| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
4. மக்³கு³ப்பாத³னபஞ்ஹோ
4. Magguppādanapañho
4. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘ததா²க³தோ பி⁴க்க²வே, அரஹங் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி. புன ச ப⁴ணிதங் ‘அத்³த³ஸங் க்²வாஹங், பி⁴க்க²வே, புராணங் மக்³க³ங் புராணங் அஞ்ஜஸங் புப்³ப³கேஹி ஸம்மாஸம்பு³த்³தே⁴ஹி அனுயாத’ந்தி. யதி³, ப⁴ந்தே நாக³ஸேன, ததா²க³தோ அனுப்பன்னஸ்ஸ மக்³க³ஸ்ஸ உப்பாதே³தா, தேன ஹி ‘அத்³த³ஸங் க்²வாஹங், பி⁴க்க²வே, புராணங் மக்³க³ங் புராணங் அஞ்ஜஸங் புப்³ப³கேஹி ஸம்மாஸம்பு³த்³தே⁴ஹி அனுயாத’ந்தி யங் வசனங், தங் மிச்சா². யதி³ ததா²க³தேன ப⁴ணிதங் ‘அத்³த³ஸங் க்²வாஹங், பி⁴க்க²வே, புராணங் மக்³க³ங் புராணங் அஞ்ஜஸங் புப்³ப³கேஹி ஸம்மாஸம்பு³த்³தே⁴ஹி அனுயாத’ந்தி, தேன ஹி ‘ததா²க³தோ, பி⁴க்க²வே, அரஹங் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
4. ‘‘Bhante nāgasena, bhāsitampetaṃ bhagavatā ‘tathāgato bhikkhave, arahaṃ sammāsambuddho anuppannassa maggassa uppādetā’ti. Puna ca bhaṇitaṃ ‘addasaṃ khvāhaṃ, bhikkhave, purāṇaṃ maggaṃ purāṇaṃ añjasaṃ pubbakehi sammāsambuddhehi anuyāta’nti. Yadi, bhante nāgasena, tathāgato anuppannassa maggassa uppādetā, tena hi ‘addasaṃ khvāhaṃ, bhikkhave, purāṇaṃ maggaṃ purāṇaṃ añjasaṃ pubbakehi sammāsambuddhehi anuyāta’nti yaṃ vacanaṃ, taṃ micchā. Yadi tathāgatena bhaṇitaṃ ‘addasaṃ khvāhaṃ, bhikkhave, purāṇaṃ maggaṃ purāṇaṃ añjasaṃ pubbakehi sammāsambuddhehi anuyāta’nti, tena hi ‘tathāgato, bhikkhave, arahaṃ sammāsambuddho anuppannassa maggassa uppādetā’ti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங் , மஹாராஜ, ப⁴க³வதா ‘ததா²க³தோ, பி⁴க்க²வே, அரஹங் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி. ப⁴ணிதஞ்ச ‘அத்³த³ஸங் க்²வாஹங், பி⁴க்க²வே, புராணங் மக்³க³ங் புராணங் அஞ்ஜஸங் புப்³ப³கேஹி ஸம்மாஸம்பு³த்³தே⁴ஹி அனுயாத’ந்தி, தங் த்³வயம்பி ஸபா⁴வவசனமேவ, புப்³ப³கானங், மஹாராஜ, ததா²க³தானங் அந்தரதா⁴னேன அஸதி அனுஸாஸகே மக்³கோ³ அந்தரதா⁴யி, தங் 1 ததா²க³தோ மக்³க³ங் லுக்³க³ங் பலுக்³க³ங் கூ³ள்ஹங் பிஹிதங் படிச்ச²ன்னங் அஸஞ்சரணங் பஞ்ஞாசக்கு²னா ஸம்பஸ்ஸமானோ 2 அத்³த³ஸ புப்³ப³கேஹி ஸம்மாஸம்பு³த்³தே⁴ஹி அனுயாதங், தங்காரணா ஆஹ ‘அத்³த³ஸங் க்²வாஹங், பி⁴க்க²வே, புராணங் மக்³க³ங் புராணங் அஞ்ஜஸங் புப்³ப³கேஹி ஸம்மாஸம்பு³த்³தே⁴ஹி அனுயாத’ந்தி.
‘‘Bhāsitampetaṃ , mahārāja, bhagavatā ‘tathāgato, bhikkhave, arahaṃ sammāsambuddho anuppannassa maggassa uppādetā’ti. Bhaṇitañca ‘addasaṃ khvāhaṃ, bhikkhave, purāṇaṃ maggaṃ purāṇaṃ añjasaṃ pubbakehi sammāsambuddhehi anuyāta’nti, taṃ dvayampi sabhāvavacanameva, pubbakānaṃ, mahārāja, tathāgatānaṃ antaradhānena asati anusāsake maggo antaradhāyi, taṃ 3 tathāgato maggaṃ luggaṃ paluggaṃ gūḷhaṃ pihitaṃ paṭicchannaṃ asañcaraṇaṃ paññācakkhunā sampassamāno 4 addasa pubbakehi sammāsambuddhehi anuyātaṃ, taṃkāraṇā āha ‘addasaṃ khvāhaṃ, bhikkhave, purāṇaṃ maggaṃ purāṇaṃ añjasaṃ pubbakehi sammāsambuddhehi anuyāta’nti.
‘‘புப்³ப³கானங், மஹாராஜ, ததா²க³தானங் அந்தரதா⁴னேன அஸதி அனுஸாஸகே லுக்³க³ங் பலுக்³க³ங் கூ³ள்ஹங் பிஹிதங் படிச்ச²ன்னங் அஸஞ்சரணங் மக்³க³ங் யங் தா³னி ததா²க³தோ ஸஞ்சரணங் அகாஸி, தங்காரணா ஆஹ ‘ததா²க³தோ, பி⁴க்க²வே, அரஹங் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி.
‘‘Pubbakānaṃ, mahārāja, tathāgatānaṃ antaradhānena asati anusāsake luggaṃ paluggaṃ gūḷhaṃ pihitaṃ paṭicchannaṃ asañcaraṇaṃ maggaṃ yaṃ dāni tathāgato sañcaraṇaṃ akāsi, taṃkāraṇā āha ‘tathāgato, bhikkhave, arahaṃ sammāsambuddho anuppannassa maggassa uppādetā’ti.
‘‘இத⁴, மஹாராஜ, ரஞ்ஞோ சக்கவத்திஸ்ஸ அந்தரதா⁴னேன மணிரதனங் கி³ரிஸிக²ந்தரே நிலீயதி, அபரஸ்ஸ சக்கவத்திஸ்ஸ ஸம்மாபடிபத்தியா உபக³ச்ச²தி, அபி நு கோ² தங், மஹாராஜ, மணிரதனங் தஸ்ஸ பகத’’ந்தி? ‘‘ந ஹி, ப⁴ந்தே, பாகதிகங் யேவ தங் மணிரதனங், தேன பன நிப்³ப³த்தித’’ந்தி 5. ‘‘ஏவமேவ கோ², மஹாராஜ, பாகதிகங் புப்³ப³கேஹி ததா²க³தேஹி அனுசிண்ணங் அட்ட²ங்கி³கங் ஸிவங் மக்³க³ங் அஸதி அனுஸாஸகே லுக்³க³ங் பலுக்³க³ங் கூ³ள்ஹங் பிஹிதங் படிச்ச²ன்னங் அஸஞ்சரணங் ப⁴க³வா பஞ்ஞாசக்கு²னா ஸம்பஸ்ஸமானோ உப்பாதே³ஸி, ஸஞ்சரணங் அகாஸி, தங்காரணா ஆஹ ‘ததா²க³தோ, பி⁴க்க²வே, அரஹங் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி.
‘‘Idha, mahārāja, rañño cakkavattissa antaradhānena maṇiratanaṃ girisikhantare nilīyati, aparassa cakkavattissa sammāpaṭipattiyā upagacchati, api nu kho taṃ, mahārāja, maṇiratanaṃ tassa pakata’’nti? ‘‘Na hi, bhante, pākatikaṃ yeva taṃ maṇiratanaṃ, tena pana nibbattita’’nti 6. ‘‘Evameva kho, mahārāja, pākatikaṃ pubbakehi tathāgatehi anuciṇṇaṃ aṭṭhaṅgikaṃ sivaṃ maggaṃ asati anusāsake luggaṃ paluggaṃ gūḷhaṃ pihitaṃ paṭicchannaṃ asañcaraṇaṃ bhagavā paññācakkhunā sampassamāno uppādesi, sañcaraṇaṃ akāsi, taṃkāraṇā āha ‘tathāgato, bhikkhave, arahaṃ sammāsambuddho anuppannassa maggassa uppādetā’ti.
‘‘யதா² வா பன, மஹாராஜ, ஸந்தங் யேவ புத்தங் யோனியா ஜனயித்வா மாதா ‘ஜனிகா’தி வுச்சதி, ஏவமேவ கோ², மஹாராஜ, ததா²க³தோ ஸந்தங் யேவ மக்³க³ங் லுக்³க³ங் பலுக்³க³ங் கூ³ள்ஹங் பிஹிதங் படிச்ச²ன்னங் அஸஞ்சரணங் பஞ்ஞாசக்கு²னா ஸம்பஸ்ஸமானோ உப்பாதே³ஸி, ஸஞ்சரணங் அகாஸி, தங்காரணா ஆஹ ‘ததா²க³தோ, பி⁴க்க²வே, அரஹங் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி.
‘‘Yathā vā pana, mahārāja, santaṃ yeva puttaṃ yoniyā janayitvā mātā ‘janikā’ti vuccati, evameva kho, mahārāja, tathāgato santaṃ yeva maggaṃ luggaṃ paluggaṃ gūḷhaṃ pihitaṃ paṭicchannaṃ asañcaraṇaṃ paññācakkhunā sampassamāno uppādesi, sañcaraṇaṃ akāsi, taṃkāraṇā āha ‘tathāgato, bhikkhave, arahaṃ sammāsambuddho anuppannassa maggassa uppādetā’ti.
‘‘யதா² வா பன, மஹாராஜ, கோசி புரிஸோ யங் கிஞ்சி நட்ட²ங் பஸ்ஸதி, ‘தேன தங் ப⁴ண்ட³ங் நிப்³ப³த்தித’ந்தி ஜனோ வோஹரதி, ஏவமேவ கோ², மஹாராஜ, ததா²க³தோ ஸந்தங் யேவ மக்³க³ங் லுக்³க³ங் பலுக்³க³ங் கூ³ள்ஹங் பிஹிதங் படிச்ச²ன்னங் அஸஞ்சரணங் பஞ்ஞாசக்கு²னா ஸம்பஸ்ஸமானோ உப்பாதே³ஸி, ஸஞ்சரணங் அகாஸி, தங்காரணா ஆஹ ‘ததா²க³தோ, பி⁴க்க²வே, அரஹங் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி.
‘‘Yathā vā pana, mahārāja, koci puriso yaṃ kiñci naṭṭhaṃ passati, ‘tena taṃ bhaṇḍaṃ nibbattita’nti jano voharati, evameva kho, mahārāja, tathāgato santaṃ yeva maggaṃ luggaṃ paluggaṃ gūḷhaṃ pihitaṃ paṭicchannaṃ asañcaraṇaṃ paññācakkhunā sampassamāno uppādesi, sañcaraṇaṃ akāsi, taṃkāraṇā āha ‘tathāgato, bhikkhave, arahaṃ sammāsambuddho anuppannassa maggassa uppādetā’ti.
‘‘யதா² வா பன, மஹாராஜ, கோசி புரிஸோ வனங் ஸோதெ⁴த்வா பூ⁴மிங் நீஹரதி, ‘தஸ்ஸ ஸா பூ⁴மீ’தி ஜனோ வோஹரதி, ந சேஸா பூ⁴மி தேன பவத்திதா, தங் பூ⁴மிங் காரணங் கத்வா பூ⁴மிஸாமிகோ நாம ஹோதி, ஏவமேவ கோ², மஹாராஜ, ததா²க³தோ ஸந்தங் யேவ மக்³க³ங் லுக்³க³ங் பலுக்³க³ங் கூ³ள்ஹங் பிஹிதங் படிச்ச²ன்னங் அஸஞ்சரணங் பஞ்ஞாய ஸம்பஸ்ஸமானோ உப்பாதே³ஸி, ஸஞ்சரணங் அகாஸி, தங்காரணா ஆஹ ‘ததா²க³தோ, பி⁴க்க²வே, அரஹங் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Yathā vā pana, mahārāja, koci puriso vanaṃ sodhetvā bhūmiṃ nīharati, ‘tassa sā bhūmī’ti jano voharati, na cesā bhūmi tena pavattitā, taṃ bhūmiṃ kāraṇaṃ katvā bhūmisāmiko nāma hoti, evameva kho, mahārāja, tathāgato santaṃ yeva maggaṃ luggaṃ paluggaṃ gūḷhaṃ pihitaṃ paṭicchannaṃ asañcaraṇaṃ paññāya sampassamāno uppādesi, sañcaraṇaṃ akāsi, taṃkāraṇā āha ‘tathāgato, bhikkhave, arahaṃ sammāsambuddho anuppannassa maggassa uppādetā’’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
மக்³கு³ப்பாத³னபஞ்ஹோ சதுத்தோ².
Magguppādanapañho catuttho.
Footnotes:
