| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೯. ಬಾಳಿಸಿಕಙ್ಗಪಞ್ಹೋ
9. Bāḷisikaṅgapañho
೯. ‘‘ಭನ್ತೇ ನಾಗಸೇನ, ‘ಬಾಳಿಸಿಕಸ್ಸ ದ್ವೇ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ದ್ವೇ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಬಾಳಿಸಿಕೋ ಬಳಿಸೇನ ಮಚ್ಛೇ ಉದ್ಧರತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಞಾಣೇನ ಉತ್ತರಿಂ ಸಾಮಞ್ಞಫಲಾನಿ ಉದ್ಧರಿತಬ್ಬಾನಿ। ಇದಂ, ಮಹಾರಾಜ, ಬಾಳಿಸಿಕಸ್ಸ ಪಠಮಂ ಅಙ್ಗಂ ಗಹೇತಬ್ಬಂ।
9. ‘‘Bhante nāgasena, ‘bāḷisikassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, bāḷisiko baḷisena macche uddharati, evameva kho, mahārāja, yoginā yogāvacarena ñāṇena uttariṃ sāmaññaphalāni uddharitabbāni. Idaṃ, mahārāja, bāḷisikassa paṭhamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಬಾಳಿಸಿಕೋ ಪರಿತ್ತಕಂ ವಧಿತ್ವಾ ವಿಪುಲಂ ಲಾಭಮಧಿಗಚ್ಛತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಪರಿತ್ತಲೋಕಾಮಿಸಮತ್ತಂ ಪರಿಚ್ಚಜಿತಬ್ಬಂ। ಲೋಕಾಮಿಸಮತ್ತಂ, ಮಹಾರಾಜ, ಪರಿಚ್ಚಜಿತ್ವಾ ಯೋಗೀ ಯೋಗಾವಚರೋ ವಿಪುಲಂ ಸಾಮಞ್ಞಫಲಂ ಅಧಿಗಚ್ಛತಿ। ಇದಂ, ಮಹಾರಾಜ, ಬಾಳಿಸಿಕಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ರಾಹುಲೇನ –
‘‘Puna caparaṃ, mahārāja, bāḷisiko parittakaṃ vadhitvā vipulaṃ lābhamadhigacchati, evameva kho, mahārāja, yoginā yogāvacarena parittalokāmisamattaṃ pariccajitabbaṃ. Lokāmisamattaṃ, mahārāja, pariccajitvā yogī yogāvacaro vipulaṃ sāmaññaphalaṃ adhigacchati. Idaṃ, mahārāja, bāḷisikassa dutiyaṃ aṅgaṃ gahetabbaṃ. Bhāsitampetaṃ, mahārāja, therena rāhulena –
‘‘‘ಸುಞ್ಞತಞ್ಚಾನಿಮಿತ್ತಞ್ಚ, ವಿಮೋಕ್ಖಞ್ಚಾಪ್ಪಣಿಹಿತಂ।
‘‘‘Suññatañcānimittañca, vimokkhañcāppaṇihitaṃ;
ಚತುರೋ ಫಲೇ ಛಳಭಿಞ್ಞಾ, ಚಜಿತ್ವಾ ಲೋಕಾಮಿಸಂ ಲಭೇ’’’ತಿ॥
Caturo phale chaḷabhiññā, cajitvā lokāmisaṃ labhe’’’ti.
ಬಾಳಿಸಿಕಙ್ಗಪಞ್ಹೋ ನವಮೋ।
Bāḷisikaṅgapañho navamo.
