| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೮. ಮಾಗವಿಕಙ್ಗಪಞ್ಹೋ
8. Māgavikaṅgapañho
೮. ‘‘ಭನ್ತೇ ನಾಗಸೇನ, ‘ಮಾಗವಿಕಸ್ಸ ಚತ್ತಾರಿ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ಚತ್ತಾರಿ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಮಾಗವಿಕೋ ಅಪ್ಪಮಿದ್ಧೋ ಹೋತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಅಪ್ಪಮಿದ್ಧೇನ ಭವಿತಬ್ಬಂ। ಇದಂ, ಮಹಾರಾಜ, ಮಾಗವಿಕಸ್ಸ ಪಠಮಂ ಅಙ್ಗಂ ಗಹೇತಬ್ಬಂ।
8. ‘‘Bhante nāgasena, ‘māgavikassa cattāri aṅgāni gahetabbānī’ti yaṃ vadesi, katamāni tāni cattāri aṅgāni gahetabbānī’’ti? ‘‘Yathā, mahārāja, māgaviko appamiddho hoti, evameva kho, mahārāja, yoginā yogāvacarena appamiddhena bhavitabbaṃ. Idaṃ, mahārāja, māgavikassa paṭhamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಮಾಗವಿಕೋ ಮಿಗೇಸು ಯೇವ ಚಿತ್ತಂ ಉಪನಿಬನ್ಧತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಆರಮ್ಮಣೇಸು ಯೇವ ಚಿತ್ತಂ ಉಪನಿಬನ್ಧಿತಬ್ಬಂ। ಇದಂ, ಮಹಾರಾಜ, ಮಾಗವಿಕಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, māgaviko migesu yeva cittaṃ upanibandhati, evameva kho, mahārāja, yoginā yogāvacarena ārammaṇesu yeva cittaṃ upanibandhitabbaṃ. Idaṃ, mahārāja, māgavikassa dutiyaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಮಾಗವಿಕೋ ಕಾಲಂ ಕಮ್ಮಸ್ಸ ಜಾನಾತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಪಟಿಸಲ್ಲಾನಸ್ಸ ಕಾಲೋ ಜಾನಿತಬ್ಬೋ ‘ಅಯಂ ಕಾಲೋ ಪಟಿಸಲ್ಲಾನಸ್ಸ, ಅಯಂ ಕಾಲೋ ನಿಕ್ಖಮನಾಯಾ’ತಿ। ಇದಂ, ಮಹಾರಾಜ, ಮಾಗವಿಕಸ್ಸ ತತಿಯಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, māgaviko kālaṃ kammassa jānāti, evameva kho, mahārāja, yoginā yogāvacarena paṭisallānassa kālo jānitabbo ‘ayaṃ kālo paṭisallānassa, ayaṃ kālo nikkhamanāyā’ti. Idaṃ, mahārāja, māgavikassa tatiyaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಮಾಗವಿಕೋ ಮಿಗಂ ದಿಸ್ವಾ ಹಾಸಮಭಿಜನೇತಿ ‘ಇಮಂ ಲಚ್ಛಾಮೀ’ತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಆರಮ್ಮಣೇ ಅಭಿರಮಿತಬ್ಬಂ, ಹಾಸಮಭಿಜನೇತಬ್ಬಂ ‘ಉತ್ತರಿಂ ವಿಸೇಸಮಧಿಗಚ್ಛಿಸ್ಸಾಮೀ’ತಿ। ಇದಂ, ಮಹಾರಾಜ, ಮಾಗವಿಕಸ್ಸ ಚತುತ್ಥಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ ಮಹಾರಾಜ ಥೇರೇನ ಮೋಘರಾಜೇನ –
‘‘Puna caparaṃ, mahārāja, māgaviko migaṃ disvā hāsamabhijaneti ‘imaṃ lacchāmī’ti, evameva kho, mahārāja, yoginā yogāvacarena ārammaṇe abhiramitabbaṃ, hāsamabhijanetabbaṃ ‘uttariṃ visesamadhigacchissāmī’ti. Idaṃ, mahārāja, māgavikassa catutthaṃ aṅgaṃ gahetabbaṃ. Bhāsitampetaṃ mahārāja therena mogharājena –
‘‘‘ಆರಮ್ಮಣೇ ಲಭಿತ್ವಾನ, ಪಹಿತತ್ತೇನ ಭಿಕ್ಖುನಾ।
‘‘‘Ārammaṇe labhitvāna, pahitattena bhikkhunā;
ಭಿಯ್ಯೋ ಹಾಸೋ ಜನೇತಬ್ಬೋ, ಅಧಿಗಚ್ಛಿಸ್ಸಾಮಿ ಉತ್ತರಿ’’’ನ್ತಿ॥
Bhiyyo hāso janetabbo, adhigacchissāmi uttari’’’nti.
ಮಾಗವಿಕಙ್ಗಪಞ್ಹೋ ಅಟ್ಠಮೋ।
Māgavikaṅgapañho aṭṭhamo.
