| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၈. မဟဒ္ဓနသုတ္တဝဏ္ဏနာ
8. Mahaddhanasuttavaṇṇanā
၂၈. နိဓီယတီတိ နိဓာနံ။ နိဓာတဗ္ဗတံ ဂတံ နိဟိတန္တိ အတ္ထော။ မုတ္တသာရာဒီတိ မုတ္တာမဏိဝေဠုရိယပဝာဠရဇတဇာတရူပာဒိ။ သုဝဏ္ဏရဇတဘာဇနာဒီတိ အာဒိ-သဒ္ဒေန ကဟာပဏ-ဓညကောဋ္ဌဘဏ္ဍာဒိံ သင္ဂဏ္ဟာတိ။ တမ္ပိ ဟိ နိစ္စပရိဗ္ဗယဝသေန ဘုဉ္ဇီယတီတိ ‘‘ဘောဂော’’တိ ဝုစ္စတိ။ အညမညံ အဘိဂိဇ္ဈန္တီတိ အညမညသ္သ သန္တကံ အဘိဂိဇ္ဈန္တိ။ တေနာဟ ‘‘ပတ္ထေန္တီ’’တိ။ အနလင္ကတာတိ န အလံ ပရိယတ္တန္တိ ဧဝံ ကတစိတ္တာ, အတ္ရိစ္ဆတာမဟိစ္ဆတာဟိ အဘိဘူတာ။ တေနာဟ ‘‘အတိတ္တာ အပရိယတ္တဇာတာ’’တိ။ ဥသ္သုက္ကဇာတေသူတိ တံတံကိစ္စေ သဉ္ဇာတဥသ္သုက္ကေသု။ နာနာကိစ္စဇာတေသူတိ နာနာဝိဓကိစ္စေသု, သဉ္ဇာတနာနာကိစ္စေသု ဝာ။ ဝဋ္ဋဂာမိကပသုတေန ဝဋ္ဋသောတံ အနုသရန္တေသု။ တဏ္ဟာနိဝာသတာယ ဂေဟန္တိပိ အဂာရန္တိပိ ဝုစ္စတီတိ အာဟ ‘‘မာတုဂာမေန သဒ္ဓိံ ဂေဟ’’န္တိ။ ဝိရာဇိယာတိ ဟေတုအတ္ထဒီပကံ ပဒန္တိ အာဟ ‘‘ဝိရာဇေတ္ဝာ’’တိ, တ္ဝာ-သဒ္ဒောပိ စာယံ ဟေတုအတ္ထောတိ။
28. Nidhīyatīti nidhānaṃ. Nidhātabbataṃ gataṃ nihitanti attho. Muttasārādīti muttāmaṇiveḷuriyapavāḷarajatajātarūpādi. Suvaṇṇarajatabhājanādīti ādi-saddena kahāpaṇa-dhaññakoṭṭhabhaṇḍādiṃ saṅgaṇhāti. Tampi hi niccaparibbayavasena bhuñjīyatīti ‘‘bhogo’’ti vuccati. Aññamaññaṃ abhigijjhantīti aññamaññassa santakaṃ abhigijjhanti. Tenāha ‘‘patthentī’’ti. Analaṅkatāti na alaṃ pariyattanti evaṃ katacittā, atricchatāmahicchatāhi abhibhūtā. Tenāha ‘‘atittā apariyattajātā’’ti. Ussukkajātesūti taṃtaṃkicce sañjātaussukkesu. Nānākiccajātesūti nānāvidhakiccesu, sañjātanānākiccesu vā. Vaṭṭagāmikapasutena vaṭṭasotaṃ anusarantesu. Taṇhānivāsatāya gehantipi agārantipi vuccatīti āha ‘‘mātugāmena saddhiṃ geha’’nti. Virājiyāti hetuatthadīpakaṃ padanti āha ‘‘virājetvā’’ti, tvā-saddopi cāyaṃ hetuatthoti.
မဟဒ္ဓနသုတ္တဝဏ္ဏနာ နိဋ္ဌိတာ။
Mahaddhanasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. မဟဒ္ဓနသုတ္တံ • 8. Mahaddhanasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. မဟဒ္ဓနသုတ္တဝဏ္ဏနာ • 8. Mahaddhanasuttavaṇṇanā
