Only Dharma. Since 1992
Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi

೫೧೬. ಮಹಾಕಪಿಜಾತಕಂ (೬)

516. Mahākapijātakaṃ (6)

೧೭೮.

178.

ಬಾರಾಣಸ್ಯಂ 1 ಅಹೂ ರಾಜಾ, ಕಾಸೀನಂ ರಟ್ಠವಡ್ಢನೋ।

Bārāṇasyaṃ 2 ahū rājā, kāsīnaṃ raṭṭhavaḍḍhano;

ಮಿತ್ತಾಮಚ್ಚಪರಿಬ್ಯೂಳ್ಹೋ, ಅಗಮಾಸಿ ಮಿಗಾಜಿನಂ 3॥

Mittāmaccaparibyūḷho, agamāsi migājinaṃ 4.

೧೭೯.

179.

ತತ್ಥ ಬ್ರಾಹ್ಮಣಮದ್ದಕ್ಖಿ, ಸೇತಂ ಚಿತ್ರಂ ಕಿಲಾಸಿನಂ।

Tattha brāhmaṇamaddakkhi, setaṃ citraṃ kilāsinaṃ;

ವಿದ್ಧಸ್ತಂ ಕೋವಿಳಾರಂವ, ಕಿಸಂ ಧಮನಿಸನ್ಥತಂ॥

Viddhastaṃ koviḷāraṃva, kisaṃ dhamanisanthataṃ.

೧೮೦.

180.

ಪರಮಕಾರುಞ್ಞತಂ ಪತ್ತಂ, ದಿಸ್ವಾ ಕಿಚ್ಛಗತಂ ನರಂ।

Paramakāruññataṃ pattaṃ, disvā kicchagataṃ naraṃ;

ಅವಚ ಬ್ಯಮ್ಹಿತೋ ರಾಜಾ, ‘‘ಯಕ್ಖಾನಂ ಕತಮೋ ನುಸಿ॥

Avaca byamhito rājā, ‘‘yakkhānaṃ katamo nusi.

೧೮೧.

181.

‘‘ಹತ್ಥಪಾದಾ ಚ ತೇ ಸೇತಾ, ತತೋ ಸೇತತರಂ 5 ಸಿರೋ।

‘‘Hatthapādā ca te setā, tato setataraṃ 6 siro;

ಗತ್ತಂ ಕಮ್ಮಾಸವಣ್ಣಂ ತೇ, ಕಿಲಾಸಬಹುಲೋ ಚಸಿ॥

Gattaṃ kammāsavaṇṇaṃ te, kilāsabahulo casi.

೧೮೨.

182.

‘‘ವಟ್ಟನಾವಳಿ 7 ಸಙ್ಕಾಸಾ, ಪಿಟ್ಠಿ ತೇ ನಿನ್ನತುನ್ನತಾ।

‘‘Vaṭṭanāvaḷi 8 saṅkāsā, piṭṭhi te ninnatunnatā;

ಕಾಳಪಬ್ಬಾವ 9 ತೇ ಅಙ್ಗಾ, ನಾಞ್ಞಂ ಪಸ್ಸಾಮಿ ಏದಿಸಂ॥

Kāḷapabbāva 10 te aṅgā, nāññaṃ passāmi edisaṃ.

೧೮೩.

183.

‘‘ಉಗ್ಘಟ್ಟಪಾದೋ ತಸಿತೋ, ಕಿಸೋ ಧಮನಿಸನ್ಥತೋ।

‘‘Ugghaṭṭapādo tasito, kiso dhamanisanthato;

ಛಾತೋ ಆತತ್ತರೂಪೋಸಿ 11, ಕುತೋಸಿ ಕತ್ಥ ಗಚ್ಛಸಿ॥

Chāto ātattarūposi 12, kutosi kattha gacchasi.

೧೮೪.

184.

‘‘ದುದ್ದಸೀ ಅಪ್ಪಕಾರೋಸಿ, ದುಬ್ಬಣ್ಣೋ ಭೀಮದಸ್ಸನೋ।

‘‘Duddasī appakārosi, dubbaṇṇo bhīmadassano;

ಜನೇತ್ತಿ ಯಾಪಿ ತೇ ಮಾತಾ, ನ ತಂ ಇಚ್ಛೇಯ್ಯ ಪಸ್ಸಿತುಂ॥

Janetti yāpi te mātā, na taṃ iccheyya passituṃ.

೧೮೫.

185.

‘‘ಕಿಂ ಕಮ್ಮಮಕರಂ 13 ಪುಬ್ಬೇ, ಕಂ ಅವಜ್ಝಂ ಅಘಾತಯಿ।

‘‘Kiṃ kammamakaraṃ 14 pubbe, kaṃ avajjhaṃ aghātayi;

ಕಿಬ್ಬಿಸಂ ಯಂ ಕರಿತ್ವಾನ, ಇದಂ ದುಕ್ಖಂ ಉಪಾಗಮಿ’’॥

Kibbisaṃ yaṃ karitvāna, idaṃ dukkhaṃ upāgami’’.

೧೮೬.

186.

ತಗ್ಘ ತೇ ಅಹಮಕ್ಖಿಸ್ಸಂ, ಯಥಾಪಿ ಕುಸಲೋ ತಥಾ।

Taggha te ahamakkhissaṃ, yathāpi kusalo tathā;

ಸಚ್ಚವಾದಿಞ್ಹಿ ಲೋಕಸ್ಮಿಂ, ಪಸಂಸನ್ತೀಧ ಪಣ್ಡಿತಾ॥

Saccavādiñhi lokasmiṃ, pasaṃsantīdha paṇḍitā.

೧೮೭.

187.

ಏಕೋ ಚರಂ ಗೋಗವೇಸೋ, ಮೂಳ್ಹೋ ಅಚ್ಚಸರಿಂ ವನೇ।

Eko caraṃ gogaveso, mūḷho accasariṃ vane;

ಅರಞ್ಞೇ ಇರೀಣೇ 15 ವಿವನೇ, ನಾನಾಕುಞ್ಜರಸೇವಿತೇ॥

Araññe irīṇe 16 vivane, nānākuñjarasevite.

೧೮೮.

188.

ವಾಳಮಿಗಾನುಚರಿತೇ, ವಿಪ್ಪನಟ್ಠೋಸ್ಮಿ ಕಾನನೇ।

Vāḷamigānucarite, vippanaṭṭhosmi kānane;

ಅಚರಿಂ ತತ್ಥ ಸತ್ತಾಹಂ, ಖುಪ್ಪಿಪಾಸ 17 ಸಮಪ್ಪಿತೋ॥

Acariṃ tattha sattāhaṃ, khuppipāsa 18 samappito.

೧೮೯.

189.

ತತ್ಥ ತಿನ್ದುಕಮದ್ದಕ್ಖಿಂ, ವಿಸಮಟ್ಠಂ ಬುಭುಕ್ಖಿತೋ।

Tattha tindukamaddakkhiṃ, visamaṭṭhaṃ bubhukkhito;

ಪಪಾತಮಭಿಲಮ್ಬನ್ತಂ, ಸಮ್ಪನ್ನಫಲಧಾರಿನಂ॥

Papātamabhilambantaṃ, sampannaphaladhārinaṃ.

೧೯೦.

190.

ವಾತಸ್ಸಿತಾನಿ ಭಕ್ಖೇಸಿಂ, ತಾನಿ ರುಚ್ಚಿಂಸು ಮೇ ಭುಸಂ।

Vātassitāni bhakkhesiṃ, tāni rucciṃsu me bhusaṃ;

ಅತಿತ್ತೋ ರುಕ್ಖಮಾರೂಹಿಂ 19, ತತ್ಥ ಹೇಸ್ಸಾಮಿ ಆಸಿತೋ॥

Atitto rukkhamārūhiṃ 20, tattha hessāmi āsito.

೧೯೧.

191.

ಏಕಂ ಮೇ ಭಕ್ಖಿತಂ ಆಸಿ, ದುತಿಯಂ ಅಭಿಪತ್ಥಿತಂ।

Ekaṃ me bhakkhitaṃ āsi, dutiyaṃ abhipatthitaṃ;

ತತೋ ಸಾ ಭಞ್ಜಥ ಸಾಖಾ, ಛಿನ್ನಾ ಫರಸುನಾ ವಿಯ॥

Tato sā bhañjatha sākhā, chinnā pharasunā viya.

೧೯೨.

192.

ಸೋಹಂ ಸಹಾವ ಸಾಖಾಹಿ, ಉದ್ಧಂಪಾದೋ ಅವಂಸಿರೋ।

Sohaṃ sahāva sākhāhi, uddhaṃpādo avaṃsiro;

ಅಪ್ಪತಿಟ್ಠೇ ಅನಾಲಮ್ಬೇ, ಗಿರಿದುಗ್ಗಸ್ಮಿ ಪಾಪತಂ॥

Appatiṭṭhe anālambe, giriduggasmi pāpataṃ.

೧೯೩.

193.

ಯಸ್ಮಾ ಚ ವಾರಿ ಗಮ್ಭೀರಂ, ತಸ್ಮಾ ನ ಸಮಪಜ್ಜಿಸಂ 21।

Yasmā ca vāri gambhīraṃ, tasmā na samapajjisaṃ 22;

ತತ್ಥ ಸೇಸಿಂ ನಿರಾನನ್ದೋ, ಅನೂನಾ 23 ದಸ ರತ್ತಿಯೋ॥

Tattha sesiṃ nirānando, anūnā 24 dasa rattiyo.

೧೯೪.

194.

ಅಥೇತ್ಥ ಕಪಿ ಮಾಗಞ್ಛಿ 25, ಗೋನಙ್ಗುಲೋ ದರೀಚರೋ।

Athettha kapi māgañchi 26, gonaṅgulo darīcaro;

ಸಾಖಾಹಿ ಸಾಖಂ ವಿಚರನ್ತೋ, ಖಾದಮಾನೋ ದುಮಪ್ಫಲಂ॥

Sākhāhi sākhaṃ vicaranto, khādamāno dumapphalaṃ.

೧೯೫.

195.

ಸೋ ಮಂ ದಿಸ್ವಾ ಕಿಸಂ ಪಣ್ಡುಂ, ಕಾರುಞ್ಞಮಕರಂ ಮಯಿ।

So maṃ disvā kisaṃ paṇḍuṃ, kāruññamakaraṃ mayi;

ಅಮ್ಭೋ ಕೋ ನಾಮ ಸೋ ಏತ್ಥ, ಏವಂ ದುಕ್ಖೇನ ಅಟ್ಟಿತೋ॥

Ambho ko nāma so ettha, evaṃ dukkhena aṭṭito.

೧೯೬.

196.

ಮನುಸ್ಸೋ ಅಮನುಸ್ಸೋ ವಾ, ಅತ್ತಾನಂ ಮೇ ಪವೇದಯ।

Manusso amanusso vā, attānaṃ me pavedaya;

ತಸ್ಸಞ್ಜಲಿಂ ಪಣಾಮೇತ್ವಾ, ಇದಂ ವಚನಮಬ್ರವಿಂ॥

Tassañjaliṃ paṇāmetvā, idaṃ vacanamabraviṃ.

೧೯೭.

197.

ಮನುಸ್ಸೋಹಂ ಬ್ಯಸಮ್ಪತ್ತೋ 27, ಸಾ ಮೇ ನತ್ಥಿ ಇತೋ ಗತಿ।

Manussohaṃ byasampatto 28, sā me natthi ito gati;

ತಂ ವೋ ವದಾಮಿ ಭದ್ದಂ ವೋ, ತ್ವಞ್ಚ ಮೇ ಸರಣಂ ಭವ॥

Taṃ vo vadāmi bhaddaṃ vo, tvañca me saraṇaṃ bhava.

೧೯೮.

198.

ಗರುಂ 29 ಸಿಲಂ ಗಹೇತ್ವಾನ, ವಿಚರೀ 30 ಪಬ್ಬತೇ ಕಪಿ।

Garuṃ 31 silaṃ gahetvāna, vicarī 32 pabbate kapi;

ಸಿಲಾಯ ಯೋಗ್ಗಂ ಕತ್ವಾನ, ನಿಸಭೋ ಏತದಬ್ರವಿ॥

Silāya yoggaṃ katvāna, nisabho etadabravi.

೧೯೯.

199.

ಏಹಿ ಮೇ ಪಿಟ್ಠಿಮಾರುಯ್ಹ, ಗೀವಂ ಗಣ್ಹಾಹಿ ಬಾಹುಭಿ।

Ehi me piṭṭhimāruyha, gīvaṃ gaṇhāhi bāhubhi;

ಅಹಂ ತಂ ಉದ್ಧರಿಸ್ಸಾಮಿ, ಗಿರಿದುಗ್ಗತ ವೇಗಸಾ॥

Ahaṃ taṃ uddharissāmi, giriduggata vegasā.

೨೦೦.

200.

ತಸ್ಸ ತಂ ವಚನಂ ಸುತ್ವಾ, ವಾನರಿನ್ದಸ್ಸ ಸಿರೀಮತೋ।

Tassa taṃ vacanaṃ sutvā, vānarindassa sirīmato;

ಪಿಟ್ಠಿಮಾರುಯ್ಹ ಧೀರಸ್ಸ, ಗೀವಂ ಬಾಹಾಹಿ ಅಗ್ಗಹಿಂ॥

Piṭṭhimāruyha dhīrassa, gīvaṃ bāhāhi aggahiṃ.

೨೦೧.

201.

ಸೋ ಮಂ ತತೋ ಸಮುಟ್ಠಾಸಿ, ತೇಜಸ್ಸೀ 33 ಬಲವಾ ಕಪಿ।

So maṃ tato samuṭṭhāsi, tejassī 34 balavā kapi;

ವಿಹಞ್ಞಮಾನೋ ಕಿಚ್ಛೇನ, ಗಿರಿದುಗ್ಗತ ವೇಗಸಾ॥

Vihaññamāno kicchena, giriduggata vegasā.

೨೦೨.

202.

ಉದ್ಧರಿತ್ವಾನ ಮಂ ಸನ್ತೋ, ನಿಸಭೋ ಏತದಬ್ರವಿ।

Uddharitvāna maṃ santo, nisabho etadabravi;

ಇಙ್ಘ ಮಂ ಸಮ್ಮ ರಕ್ಖಸ್ಸು, ಪಸ್ಸುಪಿಸ್ಸಂ ಮುಹುತ್ತಕಂ॥

Iṅgha maṃ samma rakkhassu, passupissaṃ muhuttakaṃ.

೨೦೩.

203.

ಸೀಹಾ ಬ್ಯಗ್ಘಾ ಚ ದೀಪೀ ಚ, ಅಚ್ಛಕೋಕತರಚ್ಛಯೋ।

Sīhā byagghā ca dīpī ca, acchakokataracchayo;

ತೇ ಮಂ ಪಮತ್ತಂ ಹಿಂಸೇಯ್ಯುಂ, ತೇ ತ್ವಂ ದಿಸ್ವಾ ನಿವಾರಯ 35॥

Te maṃ pamattaṃ hiṃseyyuṃ, te tvaṃ disvā nivāraya 36.

೨೦೪.

204.

ಏವಂ ಮೇ ಪರಿತ್ತಾತೂನ 37, ಪಸ್ಸುಪಿ ಸೋ ಮುಹುತ್ತಕಂ।

Evaṃ me parittātūna 38, passupi so muhuttakaṃ;

ತದಾಹಂ ಪಾಪಿಕಂ ದಿಟ್ಠಿಂ, ಪಟಿಲಚ್ಛಿಂ ಅಯೋನಿಸೋ॥

Tadāhaṃ pāpikaṃ diṭṭhiṃ, paṭilacchiṃ ayoniso.

೨೦೫.

205.

ಭಕ್ಖೋ ಅಯಂ ಮನುಸ್ಸಾನಂ, ಯಥಾ ಚಞ್ಞೇ ವನೇ ಮಿಗಾ।

Bhakkho ayaṃ manussānaṃ, yathā caññe vane migā;

ಯಂ ನೂನಿಮಂ ವಧಿತ್ವಾನ, ಛಾತೋ ಖಾದೇಯ್ಯ ವಾನರಂ॥

Yaṃ nūnimaṃ vadhitvāna, chāto khādeyya vānaraṃ.

೨೦೬.

206.

ಅಸಿತೋ 39 ಚ ಗಮಿಸ್ಸಾಮಿ, ಮಂಸಮಾದಾಯ ಸಮ್ಬಲಂ।

Asito 40 ca gamissāmi, maṃsamādāya sambalaṃ;

ಕನ್ತಾರಂ ನಿತ್ಥರಿಸ್ಸಾಮಿ, ಪಾಥೇಯ್ಯಂ ಮೇ ಭವಿಸ್ಸತಿ॥

Kantāraṃ nittharissāmi, pātheyyaṃ me bhavissati.

೨೦೭.

207.

ತತೋ ಸಿಲಂ ಗಹೇತ್ವಾನ, ಮತ್ಥಕಂ ಸನ್ನಿತಾಳಯಿಂ।

Tato silaṃ gahetvāna, matthakaṃ sannitāḷayiṃ;

ಮಮ ಗತ್ತ 41 ಕಿಲನ್ತಸ್ಸ, ಪಹಾರೋ ದುಬ್ಬಲೋ ಅಹು॥

Mama gatta 42 kilantassa, pahāro dubbalo ahu.

೨೦೮.

208.

ಸೋ ಚ ವೇಗೇನುದಪ್ಪತ್ತೋ, ಕಪಿ ರುಹಿರ 43 ಮಕ್ಖಿತೋ।

So ca vegenudappatto, kapi ruhira 44 makkhito;

ಅಸ್ಸುಪುಣ್ಣೇಹಿ ನೇತ್ತೇಹಿ, ರೋದನ್ತೋ ಮಂ ಉದಿಕ್ಖತಿ॥

Assupuṇṇehi nettehi, rodanto maṃ udikkhati.

೨೦೯.

209.

ಮಾಯ್ಯೋಮಂ ಕರಿ ಭದ್ದನ್ತೇ, ತ್ವಞ್ಚ ನಾಮೇದಿಸಂ ಕರಿ।

Māyyomaṃ kari bhaddante, tvañca nāmedisaṃ kari;

ತ್ವಞ್ಚ ಖೋ ನಾಮ ದೀಘಾವು 45, ಅಞ್ಞೇ 46 ವಾರೇತುಮರಹಸಿ॥

Tvañca kho nāma dīghāvu 47, aññe 48 vāretumarahasi.

೨೧೦.

210.

ಅಹೋ ವತ ರೇ ಪುರಿಸ, ತಾವ ದುಕ್ಕರಕಾರಕ।

Aho vata re purisa, tāva dukkarakāraka;

ಏದಿಸಾ ವಿಸಮಾ ದುಗ್ಗಾ, ಪಪಾತಾ ಉದ್ಧತೋ 49 ಮಯಾ॥

Edisā visamā duggā, papātā uddhato 50 mayā.

೨೧೧.

211.

ಆನೀತೋ ಪರಲೋಕಾವ, ದುಬ್ಭೇಯ್ಯಂ ಮಂ ಅಮಞ್ಞಥ।

Ānīto paralokāva, dubbheyyaṃ maṃ amaññatha;

ತಂ ತೇನ ಪಾಪಧಮ್ಮೇನ, ಪಾಪಂ ಪಾಪೇನ ಚಿನ್ತಿತಂ॥

Taṃ tena pāpadhammena, pāpaṃ pāpena cintitaṃ.

೨೧೨.

212.

ಮಾ ಹೇವ ತ್ವಂ ಅಧಮ್ಮಟ್ಠ, ವೇದನಂ ಕಟುಕಂ ಫುಸಿ।

Mā heva tvaṃ adhammaṭṭha, vedanaṃ kaṭukaṃ phusi;

ಮಾ ಹೇವ ಪಾಪಕಮ್ಮಂ ತಂ, ಫಲಂ ವೇಳುಂವ ತಂ ವಧಿ॥

Mā heva pāpakammaṃ taṃ, phalaṃ veḷuṃva taṃ vadhi.

೨೧೩.

213.

ತಯಿಮೇ ನತ್ಥಿ ವಿಸ್ಸಾಸೋ, ಪಾಪಧಮ್ಮ ಅಸಞ್ಞತ 51।

Tayime natthi vissāso, pāpadhamma asaññata 52;

ಏಹಿ ಮೇ ಪಿಟ್ಠಿತೋ ಗಚ್ಛ, ದಿಸ್ಸಮಾನೋವ ಸನ್ತಿಕೇ॥

Ehi me piṭṭhito gaccha, dissamānova santike.

೨೧೪.

214.

ಮುತ್ತೋಸಿ ಹತ್ಥಾ ವಾಳಾನಂ, ಪತ್ತೋಸಿ ಮಾನುಸಿಂ ಪದಂ।

Muttosi hatthā vāḷānaṃ, pattosi mānusiṃ padaṃ;

ಏಸ ಮಗ್ಗೋ ಅಧಮ್ಮಟ್ಠ, ತೇನ ಗಚ್ಛ ಯಥಾಸುಖಂ॥

Esa maggo adhammaṭṭha, tena gaccha yathāsukhaṃ.

೨೧೫.

215.

ಇದಂ ವತ್ವಾ ಗಿರಿಚರೋ, ರಹದೇ 53 ಪಕ್ಖಲ್ಯ ಮತ್ಥಕಂ।

Idaṃ vatvā giricaro, rahade 54 pakkhalya matthakaṃ;

ಅಸ್ಸೂನಿ ಸಮ್ಪಮಜ್ಜಿತ್ವಾ, ತತೋ ಪಬ್ಬತಮಾರುಹಿ॥

Assūni sampamajjitvā, tato pabbatamāruhi.

೨೧೬.

216.

ಸೋಹಂ ತೇನಾಭಿಸತ್ತೋಸ್ಮಿ, ಪರಿಳಾಹೇನ ಅಟ್ಟಿತೋ।

Sohaṃ tenābhisattosmi, pariḷāhena aṭṭito;

ಡಯ್ಹಮಾನೇನ ಗತ್ತೇನ, ವಾರಿಂ ಪಾತುಂ ಉಪಾಗಮಿಂ॥

Ḍayhamānena gattena, vāriṃ pātuṃ upāgamiṃ.

೨೧೭.

217.

ಅಗ್ಗಿನಾ ವಿಯ ಸನ್ತತ್ತೋ, ರಹದೋ ರುಹಿರಮಕ್ಖಿತೋ।

Agginā viya santatto, rahado ruhiramakkhito;

ಪುಬ್ಬಲೋಹಿತಸಙ್ಕಾಸೋ, ಸಬ್ಬೋ ಮೇ ಸಮಪಜ್ಜಥ॥

Pubbalohitasaṅkāso, sabbo me samapajjatha.

೨೧೮.

218.

ಯಾವನ್ತೋ ಉದಬಿನ್ದೂನಿ, ಕಾಯಸ್ಮಿಂ ನಿಪತಿಂಸು ಮೇ।

Yāvanto udabindūni, kāyasmiṃ nipatiṃsu me;

ತಾವನ್ತೋ ಗಣ್ಡ 55 ಜಾಯೇಥ, ಅದ್ಧಬೇಲುವಸಾದಿಸಾ॥

Tāvanto gaṇḍa 56 jāyetha, addhabeluvasādisā.

೨೧೯.

219.

ಪಭಿನ್ನಾ ಪಗ್ಘರಿಂಸು ಮೇ, ಕುಣಪಾ ಪುಬ್ಬಲೋಹಿತಾ।

Pabhinnā pagghariṃsu me, kuṇapā pubbalohitā;

ಯೇನ ಯೇನೇವ ಗಚ್ಛಾಮಿ, ಗಾಮೇಸು ನಿಗಮೇಸು ಚ॥

Yena yeneva gacchāmi, gāmesu nigamesu ca.

೨೨೦.

220.

ದಣ್ಡಹತ್ಥಾ ನಿವಾರೇನ್ತಿ, ಇತ್ಥಿಯೋ ಪುರಿಸಾ ಚ ಮಂ।

Daṇḍahatthā nivārenti, itthiyo purisā ca maṃ;

ಓಕ್ಕಿತಾ 57 ಪೂತಿಗನ್ಧೇನ, ಮಾಸ್ಸು ಓರೇನ ಆಗಮಾ 58॥

Okkitā 59 pūtigandhena, māssu orena āgamā 60.

೨೨೧.

221.

ಏತಾದಿಸಂ ಇದಂ ದುಕ್ಖಂ, ಸತ್ತ ವಸ್ಸಾನಿ ದಾನಿ ಮೇ।

Etādisaṃ idaṃ dukkhaṃ, satta vassāni dāni me;

ಅನುಭೋಮಿ ಸಕಂ ಕಮ್ಮಂ, ಪುಬ್ಬೇ ದುಕ್ಕಟಮತ್ತನೋ॥

Anubhomi sakaṃ kammaṃ, pubbe dukkaṭamattano.

೨೨೨.

222.

ತಂ ವೋ ವದಾಮಿ ಭದ್ದನ್ತೇ 61, ಯಾವನ್ತೇತ್ಥ ಸಮಾಗತಾ।

Taṃ vo vadāmi bhaddante 62, yāvantettha samāgatā;

ಮಾಸ್ಸು ಮಿತ್ತಾನ 63 ದುಬ್ಭಿತ್ಥೋ, ಮಿತ್ತದುಬ್ಭೋ ಹಿ ಪಾಪಕೋ॥

Māssu mittāna 64 dubbhittho, mittadubbho hi pāpako.

೨೨೩.

223.

ಕುಟ್ಠೀ ಕಿಲಾಸೀ ಭವತಿ, ಯೋ ಮಿತ್ತಾನಿಧ ದುಬ್ಭತಿ 65।

Kuṭṭhī kilāsī bhavati, yo mittānidha dubbhati 66;

ಕಾಯಸ್ಸ ಭೇದಾ ಮಿತ್ತದ್ದು 67, ನಿರಯಂ ಸೋಪಪಜ್ಜತೀತಿ 68॥

Kāyassa bhedā mittaddu 69, nirayaṃ sopapajjatīti 70.

ಮಹಾಕಪಿಜಾತಕಂ ಛಟ್ಠಂ।

Mahākapijātakaṃ chaṭṭhaṃ.




Next: ೫೧೭. ದಕರಕ್ಖಸಜಾತಕಂ • 517. Dakarakkhasajātakaṃ




Footnotes:
1. ಬಾರಾಣಸ್ಸಂ (ಸೀ॰ ಪೀ॰)
2. bārāṇassaṃ (sī. pī.)
3. ಮಿಗಾಜಿರಂ (ಸೀ॰), ಮಿಗಾಚಿರಂ (ಪೀ॰)
4. migājiraṃ (sī.), migāciraṃ (pī.)
5. ಸೇತತರೋ (ಪೀ॰)
6. setataro (pī.)
7. ವಟ್ಠನಾವಲಿ (ಪೀ॰)
8. vaṭṭhanāvali (pī.)
9. ಕಾಳಪಬ್ಬಾ ಚ (ಸ್ಯಾ॰), ಕಾಳಾ ಪಬ್ಬಾ ಚ (ಪೀ॰)
10. kāḷapabbā ca (syā.), kāḷā pabbā ca (pī.)
11. ಆದಿತ್ತರೂಪೋಸಿ (ಕ॰), ಅತಿತ್ತರೂಪೋಸಿ (ಸ್ಯಾ॰ ಕ॰ ಅಟ್ಠ॰)
12. ādittarūposi (ka.), atittarūposi (syā. ka. aṭṭha.)
13. ಕಮ್ಮಮಕರಾ (ಸೀ॰ ಸ್ಯಾ॰ ಪೀ॰)
14. kammamakarā (sī. syā. pī.)
15. ಈರಿಣೇ (ಸೀ॰ ಸ್ಯಾ॰ ಪೀ॰)
16. īriṇe (sī. syā. pī.)
17. ಖುಪ್ಪಿಪಾಸಾ (ಸೀ॰ ಪೀ॰)
18. khuppipāsā (sī. pī.)
19. ಮಾರುಯ್ಹ (ಸೀ॰ ಸ್ಯಾ॰)
20. māruyha (sī. syā.)
21. ಸಮಪಜ್ಜಸಿಂ (ಸೀ॰), ಸಮಭಜ್ಜಿಸಂ (ಪೀ॰)
22. samapajjasiṃ (sī.), samabhajjisaṃ (pī.)
23. ಅನಾಥೋ (ಸೀ॰)
24. anātho (sī.)
25. ಮಾಗಚ್ಛಿ (ಸ್ಯಾ॰ ಕ॰)
26. māgacchi (syā. ka.)
27. ವಸಮ್ಪತ್ತೋ (ಸ್ಯಾ॰ ಕ॰)
28. vasampatto (syā. ka.)
29. ಗರು (ಸೀ॰ ಪೀ॰)
30. ವಿಚರಿ (ಪೀ॰)
31. garu (sī. pī.)
32. vicari (pī.)
33. ತೇಜಸೀ (ಸ್ಯಾ॰ ಪೀ॰ ಕ॰)
34. tejasī (syā. pī. ka.)
35. ದಿಸ್ವಾನ ವಾರಯ (ಪೀ॰)
36. disvāna vāraya (pī.)
37. ಪರಿತ್ತಾತುನ (ಕ॰)
38. parittātuna (ka.)
39. ಆಸಿಕೋ (ಪೀ॰)
40. āsiko (pī.)
41. ಭತ್ತ (ಸೀ॰ ಸ್ಯಾ॰), ಹತ್ಥ (ಪೀ॰)
42. bhatta (sī. syā.), hattha (pī.)
43. ರುಧಿರ (ಸೀ॰)
44. rudhira (sī.)
45. ದೀಘಾಯು (ಪೀ॰)
46. ಅಞ್ಞಂ (ಪೀ॰)
47. dīghāyu (pī.)
48. aññaṃ (pī.)
49. ಉದ್ಧಟೋ (ಪೀ॰)
50. uddhaṭo (pī.)
51. ಪಾಪಧಮ್ಮಂ ಅಮಞ್ಞಥ (ಪೀ॰)
52. pāpadhammaṃ amaññatha (pī.)
53. ರುಹಿರಂ (ಸ್ಯಾ॰ ಕ॰)
54. ruhiraṃ (syā. ka.)
55. ಗಣ್ಡೂ (ಸೀ॰ ಪೀ॰), ಗಣ್ಡು (ಸ್ಯಾ॰)
56. gaṇḍū (sī. pī.), gaṇḍu (syā.)
57. ಓಕಿಣ್ಣಾ (ಸೀ॰)
58. ಮಾಗಮಾ (ಸೀ॰ ಪೀ॰)
59. okiṇṇā (sī.)
60. māgamā (sī. pī.)
61. ಭದ್ದಂ ವೋ (ಸೀ॰ ಪೀ॰)
62. bhaddaṃ vo (sī. pī.)
63. ಮಿತ್ತಾನಂ (ಸೀ॰ ಪೀ॰)
64. mittānaṃ (sī. pī.)
65. ಯೋ ಮಿತ್ತಾನಂ ಇಧದ್ದುಭಿ (ಸೀ॰ ಅಟ್ಠ॰), ಯೋ ಮಿತ್ತಾನಂ ಇಧ ದುಬ್ಭತಿ (ಪೀ॰)
66. yo mittānaṃ idhaddubhi (sī. aṭṭha.), yo mittānaṃ idha dubbhati (pī.)
67. ಮಿತ್ತದುಬ್ಭೀ (ಸ್ಯಾ॰ ಕ॰)
68. ಸೋ ಉಪಪಜ್ಜತೀತಿ (ಸೀ॰ ಸ್ಯಾ॰ ಪೀ॰)
69. mittadubbhī (syā. ka.)
70. so upapajjatīti (sī. syā. pī.)



Related texts:



ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೫೧೬] ೬. ಮಹಾಕಪಿಜಾತಕವಣ್ಣನಾ • [516] 6. Mahākapijātakavaṇṇanā


© 1991-2026 Titi Tudorancea Yoga Bulletin | Titi Tudorancea® is a Registered Trademark | Terms of use and privacy policy
Contact