| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៦. មគ្គទត្តិកត្ថេរអបទានវណ្ណនា
6. Maggadattikattheraapadānavaṇṇanā
អនោមទស្សី ភគវាតិអាទិកំ អាយស្មតោ មគ្គទត្តិកត្ថេរស្ស អបទានំ។ អយម្បាយស្មា បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ អនោមទស្សិស្ស ភគវតោ កាលេ កុលគេហេ និព្ពត្តោ វុទ្ធិមន្វាយ ឃរាវាសំ សណ្ឋបេត្វា វសន្តោ អនោមទស្សិំ ភគវន្តំ អាកាសេ ចង្កមន្តំ បាទុទ្ធារេ បាទុទ្ធារចង្កមនដ្ឋានេ បុប្ផានំ វិកិរណំ អច្ឆរិយញ្ច ទិស្វា បសន្នមានសោ បុប្ផានិ អាកាសេ ឧក្ខិបិ, តានិ វិតានំ ហុត្វា អដ្ឋំសុ។
Anomadassī bhagavātiādikaṃ āyasmato maggadattikattherassa apadānaṃ. Ayampāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle kulagehe nibbatto vuddhimanvāya gharāvāsaṃ saṇṭhapetvā vasanto anomadassiṃ bhagavantaṃ ākāse caṅkamantaṃ pāduddhāre pāduddhāracaṅkamanaṭṭhāne pupphānaṃ vikiraṇaṃ acchariyañca disvā pasannamānaso pupphāni ākāse ukkhipi, tāni vitānaṃ hutvā aṭṭhaṃsu.
២៦. សោ តេន បុញ្ញេន សុគតីសុយេវ សំសរន្តោ សព្ពត្ថ បូជិតោ សុខំ អនុភវិត្វា ឥមស្មិំ ពុទ្ធុប្បាទេ ឯកស្មិំ កុលេ និព្ពត្តោ កមេន យោព្ពញ្ញំ បាបុណិត្វា សទ្ធាជាតោ បព្ពជិត្វា វត្តសម្បន្នោ នចិរស្សេវ អរហត្តំ បត្តោ ចង្កមនស្ស បូជិតត្តា មគ្គទត្តិកត្ថេរោតិ បាកដោ។ សោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ អនោមទស្សី ភគវាតិអាទិមាហ។ ទិដ្ឋធម្មសុខត្ថាយាតិ ឥមស្មិំ អត្តភាវេ ចង្កមនេន សរីរសល្លហុកាទិសុខំ បដិច្ចាតិ អត្ថោ។ អព្ភោកាសម្ហិ ចង្កមីតិ អព្ភោកាសេ អង្គណដ្ឋានេ ចង្កមិ, បទវិក្ខេបំ បទសញ្ចារំ អកាសីតិ អត្ថោ។
26. So tena puññena sugatīsuyeva saṃsaranto sabbattha pūjito sukhaṃ anubhavitvā imasmiṃ buddhuppāde ekasmiṃ kule nibbatto kamena yobbaññaṃ pāpuṇitvā saddhājāto pabbajitvā vattasampanno nacirasseva arahattaṃ patto caṅkamanassa pūjitattā maggadattikattheroti pākaṭo. So pubbakammaṃ saritvā somanassajāto pubbacaritāpadānaṃ pakāsento anomadassī bhagavātiādimāha. Diṭṭhadhammasukhatthāyāti imasmiṃ attabhāve caṅkamanena sarīrasallahukādisukhaṃ paṭiccāti attho. Abbhokāsamhi caṅkamīti abbhokāse aṅgaṇaṭṭhāne caṅkami, padavikkhepaṃ padasañcāraṃ akāsīti attho.
ឧទ្ធតេ បាទេ បុប្ផានីតិ ចង្កមន្តេន បាទេ ឧទ្ធតេ បទុមុប្បលាទីនិ បុប្ផានិ បថវិតោ ឧគ្គន្ត្វា ចង្កមេ វិកិរិំសូតិ អត្ថោ។ សោភំ មុទ្ធនិ តិដ្ឋរេតិ ពុទ្ធស្ស មុទ្ធនិ សីសេ សោភយមានា តានិ តិដ្ឋន្តីតិ អត្ថោ។ សេសំ សុវិញ្ញេយ្យមេវាតិ។
Uddhate pāde pupphānīti caṅkamantena pāde uddhate padumuppalādīni pupphāni pathavito uggantvā caṅkame vikiriṃsūti attho. Sobhaṃ muddhani tiṭṭhareti buddhassa muddhani sīse sobhayamānā tāni tiṭṭhantīti attho. Sesaṃ suviññeyyamevāti.
មគ្គទត្តិកត្ថេរអបទានវណ្ណនា សមត្តា។
Maggadattikattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៦. មគ្គទត្តិកត្ថេរអបទានំ • 6. Maggadattikattheraapadānaṃ
