស បន អច្ចាយិកភាវំ ទស្សេតុំ ‘‘សេនាយ វា គន្តុកាមោ ហោតី’’តិអាទិ វុត្តំ។ តត្ថ សទ្ធាតិ ឥមិនា សទ្ធាមត្តកមេវ ទស្សិតំ។ បសាទោតិ ឥមិនា សុប្បសន្នា ពលវសទ្ធា។ ឯតំ អច្ចេកចីវរំ នាមាតិ ឯតំ ឥមេហិ ការណេហិ ទាតុកាមេន ទូតំ វា បេសេត្វា សយំ វា អាគន្ត្វា ‘‘វស្សាវាសិកំ ទស្សាមី’’តិ ឯវំ អារោចិតំ ចីវរំ អច្ចេកចីវរំ នាម ហោតី។ ឆដ្ឋិតោ បដ្ឋាយ បន ឧប្បន្នំ អនច្ចេកចីវរម្បិ បច្ចុទ្ធរិត្វា ឋបិតចីវរម្បិ ឯតំ បរិហារំ លភតិយេវ។
Accekacīvaranti accāyikacīvaraṃ vuccati, tassa pana accāyikabhāvaṃ dassetuṃ ‘‘senāya vā gantukāmo hotī’’tiādi vuttaṃ. Tattha saddhāti iminā saddhāmattakameva dassitaṃ. Pasādoti iminā suppasannā balavasaddhā. Etaṃ accekacīvaraṃ nāmāti etaṃ imehi kāraṇehi dātukāmena dūtaṃ vā pesetvā sayaṃ vā āgantvā ‘‘vassāvāsikaṃ dassāmī’’ti evaṃ ārocitaṃ cīvaraṃ accekacīvaraṃ nāma hotī. Chaṭṭhito paṭṭhāya pana uppannaṃ anaccekacīvarampi paccuddharitvā ṭhapitacīvarampi etaṃ parihāraṃ labhatiyeva.
សញ្ញាណំ កត្វា និក្ខិបិតព្ពន្តិ កិញ្ចិ និមិត្តំ កត្វា ឋបេតព្ពំ។ កស្មា ឯតំ វុត្តំ? យទិ ហិ តំ បុរេ បវារណាយ វិភជន្តិ។ យេន គហិតំ, តេន ឆិន្នវស្សេន ន ភវិតព្ពំ។ សចេ បន ហោតិ, តំ ចីវរំ សង្ឃិកមេវ ហោតិ។ តតោ សល្លក្ខេត្វា សុខំ ទាតុំ ភវិស្សតីតិ។
Saññāṇaṃ katvā nikkhipitabbanti kiñci nimittaṃ katvā ṭhapetabbaṃ. Kasmā etaṃ vuttaṃ? Yadi hi taṃ pure pavāraṇāya vibhajanti. Yena gahitaṃ, tena chinnavassena na bhavitabbaṃ. Sace pana hoti, taṃ cīvaraṃ saṅghikameva hoti. Tato sallakkhetvā sukhaṃ dātuṃ bhavissatīti.
៦៥០. អច្ចេកចីវរេ អច្ចេកចីវរសញ្ញីតិ ឯវមាទិ វិភជិត្វា គហិតមេវ សន្ធាយ វុត្តំ។ សចេ បន អវិភត្តំ ហោតិ, សង្ឃស្ស វា ភណ្ឌាគារេ, ចីវរសមយាតិក្កមេបិ អនាបត្តិ។ ឥតិ អតិរេកចីវរស្ស ទសាហំ បរិហារោ។ អកតស្ស វស្សិកសាដិកចីវរស្ស អនត្ថតេ កថិនេ បញ្ច មាសា, វស្សេ ឧក្កឌ្ឍិតេ ឆ មាសា, អត្ថតេ កថិនេ អបរេ ចត្តារោ មាសា។ ហេមន្តស្ស បច្ឆិមេ ទិវសេ មូលចីវរាធិដ្ឋានវសេន អបរោបិ ឯកោ មាសោតិ ឯកាទស មាសា បរិហារោ។ សតិយា បច្ចាសាយ មូលចីវរស្ស ឯកោ មាសោ, អច្ចេកចីវរស្ស អនត្ថតេ កថិនេ ឯកាទសទិវសាធិកោ មាសោ, អត្ថតេ កថិនេ ឯកាទសទិវសាធិកា បញ្ច មាសា, តតោ បរំ ឯកទិវសម្បិ បរិហារោ នត្ថីតិ វេទិតព្ពំ។
650.Accekacīvare accekacīvarasaññīti evamādi vibhajitvā gahitameva sandhāya vuttaṃ. Sace pana avibhattaṃ hoti, saṅghassa vā bhaṇḍāgāre, cīvarasamayātikkamepi anāpatti. Iti atirekacīvarassa dasāhaṃ parihāro. Akatassa vassikasāṭikacīvarassa anatthate kathine pañca māsā, vasse ukkaḍḍhite cha māsā, atthate kathine apare cattāro māsā. Hemantassa pacchime divase mūlacīvarādhiṭṭhānavasena aparopi eko māsoti ekādasa māsā parihāro. Satiyā paccāsāya mūlacīvarassa eko māso, accekacīvarassa anatthate kathine ekādasadivasādhiko māso, atthate kathine ekādasadivasādhikā pañca māsā, tato paraṃ ekadivasampi parihāro natthīti veditabbaṃ.
អនច្ចេកចីវរេតិ អច្ចេកចីវរសទិសេ អញ្ញស្មិំ។ សេសមេត្ថ ឧត្តានត្ថមេវាតិ។
Anaccekacīvareti accekacīvarasadise aññasmiṃ. Sesamettha uttānatthamevāti.
កថិនសមុដ្ឋានំ – អកិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មវចីកម្មំ, តិចិត្តំ, តិវេទនន្តិ។
Kathinasamuṭṭhānaṃ – akiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
អច្ចេកចីវរសិក្ខាបទវណ្ណនា និដ្ឋិតា។
Accekacīvarasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៨. អច្ចេកចីវរសិក្ខាបទំ • 8. Accekacīvarasikkhāpadaṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៨. អច្ចេកចីវរសិក្ខាបទវណ្ណនា • 8. Accekacīvarasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៨. អច្ចេកចីវរសិក្ខាបទវណ្ណនា • 8. Accekacīvarasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៨. អច្ចេកចីវរសិក្ខាបទវណ្ណនា • 8. Accekacīvarasikkhāpadavaṇṇanā
