| Library / Tipiṭaka / તિપિટક • Tipiṭaka / સારત્થદીપની-ટીકા • Sāratthadīpanī-ṭīkā |
૭. મહાપેસકારસિક્ખાપદવણ્ણના
7. Mahāpesakārasikkhāpadavaṇṇanā
૬૪૨. સત્તમે કિઞ્ચિમત્તં અનુપદજ્જેય્યાતિ ઇદં તસ્સ કત્તબ્બાકારમત્તદસ્સનં, દાનં પનેત્થ અઙ્ગં ન હોતિ સુત્તવડ્ઢનવસેનેવ આપજ્જિતબ્બત્તા. તેનેવ પદભાજનેપિ ‘‘તસ્સ વચનેન આયતં વા વિત્થતં વા અપ્પિતં વા કરોતિ, પયોગે દુક્કટં, પટિલાભેન નિસ્સગ્ગિય’’ન્તિ સુત્તવડ્ઢનાકારમેવ દસ્સેત્વા આપત્તિ વુત્તા. માતિકાટ્ઠકથાયમ્પિ (કઙ્ખા॰ અટ્ઠ॰ મહાપેસકારસિક્ખાપદવણ્ણના) વુત્તં ‘‘ન ભિક્ખુનો પિણ્ડપાતદાનમત્તેન તં નિસ્સગ્ગિયં હોતિ. સચે પન તે તસ્સ વચનેન ચીવરસામિકાનં હત્થતો સુત્તં ગહેત્વા ઈસકમ્પિ આયતં વા વિત્થતં વા અપ્પિતં વા કરોન્તિ, અથ તેસં પયોગે ભિક્ખુનો દુક્કટં, પટિલાભેન નિસ્સગ્ગિયં હોતી’’તિ. આયતાદીસુ સત્તસુ આકારેસુ આદિમ્હિ તયો આકારે સુત્તવડ્ઢનેન વિના ન સક્કા કાતુન્તિ આહ ‘‘સુત્તવડ્ઢનઆકારમેવ દસ્સેતી’’તિ. સુવીતાદયો હિ આકારે વિનાપિ સુત્તવડ્ઢનેન સક્કા કાતું. સેસમેત્થ ઉત્તાનમેવ. અઞ્ઞાતકઅપ્પવારિતાનં તન્તવાયે ઉપસઙ્કમિત્વા વિકપ્પમાપજ્જનતા, ચીવરસ્સ અત્તુદ્દેસિકતા, તસ્સ વચનેન સુત્તવડ્ઢનં, ચીવરસ્સ પટિલાભોતિ ઇમાનેત્થ ચત્તારિ અઙ્ગાનિ.
642. Sattame kiñcimattaṃ anupadajjeyyāti idaṃ tassa kattabbākāramattadassanaṃ, dānaṃ panettha aṅgaṃ na hoti suttavaḍḍhanavaseneva āpajjitabbattā. Teneva padabhājanepi ‘‘tassa vacanena āyataṃ vā vitthataṃ vā appitaṃ vā karoti, payoge dukkaṭaṃ, paṭilābhena nissaggiya’’nti suttavaḍḍhanākārameva dassetvā āpatti vuttā. Mātikāṭṭhakathāyampi (kaṅkhā. aṭṭha. mahāpesakārasikkhāpadavaṇṇanā) vuttaṃ ‘‘na bhikkhuno piṇḍapātadānamattena taṃ nissaggiyaṃ hoti. Sace pana te tassa vacanena cīvarasāmikānaṃ hatthato suttaṃ gahetvā īsakampi āyataṃ vā vitthataṃ vā appitaṃ vā karonti, atha tesaṃ payoge bhikkhuno dukkaṭaṃ, paṭilābhena nissaggiyaṃ hotī’’ti. Āyatādīsu sattasu ākāresu ādimhi tayo ākāre suttavaḍḍhanena vinā na sakkā kātunti āha ‘‘suttavaḍḍhanaākārameva dassetī’’ti. Suvītādayo hi ākāre vināpi suttavaḍḍhanena sakkā kātuṃ. Sesamettha uttānameva. Aññātakaappavāritānaṃ tantavāye upasaṅkamitvā vikappamāpajjanatā, cīvarassa attuddesikatā, tassa vacanena suttavaḍḍhanaṃ, cīvarassa paṭilābhoti imānettha cattāri aṅgāni.
મહાપેસકારસિક્ખાપદવણ્ણના નિટ્ઠિતા.
Mahāpesakārasikkhāpadavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવિભઙ્ગ • Mahāvibhaṅga / ૭. મહાપેસકારસિક્ખાપદં • 7. Mahāpesakārasikkhāpadaṃ
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / મહાવિભઙ્ગ-અટ્ઠકથા • Mahāvibhaṅga-aṭṭhakathā / ૭. મહાપેસકારસિક્ખાપદવણ્ણના • 7. Mahāpesakārasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૭. મહાપેસકારસિક્ખાપદવણ્ણના • 7. Mahāpesakārasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૭. મહાપેસકારસિક્ખાપદવણ્ણના • 7. Mahāpesakārasikkhāpadavaṇṇanā
