| Library / Tipiṭaka / तिपिटक • Tipiṭaka / जातकपाळि • Jātakapāḷi |
४४७. महाधम्मपालजातकं (९)
447. Mahādhammapālajātakaṃ (9)
९२.
92.
किं ते वतं किं पन ब्रह्मचरियं, किस्स सुचिण्णस्स अयं विपाको।
Kiṃ te vataṃ kiṃ pana brahmacariyaṃ, kissa suciṇṇassa ayaṃ vipāko;
अक्खाहि मे ब्राह्मण एतमत्थं, कस्मा नु तुम्हं दहरा न मिय्यरे 1॥
Akkhāhi me brāhmaṇa etamatthaṃ, kasmā nu tumhaṃ daharā na miyyare 2.
९३.
93.
धम्मं चराम न मुसा भणाम, पापानि कम्मानि परिवज्जयाम 3।
Dhammaṃ carāma na musā bhaṇāma, pāpāni kammāni parivajjayāma 4;
अनरियं परिवज्जेमु सब्बं, तस्मा हि अम्हं दहरा न मिय्यरे॥
Anariyaṃ parivajjemu sabbaṃ, tasmā hi amhaṃ daharā na miyyare.
९४.
94.
सुणोम धम्मं असतं सतञ्च, न चापि धम्मं असतं रोचयाम।
Suṇoma dhammaṃ asataṃ satañca, na cāpi dhammaṃ asataṃ rocayāma;
हित्वा असन्ते न जहाम सन्ते, तस्मा हि अम्हं दहरा न मिय्यरे॥
Hitvā asante na jahāma sante, tasmā hi amhaṃ daharā na miyyare.
९५.
95.
पुब्बेव दाना सुमना भवाम, ददम्पि वे अत्तमना भवाम।
Pubbeva dānā sumanā bhavāma, dadampi ve attamanā bhavāma;
दत्वापि वे नानुतप्पाम पच्छा, तस्मा हि अम्हं दहरा न मिय्यरे॥
Datvāpi ve nānutappāma pacchā, tasmā hi amhaṃ daharā na miyyare.
९६.
96.
समणे मयं ब्राह्मणे अद्धिके च, वनिब्बके याचनके दलिद्दे।
Samaṇe mayaṃ brāhmaṇe addhike ca, vanibbake yācanake dalidde;
अन्नेन पानेन अभितप्पयाम, तस्मा हि अम्हं दहरा न मिय्यरे॥
Annena pānena abhitappayāma, tasmā hi amhaṃ daharā na miyyare.
९७.
97.
मयञ्च भरियं नातिक्कमाम, अम्हे च भरिया नातिक्कमन्ति।
Mayañca bhariyaṃ nātikkamāma, amhe ca bhariyā nātikkamanti;
अञ्ञत्र ताहि ब्रह्मचरियं चराम, तस्मा हि अम्हं दहरा न मिय्यरे॥
Aññatra tāhi brahmacariyaṃ carāma, tasmā hi amhaṃ daharā na miyyare.
९८.
98.
पाणातिपाता विरमाम सब्बे, लोके अदिन्नं परिवज्जयाम।
Pāṇātipātā viramāma sabbe, loke adinnaṃ parivajjayāma;
अमज्जपा नोपि मुसा भणाम, तस्मा हि अम्हं दहरा न मिय्यरे॥
Amajjapā nopi musā bhaṇāma, tasmā hi amhaṃ daharā na miyyare.
९९.
99.
एतासु वे जायरे सुत्तमासु, मेधाविनो होन्ति पहूतपञ्ञा।
Etāsu ve jāyare suttamāsu, medhāvino honti pahūtapaññā;
बहुस्सुता वेदगुनो 5 च होन्ति, तस्मा हि अम्हं दहरा न मिय्यरे॥
Bahussutā vedaguno 6 ca honti, tasmā hi amhaṃ daharā na miyyare.
१००.
100.
माता पिता च 7 भगिनी भातरो च, पुत्ता च दारा च मयञ्च सब्बे।
Mātā pitā ca 8 bhaginī bhātaro ca, puttā ca dārā ca mayañca sabbe;
धम्मं चराम परलोकहेतु, तस्मा हि अम्हं दहरा न मिय्यरे॥
Dhammaṃ carāma paralokahetu, tasmā hi amhaṃ daharā na miyyare.
१०१.
101.
दासा च दास्यो 9 अनुजीविनो च, परिचारका कम्मकरा च सब्बे।
Dāsā ca dāsyo 10 anujīvino ca, paricārakā kammakarā ca sabbe;
धम्मं चरन्ति परलोकहेतु, तस्मा हि अम्हं दहरा न मिय्यरे॥
Dhammaṃ caranti paralokahetu, tasmā hi amhaṃ daharā na miyyare.
१०२.
102.
धम्मो हवे रक्खति धम्मचारिं, धम्मो सुचिण्णो सुखमावहाति।
Dhammo have rakkhati dhammacāriṃ, dhammo suciṇṇo sukhamāvahāti;
एसानिसंसो धम्मे सुचिण्णे, न दुग्गतिं गच्छति धम्मचारी॥
Esānisaṃso dhamme suciṇṇe, na duggatiṃ gacchati dhammacārī.
१०३.
103.
धम्मो हवे रक्खति धम्मचारिं, छत्तं महन्तं विय वस्सकाले।
Dhammo have rakkhati dhammacāriṃ, chattaṃ mahantaṃ viya vassakāle;
धम्मेन गुत्तो मम धम्मपालो, अञ्ञस्स अट्ठीनि सुखी कुमारोति॥
Dhammena gutto mama dhammapālo, aññassa aṭṭhīni sukhī kumāroti.
महाधम्मपालजातकं नवमं।
Mahādhammapālajātakaṃ navamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४४७] ९. महाधम्मपालजातकवण्णना • [447] 9. Mahādhammapālajātakavaṇṇanā
