Maha Upanishad

॥ mahopaniṣat ॥

yanmahopaniṣadvedyaṃ cidākāśatayā sthitam ।
paramādvaitasāmrājyaṃ tadrāmabrahma me gatiḥ ॥

oṃ āpyāyantu māmāṅgāni vākprāṇaścakṣuḥ
śrotramatho balamindriyāṇi ca ॥ sarvāṇi sarvaṃ brahmopaniṣadaṃ
māhaṃ brahma nirākuryāṃ mā mā brahma nirākarodanirakaraṇama-
stvanirākāraṇaṃ mestu tadātmani nirate ya upaniṣatsu dharmāste
mayi santu te mayi santu॥

oṃ śāntiḥ śāntiḥ śāntiḥ ॥

athāto mahopaniṣadaṃ vyākhyāsyamastadāhureko ha vai nārāyaṇa
āsīnna brahmā neśāno nāpo nāgnīṣomau neme dyāvāpṛthivī na
nakṣatrāṇi na sūryo na candramāḥ । sa ekākī na ramate । tasya
dhyānāntaḥsthasya yajñastomamucyate । tasminpuruṣāścaturdaśa
jāyante । ekā kanyā । daśendriyāṇi mana ekādaśaṃ tejaḥ ।
dvādaśo'haṅkāraḥ । trayodaśakaḥ prāṇaḥ । caturdaśa ātmā ।
pañcadaśī buddhiḥ । bhūtāni pañca tanmātrāṇi । pañca mahābhūtāni ।
sa ekaḥ pañcaviṃśatiḥ puruṣaḥ । tatpuruṣaṃ puruṣo niveśya nāsya
pradhānasaṃvatsarā jāyante । saṃvatsarādadhijāyante । atha punareva
nārāyaṇaḥ so'nyatkāmo manasādhyāyata । tasya dhyānāntaḥsthasya
lalāṭāttryakṣaḥ śūlapāṇiḥ puruṣo jāyate । bibhracchriyaṃ yaśaḥ
satyaṃ brahmacaryaṃ tapo vairāgyaṃ mana aiśvaryaṃ sapraṇavā vyāhṛtaya
ṛgyajuḥsāmātharvāṅgirasaḥ sarvāṇi chandāṃsi tānyaṅge
samāśritāni । tasmādīśāno mahādevo mahādevaḥ । atha punareva
nārāyaṇaḥ so'nyatkāmo manasādhyāyata । tasya dhyānāntaḥsthasya
lalāṭātsvedo'papat । tā imāḥ pratatā āpaḥ । tatastejo hiraṇmayamaṇḍalam ।
tatra brahmā caturmukho'jāyata । so'dhyāyt । pūrvābhimukho bhūtvā
bhūriti vyāhṛtirgāyatraṃ chanda ṛgvedo'gnirdevatā । paścimābhimukho
bhūtvā bhuvariti vyāhṛtistraiṣṭubhaṃ chando yajurvedo vāyurdevatā ।
uttarābhimukho bhūtvā svariti vyāhṛtirjāgrataṃ chandaḥ sāmavedaḥ sūryo
devatā । dakṣiṇābhimukho bhūtvā maharitivyāhṛtirānuṣṭabha
chando'tharvavedāḥ somo devatā ।
sahasraśīrṣaṃ devaṃ sahasrākṣaṃ viśvasambhuvam ।
viśvataḥ paramaṃ nityaṃ viśvaṃ nārāyaṇaṃ harim ।
viśvamevedaṃ puruṣastadviśvamupajīvati ।
patiṃ viśveśvaraṃ devaṃ samudre viśvarūpiṇam ।
padmakośapratīkāśaṃ lambatyākośasaṃnibham ।
hṛdayaṃ cāpyadhomukhaṃ santatyai sītkarābhīśca ।
tasya madhye mahānarcirviśvarcirviśvatomukham ।
tasya madhye vahniśikhā aṇīyordhvā vyavasthitā ।
tasyāḥ śikhāyā madhye paramātmā vyavasthitā ।
sa brahmā sa īśānaḥ sendraḥ so'kṣaraḥ paramaḥ svarāḍiti mahopaniṣat ॥

iti prathamodhyāyaḥ ॥ 1॥

śuko nāma mahātejāḥ svarūpānandatatparaḥ ।
jātamātreṇa munirāḍ yatsatyaṃ tadavāptavān ॥ 1॥

tenāsau svavivekena svayameva mahāmanāḥ ।
pravicārya ciraṃ sādhu svātmaniścayamāptavān ॥ 2॥

anākhyatvādagamyatvānmanaḥṣaṣṭhendriyasthiteḥ ।
cinmātramevamātmāṇurākāśādapi sūkṣmakaḥ ॥ 3॥

cidaṇoḥ paramasyāntaḥ koṭibrahmāṇḍareṇavaḥ ।
utpattisthitimabhyetya līyante śaktiparyayāt ॥ 4॥

ākāśaṃ bāhyaśūnyatvādanākāśaṃ tu cittvataḥ ।
na kiṃcidyadanirdeśyaṃ vastu satteti kiṃcana ॥ 5॥

cetano'sau prakāśatvādvedyābhāvācchilopamaḥ ।
svātmani vyomani svasthe jagadunmeṣacitrakṛt ॥ 6॥

tadbhāmātramidaṃ viśvamiti na syāttataḥ pṛthak ।
jagadbhedo'pi tadbhānamiti bhedo'pi tanmayaḥ ॥ 7॥

sarvagaḥ sarvasambandho gatyabhāvānna gacchati ।
nāstyasāvaśrayābhāvātsadrūpatvādathāsti ca ॥ 8॥

vijñānamānandaṃ brahma rāterdātuḥ parāyaṇam ।
sarvasaṃkalpasaṃnyāsaścetasā yatparigrahaḥ ॥ 9॥

jāgrataḥ pratyayābhāvaṃ yasyāhuḥ pratyayaṃ budhāḥ ।
yatsaṃkocavikāsābhyāṃ jagatpralayasṛṣṭayaḥ ॥ 10॥

niṣṭhā vedāntavākyānāmatha vācāmagocaraḥ ।
ahaṃ saccitparānandabrahmaivāsmi na cetaraḥ ॥ 11॥

svayaiva sūkṣmayā buddhyā sarvaṃ vijñātavāñchukaḥ ।
svayaṃ prāpte pare vastunyaviśrāntamanāḥ sthitaḥ ॥ 12॥

idaṃ vastviti viśvāsaṃ nāsāvātmanyupāyayau ।
kevalaṃ virarāmāsya ceto viṣayacāpalam ।
bhogebhyo bhūribhaṅgebhyo dhārābhya iva cātakaḥ ॥ 13॥

ekadā so'malaprajño merāvekāntasaṃsthitaḥ ।
papraccha pitaraṃ bhaktyā kṛṣṇadvaipāyanaṃ munim ॥ 14॥

saṃsārāḍambaramidaṃ kathamabhyutthitaṃ mune ।
kathaṃ ca praśamaṃ yāti kiṃ yatkasya kadā vada ॥ 15॥

evaṃ pṛṣṭena muninā vyāsenākhilamātmaje ।
yathāvadakhilaṃ proktaṃ vaktavyaṃ viditātmanā ॥ 16॥

ajñāsiṣaṃ pūrvamevamahamityatha tatpituḥ ।
sa śukaḥ svakayā buddhyā na vākyaṃ bahu manyate ॥ 17॥

vyāso'pi bhagavānbuddhvā putrābhiprāyamīdṛśam ।
pratyuvāca punaḥ putraṃ nāhaṃ jānāmi tattvataḥ ॥ 18॥

janako nāma bhūpālo vidyate mithilāpure ।
yathāvadvettyasau vedyaṃ tasmātsarvamavāpsyasi ॥ 19॥

pitretyuktaḥ śukaḥ prāyātsumerorvasudhātalam ।
videhanagarīṃ prāpa janakenābhipālitām ॥ 20॥

āvedito'sau yāṣṭīkairjanakāya mahātmane ।
dvāri vyāsasuto rājañchuko'tra sthitavāniti ॥ 21॥

jijñāsārthaṃ śukasyāsāvāstāmevetyavajñayā ।
uktvā babhūva janakastūṣṇīṃ sapta dinānyatha ॥ 22॥

tataḥ praveśayāmāsa janakaḥ śukamaṅgaṇe ।
tatrāhāni sa saptaiva tathaivāvasadunmanāḥ ॥ 23॥

tataḥ praveśayāmāsa janako'ntaḥpurājire ।
rājā na dṛśyate tāvaditi saptadināni tam ॥ 24॥

tatronmadābhiḥ kāntābhirbhojanairbhogasaṃcayaiḥ ।
janako lālayāmāsa śukaṃ śaśinibhānanam ॥ 25॥

te bhogāstāni bhojyāni vyāsaputrasya tanmanaḥ ।
nājahvurmandapavano baddhapīṭhamivācalam ॥ 26॥

kevalaṃ susamaḥ svaccho maunī muditamānasaḥ ।
sampūrṇa iva śītāṃśuratiṣṭhadamalaḥ śukaḥ ॥ 27॥

parijñātasvabhāvaṃ taṃ śukaṃ sa janako nṛpaḥ ।
ānīya muditātmānamavalokya nanāma ha ॥ 28॥

niḥśeṣitajagatkāryaḥ prāptākhilamanorathaḥ ।
kimīpsitaṃ tavetyāha kṛtasvāgata āha tam ॥ 29॥

saṃsārāḍambaramidaṃ kathamabhyutthitaṃ guro ।
kathaṃ praśamamāyāti yathāvatkathayāśu me ॥30॥

yathāvadakhilaṃ proktaṃ janakena mahātmanā ।
tadeva tatpurā proktaṃ tasya pitrā mahādhiyā ॥ 31॥

svayameva mayā pūrvamabhijñātaṃ viśeṣataḥ ।
etadeva hi pṛṣṭena pitrā me samudāhṛtam ॥ 32॥

bhavatāpyeṣa evārthaḥ kathito vāgvidāṃ vara ।
eṣa eva hi vākyārthaḥ śāstreṣu paridṛśyate ॥ 33॥

manovikalpasaṃjātaṃ tadvikalpaparikṣayāt ।
kṣīyate dagdhasaṃsāro niḥsāra iti niścitaḥ ॥ 34॥

tatkimetanmahābhāga satyaṃ brūhi mamācalam ।
tvatto viśramamāpnomi cetasā bhramatā jagat ॥ 35॥

śruṇu tāvadidānīṃ tvaṃ kathyamānamidaṃ mayā ।
śrīśukaṃ jñānavistāraṃ buddhisārāntarāntaram ॥ 36॥

yadvijñānātpumānsadyo jīvanmuktatvamāpnuyāt ॥ 37॥

dṛśyaṃ nāstīti bodhena manaso dṛśyamārjanam ।
sampannaṃ cettadutpannā parā nirvāṇanirvṛtiḥ ॥ 38॥

aśeṣeṇa parityāgo vāsanāyāṃ ya uttamaḥ ।
mokṣa ityucyate sadbhiḥ sa eva vimalakramaḥ ॥ 39॥

ye śuddhavāsanā bhūyo na janmānarthabhāginaḥ ।
jñātajñeyāsta ucyante jīvanmuktā mahādhiyaḥ ॥ 40॥

padārthabhāvanādārḍhyaṃ bandha ityabhidhīyate ।
vāsanātānavaṃ brahmanmokṣa ityabhidhīyate ॥ 41॥

tapaḥ prabhṛtinā yasmai hetunaiva vinā punaḥ ।
bhogā iha na rocante sa jīvanmukta ucyate ॥ 42॥

āpatatsu yathākālaṃ sukhaduḥkheṣvanārataḥ ।
na hṛṣyati glāyati yaḥ sa jīvanmukta ucyate ॥ 43॥

harṣāmarṣabhayakrodhakāmakārpaṇyadṛṣṭibhiḥ ।
na parāmṛśyate yo'ntaḥ sa jīvanmukta ucyate ॥ 44॥

ahaṃkāramayīṃ tyaktvā vāsanāṃ līlayaiva yaḥ ।
tiṣṭhati dhyeyasaṃtyāgī sa jīvanmukta ucyate ॥ 45॥

īpsitānīpsite na sto yasyāntarvartidṛṣṭiṣu ।
suṣuptivadyaścarati sa jīvanmukta ucyate ॥ 46॥

adhyātmaratirāsīnaḥ pūrṇaḥ pāvanamānasaḥ ।
prāptānuttamaviśrāntirna kiṃcidiha vāñchati ।
yo jīvati gatasnehaḥ sa jīvanmukta ucyate ॥ 47॥

saṃvedyena hṛdākāśe manāgapi na lipyate ।
yasyāsāvajaḍā saṃvitsa jīvanmukta ucyate ॥ 48॥

rāgadveṣau sukhaṃ duḥkhaṃ dharmādharmau phalāphale ।
yaḥ karotyanapekṣyaiva sa jīvanmukta ucyate ॥ 49॥

maunavānnirahaṃbhāvo nirmāno muktamatsaraḥ ।
yaḥ karoti gatodvegaḥ sa jīvanmukta ucyate ॥ 50॥

sarvatra vigatasneho yaḥ sākṣivadavasthitaḥ ।
niriccho vartate kārye sa jīvanmukta ucyate ॥ 51॥

yena dharmamadharmaṃ ca manomananamīhitam ।
sarvamantaḥ parityaktaṃ sa jīvanmukta ucyate ॥ 52॥

yāvatī dṛśyakalanā sakaleyaṃ vilokyate ।
sā yena suṣṭhu saṃtyaktā sa jīvanmukta ucyate ॥ 53॥

kaṭvamlalavaṇaṃ tiktamamṛṣṭaṃ mṛṣṭameva ca ।
samameva ca yo bhuṅkte sa jīvanmukta ucyate ॥ 54॥

jarāmaraṇamāpacca rājyaṃ dāridryameva ca ।
ramyamityeva yo bhuṅkte sa jīvanmukta ucyate ॥ 55॥

dharmādharmau sukhaṃ duḥkhaṃ tathā maraṇajanmanī ।
dhiyā yena susaṃtyaktaṃ sa jīvanmukta ucyate ॥ 56॥

udvegānandarahitaḥ samayā svacchayā dhiyā ।
na śocate na codeti sa jīvanmukta ucyate ॥ 57॥

sarvecchāḥ sakalāḥ śaṅkāḥ sarvehāḥ sarvaniścayāḥ ।
dhiyā yena parityaktāḥ sa jīvanmukta ucyate ॥ 58॥

janmasthitivināśeṣu sodayāstamayeṣu ca ।
samameva mano yasya sa jīvanmukta ucyate ॥ 59॥

na kiṃcana dveṣṭi tathā na kiṃcidapi kāṅkṣati ।
bhuṅkte yaḥ prakṛtānbhogānsa jīvanmukta ucyate ॥ 60॥

śāntasaṃsārakalanaḥ kalāvānapi niṣkalaḥ ।
yaḥ sacitto'pi niścittaḥ sa jīvanmukta ucyate ॥ 61॥

yaḥ samastārthajāleṣu vyavahāryapi niḥspṛhaḥ ।
parārtheṣviva pūrṇātmā sa jīvanmukta ucyate ॥ 62॥

jīvanmuktapadaṃ tyaktvā svadehe kālasātkṛte ।
viśatyadehamuktatvaṃ pavano'spandatāmiva ॥ 63॥

videhamukto nodeti nāstameti na śāmyati ।
na sannāsanna dūrastho na cāhaṃ na ca netaraḥ ॥ 64॥

tataḥ stimitagaṃbhīraṃ na tejo na tamastatam ।
anākhyamanabhivyaktaṃ satkiṃcidavaśiṣyate ॥ 65॥

na śūnyaṃ nāpi cākāro na dṛśyaṃ nāpi darśanam ।
na ca bhūtapadārthaughasadanantatayā sthitam ॥ 66॥

kimapyavyapadeśātmā pūrṇātpūrṇatarākṛtiḥ ।
na sannāsanna sadasanna bhāvo bhāvanaṃ na ca ॥ 67॥

cinmātraṃ caityarahitamanantamajaraṃ śivam ।
anādimadhyaparyantaṃ yadanādi nirāmayam ॥ 68॥

draṣṭṛdarśanadṛśyānāṃ madhye yaddarśanaṃ smṛtam ।
nātaḥ parataraṃ kiṃcinniścayo'styaparo mune ॥ 69॥

svayameva tvayā jñātaṃ gurutaśca punaḥ śrutam ।
svasaṃkalpavaśādbaddho niḥsaṃkalpādvimucyate ॥ 70॥

tena svayaṃ tvayā jñātaṃ jñeyaṃ yasya mahātmanaḥ ।
bhogebhyo hyaratirjātā dṛśyādvā sakalādiha ॥ 71॥

prāptaṃ prāptavyamakhilaṃ bhavatā pūrṇacetasā ।
svarūpe tapasi brahmanmuktastvaṃ bhrāntimutsṛja ॥ 72॥

atibāhyaṃ tathā bāhyamantarābhyantaraṃ dhiyaḥ ।
śuka paśyanna paśyestvaṃ sākṣī sampūrṇakevalaḥ ॥ 73॥

viśaśrāma śukastūṣṇīṃ svasthe paramavastuni ।
vītaśokabhayāyāso nirīhaśchinnasaṃśayaḥ ॥ 74॥

jagāma śikharaṃ meroḥ samādhyarthamakhaṇḍitam ॥ 75॥

tatra varṣasahasrāṇi nirvikalpasamādhinā ।
deśe sthitvā śaśāmāsāvātmanyasnehadīpavat ॥ 76॥

vyapagatakalanākalaṅkaśuddhaḥ
svayamamalātmani pāvane pade'sau ।
salilakaṇa ivāṃbudhau mahātmā
vigalitavāsanamekatāṃ jagāma ॥ 77॥

iti mahopaniṣat । iti dvitīyo'dhyāyaḥ ॥ 2॥

nidāgho nāma munirāṭ prāptavidyaśca bālakaḥ ।
vihṛtastīrthayātrārthaṃ pitrānujñātavānsvayam ॥ 1॥

sārdhatrikoṭitīrtheṣu snātvā gṛhamupāgataḥ ।
svodantaṃ kathayāmāsa ṛbhuṃ natvā mahāyaśāḥ ॥ 2॥

sārdhatrikoṭitīrtheṣu snānapuṇyaprabhāvataḥ ।
prādurbhūtomanasi me vicāraḥ so'yamīdṛśaḥ ॥ 3॥

jāyate mriyate loko mriyate jananāya ca ।
asthiraḥ sarva eveme sacarācaraceṣṭitāḥ ।
sarvāpadāṃ padaṃ pāpā bhāvā vibhavabhūmayaḥ ॥ 4॥

ayaḥśalākāsadṛśāḥ parasparamasaṅginaḥ ।
śuṣyante kevalā bhāvā manaḥkalpanayānayā ॥ 5॥

bhāveṣvaratirāyātā pathikasya maruṣviva ।
śāmyatīdaṃ kathaṃ duḥkhamiti tapto'smi cetasā ॥ 6॥

cintānicayacakrāṇi nānandāya dhanāni me ।
samprasūtakalatrāṇi gṛhāṇyugrāpadāmiva ॥ 7॥

iyamasmi sthitodārā saṃsāre paripelavā ।
śrīrmune parimohāya sāpi nūnaṃ na śarmadā ॥ 8॥

āyuḥ pallavakoṇāgralambāmbukaṇabhaṅguram ।
unmatta iva saṃtyajya yāmyakāṇḍe śarīrakam ॥ 9॥

viṣayāśī viṣāsaṅgaparijarjaracetasām ।
aprauḍhātmavivekānāmāyurāyāsakāraṇam ॥ 10॥

yujyate veṣṭanaṃ vāyorākāśasya ca khaṇḍanam ।
granthanaṃ ca taraṅgāṇāmāsthā nāyuṣi yujyate ॥ 11॥

prāpyaṃ samprāpyate yena bhūyo yena na śocyate ।
parāyā nirvṛteḥ sthānaṃ yattajjīvitamucyate ॥ 12॥

taravo'pi hi jīvanti jīvanti mṛgapakṣiṇaḥ ।
sa jīvati mano yasya mananenopajīvati ॥ 13॥

jātāsta eva jagati jantavaḥ sādhujīvitāḥ ।
ye punarneha jāyante śeṣā jaraṭhagardabhāḥ ॥ 14॥

bhāro vivekinaḥ śāstraṃ bhāro jñānaṃ ca rāgiṇaḥ ।
aśāntasya mano bhāro bhāro'nātmavido vapuḥ ॥ 15॥

ahaṃkāravaśādāpadahaṃkārāddurādhayaḥ ।
ahaṃkāravaśādīhā nāhaṃkārātparo ripuḥ ॥ 16॥

ahaṃkāravaśādyadyanmayā bhuktaṃ carācaram ।
tattatsarvamavastveva vastvahaṃkārariktatā ॥ 17॥

itaścetaśca suvyagraṃ vyarthamevābhidhāvati ।
mano dūrataraṃ yāti grāme kauleyako yathā ॥ 18॥

krūreṇa jaḍatāṃ yātā tṛṣṇābhāryānugāminā ।
vaśaḥ kauleyakeneva brahmanmukto'smi cetasā ॥ 19॥

apyabdhipānānmahataḥ sumerūnmūlanādapi ।
api vahnyaśanādbrahmanviṣamaścittanigrahaḥ ॥ 20॥

cittaṃ kāraṇamarthānāṃ tasminsati jagattrayam ।
tasminkṣīṇe jagatkṣīṇaṃ taccikitsyaṃ prayatnataḥ ॥ 21॥

yāṃ yāmahaṃ muniśreṣṭha saṃśrayāmi guṇaśriyam ।
tāṃ tāṃ kṛntati me tṛṣṇā tantrīmiva kumūṣikā ॥ 22॥

padaṃ karotyalaṅghye'pi tṛptā viphalamīhate ।
ciraṃ tiṣṭhati naikatra tṛṣṇā capalamarkaṭī ॥ 23॥

kṣaṇamāyāti pātālaṃ kṣaṇaṃ yāti nabhasthalam ।
kṣaṇaṃ bhramati dikkuñje tṛṣṇā hṛtpadmaṣaṭpadī ॥ 24॥

sarvasaṃsāraduḥkhānāṃ tṛṣṇaikā dīrghaduḥkhadā ।
antaḥpurasthamapi yā yojayatyatisaṃkaṭe ॥ 25॥

tṛṣṇāviṣūcikāmantraścintātyāgo hi sa dvija ।
stokenānandamāyāti stokenāyāti khedatām ॥ 26॥

nāsti dehasamaḥ śocyo nīco guṇavivarjitaḥ ॥ 27॥

kalevaramahaṃkāragṛhasthasya mahāgṛham ।
luṭhatvabhyetu vā sthairyaṃ kimanena guro mama ॥ 28॥

paṅktibaddhendriyapaśuṃ valgattṛṣṇāgṛhāṅgaṇam ।
cittabhṛtyajanākīrṇaṃ neṣṭaṃ dehagṛhaṃ mama ॥ 29॥

jihvāmarkaṭikākrāntavadanadvārabhīṣaṇam ।
dṛṣṭadantāsthiśakalaṃ neṣṭaṃ dehagṛhaṃ mama ॥ 30॥

raktamāṃsamayasyāsya sabāhyābhyantare mune ।
nāśaikadharmiṇo brūhi kaiva kāyasya ramyatā ॥ 31॥

taḍitsu śaradabhreṣu gandharvanagareṣu ca ।
sthairyaṃ yena vinirṇītaṃ sa viśvasitu vigrahe ॥ 32॥

śaiśave guruto bhītirmātṛtaḥ pitṛtastathā ।
janato jyeṣṭhabālācca śaiśavaṃ bhayamandiram ॥ 33॥

svacittabilasaṃsthena nānāvibhramakāriṇā ।
balātkāmapiśācena vivaśaḥ paribhūyate ॥ 34॥

dāsāḥ putrāḥ striyaścaiva bāndhavāḥ suhṛdastathā ।
hasantyunmattakamiva naraṃ vārdhakakampitam ॥ 35॥

dainyadoṣamayī dīrghā vardhate vārdhake spṛhā ।
sarvāpadāmekasakhī hṛdi dāhapradāyinī ॥ 36॥

kvacidvā vidyate yaiṣā saṃsāre sukhabhāvanā ।
āyuḥ stambamivāsādya kālastāmapi kṛntati ॥ 37॥

tṛṇaṃ pāṃsuṃ mahendraṃ ca suvarṇaṃ merusarṣapam ।
ātmaṃbharitayā sarvamātmasātkartumudyataḥ ।
kālo'yaṃ sarvasaṃhārī tenākrāntaṃ jagattrayam ॥ 38॥

māṃsapāñcālikāyāstu yantraloleaṅgapañjare ।
snāyvasthigranthiśālinyāḥ striyaḥ kimiva śobhanam ॥ 39॥

tvaṅmāṃsaraktabāṣpāmbu pṛthakkṛtvā vilocane ।
samālokaya ramyaṃ cetkiṃ mudhā parimuhyasi ॥ 40॥

meruśṛṅgataṭollāsigaṅgācalarayopamā ।
dṛṣṭā yasminmune muktāhārasyollāsaśālitā ॥ 41॥

śmaśāneṣu diganteṣu sa eva lalanāstanaḥ ।
śvabhirāsvādyate kāle laghupiṇḍa ivāndhasaḥ ॥ 42॥

keśakajjaladhāriṇyo duḥsparśā locanapriyāḥ ।
duṣkṛtāgniśikhā nāryo dahanti tṛṇavannaram ॥ 43॥

jvalatāmatidūre'pi sarasā api nīrasāḥ ।
striyo hi narakāgnīnāmindhanaṃ cāru dāruṇam ॥ 44॥

kāmanāmnā kirātena vikīrṇā mugdhacetasaḥ ।
nāryo naravihaṅgānāmaṅgabandhanavāgurāḥ ॥ 45॥

janmapalvalamatsyānāṃ cittakardamacāriṇām ।
puṃsāṃ durvāsanārajjurnārī baḍiśapiṇḍikā ॥ 46॥

sarveṣāṃ doṣaratnānāṃ susamudgikayānayā ।
duḥkhaśṛṅkhalayā nityamalamastu mama striyā ॥ 47॥

yasya strī tasya bhogecchā niḥstrīkasya kva bhogabhūḥ ।
striyaṃ tyaktvā jagattyaktaṃ jagattyaktvā sukhī bhavet ॥ 48॥

diśo'pi na hi dṛśyante deśo'pyanyopadeśakṛt ।
śailā api viśīryante śīryante tārakā api ॥ 49॥

śuṣyantyapi samudrāśca dhruvo'pyadhruvajīvanaḥ ।
siddhā api vinaśyanti jīryante dānavādayaḥ ॥ 50॥

parameṣṭhyapi niṣṭhāvānhīyate harirapyajaḥ ।
bhāvo'pyabhāvamāyāti jīryante vai digīśvarāḥ ॥ 51॥

brahmā viṣṇuśca rudraśca sarvā vā bhūtajātayaḥ ।
nāśamevānudhāvanti salilānīva vāḍavam ॥ 52॥

āpadaḥ kṣaṇamāyānti kṣaṇamāyānti sampadaḥ ।
kṣaṇaṃ janmātha maraṇaṃ sarvaṃ naśvarameva tat ॥ 53॥

aśūreṇa hatāḥ śūrā ekenāpi śataṃ hatam ।
viṣaṃ viṣayavaiṣamyaṃ na viṣaṃ viṣamucyate ॥ 54॥

janmāntaraghnā viṣayā ekajanmaharaṃ viṣam ।
iti me doṣadāvāgnidagdhe samprati cetasi ॥ 55॥

sphuranti hi na bhogāśā mṛgatṛṣṇāsaraḥsvapi ।
ato māṃ bodhayāśu tvaṃ tattvajñānena vai guro ॥ 56॥

no cenmaunaṃ samāsthāya nirmāno gatamatsaraḥ ।
bhāvayanmanasā viṣṇuṃ lipikarmārpitopamaḥ ॥ 57॥

iti mahopaniṣat । iti tṛtīyo'dhyāyaḥ ॥ 3॥

nidāgha tava nāstanyajjñeyaṃ jñānavatāṃ vara ।
prajñayā tvaṃ vijānāsi īśvarānugṛhītayā ।
cittamālinyasaṃjātaṃ mārjayāmi bhramaṃ mune ॥ 1॥

mokṣadvāre dvārapālaścatvāraḥ parikīrtitāḥ ।
śamo vicāraḥ santoṣaścaturthaḥ sādhusaṅgamaḥ ॥ 2॥

ekaṃ vā sarvayatnena sarvamutsṛjya saṃśrayet ।
ekasminvaśage yānti catvāro'pi vaśaṃ gatāḥ ॥ 3॥

śāstraiḥ sajjanasamparkapūrvakaiśca tapodamaiḥ ।
ādau saṃsāramuktyarthaṃ prajñāmevābhivardhayet ॥ 4॥

svānubhūteśca śāstrasya guroścevaikavākyatā ।
yasyābhyāsena tenātma satataṃ cāvalokyate ॥ 5॥

saṃkalpāśānusandhānavarjanaṃ cetpratikṣaṇam ।
karoṣi tadacittatvaṃ prāpta evāsi pāvanam ॥ 6॥

cetaso yadakartṛtvaṃ tatsamādhānamīritam ।
tadeva kevalībhāvaṃ sāśubhā nirvṛtiḥ parā ॥ 7॥

cetasā samparityajya sarvabhāvātmabhāvanām ।
yathā tiṣṭhasi tiṣṭha tvaṃ mūkāndhabadhiropamaḥ ॥ 8॥

sarvaṃ praśāntamajamekamanādimadhya-
mābhāsvaraṃ svadanamātramacaityacihnam ।
sarvaṃ praśāntamiti śabdamayī ca dṛṣṭi-
rbādhārthameva hi mudhaiva tadomitīdam ॥ 10॥

nityaprabuddhacittastvaṃ kurvanvāpi jagatkriyām ।
ātmaikatvaṃ viditvā tvaṃ tiṣṭhākṣubdhamahābdhivat ॥ 11॥

tattvāvabodha evāsau vāsanātṛṇapāvakaḥ ।
proktaḥ samādhiśabdena natu tūṣṇīmavasthitiḥ ॥ 12॥

niricche saṃsthite ratne yathā lokaḥ pravartate ।
sattāmātre pare tattve tathaivāyaṃ jagadgaṇaḥ ॥ 13॥

ataścātmani kartṛtvamakartṛtvaṃ ca vai mune ।
niricchatvādakartāsau kartā saṃnidhimātrataḥ ॥ 14॥

te dve brahmaṇi vindeti kartṛtākartṛte mune ।
yatraivaiṣa camatkārastamāśritya sthiro bhava ॥ 15॥

tasmānnityamakartāhamiti bhāvanayeddhayā ।
paramāmṛtanāmnī sā samataivāvaśiṣyate ॥ 16॥

nidāgha śṛṇu sattvasthā jātā bhuvi mahāguṇāḥ ।
te nityamevābhyuditā muditāḥ sva ivendavaḥ ॥ 17॥

nāpadi glānimāyānti niśi hemāmbujaṃ yathā ।
nehante prakṛtādanyadramante śiṣṭavartmani ॥ 18॥

ākṛtyaiva virājante maitryādiguṇavṛttibhiḥ ।
samāḥ samarasāḥ saumya satataṃ sādhuvṛttayaḥ ॥ 19॥

abdhivaddhatamaryāda bhavati viśadāśayāḥ ।
niyatiṃ na vimuñcanti mahānto bhāskarā iva ॥ 20॥

ko'haṃ kathamidaṃ ceti saṃsāramalamātatam ।
pravicāryaṃ prayatnena prājñena sahasādhunā ॥ 21॥

nākarmasu niyoktavyaṃ nānāryeṇa sahāvaset ।
draṣṭavyaḥ sarvasaṃhartā na mṛtyuravahelayā ॥ 22॥

śarīramasthimāṃsaṃ ca tyaktvā raktādyaśobhanam ।
bhūtamuktāvalītantuṃ cinmātramavalokayet ॥ 23॥

upādeyānupatanaṃ heyaikāntavisarjanam ।
yadetanmanaso rūpaṃ tadbāhyaṃ viddhi netarat ॥ 24॥

guruśāstroktamārgeṇa svānubhūtyā ca cidghane ।
brahmaivāhamiti jñātvā vītaśoko bhavenmuniḥ ॥ 25॥

yatra niśitāsiśatapātanamutpalatāḍanavatsoḍhavyamagninā
dāho himasecanamivāṅgāravartanaṃ candanacarceva
niravadhinārācavikirapāto nidāghavinodanadhārā-
gṛhaśīkaravarṣaṇamiva svaśiracchedaḥ sukhanidreva
mūkīkaraṇamānanamudreva bādhiryaṃ mahānupacaya ivedaṃ
nāvahelanayā bhavitavyamevaṃ dṛḍhavairāgyādbodho bhavati ॥

guruvākyasamudbhūtasvānubhūtyādiśuddhayā ।
yasyābhyāsena tenātmā satataṃ cāvalokyate ॥ 26॥

vinaṣṭadigbhramasyāpi yathāpūrvaṃ vibhāti dik ।
tathā vijñānavidhvastaṃ jagannāstīti bhāvaya ॥ 27॥

na dhanānypakurvanti na mitrāṇi na bāndhavāḥ ।
na kāyakleśavaidhuryaṃ na tīrthāyatanāśrayaḥ ।
kevalaṃ tanmanomātramayenāsādyate padam ॥ 28॥

yāni duḥkhāni yā tṛṣṇā duḥsahā ye durādhayaḥ ।
śāntacetaḥsu tatsarvaṃ tamo'rkeṣviva naśyati ॥ 29॥

mātarīva paraṃ yānti viṣamāṇi mṛdūni ca ।
viśvāsamiha bhūtāni sarvāṇi śamaśālini ॥ 30॥

na rasāyanapānena na lakṣmyāliṅgitena ca ।
na tathā sukhamāpnoti śamenāntaryathā janaḥ ॥ 31॥

śrutvā spṛṣṭvā ca bhuktvā ca dṛṣṭvā jñātvā śubhāśubham ।
na hṛṣyati glāyati yaḥ sa śānta iti kathyate ॥ 32॥

tuṣārakarabiṃbācchaṃ mano yasya nirākulam ।
maraṇotsavayuddheṣu sa śānta iti kathyate ॥ 33॥

tapasviṣu bahujñeṣu yājakeṣu nṛpeṣu ca ।
balavatsu guṇāḍhyeṣu śamavāneva rājate ॥ 34॥

santoṣāmṛtapānena ye śāntāstṛptimāgatāḥ ।
ātmārāmā mahātmānaste mahāpadamāgatāḥ ॥ 35॥

aprāptaṃ hi parityajya samprāpte samatāṃ gataḥ ।
adṛṣṭakhedākhedo yaḥ santuṣṭa iti kathyate ॥ 36॥

nābhinandatyasamprāptaṃ prāptaṃ bhuṅkte yathepsitam ।
yaḥ sa saumyasamācāraḥ santuṣṭa iti kathyate ॥ 37॥

ramate dhīryatāprāpte sādhvīvā'ntaḥpurājire ।
sā jīvanmuktatodeti svarūpānandadāyinī ॥ 38॥

yathākṣaṇaṃ yathāśāstraṃ yathādeśaṃ yathāsukham ।
yathāsaṃbhavasatsaṅgamimaṃ mokṣapathakramam ।
tāvadvicārayetprājño yāvadviśrāntimātmani ॥ 39॥

turyaviśrāntiyuktasya nivṛttasya bhavārṇavāt ।
jīvato'jīvataścaiva gṛhasthasyāthavā yateḥ ॥ 40॥

nākṛtena kṛtenārtho na śrutismṛtivibhramaiḥ ।
nirmandara ivāmbodhiḥ sa tiṣṭhati yathāsthitaḥ ॥ 41॥

sarvātmavedanaṃ śuddhaṃ yadodeti tavātmakam ।
bhāti prasṛtidikkālabāhyaṃ cidrūpadehakam ॥ 42॥

evamātmā yathā yatra samullāsamupāgataḥ ।
tiṣṭhatyāśu tathā tatra tadrūpaśca virājate ॥ 43॥

yadidaṃ dṛśyate sarvaṃ jagatsthāvarajaṅgamam ।
tatsuṣuptāviva svapnaḥ kalpānte pravinaśyati ॥ 44॥

ṛtamātmā paraṃbrahma satyamityādikā budhaiḥ ।
kalpitā vyavahārārthaṃ yasya saṃjñā mahātmanaḥ ॥ 45॥

yathā kaṭakaśabdārthaḥ pṛthagbhāvo na kāñcanāt ।
na hemakaṭakāttadvajjagacchabdārthatā parā ॥ 46॥

teneyamindrajālaśrīrjagati pravitanyate ।
draṣṭudṛśyasya sattāntarbandha ityabhidhīyate ॥ 47॥

draṣṭā dṛśyavaśādbaddho dṛśyābhāve vimucyate ।
jagattvamahamityādisargātmā dṛśyamucyate ॥ 48॥

manasaivendrajālaśrīrjagati pravitanyate ।
yāvadetatsaṃbhavati tāvanmokṣo na vidyate ॥ 49॥

brahmaṇā tanyate viśvaṃ manasaiva svayaṃbhuvā ।
manomayamato viśvaṃ yannāma paridṛśyate ॥ 50॥

na bāhye nāpi hṛdaye sadrūpaṃ vidyate manaḥ ।
yadarthaṃ pratibhānaṃ tanmana ityabhidhīyate ॥ 51॥

saṃkalpanaṃ mano viddhi saṃkalpastanna vidyate ।
yatra saṃkalpanaṃ tatra mano'stītyavagamyatām ॥ 52॥

saṃkalpamanasī bhinne na kadācana kenacit ।
saṃkalpajāte galite svarūpamavaśiṣyate ॥ 53॥

ahaṃ tvaṃ jagatityādau praśānte dṛśyasaṃbhrame ।
syāttādṛśī kevalatā dṛśye sattāmupāgate ॥ 54॥

mahāpralayasampattau hyasattāṃ samupāgate ।
aśeṣadṛśye sargādau śāntamevāvaśiṣyate ॥ 55॥

astyanastamito bhāsvānajo devo nirāmayaḥ ।
sarvadā sarvakṛtsarvaḥ paramātmetyudāhṛtaḥ ॥ 56॥

yato vāco nivartante yo muktairavagamyate ।
yasya cātmādikāḥ saṃjñāḥ kalpitā na svabhāvataḥ ॥ 57॥

cittākāśaṃ cidākāśamākāśaṃ ca tṛtīyakam ।
dvābhyāṃ śūnyataraṃ viddhi cidākāśaṃ mahāmune ॥ 58॥

deśāddeśāntaraprāptau saṃvido madhyameva yat ।
nimeṣeṇa cidākāśaṃ tadviddhi munipuṅgava ॥ 59॥

tasminnirastaniḥśeṣasaṃkalpasthitimeṣi cet ।
sarvātmakaṃ padaṃ śāntaṃ tadā prāpnoṣyasaṃśayaḥ ॥ 60॥

uditaudāryasaundaryavairāgyarasagarbhiṇī ।
ānandasyandinī yaiṣā samādhirabhidhīyate ॥ 61॥

dṛśyāsaṃbhavabodhena rāgadveṣāditānave ।
ratirbaloditā yāsau samādhirabhidhīyate ॥ 62॥

dṛśyāsaṃbhavabodho hi jñānaṃ jñeyaṃ cidātmakam ।
tadeva kevalībhāvaṃ tato'nyatsakalaṃ mṛṣā ॥ 63॥

matta airāvato baddhaḥ sarṣapīkoṇakoṭare ।
maśakena kṛtaṃ yuddhaṃ siṃhaughaireṇukoṭare ॥ 64॥

padmākṣe sthāpito merurnigīrṇo bhṛṅgasūnunā ।
nidāgha viddhi tādṛktvaṃ jagatetadbhramātmakam ॥ 65॥

cittameva hi saṃsāro rogādikleśadūṣitam ।
tadeva tairvinirmuktaṃ bhavānta iti kathyate ॥ 66॥

manasā bhāvyamāno hi dehatāṃ yāti dehakaḥ ।
dehavāsanayā mukto dehadharmairna lipyate ॥ 67॥

kalpaṃ kṣaṇīkarotyantaḥ kṣaṇaṃ nayati kalpatām ।
manovilāsasaṃsāra iti me niścitā matiḥ ॥ 68॥

nāvirato duścaritānnāśānto nāsamāhitaḥ ।
nāśāntamanaso vāpi prajñānenainamāpnuyāt ॥ 69॥

tadbrahmānandamadvandvaṃ nirguṇaṃ satyacidghanam ।
viditvā svātmano rūpaṃ na bibheti kadācana ॥ 70॥

parātparaṃ yanmahato mahāntaṃ
svarūpatejomayaśāśvataṃ śivam ।
kaviṃ purāṇaṃ puruṣaṃ sanātanaṃ
sarveśvaraṃ sarvadevairupāsyam ॥ 71॥

ahaṃ brahmeti niyataṃ mokṣaheturmahātmanām ।
dve pade bandhamokṣāya nirmameti mameti ca ।
mameti badhyate janturnirmameti vimucyate ॥ 72॥

jīveśvarādirūpeṇa cetanācetanātmakam ।
īkṣaṇādipraveśāntā sṛṣṭirīśena kalpitā ।
jāgradādivimokṣāntaḥ saṃsāro jīvakalpitaḥ ॥ 73॥

triṇācikādiyogāntā īśvarabhrāntimāśritāḥ ।
lokāyatādisāṃkhyāntā jīvavibhrāntimāśritāḥ ॥ 74॥

tasmānmumukṣibhirnaiva matirjīveśavādayoḥ ।
kāryā kiṃtu brahmatattvaṃ niścalena vicāryatām ॥ 75॥

aviśeṣeṇa sarvaṃ tu yaḥ paśyati cidanvayāt ।
sa eva sākṣādvijñānī sa śivaḥ sa harirvidhiḥ ॥ 76॥

durlabho viṣayatyāgo durlabhaṃ tattvadarśanam ।
durlabhā sahajāvasthā sadguroḥ karuṇāṃ vinā ॥ 77॥

utpannaśaktirbodhasya tyaktaniḥśeṣakarmaṇaḥ ।
yoginaḥ sahajāvasthā svayamevopajāyate ॥ 78॥

yadā hyevaiṣa etasminnalpamapyantaraṃ naraḥ ।
vijānāti tadā tasya bhayaṃ syānnatra saṃśayaḥ ॥ 79॥

sarvagaṃ saccidānandaṃ jñānacakṣurnirīkṣate ।
ajñānacakṣurnekṣeta bhāsvantaṃ bhānumandahvat ॥ 80॥

prajñānameva tadbrahma satyaprajñānalakṣaṇam ।
evaṃ brahmaparijñānādeva martyā'mṛto bhavet ॥ 81॥

bhidyate hṛdayagranthiśchidyante sarvasaṃśayāḥ ।
kṣīyante cāsya karmāṇi tasmindṛṣṭe parāvare ॥ 82॥

anātmatāṃ parityajya nirvikārau jagatsthitau ।
ekaniṣṭhatayāntasthaḥ saṃvinmātraparo bhava ॥ 83॥

marubhūmau jalaṃ sarvaṃ marubhūmātrameva tat ।
jagattrayamidaṃ sarvaṃ cinmātraṃ svavicārataḥ ॥ 84॥

lakṣyālakṣyamatiṃ tyaktvā yastiṣṭhetkevalātmanā ।
śiva eva svayaṃ sākṣādayaṃ brahmaviduttamaḥ ॥ 85॥

adhiṣṭhānamanaupamyamavāṅmanasagocaram ।
nityaṃ vibhuṃ sarvagataṃ susūkṣmaṃ ca tadavyayam ॥ 86॥

sarvaśaktermaheśasya vilāso hi mano jagat ।
saṃyamāsaṃyamābhyāṃ ca saṃsāraṃ śāntimanvagāt ॥ 87॥

manovyādheścikitsārthamupāyaṃ kathayāmi te ।
yadyatsvābhimataṃ vastu tattyajanmokṣamaśnute ॥ 88॥

svāyattamekāntahitaṃ svepsitatyāgavedanam ।
yasya duṣkaratāṃ yātaṃ dhiktaṃ puruṣakīṭakam ॥ 89॥

svapauruṣekasādhyena svepsitatyāgarūpiṇā ।
manaḥpraśamamātreṇa vinā nāsti śubhā gatiḥ ॥ 90॥

asaṃkalpanaśastreṇa chinnaṃ cittamidaṃ yadā ।
sarvaṃ sarvagataṃ śāntaṃ brahma sampadyate tadā ॥ 91॥

bhava bhāvanayā mukto muktaḥ paramayā dhiyā ।
dhārayātmānamavyagro grastacittaṃ citaḥ padam ॥ 92॥

paraṃ pauruṣamāśritya nītvā cittamacittatām ।
dhyānato hṛdayākāśe citi ciccakradhārayā ॥ 93॥

mano māraya niḥśaṅkaṃ tvāṃ prabadhnanti nārayaḥ ॥ 94॥

ayaṃ so'hamidaṃ tanma etāvanmātrakaṃ manaḥ ।
tadabhāvanamātreṇa dātreṇeva vilīyate ॥ 95॥

chinnābhramaṇḍalaṃ vyomni yathā śaradi dhūyate ।
vātena kalpakenaiva tathāntardhūyate manaḥ ॥ 96॥

kalpāntapavanā vāntu yāntu caikatvamarṇavāḥ ।
tapantu dvādaśādityā nāsti nirmanasaḥ kṣatiḥ ॥ 97॥

asaṃkalpanamātraikasādhye sakalasiddhide ।
asaṃkalpātisāmrājye tiṣṭhavaṣṭabdhatatpadaḥ ॥ 98॥

na hi cañcalatāhīnaṃ manaḥ kvacana dṛśyate ।
cañcalatvaṃ manodharmo vahnerdharmo yathoṣṇatā ॥ 99॥

eṣā hi cañcalāspandaśaktiścittatvasaṃsthitā ।
tāṃ viddhi mānasīṃ śaktiṃ jagadāḍaṃbarātmikām ॥ 100॥

yattu cañcalatāhīnaṃ tanmano'mṛtamucyate ।
tadeva ca tapaḥ śāstrasiddhānte mokṣa ucyate ॥ 101॥

tasya cañcalatā yaiṣā tvavidyā vāsanātmikā ।
vāsanāparanāmnīṃ tāṃ vicāreṇa vināśaya ॥ 102॥

pauruṣeṇa prayatnena yasminnaiva pade manaḥ ।
yojyate tatpadaṃ prāpya nirvikalpo bhavānagha ॥ 103॥

ataḥ pauruṣamāśritya cittamākramya cetasā ।
viśokaṃ padamālambya nirātaṅkaḥ sthiro bhava ॥ 104॥

mana eva samarthaṃ hi manaso dṛḍhanigrahe ।
arājakaḥ samarthaḥ syādrājño nigrahakarmaṇi ॥ 105॥

tṛṣṇāgrāhagṛhītānāṃ saṃsārārṇavapātinām ।
āvartairūhyamānānāṃ dūraṃ svamana eva nauḥ ॥ 106॥

manasaiva manaśchittvā pāśaṃ paramabandhanam ।
bhavāduttārayātmānaṃ nāsāvanyena tāryate ॥ 107॥

yā yodeti manonāmnī vāsanā vāsitāntarā ।
tāṃ tāṃ pariharetprājñastato'vidyākṣayo bhavet ॥ 108॥

bhogaikavāsanāṃ tyaktvā tyaja tvaṃ bhedavāsanām ।
bhāvābhāvau tatastyaktyā nirvikalpaḥ sukhī bhava ॥ 109॥

eṣa eva manonāśastvavidyānāśa eva ca ।
yattatsaṃvedyate kiṃcittatrāsthāparivarjanam ॥ 110॥

anāsthaiva hi nirvāṇaṃ duḥkhamāsthāparigrahaḥ ॥ 111॥

avidyā vidyamānaiva naṣṭaprajñeṣu dṛśyate ।
nāmnaivāṅgīkṛtākārā samyakprajñasya sā kutaḥ ॥ 112॥

tāvatsaṃsārabhṛguṣu svātmanā saha dehinam ।
āndolayati nīrandhraṃ duḥkhakaṇṭakaśāliṣu ॥ 113॥

avidyā yāvadasyāstu notpannā kṣayakāriṇī ।
svayamātmāvalokecchā mohasaṃkṣayakāriṇī ॥ 114॥

asyāḥ paraṃ prapaśyantāḥ svātmanāśaḥ prajāyate ।
dṛṣṭe sarvagate bodhe svayaṃ hyeṣā vilīyate ॥ 115॥

icchāmātramavidyeyaṃ tannāśo mokṣa ucyate ।
sa cāsaṃkalpamātreṇa siddho bhavati vai mune ॥ 116॥

manāgapi manovyomni vāsanārajanī kṣaye ।
kālikā tanutāmeti cidādityāprakāśanāt ॥ 117॥

caitānyupātarahitaṃ sāmānyena ca sarvagam ।
yaccittattvamanākhyeyaṃ sa ātmā parameśvaraḥ ॥ 118॥

sarvaṃ ca khalvidaṃ brahma nityacidghanamakṣatam ।
kalpanānyā manonāmnī vidyate na hi kācana ॥ 119॥

na jāyate na mriyatte kiṃcidatra jagattraye ।
na ca bhāvavikārāṇāṃ sattā kvacana vidyate ॥ 120॥

kevalaṃ kevalābhāsaṃ sarvasāmānyamakṣatam ।
caityānupātarahitaṃ cinmātramiha vidyate ॥ 121॥

tasminnitye tate śuddhe cinmātre nirupadrave ।
śānte śamasamābhoge nirvikāre cidātmani ॥ 122॥

yaiṣā svabhāvābhimataṃ svayaṃ saṃkalpya dhāvati ।
ciccaityaṃ svayamamlānaṃ mānanānmana ucyate ।
ataḥ saṃkalpasiddheyaṃ saṃkalpenaiva naśyati ॥ 123॥

nāhaṃ brahmeti saṃkalpātsudṛḍhādbadhyate manaḥ ।
sarvaṃ brahmeti saṃkalpātsudṛḍhānmucyate manaḥ ॥ 124॥

kṛśo'haṃ duḥkhabaddho'haṃ hastapādādimānaham ।
iti bhāvānurūpeṇa vyavahāreṇa badhyate ॥ 125॥

nāhaṃ duḥkhī na me deho bandhaḥ ko'syātmani sthitaḥ ।
iti bhāvānurūpeṇa vyavahāreṇa mucyate ॥ 126॥

nāhaṃ māṃsaṃ na cāsthīni dehādanyaḥ paro'smyaham ।
iti niścitavānantaḥ kṣīṇāvidyo vimucyate ॥ 127॥

kalpiteyamavidyeyamanātmanyātmabhāvanāt ।
paraṃ pauruṣamāśritya yatnātparamayā dhiyā ।
bhogecchāṃ dūratastyaktvā nirvikalpaḥ sukhī bhava ॥ 128॥

mama putro mama dhanamahaṃ so'yamidaṃ mama ।
itīyamindrajālena vāsanaiva vivalgati ॥ 129॥

mā bhavājño bhava jñastvaṃ jahi saṃsārabhāvanām ।
anātmanyātmabhāvena kimajña iva rodiṣi ॥ 130॥

kastavāyaṃ jaḍo mūko deho māṃsamayo'śuciḥ ।
yadarthaṃ sukhaduḥkhābhyāmavaśaḥ paribhūyase ॥ 131॥

aho nu citraṃ yatsatyaṃ brahma tadvismṛtaṃ nṛṇām ।
tiṣṭhatastava kāryeṣu māstu rāgānurañjanā ॥ 132॥

aho nu citraṃ padmotthairbaddhāstantubhiradrayaḥ ।
avidyamāna yā vidyā tayā viśvaṃ khilīkṛtam ॥ 133॥

idaṃ tadvajratāṃ yātaṃ tṛṇamātraṃ jagattrayam ॥

ityupaniṣat ॥ iti caturtho'dhyāyaḥ ॥ 4॥

ṛbhuḥ ॥ athāparaṃ pravakṣyāmi śṛṇu tāta yathāyatham ।
ajñānabhūḥ saptapadā jñabhūḥ saptapadaiva hi ॥ 1॥

padāntarāṇyasaṃkhyāni prabhavantyanyathaitayoḥ ।
svarūpāvasthitirmuktistadbhraṃśo'haṃtvavedanam ॥ 2॥

śuddhasanmātrasaṃvitteḥ svarūpānna calanti ye ।
rāgadveṣādayo bhāvāsteṣāṃ nājñatvasaṃbhavaḥ ॥ 3॥

yaḥ svarūpaparibhraṃśaścetvārthe citi majjanam ।
etasmādaparo moho na bhūto na bhaviṣyati ॥ 4॥

arthādarthāntaraṃ citte yāti madhye tu yā sthitiḥ ।
sā dhvastamananākārā svarūpasthitirucyate ॥ 5॥

saṃśāntasarvasaṃkalpā yā śilāvadavasthitiḥ ।
jāgrannidrāvinirmuktā sā svarūpasthitiḥ parā ॥ 6॥

ahantāṃśe kṣate śānte bhedaniṣpandacittatā ।
ajaḍā yā pracalati tatsvarūpamitīritam ॥ 7॥

bījaṃ jāgrattathā jāgranmahājāgrattathaiva ca ।
jāgratsvapnastathā svapnaḥ svapnajāgratsuṣuptikam ॥ 8॥

iti saptavidho mohaḥ punareṣa parasparam ।
śliṣṭo bhavatyanekāgryaṃ śruṇu lakṣaṇamasya tu ॥ 9॥

prathamaṃ cetanaṃ yatsyādanākhyaṃ nirmalaṃ citaḥ ।
bhaviṣyaccittajīvādināmaśabdārthabhājanam ॥ 10॥

bījarūpasthitaṃ jāgradbījajāgrattaducyate ।
eṣā jñapternavāvasthā tvajāgratsaṃsthitiṃ śruṇu ॥ 11॥

navaprasūtasya parādayaṃ cāhamidaṃ mama ।
iti yaḥ pratyayaḥ svasthastajjāgratprāgabhāvanāt ॥ 12॥

ayaṃ so'hamidaṃ tanma iti janmāntaroditaḥ ।
pīvaraḥ pratyayaḥ prokto mahājāgraditi sphuṭam ॥ 13॥

arūḍhamathavā rūḍhaṃ sarvathā tanmayātmakam ।
yajjāgrato manorājyaṃ yajjāgratsvapna ucyate ॥ 14॥

dvicandraśuktikārūpyamṛgatṛṣṇādibhedataḥ ।
abhyāsaṃ prāpya jāgrattatsvapno nānāvidho bhavet ॥ 15॥

alpakālaṃ mayā dṛṣṭametannodeti yatra hi ।
parāmarṣaḥ prabuddhasya sa svapna iti kathyate ॥ 16॥

ciraṃ saṃdarśanābhāvādapraphullaṃ bṛhadvacaḥ ।
cirakālānuvṛttistu svapno jāgradivoditaḥ ॥ 17॥

svapnajāgraditi proktaṃ jāgratyapi parisphurat ।
ṣaḍavasthā parityāgo jaḍā jīvasya yā sthitiḥ ॥ 18॥

bhaviṣyadduḥkhabodhāḍhyā sauṣuptiḥ socyate gatiḥ ।
jagattasyāmavasthāyāmantastamasi līyate ॥ 19॥

saptāvasthā imāḥ proktā mayā jñānasya vai dvija ।
ekaikā śatasaṃkhyātra nānāvibhavarūpiṇī ॥ 20॥

imāṃ saptapadāṃ jñānabhūmimākarṇayānagha ।
nānayā jñātayā bhūyo mohapaṅke nimajjati ॥ 21॥

vadanti bahubhedena vādino yogabhūmikāḥ ।
mama tvabhimatā nūnamimā eva śubhapradāḥ ॥ 22॥

avabodhaṃ vidurjñānaṃ tadidaṃ sāptabhūmikam ।
muktistu jñeyamityuktā bhūmikāsaptakātparam ॥ 23॥

jñānabhūmiḥ śubhecchākhyā prathamā samudāhṛtā ।
vicāraṇā dvitīyā tu tṛtīyā tanumānasī ॥ 24॥

sattvāpattiścaturthī syāttato'saṃsaktināmikā ।
padārthabhāvanā ṣaṣṭhī saptamī turyagā smṛtā ॥ 25॥

āsāmantasthitā muktiryasyāṃ bhūyo na śocati ।
etāsāṃ bhūmikānāṃ tvamidaṃ nirvacanaṃ śruṇu ॥ 26॥

sthitaḥ kiṃ mūḍha evāsmi prekṣe'haṃ śāstrasajjanaiḥ ।
vairāgyapūrvamiccheti śubhecchetyucyate budhaiḥ ॥ 27॥

śāstrasajjanasamparkavairāgyābhyāsapūrvakam ।
sadācārapravṛttiryā procyate sā vicāraṇā ॥ 28॥

vicāraṇāśubhecchābhyāmindriyārtheṣu raktatā ।
yatra sā tanutāmeti procyate tanumānasī ॥ 29॥

bhūmikātritayābhyāsāccitte tu viratervaśāt ।
sattvātmani sthite śuddhe sattvāpattirudāhṛtā ॥ 30॥

daśācatuṣṭayābhyāsādasaṃsargakalā tu yā ।
rūḍhasattvacamatkārā proktā saṃsaktināmikā ॥ 31॥

bhūmikāpañcakābhyāsātsvātmārāmatayā dṛḍham ।
ābhyantarāṇāṃ bāhyānāṃ padārthānāmabhāvanāt ॥ 32॥

paraprayuktena ciraṃ prayatnenāvabodhanam ।
padārthabhāvanā nāma ṣaṣṭhī bhavati bhūmikā ॥ 33॥

bhūmiṣaṭkacirābhyāsādbhedasyānupalambanāt ।
yatsvabhāvaikaniṣṭhatvaṃ sā jñeyā turyagā gatiḥ ॥ 34॥

eṣā hi jīvanmukteṣu turyāvastheti vidyate ।
videhamuktiviṣayaṃ turyātītamataḥ param ॥ 35॥

ye nidāgha mahābhāgāḥ sāptamīṃ bhūmimāśritāḥ ।
ātmārāmā mahātmānaste mahatpadamāgatāḥ ॥ 36॥

jīvanmuktā na majjanti sukhaduḥkharasasthite ।
prakṛtenātha kāryeṇa kiṃcitkurvanti vā na vā ॥ 37॥

pārśvasthabodhitāḥ santaḥ pūrvācarakramāgatam ।
ācāramācaratyeva suptabuddhavadutthitāḥ ॥ 38॥

bhūmikāsaptakaṃ caitaddhīmatāmeva gocaram ।
prāpya jñānadaśāmetāṃ paśumlecchādayo'pi ye ॥ 39॥

sadehā vāpyadehā vā te muktā nātra saṃśayaḥ ।
jñaptirhi granthivicchedastasminsati vimuktatā ॥ 40॥

mṛgatṛṣṇāmbubuddhyyādiśāntimātrātmakastvasau ।
ye tu mohārṇavāttīrṇāstaiḥ prāptaṃ paramaṃ padam ॥ 41॥

te sthitā bhūmikāsvāsu svātmalābhaparāyaṇāḥ ।
manaḥpraśamanopāyo yoga ityabhidhīyate ॥ 42॥

saptabhūmiḥ sa vijñeyaḥ kathitāstāśca bhūmikāḥ ।
etāsāṃ bhūmikānāṃ tu gamaṃ brahmābhidhaṃ padam ॥ 43॥

tvattāhantātmatā yatra paratā nāsti kācana ।
na kvacidbhāvakalanā na bhāvābhāva gocarā ॥ 44॥

sarvaṃ śāntaṃ nirālambaṃ vyomasthaṃ śāśvataṃ śivam ।
anāmayamanābhāsamanāmakamakāraṇam ॥ 45॥

na sannasanna madhyāntaṃ na sarvaṃ sarvameva ca ।
manovacobhiragrāhyaṃ pūrṇātpūrṇaṃ sukhātsukham ॥ 46॥

asaṃvedanamāśāntamātmavedanamātatam ।
sattā sarvapadārthānāṃ nānyā saṃvedanādṛte ॥ 47॥

saṃbandhe draṣṭṛdṛśyānāṃ madhye dṛṣṭirhi yadvapuḥ ।
draṣṭṛdarśanadṛśyādivarjitaṃ tadidaṃ padam ॥ 48॥

deśāddeśaṃ gate citte madhye yaccetaso vaouḥ ।
ajāḍyasaṃvinmananaṃ tanmayo bhava sarvadā ॥ 49॥

ajāgratsvapnanidrasya yatte rūpaṃ sanātanam ।
acetanaṃ cājaḍaṃ ca tanmayo bhava sarvadā ॥ 50॥

jaḍatāṃ varjayitvaikāṃ śilāyā hṛdayaṃ hi tat ।
amanaskasvarūpaṃ yattanmayo bhava sarvadā ।
cittaṃ dūre parityajya yo'si so'si sthiro bhava ॥ 51॥

pūrvaṃ manaḥ samuditaṃ paramātmatattvā-
ttenātataṃ jagadidaṃ savikalpajālam ।
śūnyena śūnyamapi vipra yathāmbareṇa
nīlatvamullasati cārutarābhidhānam ॥ 52॥

saṃkalpasaṃkṣayadgalite tu citte
saṃsāramohamihikā galitā bhavanti ।
svacchaṃ vibhāti śaradīva khamāgatāyāṃ
cinmātramekamajamādyamanantamantaḥ ॥ 53॥

akartṛkamaraṅgaṃ ca gagane citramutthitam ।
adraṣṭṛkaṃ svānubhavamanidrasvapnadarśanam ॥ 54॥

sākṣibhūte same svacche nirvikalpe cidātmani ।
niricchaṃ pratibimbanti jaganti mukure yathā ॥ 55॥

ekaṃ brahma cidākāśaṃ sarvātmakamakhaṇḍitam ।
iti bhāvaya yatnena cetaścāñcalyaśāntaye ॥ 56॥

rekhoparekhāvalitā yathaikā pīvarī śilā ।
tathā trailokyavalitaṃ brahmaikamiha dṛśyatām ॥ 57॥

dvitīyakāraṇābhāvādanutpannamidaṃ jagat ।
jñātaṃ jñātavyamadhunā dṛṣṭaṃ draṣṭavyamadbhutam ॥ 58॥

viśrānto'smi ciraṃ śrāntaścinmātrānnāsti kiṃcana ।
paśya viśrāntasandehaṃ vigatāśeṣakautukam ॥ 59॥

nirastakalpanājālamacittatvaṃ paraṃ padam ।
ta eva bhūmatāṃ prāptāḥ saṃśāntāśeṣakilbiṣāḥ ॥ 60॥

mahādhiyaḥ śāntadhiyo ye yātā vimanaskatām ।
jantoḥ kṛtavicārasya vigaladvṛtticetasaḥ ॥ 61॥

mananaṃ tyajato nityaṃ kiṃcitpariṇataṃ manaḥ ।
dṛśyaṃ santyajato heyamupādeyamupeyuṣaḥ ॥ 62॥

draṣṭāraṃ paśyato nityamadraṣṭāramapaśyataḥ ।
vijñātavye pare tattve jāgarūkasya jīvataḥ ॥ 63॥

suptasya dhanasaṃmohamaye saṃsāravartmani ।
atyantapakvavairāgyādaraseṣu raseṣvapi ॥ 64॥

saṃsāravāsanājāle khagajāla ivādhunā ।
troṭite hṛdayagranthau ślathe vairāgyaraṃhasā ॥ 65॥

kātakaṃ phalamāsādya yathā vāri prasīdati ।
tathā vijñānavaśataḥ svabhāvaḥ samprasīdati ॥ 66॥

nīrāgaṃ nirupāsaṅgaṃ nirdvandvaṃ nirupāśrayam ।
viniryāti mano mohādvihaṅgaḥ pañjarādiva ॥ 67॥

śāntasandehadaurātmyaṃ gatakautukavibhramam ।
paripūrṇāntaraṃ cetaḥ pūrṇenduriva rājate ॥ 68॥

nāhaṃ na cānyadastīha brahmaivāsmi nirāmayam ।
itthaṃ sadastormadhyādyaḥ paśyati sa paśyati ॥ 69॥

ayatnopateṣvakṣidṛgdṛśyeṣu yathā manaḥ ।
nīrāgameva patati tadvatkāryeṣu dhīradhīḥ ॥ 70॥

parijñāyopabhukto hi bhogo bhavati tuṣṭaye ।
vijñāya sevitaścoro maitrīmeti na coratām ॥ 71॥

aśaṅkitāpi samprāptā grāmayātrā yathādhvagaiḥ ।
prekṣyate tadvadeva jñairbhogaśrīravalokyate ॥ 72॥

manaso nigṛhītasya līlābhogo'lpako'pi yaḥ ।
tamevālabdhavistāraṃ kliṣṭatvādbahu manyate ॥ 73॥

baddhamukto mahīpālo grāsamātreṇa tuṣyati ।
parairabaddho nākrānto na rāṣṭraṃ bahu manyate ॥ 74॥

hastaṃ hatena sampīḍya dantairdantānvicūrṇya ca ।
aṅgānyaṅgairivākramya jayedādau svakaṃ manaḥ ॥ 75॥

manaso vijayānnānyā gatirasti bhavārṇave ।
mahānarakasāmrājye mattaduṣkṛtavāraṇāḥ ॥ 76॥

āśāśaraśalākāḍhyā durjayā hīndriyārayaḥ ।
prakṣīṇacittadarpasya nigṛhītendriyadviṣaḥ ॥ 77॥

padminya iva hemante kṣīyante bhogavāsanāḥ ।
tāvanniśīva vetālā vasanti hṛdi vāsanāḥ ।
ekatattvadṛḍhābhyāsādyāvanna vijitaṃ manaḥ ॥ 78॥

bhṛtyo'bhimatakartṛtvānmantrī sarvārthakāraṇāt ।
sāmantaścendriyākrāntermano manye vivekinaḥ ॥ 79॥

lālanātsnigdhalalanā pālānātpālakaḥ pitā ।
suhṛduttamavinyāsānmano manye manīṣiṇaḥ ॥ 80॥

svālokataḥ śāstradṛśā svabuddhyā svānubhāvataḥ ।
prayacchati parāṃ siddhiṃ tyaktvātmānaṃ manaḥpitā ॥ 81॥

suhṛṣṭaḥ sudṛḍhaḥ svacchaḥ sukrāntaḥ suprabodhitaḥ ।
svaguṇenorjito bhāti hṛdi hṛdyo manomaṇiḥ ॥ 82॥

enaṃ manomaṇiṃ brahmanbahupaṅkakalaṅkitam ।
vivekavāriṇā siddhyai prakṣālyālokavānbhava ॥ 83॥

vivekaṃ paramāśritya buddhyā satyamavekṣya ca ।
indriyārīnalaṃ chittvā tīrṇo bhava bhavārṇavāt ॥ 84॥

āsthāmātramanantānāṃ duḥkhānāmākaraṃ viduḥ ।
anāsthāmātramabhitaḥ sukhānāmālayaṃ viduḥ ॥ 85॥

vāsanātantubaddho'yaṃ loko viparivartate ।
sā prasiddhātiduḥkhāya sukhāyocchedamāgatā ॥ 86॥

dhīro'pyatibahujño'pi kulajo'pi mahānapi ।
tṛṣṇayā badhyate jantuḥ siṃhaḥ śṛṅkhalayā yathā ॥ 87॥

paramaṃ pauruṣaṃ yatnamāsthādāya sṛdyamam ।
yathāśāstramanudvegamācaranko na siddhibhāk ॥ 88॥

ahaṃ sarvamidaṃ viśvaṃ paramātmāhamacyutaḥ ।
nānyadastīti saṃvittyā paramā sā hyahaṅkṛtiḥ ॥ 89॥

sarvasmādvyatirikto'haṃ vālāgrādapyahaṃ tanuḥ ।
iti yā saṃvido brahmandvitīyāhaṅkṛtiḥ śubhā ॥ 90॥

mokṣāyaiṣā na bandhāya jīvanmuktasya vidyate ॥ 91॥

pāṇipādādimātro'yamahamityeṣa niścayaḥ ।
ahaṃkārastṛtīyo'sau laikikastuccha eva saḥ ॥ 92॥

jīva eva durātmāsau kandaḥ saṃsāradustaroḥ ।
anenābhihato janturadho'dhaḥ paridhāvati ॥ 93॥

anayā durahaṃkṛtyā bhāvātsaṃtyaktayā ciram ।
śiṣṭāhaṃkāravāñjantuḥ śamavānyāti muktatām ॥ 94॥

prathamau dvāvahaṃkārāvaṅgīkṛtya tvalaukikau ।
tṛtīyāhaṃkṛtistyājyā laukikī duḥkhadāyinī ॥ 95॥

atha te api saṃtyajya sarvāhaṃkṛtivarjitaḥ ।
sa tiṣṭhati tathātyuccaiḥ paramevādhirohati ॥ 96॥

bhogecchāmātrako bandhastattyāgo mokṣa ucyate ।
manaso'bhyudayo nāśo manonāśo mahodayaḥ ॥ 97॥

jñamano nāśamabhyeti mano'jñasya hi śṛṅkhalā ।
nānandaṃ na nirānandaṃ na calaṃ nācalaṃ sthiram ।
na sannāsanna caiteṣāṃ madhyaṃ jñānimano viduḥ ॥ 98॥

yathā saukṣmyāccidābhāsya ākāśo nopalakṣyate ।
tathā niraṃśaścidbhāvaḥ sarvago'pi na lakṣyate ॥ 99॥

sarvasaṃkalparahitā sarvasaṃjñāvivarjitā ।
saiṣā cidavināśātmā svātmetyādikṛtābhidhā ॥ 100॥

ākāśaśatabhāgāṇchā jñeṣu niṣkalarūpiṇī ।
sakalāmalasaṃsārasvarūpaikātmadarśinī ॥ 101॥

nāstameti na codeti nottiṣṭhati na tiṣṭhati ।
na ca yāti na cāyāti na ca neha na ceha cit ॥ 102॥

saiṣā ciyamalākārā nirvikalpā nirāspadā ॥ 103॥

ādau śamadamaprāyairguṇaiḥ śiṣyaṃ viśodhayet ।
paścātsarvamidaṃ brahma śuddhastvamiti bodhayet ॥ 104॥

ajñasyārdhaprabuddhasya sarvaṃ brahmeti yo vadet ।
mahānarakajāleṣu sa tena viniyojitaḥ ॥ 105॥

prabuddhabuddheḥ prakṣīṇabhogecchasya nirāśiṣaḥ ।
nāstyavidyāmalamiti prājñastūpadiśedguruḥ ॥ 106॥

sati dīpa ivālokaḥ satyarka iva vāsaraḥ ।
sati puṣpa ivāmodaściti satyaṃ jagattathā ॥ 107॥

pratibhāsata evedaṃ na jagatparamārthataḥ ।
jñānadṛṣṭau prasannāyāṃ prabodhavitatodaye ॥ 108॥

yathāvajjñāsyasi svastho madvāgvṛṣṭibalābalam ।
avidyayaivottamayā svārthanāśodyamārthayā ॥ 109॥

vidyā samprāpyate brahmansarvadoṣāpahāriṇī ।
śāmyati hyastramastreṇa malena kṣālyate malam ॥ 110॥

śamaṃ viṣaṃ viṣeṇaiti ripuṇā hanyate ripuḥ ।
īdṛśī bhūtamāyeyaṃ yā svanāśena harṣadā ॥ 111॥

na lakṣyate svabhāvo'syā vīkṣyamāṇaiva naśyati ।
nāstyeṣā paramārthenetyevaṃ bhāvanayeddhayā ॥ 112॥

sarvaṃ brahmeti yasyāntarbhāvanā sā hi muktidā ।
bhedadṛṣṭiravidyeyaṃ sarvathā tāṃ visarjayet ॥ 113॥

mune nāsādyate taddhi padamakṣayamucyate ।
kuto jāteyamiti te dvija māstu vicāraṇā ॥ 114॥

imāṃ kathamahaṃ hanmītyeṣā te'stu vicāraṇā ।
astaṃ gatāyāṃ kṣīṇāyāmasyāṃ jñāsyasi tatpadam ॥ 115॥

yata eṣā yathā caiṣā yathā naṣṭetyakhaṇḍitam ।
tadasyā rogaśālāyā yatnaṃ kuru cikitsane ॥ 116॥

yathaiṣā janmaduḥkheṣu na bhūyastvāṃ niyokṣyati ।
svātmani svaparispandaiḥ sphuratyacchaiścidarṇavaḥ ॥ 117॥

ekātmakamakhaṇḍaṃ tadityantarbhāvyatāṃ dṛḍham ।
kiṃcitkṣubhitarūpā sā cicchaktiścinmayārṇave॥ 118॥

tanmayaiva sphuratyacchā tatraivormirivārṇave ।
ātmanyevātmanā vyomni yathā sarasi mārutaḥ ॥ 119॥

tathaivātmātmaśaktyaiva svātmanyevaiti lolatām ।
kṣaṇaṃ sphurati sā devī sarvaśaktitayā tathā ॥ 120॥

deśakālakriyāśaktirna yasyāḥ samprakarṣaṇe ।
svasvabhāvaṃ viditvoccairapyanantapade sthitā ॥ 121॥

rūpaṃ parimitenāsau bhāvayatyavibhāvitā ।
yadaivaṃ bhāvitaṃ rūpaṃ tayā paramakāntayā ॥ 122॥

tadaivaināmanugatā nāmasaṃkhyādikā dṛśaḥ ।
vikalpakalitākāraṃ deśakālakriyāspadam ॥ 123॥

cito rūpamidaṃ brahmankṣetrajña iti kathyate ।
vāsanāḥ kalpayanso'pi yātyahaṃkāratāṃ punaḥ ॥ 124॥

ahaṅkāro vinirṇetā kalaṅkī buddhirucyate ।
buddhiḥ saṃkalpitākārā prayāti mananāspadam ॥ 125॥

mano ghanavikalpaṃ tu gacchatīndriyatāṃ śanaiḥ ।
pāṇipādamayaṃ dehamindriyāṇi vidurbudhāḥ ॥ 126॥

evaṃ jīvo hi saṃkalpavāsanārajjuveṣṭitaḥ ।
duḥkhajālaparītātmā kramādāyāti nīcatām ॥ 127॥

iti śaktimayaṃ ceto ghanāhaṃkāratāṃ gatam ।
kośakārakrimiriva svecchayā yāti bandhanam ॥ 128॥

svayaṃ kalpita tanmātrājālabhyantaravarti ca ।
parāṃ vivaśatāmeti śṛṅkhalābaddhasiṃhavat ॥ 129॥

kvacinmanaḥ kvacidbuddhiḥ kvacijjñānaṃ kvacitkriyā ।
kvacidetadahaṃkāraḥ kvaciccittamiti smṛtam ॥ 130॥

kvacitprakṛtirityuktaṃ kvacinmāyeti kalpitam ।
kvacinmalamiti proktaṃ kvacitkarmeti saṃsmṛtam ॥ 131॥

kvacidbandha iti khyātaṃ kvacitpuryaṣṭakaṃ smṛtam ।
proktaṃ kvacidavidyeti kvacidiccheti saṃmatam ॥ 132॥

iamaṃ saṃsāramakhilamāśāpāśavidhāyakam ।
dadhadantaḥphalairhīnaṃ vaṭadhānā vaṭaṃ yathā ॥ 133॥

cintānalaśikhādagdhaṃ kopājagaracarvitam ।
kāmābdhikallolarataṃ vismṛtātmapitāmaham ॥ 134॥

samuddhara mano brahmanmātaṅgamiva kardamāt ।
evaṃ jīvāśritā bhāvā bhavabhāvanayāhitāḥ ॥ 135॥

brahmaṇā kalpitākārā lakṣaśo'pyatha koṭiśaḥ ।
saṃkhyātītāḥ purā jātā jāyante'dyāpi cābhitaḥ ॥ 136॥

utpatsyante'pi caivānye kaṇaughā iva nirjharāt ।
kecitprathamajanmānaḥ kecijjanmaśatādhikāḥ ॥ 137॥

keciccāsaṃkhyajanmānaḥ keciddvitribhavāntarāḥ ।
kecitkinnaragandharvavidyādharamahoragāḥ ॥ 138॥

kecidarkenduvaruṇāstryakṣādhokṣajapadmajāḥ ।
kecidbrahmaṇabhūpālavaiśyaśūdragaṇāḥ sthitāḥ ॥ 139॥

kecittṛṇauṣadhīvṛkṣaphalamūlapataṅgakāḥ ।
kecitkadambajambīrasālatālatamālakāḥ ॥ 140॥

kecinmahendramalayasahyamandarameravaḥ ।
kecitkṣārodadhikṣīraghṛtekṣujalarāśayaḥ ॥ 141॥

kecidviśālāḥ kukubhaḥ kecinnadyo mahārayāḥ ।
vihāyasyuccakaiḥ kecinnipatantyutpatanti ca ॥ 142॥

kantukā iva hastena mṛtyunā'virataṃ hatāḥ ।
bhuktvā janmasahasrāṇi bhūyaḥ saṃsārasaṃkaṭe ॥ 143॥

patanti kecidabudhāḥ samprāpyāpi vivekatām ।
dikkālādyanavacchinnamātmatattvaṃ svaśaktitaḥ ॥ 144॥

līlayaiva yadādatte dikkālakalitaṃ vapuḥ ।
tadeva jīvaparyāyavāsanāveśataḥ param ॥ 145॥

manaḥ sampadyate lolaṃ kalanākalanonmukham ।
kalayantī manaḥśaktirādau bhāvayati kṣaṇāt ॥ 146॥

ākāśabhāvanāmacchāṃ śabdabījarasonmukhīm ।
tatastadghanatāṃ yātaṃ ghanaspandakramānmanaḥ ॥ 147॥

bhāvayatyanilaspandaṃ sparśabījarasonmukham ।
tābhyāmākāśavātābhyāṃ dṛḍhābhyāsavaśāttataḥ ॥ 148॥

śabdasparśasvarūpābhyāṃ saṃgharṣājjanyate'nalaḥ ।
rūpatanmātrasahitaṃ tribhistaiḥ saha saṃmitam ॥ 149॥

manastāddṛgguṇagataṃ rasatanmātravedanam ।
kṣaṇāccetatyapāṃ śaityaṃ jalasaṃvittato bhavet ॥ 150॥

tatastādṛgguṇagataṃ mano bhāvayati kṣaṇāt ।
gandhatanmātrametasmādbhūmisaṃvittato bhavet ॥ 151॥

athetthaṃbhūtatanmātraveṣṭitaṃ tanutāṃ jahat ।
vapurvahnikaṇākāraṃ sphuritaṃ vyomni paśyati ॥ 152॥

ahaṃkārakalāyuktaṃ buddhibījasamanvitam ।
tatpuryaṣṭakamityuktaṃ bhūtahṛtpadmaṣaṭpadam ॥ 153॥

tasmiṃstu tīvrasaṃvegādbhāvayadbhāsuraṃ vapuḥ ।
sthūlatāmeti pākena mano bilvaphalaṃ yathā ॥ 154॥

mūṣāsthadrutahemābhaṃ sphuritaṃ vimalāmbare ।
saṃniveśamathādatte tattejaḥ svasvabhāvataḥ ॥ 155॥

ūrdhvaṃ śiraḥpiṇḍamayamadhaḥ pādamayaṃ tathā ।
pārśvayorhastasaṃsthānaṃ madhye codaradharmiṇam ॥ 156॥

kālena sphuṭatāmetya bhavatyamalavigraham ।
buddhisattvabalotsāhavijñānaiśvaryasaṃsthitaḥ ॥ 157॥

sa eva bhagavānbrahmā sarvalokapitāmahaḥ ।
avalokya vapurbrahmā kāntamātmīyamuttamam ॥ 158॥

cintāmabhyetya bhagavāṃstrikālāmaladarśanaḥ ।
etasminparamākāśe cinmātraikātmarūpiṇī ॥ 159॥

adṛṣṭapāraparyante prathamaṃ kiṃ bhavediti ।
iti cintitavānbrahmā sadyo jātāmalātmadṛk ॥ 160॥

apaśyatsargavṛndāni samatītānyanekaśaḥ ।
smaratyatho sa sakalānsarvadharmaguṇakramāt ॥ 161॥

līlayā kalpayāmāsa citrāḥ saṃkalpataḥ prajāḥ ।
nānācārasamārambhā gandharvanagaraṃ yathā ॥ 162॥

tāsāṃ svargāpavargārthaṃ dharmakāmārthasiddhaye ।
anantāni vicitrāṇi śāstrāṇi samakalpayat ॥ 163॥

virañcirūpānmanasaḥ kalpitatvājjagatsthiteḥ ।
tāvatsthitiriyaṃ proktā tannāśe nāśamāpnuyāt ॥ 164॥

na jāyate na mriyate kvacitkiṃcitkadācana ।
paramārthena viprendra mithyā sarvaṃ tu dṛśyate ॥ 165॥

kośamāśābhujaṅgānāṃ saṃsārāḍaṃbaraṃ tyaja ।
asadetaditi jñātvā mātṛbhāvaṃ niveśaya ॥ 166॥

gandharvanagarasyārthe bhūṣite'bhūṣite tathā ।
avidyāṃśe sutādau vā kaḥ kramaḥ sukhaduḥkhayoḥ ॥ 167॥

dhanadāreṣu vṛddheṣu duḥkhayuktaṃ na tuṣṭatā ।
vṛddhāyāṃ mohamāyāyāṃ kaḥ samāśvāsavāniha ॥ 168॥

yaireva jāyate rāgo mūrkhasyādhikatāṃ gataiḥ ।
taireva bhāgaiḥ prājñasya virāga upajāyate ॥ 169॥

ato nidāgha tattvajña vyavahāreṣu saṃsṛteḥ ।
naṣṭaṃ naṣṭamupekṣasva prāptaṃ prāptamupāhara ॥ 170॥

anāgatānāṃ bhogānāmavāñchanamakṛtrimam ।
āgatānāṃ ca saṃbhoga iti paṇḍitalakṣaṇam ॥ 171॥

śuddhaṃ sadasatormadhyaṃ padaṃ buddhvāvalaṃbya ca ।
sabāhyābhyantaraṃ dṛśyaṃ mā gṛhāṇa vimuñca mā ॥ 172॥

yasya cecchā tathānicchā jñasya karmaṇi tiṣṭhataḥ ।
na tasya lipyate prajñā padmapatramivāmbubhiḥ ॥ 173॥

yadi te nendriyārthaśrīḥ spandate hṛdi vai dvija ।
tadā vijñātavijñeyā samuttīrṇo bhavārṇavāt ॥ 174॥

uccaiḥpadāya parayā prajñayā vāsanāgaṇāt ।
puṣpādgandhamapohyāraṃ cetovṛttiṃ pṛthakkuru ॥ 175॥

saṃsārāmbunidhāvasminvāsanāmbupariplute ।
ye prajñānāvamārūḍhāste tīrṇāḥ paṇḍitāḥ pare ॥ 176॥

na tyajanti na vāñchanti vyavahāraṃ jagadgatam ।
sarvamevānuvartante pārāvāravido janāḥ ॥ 177॥

anantasyātmatattvasya sattāsāmānyarūpiṇaḥ ।
citaścetyonmukhatvaṃ yattatsaṃkalpāṅkuraṃ viduḥ ॥ 178॥

leśataḥ prāptasattākaḥ sa eva ghanatāṃ śanaiḥ ।
yāti cittatvamāpūrya dṛḍhaṃ jāḍyāya meghavat ॥ 179॥

bhāvayanti citiścaityaṃ vyatiriktamivātmanaḥ ।
saṃkalpatāmivāyāti bījamaṅkuratāmiva ॥ 180॥

saṃkalpanaṃ hi saṃkalpaḥ svayameva prajāyate ।
vardhate svayamevāśu duḥkhāya na sukhāya yat ॥ 181॥

mā saṃkalpaya saṃkalpaṃ mā bhāvaṃ bhāvaya sthitau ।
saṃkalpanāśane yatto na bhūyo'nanugacchati ॥ 182॥

bhāvanābhāvamātreṇa saṃkalpaḥ kṣīyate svayam ।
saṃkalpenaiva saṃkalpaṃ manasaiva mano mune ॥ 183॥

chittvā svātmani tiṣṭha tvaṃ kimetāvati duṣkaram ।
yathaivedaṃ nabhaḥ śūnyaṃ jagacchūnyaṃ tathaiva hi ॥ 184॥

taṇḍulasya yathā carma yathā tāmrasya kālimā ।
naśyati kriyayā vipra puruṣasya tathā malam ॥ 185॥

jīvasya taṇḍulasyeva malaṃ sahajamapyalam ।
naśyatyeva na sandehastasmādudyogavānbhavet ॥ 186॥

iti mahopaniṣat ॥ iti pañcamo'dhyāyaḥ ॥ 5॥

antarāsthāṃ parityajya bhāvaśrīṃ bhāvanāmayīm ।
yo'si so'si jagatyasmiṃllīlayā viharānagha ॥ 1॥

sarvatrāhamakarteti dṛḍhabhāvanayānayā ।
paramāmṛtanāmnī sā samataivāvaśiṣyate ॥ 2॥

khedollāsavilāseṣu svātmakartṛtayaikayā ।
svasaṃkalpe kṣayaṃ yāte samataivāvaśiṣyate ॥ 3॥

samatā sarvabhāveṣu yāsau satyaparā sthitiḥ ।
tasyāmavasthitaṃ cittaṃ na bhūyo janmabhāgbhavet ॥ 4॥

athavā sarvakartṛtvamakartṛtvaṃ ca vai mune ।
sarvaṃ tyaktvā manaḥ pītvā yo'si so'si sthiro bhava ॥ 5॥

śeṣasthiro samādhāno yena tyajasi tattyaja ।
cinmanaḥkalanākāraṃ prakāśatimirādikam ॥ 6॥

vāsanāṃ vāsitāraṃ ca prāṇaspandanapūrvakam ।
samūlamakhilaṃ tyaktvā vyomasāmyaḥ praśāntadhīḥ ॥ 7॥

hṛdayātsamparityajya sarvavāsanapaṅktayaḥ ।
yastiṣṭhati gatavyagraḥ sa muktaḥ parameśvaraḥ ॥ 8॥

dṛṣṭaṃ draṣṭavyamakhilaṃ bhrāntaṃ bhrāntyā diśo daśa ।
yuktyā vai carato jñasya saṃsāro goṣpadākṛtiḥ ॥ 9॥

sabāhyābhyantare dehe hyadha ūrdhvaṃ ca dikṣu ca ।
ita ātmā tato'pyātmā nāstyanātmamayaṃ jagat ॥ 10॥

na tadasti na yatrāhaṃ na tadasti na tanmayam ।
kimanyadabhivāñchāmi sarvaṃ saccinmayaṃ tatam ॥ 11॥

samastaṃ khalvidaṃ brahma sarvamātmedamātatam ।
ahamanya idaṃ cānyaditi bhrāntiṃ tyajānagha ॥ 12॥

tate brahmaghane nitye saṃbhavanti na kalpitāḥ ।
na śoko'sti na moho'sti na jarāsti na janma vā ॥ 13॥

yadastīha tadevāsti vijvaro bhava sarvadā ।
yathāprāptānubhavataḥ sarvatrānabhivāñchanāt ॥ 14॥

tyāgādānaparityāgī vijvaro bhava sarvadā ।
yasyedaṃ janma pāścātyaṃ tamāśveva mahāmate ॥ 15॥

viśanti vidyā vimalā muktā veṇumivottamam ।
viraktamanasāṃ samyaksvaprasaṅgādudāhṛtam ॥ 16॥

draṣṭurdṛśyasamāyogātpratyayānandaniścayaḥ ।
yastaṃ svamātmatattvotthaṃ niṣpandaṃ samupāsmahe ॥ 17॥

draṣṭṛdarśanadṛśyāni tyaktvā vāsanayā saha ।
darśanapratyayābhāsamātmānaṃ samupāsmahe ॥ 18॥

dvayormadhyagataṃ nityamastināstīti pakṣayoḥ ।
prakāśanaṃ prakāśānāmātmānaṃ samupāsmahe ॥ 19॥

santyajya hṛdguheśānaṃ devamanyaṃ prayānti ye ।
te ratnamabhivāñchanti tyaktahastasthakaustubhāḥ ॥ 20॥

utthitānutthitānetānindriyārīnpunaḥ punaḥ ।
hanyādvivekadaṇḍena vajreṇeva harirgirīn ॥ 21॥

saṃsārarātriduḥsvapne śūnye dehamaye bhrame ।
sarvamevāpavitraṃ taddṛṣṭaṃ saṃsṛtivibhramam ॥ 22॥

ajñānopahato bālye yauvane vanitāhataḥ ।
śeṣe kalatracintārtaḥ kiṃ karoti narādhamaḥ ॥ 23॥

sato'sattā sthitā mūrdhni ramyāṇāṃ mūrdhnyaramyatā ।
sukhānāṃ mūrdhniduḥkhāni kimekaṃ saṃśrayāmyaham ॥ 24॥

yeṣāṃ nimeṣaṇāmeṣau jagataḥ pralayodayau ।
tādṛśāḥ puruṣā yānti mādṛśāṃ gaṇanaiva kā ॥ 25॥

saṃsāra eva duḥkhānāṃ sīmānta iti kathyate ।
tanmadhye patite dehe sukhamāsādyate katham ॥ 26॥

prabuddho'smi prabuddho'smi duṣṭaścoro'yamātmanaḥ ।
mano nāma nihanmyenaṃ manasāsmi ciraṃ hṛtaḥ ॥ 27॥

mā khedaṃ bhaja heyeṣu nopādeyaparo bhava ।
heyādeyādṛśau tyaktvā śeṣasthaḥ susthiro bhava ॥ 28॥

nirāśatā nirbhayatā nityatā samatā jñatā ।
nirīhatā niṣkriyatā saumyatā nirvikalpatā ॥ 29॥

dhṛrmaitrī manastuṣṭirmṛdutā mṛdubhāṣitā ।
heyopādeyanirmukte jñe tiṣṭhantyapavāsanam ॥ 30॥

gṛhītatṛṣṇāśabarīvāsanājālamātatam ।
saṃsāravāriprasṛtaṃ cintātantubhirātatam ॥ 31॥

anayā tīkṣṇayā tāta chindhi buddhiśalākayā ।
vātyayevāmbudaṃ jālaṃ chittvā tiṣṭha tate pade ॥ 32॥

manasaiva manaśchittvā kuṭhāreṇeva pādapam ।
padaṃ pāvanamāsādya sadya eva sthiro bhava ॥ 33॥

tiṣṭhangacchantsvapañjāgrannivasannutpatanpatan ।
asadevedamityantaṃ niścityāstāṃ parityaja ॥ 34॥

dṛśyamāśrayasīdaṃ cettatsaccito'si bandhavān ।
dṛśyaṃ santyajasīdaṃ cettadā'citto'si mokṣavān ॥ 35॥

nāhaṃ nedamiti dhyāyaṃstiṣṭha tvamacalācalaḥ ।
ātmano jagataścāntardraṣṭṛdṛśyadaśāntare ॥ 36॥

darśanākhyaṃ svamātmānaṃ sarvadā bhāvayanbhava ।
svādyasvādakasaṃtyaktaṃ svādyasvādakamadhyagam ॥ 37॥

svadanaṃ kevalaṃ dhyāyanparamātmamayo bhava ।
avalambya nirālambaṃ madhyemadhye sthiro bhava ॥ 38॥

rajjubaddhā vimucyante tṛṣṇābaddhā na kenacit ।
tasmānnidāgha tṛṣṇā tvaṃ tyaja saṃkalpavarjanāt ॥ 39॥

etāmahaṃbhāvamayīpapuṇyāṃ
chittvānahaṃbhāva śalākayaiva ॥

svabhāvajāṃ bhavyabhavantabhūmau
bhava praśāntākhilabhūtabhītiḥ ॥ 40॥

ahameṣāṃ padārthānāmete ca mama jīvitam ।
nāhamebhirvinā kiṃcinna mayaite vinā kila ॥ 41॥

ityantarniścayaṃ tyaktvā vicārya manasā saha ।
nāhaṃ padārthasya na me padārtha iti bhāvite ॥ 42॥

antaḥśītalayā buddhyā kurvato līlayā kriyām ।
yo nūnaṃ vāsanātyāgo dhyeyo brahmanprakīrtitaḥ ॥ 43॥

sarvaṃ samatayā buddhyā yaḥ kṛtvā vāsanākṣayam ।
jahāti nirmamo dehaṃ neyo'sau vāsanākṣayaḥ ॥ 44॥

ahaṃkāramayīṃ tyaktvā vāsanāṃ līlayaiva yaḥ ।
tiṣṭhati dhyeyasaṃtyāgī sa jīvanmukta ucyate ॥ 45॥

nirmūlaṃ kalanāṃ tyaktvā vāsanāṃ yaḥ śamaṃ gataḥ ।
jñeyaṃ tyāgamimaṃ viddhi muktaṃ taṃ brāhmaṇottamam ॥ 46॥

dvāvetau brahmatāṃ yātau dvāvetau vigatajvarau ।
āpatatsu yathākālaṃ sukhaduḥkheṣvanāratau ।
saṃnyāsiyoginau dāntau viddhi śāntau munīśvara ॥ 47॥

īpsitānīpsite na sto yasyāntarvartidṛṣṭiṣu ।
suṣuptavadyaścarati sa jīvanmukta ucyate ॥ 48॥

harṣāmarṣabhayakrodhakāmakārpaṇyadṛṣṭibhiḥ ।
na hṛṣyati glāyati yaḥ parāmarśavivarjitaḥ ॥ 49॥

bāhyārthavāsanodbhūtā tṛṣṇā baddheti kathyate ।
sarvārthavāsanonmuktā tṛṣṇā mukteti bhaṇyate ॥ 50॥

idamastu mametyantamicchāṃ prārthanayānvitām ।
tāṃ tīkṣṇāṃ śṛṅkhalāṃ viddhi duḥkhajanmabhayapradām ॥ 51॥

tāmetāṃ sarvabhāveṣu satsvasatsu ca sarvadā ।
saṃtyajya paramodāraṃ padameti mahāmanāḥ ॥ 52॥

bandhāsthāmatha mokṣāsthāṃ sukhaduḥkhadaśāmapi ।
tyaktvā sadasadāsthāṃ tvaṃ tiṣṭhākṣubdhamahābdhivat ॥ 53॥

jāyate niścayaḥ sādho puruṣasya caturvidhaḥ ॥ 54॥

āpādamastakamahaṃ mātāpitṛvinirmitaḥ ।
ityeko niścayo brahmanbandhāyāsavilokanāt ॥ 55॥

atītaḥ sarvabhāvebhyo vālāgrādapyahaṃ tanuḥ ।
iti dvitīyo mokṣāya niścayo jāyate satām ॥ 56॥

jagajjāla padārthātmā sarva evāhamakṣayaḥ ।
tṛtīyo niścayaścokto mokṣāyaiva dvijottama ॥ 57॥

ahaṃ jagadvā sakalaṃ śūnyaṃ vyoma samaṃ sadā ।
evameṣa caturtho'pi niścayo mokṣasiddhidaḥ ॥ 58॥

eteṣāṃ prathamaḥ proktastṛṣṇayā bandhayogyayā ।
śuddhatṛṣṇāstrayaḥ svacchā jīvanmuktā vilāsinaḥ ॥ 59॥

sarvaṃ cāpyahameveti niścayo yo mahāmate ।
tamādāya viṣādāya na bhūyo jāyate matiḥ ॥ 60॥

śūnyaṃ tatprakṛtirmāyā brahmavijñānamityapi ।
śivaḥ puruṣa īśāno nityamātmeti kathyate ॥ 61॥

dvaitādvaitasamudbhūtairjagannirmāṇalīlayā ।
paramātmamayīśaktiradvaitaiva vijṛmbhate ॥ 62॥

sarvātītapadālambī paripūrṇaikacinmayaḥ ।
nodvegī na ca tuṣṭātmā saṃsāre nāvasīdati ॥ 63॥

prāptakarmakaro nityaṃ śatrumitrasamānadṛk ।
īhitānīhitairmukto na śocati na kāṅkṣati ॥ 64॥

sarvasyābhimataṃ vaktā coditaḥ peśaloktimān ।
āśayajñaśca bhūtānāṃ saṃsāre nāvasīdati ॥ 65॥

pūrvāṃ dṛṣṭimavaṣṭabhya dhyeyatyāgavilāsinīm ।
jīvanmuktatayā svastho loke vihara vijvaraḥ ॥ 66॥

antaḥsaṃtyaktasarvāśo vītarāgo vivāsanaḥ ।
bahiḥsarvasamācāro loke vihara vijvaraḥ ॥ 67॥

bahiḥkṛtrimasaṃraṃbho hṛdi saṃrambhavarjitaḥ ।
kartā bahirakartāntarloke vihara śuddhadhīḥ ॥ 68॥

tyaktāhaṃkṛtirāśvastamatirākāśaśobhanaḥ ।
agṛhītakalaṅkāṅko loke vihara śuddhadhīḥ ॥ 69॥

udāraḥ peśalācāraḥ sarvācārānuvṛttimān ।
antaḥsaṅgaparityāgī bahiḥsaṃbhāravāniva ।
antarvairāgyamādāya bahirāśonmukhehitaḥ ॥ 70॥

ayaṃ bandhurayaṃ neti gaṇanā laghucetasām ।
udāracaritānāṃ tu vasudhaiva kuṭumbakam ॥ 71॥

bhāvābhāvavinirmuktaṃ jarāmaraṇavarjitam ।
praśāntakalanārabhyaṃ nīrāgaṃ padamāśraya ॥ 72॥

eṣā brāhmī sthitiḥ svacchā niṣkāmā vigatāmayā ।
ādāya viharannevaṃ saṃkaṭeṣu na muhyati ॥ 73॥

vairāgyeṇātha śāstreṇa mahattvādiguṇairapi ।
yatsaṃkalpaharārthaṃ tatsvayamevonnayenmanaḥ ॥ 74॥

vairāgyātpūrṇatāmeti mano nāśavaśānugam ।
āśayā raktatāmeti śaradīva saro'malam ॥ 75॥

tameva bhuktivirasaṃ vyāpāraughaṃ punaḥ punaḥ ।
divasedivase kurvanprājña kasmānna lajjate ॥ 76॥

ciccaityakalito bandhastanmuktau muktirucyate ।
cidacaityā kilātmeti sarvasiddhāntasaṃgrahaḥ ॥ 77॥

etanniścayamādāya vilokaya dhiyeddhayā ।
svayamevātmanātmānamānandaṃ padamāpsyasi ॥ 78॥

cidahaṃ cidime lokāścidāśāścidimāḥ prajāḥ ।
dṛśyadarśananirmuktaḥ kevalāmalarūpavān ॥ 79॥

nityodito nirābhāso draṣṭā sākṣī cidātmakaḥ ॥ 80॥

caityanirmuktacidrūpaṃ pūrṇajyotiḥsvarūpakam ।
saṃśāntasarvasaṃvedyaṃ saṃvinmātramahaṃ mahat ॥ 81॥

saṃśāntasarvasaṃkalpaḥ praśāntasakaleṣaṇaḥ ।
nirvikalpapadaṃ gatvā svastho bhava munīśvara ॥ 82॥

iti ya imāṃ mahopaniṣadaṃ brāhmaṇo nityamadhīte ।
aśrotriyaḥ śrotriyo bhavati । anupanīta upanīto bhavati ।
so'gnipūto bhavati । sa vāyupūto bhavati । sa somapūto bhavati ।
sa satyapūto bhavati । sa sarvapūto bhavati । sa sarvardevairjñāto bhavati ।
sa sarveṣu tīrtheṣu snāto bhavati । sa sarvairdevairanudhyāto bhavati ।
sa sarvakratubhiriṣṭavānbhavati । gāyatryāḥ ṣaṣṭisahasrāṇi
japtāni phalāni bhavanti । itihāsapurāṇānāṃ śatasahasrāṇi japtāni
phalāni bhavanti । praṇavānāmayutaṃ japtaṃ bhavati ।
ācakṣuṣaḥ paṅktiṃ punāti । āsaptamānpuruṣayugānpunāti ।
ityāha bhagavān hiraṇyagarbhaḥ । japyenāmṛtattvaṃ ca
gacchatītyupaniṣat ॥

iti ṣaṣṭho'dhyāyaḥ ॥ 6॥

oṃ āpyāyantu mamāṅgāni vākprāṇaścakṣuḥ śrotramatho
balamindriyāṇi ca ॥

sarvāṇi sarvaṃ brahmopaniṣadaṃ māhaṃ
brahma nirākuryāṃ mā mā brahma nirākarodanirākaraṇama-
stvanirākaraṇaṃ mestu tadātmani nirate ya upaniṣatsu dharmāste
mayi santu te mayi santu ॥

oṃ śāntiḥ śāntiḥ śāntiḥ ॥

iti mahopaniṣatsamāptā॥