| Library / Tipiṭaka / д̇ибидага • Tipiṭaka / суд̇д̇анибаад̇а-адтагат̇аа • Suttanipāta-aṭṭhakathā |
13. махааб̣яуухасуд̇д̇аван̣н̣анаа
13. Mahābyūhasuttavaṇṇanā
902. яз гзжимзд̇и махааб̣яуухасуд̇д̇ам̣. гаа уббад̇д̇и? ид̣̇амби д̇асмим̣язва махаасамаяз ‘‘гим̣ ну ко имз д̣̇идтибариб̣б̣асаанаа вин̃н̃уунам̣ санд̇игаа нинд̣̇амзва лабханд̇и, уд̣̇ааху басам̣самбий’’д̇и уббаннажид̇д̇аанам̣ згажжаанам̣ д̣̇звад̇аанам̣ д̇амад̇т̇ам̣ аавигаад̇ум̣ буриманаязна ниммид̇аб̣уд̣̇д̇хзна ад̇д̇аанам̣ бужчаабзд̇ваа вуд̇д̇ам̣. д̇ад̇т̇а анваанаяанд̇ийд̇и ану аанаяанд̇и, бунаббунам̣ аахаранд̇и.
902.Yekecimeti mahābyūhasuttaṃ. Kā uppatti? Idampi tasmiṃyeva mahāsamaye ‘‘kiṃ nu kho ime diṭṭhiparibbasānā viññūnaṃ santikā nindameva labhanti, udāhu pasaṃsampī’’ti uppannacittānaṃ ekaccānaṃ devatānaṃ tamatthaṃ āvikātuṃ purimanayena nimmitabuddhena attānaṃ pucchāpetvā vuttaṃ. Tattha anvānayantīti anu ānayanti, punappunaṃ āharanti.
903. ид̣̇аани яасмаа д̇з ‘‘ид̣̇амзва сажжа’’нд̇и вад̣̇анд̇аа д̣̇идтиг̇ад̇игаа ваад̣̇ино гад̣̇аажи гад̇т̇ажи басам̣самби лабханд̇и, яам̣ зд̇ам̣ басам̣саасан̇каад̇ам̣ ваад̣̇апалам̣, д̇ам̣ аббам̣ рааг̇аад̣̇ийнам̣ самааяа самад̇т̇ам̣ на ход̇и, го бана ваад̣̇о д̣̇уд̇ияз нинд̣̇аапалз, д̇асмаа зд̇амад̇т̇ам̣ д̣̇ассзнд̇о имам̣ д̇аава виссаж̇ж̇анаг̇аат̇амааха. ‘‘аббан̃хи зд̇ам̣ на алам̣ самааяа, д̣̇увз виваад̣̇асса палаани б̣руумий’’д̇иаад̣̇и. д̇ад̇т̇а д̣̇увз виваад̣̇асса палаанийд̇и нинд̣̇аа басам̣саа жа, ж̇аяабарааж̇аяаад̣̇ийни ваа д̇ам̣сабхааг̇аани. зд̇амби д̣̇исваад̇и ‘‘нинд̣̇аа анидтаа зва, басам̣саа наалам̣ самааяаа’’д̇и зд̇амби виваад̣̇апалз аад̣̇ийнавам̣ д̣̇исваа. кзмаабхибассам̣ авиваад̣̇абхууминд̇и авиваад̣̇абхуумим̣ ниб̣б̣аанам̣ ‘‘кзма’’нд̇и бассамаано.
903. Idāni yasmā te ‘‘idameva sacca’’nti vadantā diṭṭhigatikā vādino kadāci katthaci pasaṃsampi labhanti, yaṃ etaṃ pasaṃsāsaṅkhātaṃ vādaphalaṃ, taṃ appaṃ rāgādīnaṃ samāya samatthaṃ na hoti, ko pana vādo dutiye nindāphale, tasmā etamatthaṃ dassento imaṃ tāva vissajjanagāthamāha. ‘‘Appañhi etaṃ na alaṃ samāya, duve vivādassa phalāni brūmī’’tiādi. Tattha duve vivādassa phalānīti nindā pasaṃsā ca, jayaparājayādīni vā taṃsabhāgāni. Etampi disvāti ‘‘nindā aniṭṭhā eva, pasaṃsā nālaṃ samāyā’’ti etampi vivādaphale ādīnavaṃ disvā. Khemābhipassaṃ avivādabhūminti avivādabhūmiṃ nibbānaṃ ‘‘khema’’nti passamāno.
904. зван̃хи авивад̣̇амаано – яаа гаажимаад̇и г̇аат̇аа. д̇ад̇т̇а саммуд̇ияод̇и д̣̇идтияо. бут̇уж̇ж̇аад̇и бут̇уж̇ж̇анасамбхаваа. со убаяам̣ гимзяяаад̇и со убаг̇анд̇аб̣б̣адтзна убаяам̣ руубаад̣̇ийсу згамби д̇хаммам̣ гим̣ убзяяа, гзна ваа гааран̣зна убзяяа. д̣̇идтз суд̇з канд̇имагуб̣б̣амаанод̇и д̣̇идтасуд̇асуд̣̇д̇хийсу бзмам̣ агаронд̇о.
904. Evañhi avivadamāno – yā kācimāti gāthā. Tattha sammutiyoti diṭṭhiyo. Puthujjāti puthujjanasambhavā. So upayaṃ kimeyyāti so upagantabbaṭṭhena upayaṃ rūpādīsu ekampi dhammaṃ kiṃ upeyya, kena vā kāraṇena upeyya. Diṭṭhe sute khantimakubbamānoti diṭṭhasutasuddhīsu pemaṃ akaronto.
905. ид̇о б̣аахираа бана – сийлуд̇д̇амаад̇и г̇аат̇аа. д̇ассад̇т̇о – сийлам̣язва ‘‘уд̇д̇ама’’нд̇и ман̃н̃амаанаа сийлуд̇д̇амаа згз бхонд̇о сам̣яамамад̇д̇зна суд̣̇д̇хим̣ вад̣̇анд̇и, хад̇т̇ивад̇аад̣̇ин̃жа вад̇ам̣ самаад̣̇ааяа убадтид̇аа, ид̇хзва д̣̇идтияам̣ асса сад̇т̇уно суд̣̇д̇хинд̇и бхавуубанийд̇аа бхаваж̇жхосид̇аа самаанаа вад̣̇анд̇и, абижа д̇з гусалаа вад̣̇аанаа ‘‘гусалаа маяа’’нд̇и звам̣ ваад̣̇аа.
905. Ito bāhirā pana – sīluttamāti gāthā. Tassattho – sīlaṃyeva ‘‘uttama’’nti maññamānā sīluttamā eke bhonto saṃyamamattena suddhiṃ vadanti, hatthivatādiñca vataṃ samādāya upaṭṭhitā, idheva diṭṭhiyaṃ assa satthuno suddhinti bhavūpanītā bhavajjhositā samānā vadanti, apica te kusalā vadānā ‘‘kusalā maya’’nti evaṃ vādā.
906. звам̣ сийлуд̇д̇амзсу жа д̇зсу д̇ат̇аа бадибанно яо гожи – сажз жуд̇од̇и г̇аат̇аа. д̇ассад̇т̇о – сажз д̇ад̇о сийлавад̇ад̇о баравижчанд̣̇анзна ваа анабхисамбхун̣анд̇о ваа жуд̇о ход̇и, со д̇ам̣ сийлаб̣б̣ад̇аад̣̇игаммам̣ бун̃н̃аабхисан̇каараад̣̇игаммам̣ ваа вираад̇хаяид̇ваа бавзд̇хад̇ий. на гзвалан̃жа взд̇хад̇и, абижа ко д̇ам̣ сийлаб̣б̣ад̇асуд̣̇д̇хим̣ баж̇аббад̇ий жа виббалабад̇и бад̇т̇аяад̇ий жа. гимива? сад̇т̇аава хийно бавасам̣ гхарамхаа. гхарамхаа бавасанд̇о сад̇т̇ад̇о хийно яат̇аа д̇ам̣ гхарам̣ ваа сад̇т̇ам̣ ваа бад̇т̇зяяаад̇и.
906. Evaṃ sīluttamesu ca tesu tathā paṭipanno yo koci – sace cutoti gāthā. Tassattho – sace tato sīlavatato paravicchandanena vā anabhisambhuṇanto vā cuto hoti, so taṃ sīlabbatādikammaṃ puññābhisaṅkhārādikammaṃ vā virādhayitvā pavedhatī. Na kevalañca vedhati, apica kho taṃ sīlabbatasuddhiṃ pajappatī ca vippalapati patthayatī ca. Kimiva? Satthāva hīno pavasaṃ gharamhā. Gharamhā pavasanto satthato hīno yathā taṃ gharaṃ vā satthaṃ vā pattheyyāti.
907. звам̣ бана сийлуд̇д̇амаанам̣ взд̇хагааран̣ам̣ арияасааваго – сийлаб̣б̣ад̇ам̣ вааби бахааяа саб̣б̣анд̇и г̇аат̇аа. д̇ад̇т̇а сааваж̇ж̇анаваж̇ж̇анд̇и саб̣б̣аагусалам̣ логияагусалан̃жа. зд̇ам̣ суд̣̇д̇хим̣ асуд̣̇д̇хинд̇и абад̇т̇аяаанод̇и бан̃жагаамаг̇ун̣аад̣̇ибхзд̣̇ам̣ зд̇ам̣ суд̣̇д̇хим̣, агусалаад̣̇ибхзд̣̇ам̣ асуд̣̇д̇хин̃жа абад̇т̇аяамаано. вирад̇о жарзд̇и суд̣̇д̇хияаа асуд̣̇д̇хияаа жа вирад̇о жарзяяа. санд̇имануг̇г̇ахааяаад̇и д̣̇идтим̣ аг̇ахзд̇ваа.
907. Evaṃ pana sīluttamānaṃ vedhakāraṇaṃ ariyasāvako – sīlabbataṃ vāpi pahāya sabbanti gāthā. Tattha sāvajjanavajjanti sabbākusalaṃ lokiyakusalañca. Etaṃ suddhiṃ asuddhinti apatthayānoti pañcakāmaguṇādibhedaṃ etaṃ suddhiṃ, akusalādibhedaṃ asuddhiñca apatthayamāno. Virato careti suddhiyā asuddhiyā ca virato careyya. Santimanuggahāyāti diṭṭhiṃ agahetvā.
908. звам̣ ид̇о б̣аахирагз сийлуд̇д̇амз сам̣яамзна висуд̣̇д̇хиваад̣̇з д̇зсам̣ вигхаад̇ам̣ сийлаб̣б̣ад̇аббахааяино арахад̇о жа бадибад̇д̇им̣ д̣̇ассзд̇ваа ид̣̇аани ан̃н̃ат̇ааби суд̣̇д̇хиваад̣̇з б̣аахирагз д̣̇ассзнд̇о ‘‘д̇амуубаниссааяаа’’д̇и г̇аат̇амааха. д̇ассад̇т̇о – санд̇ан̃н̃зби саман̣аб̣раахман̣аа, д̇з ж̇иг̇ужчид̇ам̣ амаранд̇абам̣ ваа д̣̇идтасуд̣̇д̇хиаад̣̇ийсу ваа ан̃н̃ад̇аран̃н̃ад̇арам̣ убаниссааяа агирияад̣̇идтияаа ваа уд̣̇д̇хам̣сараа худ̇ваа бхаваабхавзсу авийд̇ад̇ан̣хаасз суд̣̇д̇химануд̇т̇унанд̇и вад̣̇анд̇и гат̇знд̇ийд̇и.
908. Evaṃ ito bāhirake sīluttame saṃyamena visuddhivāde tesaṃ vighātaṃ sīlabbatappahāyino arahato ca paṭipattiṃ dassetvā idāni aññathāpi suddhivāde bāhirake dassento ‘‘tamūpanissāyā’’ti gāthamāha. Tassattho – santaññepi samaṇabrāhmaṇā, te jigucchitaṃ amarantapaṃ vā diṭṭhasuddhiādīsu vā aññataraññataraṃ upanissāya akiriyadiṭṭhiyā vā uddhaṃsarā hutvā bhavābhavesu avītataṇhāsesuddhimanutthunanti vadanti kathentīti.
909. звам̣ д̇зсам̣ авийд̇ад̇ан̣хаанам̣ суд̣̇д̇хим̣ ануд̇т̇унанд̇аанам̣ яоби суд̣̇д̇хиббад̇д̇амзва ад̇д̇аанам̣ ман̃н̃зяяа, д̇ассаби авийд̇ад̇ан̣хад̇д̇аа бхаваабхавзсу д̇ам̣ д̇ам̣ вад̇т̇ум̣ бад̇т̇аяамаанасса хи ж̇аббид̇аани бунаббунам̣ хонд̇иязваад̇и ад̇хиббааяо. д̇ан̣хаа хи аасзвид̇аа д̇ан̣хам̣ вад̣дхаяад̇зва. на гзвалан̃жа ж̇аббид̇аани, бавзд̇хид̇ам̣ вааби багаббид̇зсу, д̇ан̣хаад̣̇идтийхи жасса багаббид̇зсу вад̇т̇уусу бавзд̇хид̇амби ход̇ийд̇и вуд̇д̇ам̣ ход̇и. бхаваабхавзсу бана вийд̇ад̇ан̣хад̇д̇аа ааяад̇им̣ жуд̇уубабаад̇о ид̇ха яасса над̇т̇и, сагзна взд̇хзяяа гухим̣ва ж̇аббзд̇и аяамзд̇иссаа г̇аат̇ааяа самб̣анд̇хо. сзсам̣ нид̣̇д̣̇зсз вуд̇д̇анаяамзва.
909. Evaṃ tesaṃ avītataṇhānaṃ suddhiṃ anutthunantānaṃ yopi suddhippattameva attānaṃ maññeyya, tassapi avītataṇhattā bhavābhavesu taṃ taṃ vatthuṃ patthayamānassa hi jappitāni punappunaṃ hontiyevāti adhippāyo. Taṇhā hi āsevitā taṇhaṃ vaḍḍhayateva. Na kevalañca jappitāni, pavedhitaṃ vāpi pakappitesu, taṇhādiṭṭhīhi cassa pakappitesu vatthūsu pavedhitampi hotīti vuttaṃ hoti. Bhavābhavesu pana vītataṇhattā āyatiṃ cutūpapāto idha yassa natthi, sakena vedheyya kuhiṃva jappeti ayametissā gāthāya sambandho. Sesaṃ niddese vuttanayameva.
910-11. яамаахууд̇и бужчааг̇аат̇аа. ид̣̇аани яасмаа згоби зд̇т̇а ваад̣̇о сажжо над̇т̇и, гзвалам̣ д̣̇идтимад̇д̇агзна хи д̇з вад̣̇анд̇и, д̇асмаа д̇амад̇т̇ам̣ д̣̇ассзнд̇о ‘‘саган̃хий’’д̇и имам̣ д̇аава виссаж̇ж̇анаг̇аат̇амааха. д̇ад̇т̇а саммуд̇инд̇и д̣̇идтим̣.
910-11.Yamāhūti pucchāgāthā. Idāni yasmā ekopi ettha vādo sacco natthi, kevalaṃ diṭṭhimattakena hi te vadanti, tasmā tamatthaṃ dassento ‘‘sakañhī’’ti imaṃ tāva vissajjanagāthamāha. Tattha sammutinti diṭṭhiṃ.
912. звамзд̇зсу сагам̣ д̇хаммам̣ барибун̣н̣ам̣ б̣руванд̇зсу ан̃н̃асса бана д̇хаммам̣ ‘‘хийна’’нд̇и вад̣̇анд̇зсу яасса гассажи – барасса жз вамбхаяид̇зна хийнод̇и г̇аат̇аа. д̇ассад̇т̇о – яад̣̇и барасса нинд̣̇ид̇агааран̣аа хийно бхавзяяа, на гожи д̇хаммзсу висзси аг̇г̇о бхавзяяа. гим̣ гааран̣ам̣? бут̇уу хи ан̃н̃асса вад̣̇анд̇и д̇хаммам̣, нихийнад̇о саб̣б̣зва д̇з самхи д̣̇ал̣хам̣ вад̣̇аанаа сагад̇хаммз д̣̇ал̣хаваад̣̇аа зва.
912. Evametesu sakaṃ dhammaṃ paripuṇṇaṃ bruvantesu aññassa pana dhammaṃ ‘‘hīna’’nti vadantesu yassa kassaci – parassa ce vambhayitena hīnoti gāthā. Tassattho – yadi parassa ninditakāraṇā hīno bhaveyya, na koci dhammesu visesi aggo bhaveyya. Kiṃ kāraṇaṃ? Puthū hiaññassa vadanti dhammaṃ, nihīnato sabbeva te samhi daḷhaṃ vadānā sakadhamme daḷhavādā eva.
913. гин̃жа бхияяо – сад̣̇д̇хаммабууж̇аад̇и г̇аат̇аа. д̇ассад̇т̇о – д̇з жа д̇ид̇т̇ияаа яат̇аа басам̣санд̇и сагааяанаани, сад̣̇д̇хаммабууж̇ааби нзсам̣ д̇ат̇зва вад̇д̇ад̇и. д̇з хи ад̇ивияа сад̇т̇аараад̣̇ийни саггаронд̇и. д̇ад̇т̇а яад̣̇и д̇з бамаан̣аа сияум̣, звам̣ санд̇з саб̣б̣зва ваад̣̇аа д̇ат̇ияаа бхавзяяум̣. гим̣ гааран̣ам̣? суд̣̇д̇хий хи нзсам̣ бажжад̇д̇амзва, на саа ан̃н̃ад̇ра сиж̇жхад̇и, нааби барамад̇т̇ад̇о. ад̇д̇ани д̣̇идтиг̇аахамад̇д̇амзва хи д̇ам̣ д̇зсам̣ барабажжаяанзяяаб̣уд̣̇д̇хийнам̣.
913. Kiñca bhiyyo – saddhammapūjāti gāthā. Tassattho – te ca titthiyā yathā pasaṃsanti sakāyanāni, saddhammapūjāpi nesaṃ tatheva vattati. Te hi ativiya satthārādīni sakkaronti. Tattha yadi te pamāṇā siyuṃ, evaṃ sante sabbeva vādā tathiyā bhaveyyuṃ. Kiṃ kāraṇaṃ? Suddhī hi nesaṃ paccattameva, na sā aññatra sijjhati, nāpi paramatthato. Attani diṭṭhigāhamattameva hi taṃ tesaṃ parapaccayaneyyabuddhīnaṃ.
914. яо ваа бана вибарийд̇о б̣аахид̇абаабад̇д̇аа б̣раахман̣о, д̇асса – на б̣раахман̣асса баранзяяамад̇т̇ийд̇и г̇аат̇аа. д̇ассад̇т̇о – б̣раахман̣асса хи ‘‘саб̣б̣з сан̇каараа анижжаа’’д̇иаад̣̇инаа (д̇ха. ба. 277; нзд̇д̇и. 5) наязна суд̣̇идтад̇д̇аа барзна нзд̇аб̣б̣ам̣ н̃аан̣ам̣ над̇т̇и, д̣̇идтид̇хаммзсу ‘‘ид̣̇амзва сажжа’’нд̇и нижчинид̇ваа самуг̇г̇ахийд̇амби над̇т̇и. д̇ам̣гааран̣аа со д̣̇идтигалахаани ад̇ийд̇о, на жа со сздтад̇о бассад̇и д̇хаммаман̃н̃ам̣ ан̃н̃ад̇ра сад̇ибадтаанаад̣̇ийхи.
914. Yo vā pana viparīto bāhitapāpattā brāhmaṇo, tassa – na brāhmaṇassa paraneyyamatthīti gāthā. Tassattho – brāhmaṇassa hi ‘‘sabbe saṅkhārā aniccā’’tiādinā (dha. pa. 277; netti. 5) nayena sudiṭṭhattā parena netabbaṃ ñāṇaṃ natthi, diṭṭhidhammesu ‘‘idameva sacca’’nti nicchinitvā samuggahītampi natthi. Taṃkāraṇā so diṭṭhikalahāni atīto, na ca so seṭṭhato passati dhammamaññaṃ aññatra satipaṭṭhānādīhi.
915. ж̇аанаамийд̇и г̇аат̇ааяа самб̣анд̇хо ад̇т̇о жа – звам̣ д̇аава барамад̇т̇аб̣раахман̣о на хи сздтад̇о бассад̇и д̇хаммаман̃н̃ам̣, ан̃н̃з бана д̇ид̇т̇ияаа баражид̇д̇ан̃аан̣аад̣̇ийхи ж̇аананд̇аа бассанд̇ааби ‘‘ж̇аанаами бассаами д̇ат̇зва зд̇а’’нд̇и звам̣ вад̣̇анд̇ааби жа д̣̇идтияаа суд̣̇д̇хим̣ бажжзнд̇и. гасмаа? яасмаа д̇зсу згоби ад̣̇д̣̇агки жз ад̣̇д̣̇аса жзби д̇зна баражид̇д̇ан̃аан̣аад̣̇инаа яат̇аабхууд̇ам̣ ад̇т̇ам̣, гин̃хи д̇умасса д̇зна д̇асса д̇зна д̣̇ассанзна гим̣ гад̇ам̣, гим̣ д̣̇угкабарин̃н̃аа саад̇хид̇аа, уд̣̇ааху самуд̣̇аяабахаанаад̣̇ийнам̣ ан̃н̃ад̇арам̣, яад̇о саб̣б̣ат̇ааби ад̇иггамид̇ваа арияамаг̇г̇ам̣ д̇з д̇ид̇т̇ияаа ан̃н̃знзва вад̣̇анд̇и суд̣̇д̇хим̣, ад̇иггамид̇ваа ваа д̇з д̇ид̇т̇ияз б̣уд̣̇д̇хаад̣̇аяо ан̃н̃знзва вад̣̇анд̇и суд̣̇д̇хинд̇и.
915.Jānāmīti gāthāya sambandho attho ca – evaṃ tāva paramatthabrāhmaṇo na hi seṭṭhato passati dhammamaññaṃ, aññe pana titthiyā paracittañāṇādīhi jānantā passantāpi ‘‘jānāmi passāmi tatheva eta’’nti evaṃ vadantāpi ca diṭṭhiyā suddhiṃ paccenti. Kasmā? Yasmā tesu ekopi addakkhi ce addasa cepi tena paracittañāṇādinā yathābhūtaṃ atthaṃ, kiñhi tumassa tena tassa tena dassanena kiṃ kataṃ, kiṃ dukkhapariññā sādhitā, udāhu samudayapahānādīnaṃ aññataraṃ, yato sabbathāpi atikkamitvā ariyamaggaṃ te titthiyā aññeneva vadanti suddhiṃ, atikkamitvā vā te titthiye buddhādayo aññeneva vadanti suddhinti.
916. бассам̣ народ̇и г̇аат̇ааяа самб̣анд̇хо ад̇т̇о жа. гин̃жа бхияяо? явааяам̣ баражид̇д̇ан̃аан̣аад̣̇ийхи ад̣̇д̣̇агки, со бассам̣ наро д̣̇агкад̇и наамаруубам̣, на д̇ад̇о барам̣ д̣̇исваана ваа н̃ассад̇и д̇аанимзва наамаруубаани нижжад̇о сукад̇о ваа на ан̃н̃ат̇аа. со звам̣ бассанд̇о гаамам̣ б̣ахум̣ бассад̇у аббагам̣ ваа наамаруубам̣ нижжад̇о сукад̇о жа, ат̇асса зваруубзна д̣̇ассанзна на хи д̇зна суд̣̇д̇хим̣ гусалаа вад̣̇анд̇ийд̇и.
916.Passaṃ naroti gāthāya sambandho attho ca. Kiñca bhiyyo? Yvāyaṃ paracittañāṇādīhi addakkhi, so passaṃ naro dakkhati nāmarūpaṃ, na tato paraṃ disvāna vā ñassati tānimeva nāmarūpāni niccato sukhato vā na aññathā. So evaṃ passanto kāmaṃ bahuṃ passatu appakaṃ vā nāmarūpaṃ niccato sukhato ca, athassa evarūpena dassanena na hi tena suddhiṃ kusalā vadantīti.
917. нивиссаваад̣̇ийд̇и г̇аат̇ааяа самб̣анд̇хо ад̇т̇о жа – д̇зна жа д̣̇ассанзна суд̣̇д̇хияаа асад̇ияааби яо ‘‘ж̇аанаами бассаами д̇ат̇зва зд̇а’’нд̇и звам̣ нивиссаваад̣̇ий, зд̇ам̣ ваа д̣̇ассанам̣ бадижжа д̣̇идтияаа суд̣̇д̇хим̣ бажжзнд̇о ‘‘ид̣̇амзва сажжа’’нд̇и звам̣ нивиссаваад̣̇ий, со суб̣б̣инаяо на ход̇и д̇ам̣ д̇ат̇аа багаббид̇ам̣ абхисан̇кад̇ам̣ д̣̇идтим̣ бурзгкараано. со хи яам̣ сад̇т̇аараад̣̇им̣ ниссид̇о, д̇ад̇т̇зва субхам̣ вад̣̇аано суд̣̇д̇хим̣ вад̣̇о, ‘‘барисуд̣̇д̇хаваад̣̇о барисуд̣̇д̇хад̣̇ассано ваа аха’’нд̇и ад̇д̇аанам̣ ман̃н̃амаано д̇ад̇т̇а д̇ат̇ад̣̇д̣̇асаа со, д̇ад̇т̇а сагааяа д̣̇идтияаа авибарийд̇амзва со ад̣̇д̣̇аса. яат̇аа саа д̣̇идти бавад̇д̇ад̇и, д̇ат̇зва нам̣ ад̣̇д̣̇аса, на ан̃н̃ат̇аа бассид̇ум̣ ижчад̇ийд̇и ад̇хиббааяо.
917.Nivissavādīti gāthāya sambandho attho ca – tena ca dassanena suddhiyā asatiyāpi yo ‘‘jānāmi passāmi tatheva eta’’nti evaṃ nivissavādī, etaṃ vā dassanaṃ paṭicca diṭṭhiyā suddhiṃ paccento ‘‘idameva sacca’’nti evaṃ nivissavādī, so subbinayo na hoti taṃ tathā pakappitaṃ abhisaṅkhataṃ diṭṭhiṃ purekkharāno. So hi yaṃ satthārādiṃ nissito, tattheva subhaṃ vadāno suddhiṃ vado, ‘‘parisuddhavādo parisuddhadassano vā aha’’nti attānaṃ maññamāno tattha tathaddasā so, tattha sakāya diṭṭhiyā aviparītameva so addasa. Yathā sā diṭṭhi pavattati, tatheva naṃ addasa, na aññathā passituṃ icchatīti adhippāyo.
918. звам̣ багаббид̇ам̣ д̣̇идтим̣ бурзгкараанзсу д̇ид̇т̇иязсу – на б̣раахман̣о габбамубзд̇и сан̇каад̇и г̇аат̇аа. д̇ад̇т̇а сан̇каад̇и сан̇кааяа, ж̇аанид̇ваад̇и ад̇т̇о. наби н̃аан̣аб̣анд̇хууд̇и самаабад̇д̇ин̃аан̣аад̣̇инаа агад̇ад̇ан̣хаад̣̇идтиб̣анд̇ху. д̇ад̇т̇а виг̇г̇ахо – нааби асса н̃аан̣зна гад̇о б̣анд̇ху ад̇т̇ийд̇и наби н̃аан̣аб̣анд̇ху. саммуд̇ияод̇и д̣̇идтисаммуд̇ияо. бут̇уж̇ж̇аад̇и бут̇уж̇ж̇анасамбхаваа. уг̇г̇ахан̣анд̇и ман̃н̃зд̇и уг̇г̇ахан̣анд̇и ан̃н̃з, ан̃н̃з д̇аа саммуд̇ияо уг̇г̇ан̣ханд̇ийд̇и вуд̇д̇ам̣ ход̇и.
918. Evaṃ pakappitaṃ diṭṭhiṃ purekkharānesu titthiyesu – na brāhmaṇo kappamupeti saṅkhāti gāthā. Tattha saṅkhāti saṅkhāya, jānitvāti attho. Napi ñāṇabandhūti samāpattiñāṇādinā akatataṇhādiṭṭhibandhu. Tattha viggaho – nāpi assa ñāṇena kato bandhu atthīti napi ñāṇabandhu. Sammutiyoti diṭṭhisammutiyo. Puthujjāti puthujjanasambhavā. Uggahaṇanti maññeti uggahaṇanti aññe, aññe tā sammutiyo uggaṇhantīti vuttaṃ hoti.
919. гин̃жа бхияяо – виссаж̇ж̇а г̇ант̇аанийд̇и г̇аат̇аа. д̇ад̇т̇а ануг̇г̇аход̇и уг̇г̇ахан̣авирахид̇о, соби наасса уг̇г̇аход̇и ануг̇г̇ахо, на ваа уг̇г̇ан̣хаад̇ийд̇и ануг̇г̇ахо.
919. Kiñca bhiyyo – vissajja ganthānīti gāthā. Tattha anuggahoti uggahaṇavirahito, sopi nāssa uggahoti anuggaho, na vā uggaṇhātīti anuggaho.
920. гин̃жа бхияяо – со зваруубо – буб̣б̣аасавзд̇и г̇аат̇аа. д̇ад̇т̇а буб̣б̣аасавзд̇и ад̇ийд̇аруубаад̣̇ийни аараб̣бха уббаж̇ж̇амаанад̇хаммз гилзсз. навзд̇и бажжуббаннаруубаад̣̇ийни аараб̣бха уббаж̇ж̇амаанад̇хаммз. на чанд̣̇аг̇ууд̇и чанд̣̇аад̣̇ивасзна на г̇ажчад̇и. анад̇д̇аг̇арахийд̇и гад̇аагад̇авасзна ад̇д̇аанам̣ аг̇араханд̇о.
920. Kiñca bhiyyo – so evarūpo – pubbāsaveti gāthā. Tattha pubbāsaveti atītarūpādīni ārabbha uppajjamānadhamme kilese. Naveti paccuppannarūpādīni ārabbha uppajjamānadhamme. Na chandagūti chandādivasena na gacchati. Anattagarahīti katākatavasena attānaṃ agarahanto.
921. звам̣ анад̇д̇аг̇арахий жа – са саб̣б̣ад̇хаммзсууд̇и г̇аат̇аа. д̇ад̇т̇а саб̣б̣ад̇хаммзсууд̇и д̣̇ваасадтид̣̇идтид̇хаммзсу ‘‘яам̣ гин̃жи д̣̇идтам̣ ваа’’д̇и звам̣бабхзд̣̇зсу. баннабхаарод̇и бад̇ид̇абхааро. на габбзд̇ийд̇и на габбияо, д̣̇увид̇хамби габбам̣ на гарод̇ийд̇и ад̇т̇о. нуубарад̇од̇и бут̇уж̇ж̇анагаляаан̣агасзгкаа вияа убарад̇исаман̇г̇ийби на ход̇и. на бад̇т̇ияод̇и нид̇д̇ан̣хо. д̇ан̣хаа хи бад̇т̇ияад̇ийд̇и бад̇т̇ияаа, наасса бад̇т̇ияаад̇и на бад̇т̇ияод̇и. сзсам̣ д̇ад̇т̇а д̇ад̇т̇а баагадамзваад̇и на вуд̇д̇ам̣. звам̣ арахад̇д̇анигуудзна д̣̇зсанам̣ нидтаабзси, д̣̇зсанаабарияосаанз бураабхзд̣̇асуд̇д̇з вуд̇д̇асад̣̇исо зваабхисамаяо ахосийд̇и.
921. Evaṃ anattagarahī ca – sa sabbadhammesūti gāthā. Tattha sabbadhammesūti dvāsaṭṭhidiṭṭhidhammesu ‘‘yaṃ kiñci diṭṭhaṃ vā’’ti evaṃpabhedesu. Pannabhāroti patitabhāro. Na kappetīti na kappiyo, duvidhampi kappaṃ na karotīti attho. Nūparatoti puthujjanakalyāṇakasekkhā viya uparatisamaṅgīpi na hoti. Na patthiyoti nittaṇho. Taṇhā hi patthiyatīti patthiyā, nāssa patthiyāti na patthiyoti. Sesaṃ tattha tattha pākaṭamevāti na vuttaṃ. Evaṃ arahattanikūṭena desanaṃ niṭṭhāpesi, desanāpariyosāne purābhedasutte vuttasadiso evābhisamayo ahosīti.
барамад̇т̇аж̇од̇игааяа куд̣̇д̣̇ага-адтагат̇ааяа
Paramatthajotikāya khuddaka-aṭṭhakathāya
суд̇д̇анибаад̇а-адтагат̇ааяа махааб̣яуухасуд̇д̇аван̣н̣анаа нидтид̇аа.
Suttanipāta-aṭṭhakathāya mahābyūhasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / суд̇д̇анибаад̇абаал̣и • Suttanipātapāḷi / 13. махааб̣яуухасуд̇д̇ам̣ • 13. Mahābyūhasuttaṃ
