| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. মহকপাটিহারিযসুত্তৰণ্ণনা
4. Mahakapāṭihāriyasuttavaṇṇanā
৩৪৬. তেসং অনুজানন্তোতি তেসং দাসকম্মকরানং সেসকে যথারুচি ৰিচারণং অনুজানন্তো। কুধিতন্তি বলৰতা সূরিযসন্তাপেন সঙ্কুথিতং । তেনাহ ‘‘হেট্ঠা’’তিআদি। অতিতিখিণন্তি অতিৰিয তিক্খধাতুকং। অসম্ভিন্নপদন্তি অঞ্ঞত্থ অনাগতত্তা তিপিটকে অৰোমিস্সকপদং, ইধেৰ আগতপদন্তি অত্থো। পটিলীযমানেনাতি পটিকংসেন ৰিসেসনেন ৰিলীযমানেন কাযেন।
346.Tesaṃ anujānantoti tesaṃ dāsakammakarānaṃ sesake yathāruci vicāraṇaṃ anujānanto. Kudhitanti balavatā sūriyasantāpena saṅkuthitaṃ . Tenāha ‘‘heṭṭhā’’tiādi. Atitikhiṇanti ativiya tikkhadhātukaṃ. Asambhinnapadanti aññattha anāgatattā tipiṭake avomissakapadaṃ, idheva āgatapadanti attho. Paṭilīyamānenāti paṭikaṃsena visesanena vilīyamānena kāyena.
এত্থ চাতি এতস্মিং অধিট্ঠানিদ্ধিকরণে। অব্ভমণ্ডপং কত্ৰাতি সমন্ততো ছাদনৰসেন মণ্ডপং ৰিয মেঘপটলং উপ্পাদেত্ৰা। দেৰোতি মেঘো। একমেকং ফুসিতকং ফুসাযতু জালৰিনদ্ধং ৰিয ৰস্সতু। এৰং ৰুত্তপ্পকারেন নানাপরিকম্মং নানাধিট্ঠানং একতো পরিকম্মং একতো অধিট্ঠানন্তি চতুক্কমেত্থ সম্ভৰতীতি দস্সেতি ‘‘এত্থ চা’’তিআদিনা। যথা তথাতি যথাৰুত্তেসু চতূসু পকারেসু যেন ৰা তেন ৰা পকারেন করোন্তস্স। কতপরিকম্মস্সাতি ‘‘এৰং ৰা এৰং ৰা হোতূ’’তি পৰত্তিতপরিকম্মচিত্তস্স। ‘‘পরিকম্মানন্তরেনাতি অধিট্ঠানচিত্তুপ্পাদনত্থং সমাপন্নপাদকজ্ঝানতো ৰুট্ঠায অধিট্ঠানচিত্তস্স একাৰজ্জনৰীথিযং পৰত্তপরিকম্মং সন্ধায ৰুত্ত’’ন্তি ৰদন্তি।
Ettha cāti etasmiṃ adhiṭṭhāniddhikaraṇe. Abbhamaṇḍapaṃ katvāti samantato chādanavasena maṇḍapaṃ viya meghapaṭalaṃ uppādetvā. Devoti megho. Ekamekaṃ phusitakaṃ phusāyatu jālavinaddhaṃ viya vassatu. Evaṃ vuttappakārena nānāparikammaṃ nānādhiṭṭhānaṃ ekato parikammaṃ ekato adhiṭṭhānanti catukkamettha sambhavatīti dasseti ‘‘ettha cā’’tiādinā. Yathā tathāti yathāvuttesu catūsu pakāresu yena vā tena vā pakārena karontassa. Kataparikammassāti ‘‘evaṃ vā evaṃ vā hotū’’ti pavattitaparikammacittassa. ‘‘Parikammānantarenāti adhiṭṭhānacittuppādanatthaṃ samāpannapādakajjhānato vuṭṭhāya adhiṭṭhānacittassa ekāvajjanavīthiyaṃ pavattaparikammaṃ sandhāya vutta’’nti vadanti.
মহকপাটিহারিযসুত্তৰণ্ণনা নিট্ঠিতা।
Mahakapāṭihāriyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. মহকপাটিহারিযসুত্তং • 4. Mahakapāṭihāriyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. মহকপাটিহারিযসুত্তৰণ্ণনা • 4. Mahakapāṭihāriyasuttavaṇṇanā
