| Library / Tipiṭaka / തിപിടക • Tipiṭaka / സംയുത്തനികായ (ടീകാ) • Saṃyuttanikāya (ṭīkā) |
൮. മഹദ്ധനസുത്തവണ്ണനാ
8. Mahaddhanasuttavaṇṇanā
൨൮. നിധീയതീതി നിധാനം. നിധാതബ്ബതം ഗതം നിഹിതന്തി അത്ഥോ. മുത്തസാരാദീതി മുത്താമണിവേളുരിയപവാളരജതജാതരൂപാദി. സുവണ്ണരജതഭാജനാദീതി ആദി-സദ്ദേന കഹാപണ-ധഞ്ഞകോട്ഠഭണ്ഡാദിം സങ്ഗണ്ഹാതി. തമ്പി ഹി നിച്ചപരിബ്ബയവസേന ഭുഞ്ജീയതീതി ‘‘ഭോഗോ’’തി വുച്ചതി. അഞ്ഞമഞ്ഞം അഭിഗിജ്ഝന്തീതി അഞ്ഞമഞ്ഞസ്സ സന്തകം അഭിഗിജ്ഝന്തി. തേനാഹ ‘‘പത്ഥേന്തീ’’തി. അനലങ്കതാതി ന അലം പരിയത്തന്തി ഏവം കതചിത്താ, അത്രിച്ഛതാമഹിച്ഛതാഹി അഭിഭൂതാ. തേനാഹ ‘‘അതിത്താ അപരിയത്തജാതാ’’തി. ഉസ്സുക്കജാതേസൂതി തംതംകിച്ചേ സഞ്ജാതഉസ്സുക്കേസു. നാനാകിച്ചജാതേസൂതി നാനാവിധകിച്ചേസു, സഞ്ജാതനാനാകിച്ചേസു വാ. വട്ടഗാമികപസുതേന വട്ടസോതം അനുസരന്തേസു. തണ്ഹാനിവാസതായ ഗേഹന്തിപി അഗാരന്തിപി വുച്ചതീതി ആഹ ‘‘മാതുഗാമേന സദ്ധിം ഗേഹ’’ന്തി. വിരാജിയാതി ഹേതുഅത്ഥദീപകം പദന്തി ആഹ ‘‘വിരാജേത്വാ’’തി, ത്വാ-സദ്ദോപി ചായം ഹേതുഅത്ഥോതി.
28. Nidhīyatīti nidhānaṃ. Nidhātabbataṃ gataṃ nihitanti attho. Muttasārādīti muttāmaṇiveḷuriyapavāḷarajatajātarūpādi. Suvaṇṇarajatabhājanādīti ādi-saddena kahāpaṇa-dhaññakoṭṭhabhaṇḍādiṃ saṅgaṇhāti. Tampi hi niccaparibbayavasena bhuñjīyatīti ‘‘bhogo’’ti vuccati. Aññamaññaṃ abhigijjhantīti aññamaññassa santakaṃ abhigijjhanti. Tenāha ‘‘patthentī’’ti. Analaṅkatāti na alaṃ pariyattanti evaṃ katacittā, atricchatāmahicchatāhi abhibhūtā. Tenāha ‘‘atittā apariyattajātā’’ti. Ussukkajātesūti taṃtaṃkicce sañjātaussukkesu. Nānākiccajātesūti nānāvidhakiccesu, sañjātanānākiccesu vā. Vaṭṭagāmikapasutena vaṭṭasotaṃ anusarantesu. Taṇhānivāsatāya gehantipi agārantipi vuccatīti āha ‘‘mātugāmena saddhiṃ geha’’nti. Virājiyāti hetuatthadīpakaṃ padanti āha ‘‘virājetvā’’ti, tvā-saddopi cāyaṃ hetuatthoti.
മഹദ്ധനസുത്തവണ്ണനാ നിട്ഠിതാ.
Mahaddhanasuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൮. മഹദ്ധനസുത്തം • 8. Mahaddhanasuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൮. മഹദ്ധനസുത്തവണ്ണനാ • 8. Mahaddhanasuttavaṇṇanā
