| Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
១៣. មហាព្យូហសុត្តំ
13. Mahābyūhasuttaṃ
៩០១.
901.
យេ កេចិមេ ទិដ្ឋិបរិព្ពសានា, ឥទមេវ សច្ចន្តិ វិវាទយន្តិ 1;
Ye kecime diṭṭhiparibbasānā, idameva saccanti vivādayanti 2;
សព្ពេវ តេ និន្ទមន្វានយន្តិ, អថោ បសំសម្បិ លភន្តិ តត្ថ។
Sabbeva te nindamanvānayanti, atho pasaṃsampi labhanti tattha.
៩០២.
902.
អប្បញ្ហិ ឯតំ ន អលំ សមាយ, ទុវេ វិវាទស្ស ផលានិ ព្រូមិ;
Appañhi etaṃ na alaṃ samāya, duve vivādassa phalāni brūmi;
ឯតម្បិ ទិស្វា ន វិវាទយេថ, ខេមាភិបស្សំ អវិវាទភូមិំ។
Etampi disvā na vivādayetha, khemābhipassaṃ avivādabhūmiṃ.
៩០៣.
903.
យា កាចិមា សម្មុតិយោ បុថុជ្ជា, សព្ពាវ ឯតា ន ឧបេតិ វិទ្វា;
Yā kācimā sammutiyo puthujjā, sabbāva etā na upeti vidvā;
អនូបយោ សោ ឧបយំ កិមេយ្យ, ទិដ្ឋេ សុតេ ខន្តិមកុព្ពមានោ។
Anūpayo so upayaṃ kimeyya, diṭṭhe sute khantimakubbamāno.
៩០៤.
904.
សីលុត្តមា សញ្ញមេនាហុ សុទ្ធិំ, វតំ សមាទាយ ឧបដ្ឋិតាសេ;
Sīluttamā saññamenāhu suddhiṃ, vataṃ samādāya upaṭṭhitāse;
ឥធេវ សិក្ខេម អថស្ស សុទ្ធិំ, ភវូបនីតា កុសលា វទានា។
Idheva sikkhema athassa suddhiṃ, bhavūpanītā kusalā vadānā.
៩០៥.
905.
សចេ ចុតោ សីលវតតោ ហោតិ, បវេធតី 3 កម្ម វិរាធយិត្វា;
Sace cuto sīlavatato hoti, pavedhatī 4 kamma virādhayitvā;
បជប្បតី បត្ថយតី ច សុទ្ធិំ, សត្ថាវ ហីនោ បវសំ ឃរម្ហា។
Pajappatī patthayatī ca suddhiṃ, satthāva hīno pavasaṃ gharamhā.
៩០៦.
906.
សីលព្ពតំ វាបិ បហាយ សព្ពំ, កម្មញ្ច សាវជ្ជនវជ្ជមេតំ;
Sīlabbataṃ vāpi pahāya sabbaṃ, kammañca sāvajjanavajjametaṃ;
សុទ្ធិំ អសុទ្ធិន្តិ អបត្ថយានោ, វិរតោ ចរេ សន្តិមនុគ្គហាយ។
Suddhiṃ asuddhinti apatthayāno, virato care santimanuggahāya.
៩០៧.
907.
តមូបនិស្សាយ ជិគុច្ឆិតំ វា, អថវាបិ ទិដ្ឋំ វ សុតំ មុតំ វា;
Tamūpanissāya jigucchitaṃ vā, athavāpi diṭṭhaṃ va sutaṃ mutaṃ vā;
ឧទ្ធំសរា សុទ្ធិមនុត្ថុនន្តិ, អវីតតណ្ហាសេ ភវាភវេសុ។
Uddhaṃsarā suddhimanutthunanti, avītataṇhāse bhavābhavesu.
៩០៨.
908.
បត្ថយមានស្ស ហិ ជប្បិតានិ, បវេធិតំ វាបិ បកប្បិតេសុ;
Patthayamānassa hi jappitāni, pavedhitaṃ vāpi pakappitesu;
ចុតូបបាតោ ឥធ យស្ស នត្ថិ, ស កេន វេធេយ្យ កុហិំវ ជប្បេ 5។
Cutūpapāto idha yassa natthi, sa kena vedheyya kuhiṃva jappe 6.
៩០៩.
909.
យមាហុ ធម្មំ បរមន្តិ ឯកេ, តមេវ ហីនន្តិ បនាហុ អញ្ញេ;
Yamāhu dhammaṃ paramanti eke, tameva hīnanti panāhu aññe;
សច្ចោ នុ វាទោ កតមោ ឥមេសំ, សព្ពេវ ហីមេ កុសលា វទានា។
Sacco nu vādo katamo imesaṃ, sabbeva hīme kusalā vadānā.
៩១០.
910.
សកញ្ហិ ធម្មំ បរិបុណ្ណមាហុ, អញ្ញស្ស ធម្មំ បន ហីនមាហុ;
Sakañhi dhammaṃ paripuṇṇamāhu, aññassa dhammaṃ pana hīnamāhu;
ឯវម្បិ វិគ្គយ្ហ វិវាទយន្តិ, សកំ សកំ សម្មុតិមាហុ សច្ចំ។
Evampi viggayha vivādayanti, sakaṃ sakaṃ sammutimāhu saccaṃ.
៩១១.
911.
បរស្ស ចេ វម្ភយិតេន ហីនោ, ន កោចិ ធម្មេសុ វិសេសិ អស្ស;
Parassa ce vambhayitena hīno, na koci dhammesu visesi assa;
បុថូ ហិ អញ្ញស្ស វទន្តិ ធម្មំ, និហីនតោ សម្ហិ ទឡ្ហំ វទានា។
Puthū hi aññassa vadanti dhammaṃ, nihīnato samhi daḷhaṃ vadānā.
៩១២.
912.
សទ្ធម្មបូជាបិ នេសំ តថេវ, យថា បសំសន្តិ សកាយនានិ;
Saddhammapūjāpi nesaṃ tatheva, yathā pasaṃsanti sakāyanāni;
៩១៣.
913.
ន ព្រាហ្មណស្ស បរនេយ្យមត្ថិ, ធម្មេសុ និច្ឆេយ្យ សមុគ្គហីតំ;
Na brāhmaṇassa paraneyyamatthi, dhammesu niccheyya samuggahītaṃ;
តស្មា វិវាទានិ ឧបាតិវត្តោ, ន ហិ សេដ្ឋតោ បស្សតិ ធម្មមញ្ញំ។
Tasmā vivādāni upātivatto, na hi seṭṭhato passati dhammamaññaṃ.
៩១៤.
914.
ជានាមិ បស្សាមិ តថេវ ឯតំ, ទិដ្ឋិយា ឯកេ បច្ចេន្តិ សុទ្ធិំ;
Jānāmi passāmi tatheva etaṃ, diṭṭhiyā eke paccenti suddhiṃ;
អទ្ទក្ខិ ចេ កិញ្ហិ តុមស្ស តេន, អតិសិត្វា អញ្ញេន វទន្តិ សុទ្ធិំ។
Addakkhi ce kiñhi tumassa tena, atisitvā aññena vadanti suddhiṃ.
៩១៥.
915.
បស្សំ នរោ ទក្ខតិ 11 នាមរូបំ, ទិស្វាន វា ញស្សតិ តានិមេវ;
Passaṃ naro dakkhati 12 nāmarūpaṃ, disvāna vā ñassati tānimeva;
កាមំ ពហុំ បស្សតុ អប្បកំ វា, ន ហិ តេន សុទ្ធិំ កុសលា វទន្តិ។
Kāmaṃ bahuṃ passatu appakaṃ vā, na hi tena suddhiṃ kusalā vadanti.
៩១៦.
916.
និវិស្សវាទី ន ហិ សុព្ពិនាយោ, បកប្បិតំ ទិដ្ឋិ បុរេក្ខរានោ;
Nivissavādī na hi subbināyo, pakappitaṃ diṭṭhi purekkharāno;
យំ និស្សិតោ តត្ថ សុភំ វទានោ, សុទ្ធិំវទោ តត្ថ តថទ្ទសា សោ។
Yaṃ nissito tattha subhaṃ vadāno, suddhiṃvado tattha tathaddasā so.
៩១៧.
917.
ន ព្រាហ្មណោ កប្បមុបេតិ សង្ខា 13, ន ទិដ្ឋិសារី នបិ ញាណពន្ធុ;
Na brāhmaṇo kappamupeti saṅkhā 14, na diṭṭhisārī napi ñāṇabandhu;
ញត្វា ច សោ សម្មុតិយោ 15 បុថុជ្ជា, ឧបេក្ខតី ឧគ្គហណន្តិ មញ្ញេ។
Ñatvā ca so sammutiyo 16 puthujjā, upekkhatī uggahaṇanti maññe.
៩១៨.
918.
វិស្សជ្ជ គន្ថានិ មុនីធ លោកេ, វិវាទជាតេសុ ន វគ្គសារី;
Vissajja ganthāni munīdha loke, vivādajātesu na vaggasārī;
សន្តោ អសន្តេសុ ឧបេក្ខកោ សោ, អនុគ្គហោ ឧគ្គហណន្តិ មញ្ញេ។
Santo asantesu upekkhako so, anuggaho uggahaṇanti maññe.
៩១៩.
919.
បុព្ពាសវេ ហិត្វា នវេ អកុព្ពំ, ន ឆន្ទគូ នោបិ និវិស្សវាទី;
Pubbāsave hitvā nave akubbaṃ, na chandagū nopi nivissavādī;
ស វិប្បមុត្តោ ទិដ្ឋិគតេហិ ធីរោ, ន លិម្បតិ 17 លោកេ អនត្តគរហី។
Sa vippamutto diṭṭhigatehi dhīro, na limpati 18 loke anattagarahī.
៩២០.
920.
ស សព្ពធម្មេសុ វិសេនិភូតោ, យំ កិញ្ចិ ទិដ្ឋំ វ សុតំ មុតំ វា;
Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā;
ស បន្នភារោ មុនិ វិប្បមុត្តោ, ន កប្បិយោ នូបរតោ ន បត្ថិយោតិ។
Sa pannabhāro muni vippamutto, na kappiyo nūparato na patthiyoti.
មហាព្យូហសុត្តំ តេរសមំ និដ្ឋិតំ។
Mahābyūhasuttaṃ terasamaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ១៣. មហាព្យូហសុត្តវណ្ណនា • 13. Mahābyūhasuttavaṇṇanā
