| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၉. မစ္ဆရိသုတ္တဝဏ္ဏနာ
9. Maccharisuttavaṇṇanā
၄၉. နဝမေ မစ္ဆရိနောတိ မစ္ဆေရေန သမန္နာဂတာ။ ဧကစ္စော ဟိ အတ္တနော ဝသနဋ္ဌာနေ ဘိက္ခုံ ဟတ္ထံ ပသာရေတ္ဝာပိ န ဝန္ဒတိ, အညတ္ထ ဂတော ဝိဟာရံ ပဝိသိတ္ဝာ သက္ကစ္စံ ဝန္ဒိတ္ဝာ မဓုရပဋိသန္ထာရံ ကရောတိ – ‘‘ဘန္တေ, အမ္ဟာကံ ဝသနဋ္ဌာနံ နာဂစ္ဆထ, သမ္ပန္နော ပဒေသော, ပဋိဗလာ မယံ အယ္ယာနံ ယာဂုဘတ္တာဒီဟိ ဥပဋ္ဌာနံ ကာတု’’န္တိ။ ဘိက္ခူ ‘‘သဒ္ဓော အယံ ဥပာသကော’’တိ ယာဂုဘတ္တာဒီဟိ သင္ဂဏ္ဟန္တိ။ အထေကော ထေရော တသ္သ ဂာမံ ဂန္တ္ဝာ ပိဏ္ဍာယ စရတိ။ သော တံ ဒိသ္ဝာ အညေန ဝာ ဂစ္ဆတိ, ဃရံ ဝာ ပဝိသတိ။ သစေပိ သမ္မုခီဘာဝံ အာဂစ္ဆတိ, ဟတ္ထေန ဝန္ဒိတ္ဝာ – ‘‘အယ္ယသ္သ ဘိက္ခံ ဒေထ, အဟံ ဧကေန ကမ္မေန ဂစ္ဆာမီ’’တိ ပက္ကမတိ။ ထေရော သကလဂာမံ စရိတ္ဝာ တုစ္ဆပတ္တောဝ နိက္ခမတိ။ ဣဒံ တာဝ မုဒုမစ္ဆရိယံ နာမ, ယေန သမန္နာဂတော အဒာယကောပိ ဒာယကော ဝိယ ပညာယတိ။ ဣဓ ပန ထဒ္ဓမစ္ဆရိယံ အဓိပ္ပေတံ, ယေန သမန္နာဂတော ဘိက္ခူသု ပိဏ္ဍာယ ပဝိဋ္ဌေသု, ‘‘ထေရာ ဌိတာ’’တိ ဝုတ္တေ, ‘‘ကိံ မယ္ဟံ ပာဒာ ရုဇ္ဇန္တီ’’တိအာဒီနိ ဝတ္ဝာ သိလာထမ္ဘော ဝိယ ခာဏုကော ဝိယ စ ထဒ္ဓော ဟုတ္ဝာ တိဋ္ဌတိ, သာမီစိမ္ပိ န ကရောတိ။ ကဒရိယာတိ ဣဒံ မစ္ဆရိနောတိ ပဒသ္သေဝ ဝေဝစနံ။ မုဒုကမ္ပိ ဟိ မစ္ဆရိယံ ‘‘မစ္ဆရိယ’’န္တေဝ ဝုစ္စတိ, ထဒ္ဓံ ပန ကဒရိယံ နာမ။ ပရိဘာသကာတိ ဘိက္ခူ ဃရဒ္ဝာရေ ဌိတေ ဒိသ္ဝာ, ‘‘ကိံ တုမ္ဟေ ကသိတ္ဝာ အာဂတာ, ဝပိတ္ဝာ, လာယိတ္ဝာ? မယံ အတ္တနောပိ န လဘာမ, ကုတော တုမ္ဟာကံ, သီဃံ နိက္ခမထာ’’တိအာဒီဟိ သံတဇ္ဇကာ။ အန္တရာယကရာတိ ဒာယကသ္သ သဂ္ဂန္တရာယော, ပဋိဂ္ဂာဟကာနံ လာဘန္တရာယော, အတ္တနော ဥပဃာတောတိ ဣမေသံ အန္တရာယာနံ ကာရကာ။
49. Navame maccharinoti maccherena samannāgatā. Ekacco hi attano vasanaṭṭhāne bhikkhuṃ hatthaṃ pasāretvāpi na vandati, aññattha gato vihāraṃ pavisitvā sakkaccaṃ vanditvā madhurapaṭisanthāraṃ karoti – ‘‘bhante, amhākaṃ vasanaṭṭhānaṃ nāgacchatha, sampanno padeso, paṭibalā mayaṃ ayyānaṃ yāgubhattādīhi upaṭṭhānaṃ kātu’’nti. Bhikkhū ‘‘saddho ayaṃ upāsako’’ti yāgubhattādīhi saṅgaṇhanti. Atheko thero tassa gāmaṃ gantvā piṇḍāya carati. So taṃ disvā aññena vā gacchati, gharaṃ vā pavisati. Sacepi sammukhībhāvaṃ āgacchati, hatthena vanditvā – ‘‘ayyassa bhikkhaṃ detha, ahaṃ ekena kammena gacchāmī’’ti pakkamati. Thero sakalagāmaṃ caritvā tucchapattova nikkhamati. Idaṃ tāva mudumacchariyaṃ nāma, yena samannāgato adāyakopi dāyako viya paññāyati. Idha pana thaddhamacchariyaṃ adhippetaṃ, yena samannāgato bhikkhūsu piṇḍāya paviṭṭhesu, ‘‘therā ṭhitā’’ti vutte, ‘‘kiṃ mayhaṃ pādā rujjantī’’tiādīni vatvā silāthambho viya khāṇuko viya ca thaddho hutvā tiṭṭhati, sāmīcimpi na karoti. Kadariyāti idaṃ maccharinoti padasseva vevacanaṃ. Mudukampi hi macchariyaṃ ‘‘macchariya’’nteva vuccati, thaddhaṃ pana kadariyaṃ nāma. Paribhāsakāti bhikkhū gharadvāre ṭhite disvā, ‘‘kiṃ tumhe kasitvā āgatā, vapitvā, lāyitvā? Mayaṃ attanopi na labhāma, kuto tumhākaṃ, sīghaṃ nikkhamathā’’tiādīhi saṃtajjakā. Antarāyakarāti dāyakassa saggantarāyo, paṭiggāhakānaṃ lābhantarāyo, attano upaghātoti imesaṃ antarāyānaṃ kārakā.
သမ္ပရာယောတိ ပရလောကော။ ရတီတိ ပဉ္စကာမဂုဏရတိ။ ခိဍ္ဍာတိ ကာယိကခိဍ္ဍာဒိကာ တိဝိဓာ ခိဍ္ဍာ။ ဒိဋ္ဌေ ဓမ္မေသ ဝိပာကောတိ တသ္မိံ နိဗ္ဗတ္တဘဝနေ ဒိဋ္ဌေ ဓမ္မေ ဧသ ဝိပာကော။ သမ္ပရာယေ စ ဒုဂ္ဂတီတိ ‘‘ယမလောကံ ဥပပဇ္ဇရေ’’တိ ဝုတ္တေ သမ္ပရာယေ စ ဒုဂ္ဂတိ။
Samparāyoti paraloko. Ratīti pañcakāmaguṇarati. Khiḍḍāti kāyikakhiḍḍādikā tividhā khiḍḍā. Diṭṭhe dhammesa vipākoti tasmiṃ nibbattabhavane diṭṭhe dhamme esa vipāko. Samparāye ca duggatīti ‘‘yamalokaṃ upapajjare’’ti vutte samparāye ca duggati.
ဝဒညူတိ ဘိက္ခူ ဃရဒ္ဝာရေ ဌိတာ ကိဉ္စာပိ တုဏ္ဟီဝ ဟောန္တိ, အတ္ထတော ပန – ‘‘ဘိက္ခံ ဒေထာ’’တိ ဝဒန္တိ နာမ။ တတ္ရ ယေ ‘‘မယံ ပစာမ, ဣမေ ပန န ပစန္တိ, ပစမာနေ ပတ္ဝာ အလဘန္တာ ကုဟိံ လဘိသ္သန္တီ’’တိ? ဒေယ္ယဓမ္မံ သံဝိဘဇန္တိ, တေ ဝဒညူ နာမ။ ပကာသန္တီတိ ဝိမာနပ္ပဘာယ ဇောတန္တိ။ ပရသမ္ဘတေသူတိ ပရေဟိ သမ္ပိဏ္ဍိတေသု။ သမ္ပရာယေ စ သုဂ္ဂတီတိ, ‘‘ဧတေ သဂ္ဂာ’’တိ ဧဝံ ဝုတ္တသမ္ပရာယေ သုဂတိ။ ဥဘိန္နမ္ပိ ဝာ ဧတေသံ တတော စဝိတ္ဝာ ပုန သမ္ပရာယေပိ ဒုဂ္ဂတိသုဂတိယေဝ ဟောတီတိ။ နဝမံ။
Vadaññūti bhikkhū gharadvāre ṭhitā kiñcāpi tuṇhīva honti, atthato pana – ‘‘bhikkhaṃ dethā’’ti vadanti nāma. Tatra ye ‘‘mayaṃ pacāma, ime pana na pacanti, pacamāne patvā alabhantā kuhiṃ labhissantī’’ti? Deyyadhammaṃ saṃvibhajanti, te vadaññū nāma. Pakāsantīti vimānappabhāya jotanti. Parasambhatesūti parehi sampiṇḍitesu. Samparāye ca suggatīti, ‘‘ete saggā’’ti evaṃ vuttasamparāye sugati. Ubhinnampi vā etesaṃ tato cavitvā puna samparāyepi duggatisugatiyeva hotīti. Navamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၉. မစ္ဆရိသုတ္တံ • 9. Maccharisuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၉. မစ္ဆရိသုတ္တဝဏ္ဏနာ • 9. Maccharisuttavaṇṇanā
