| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
14. லோகவாத³படிஸங்யுத்ததி³ட்டி²னித்³தே³ஸவண்ணனா
14. Lokavādapaṭisaṃyuttadiṭṭhiniddesavaṇṇanā
147. அத்தா ச லோகோ சாதி ஸோ ஏவ அத்தா ச ஆலோகனட்டே²ன லோகோ சாதி அத்தோ². ஸஸ்ஸதோதி ஸஸ்ஸதவாதா³னங் தி³ட்டி². அஸஸ்ஸதோதி உச்சே²த³வாதா³னங். ஸஸ்ஸதோ ச அஸஸ்ஸதோ சாதி ஏகச்சஸஸ்ஸதிகானங். நேவ ஸஸ்ஸதோ நாஸஸ்ஸதோதி அமராவிக்கே²பிகானங். அந்தவாதி பரித்தகஸிணலாபீ⁴னங் தக்கிகானஞ்ச நிக³ண்டா²ஜீவிகானஞ்ச. அத² வா உச்சே²த³வாதி³னோ ‘‘ஸத்தோ ஜாதியா புப்³ப³ந்தவா, மரணேன அபரந்தவா’’தி வத³ந்தி. அதி⁴ச்சஸமுப்பன்னிகா ‘‘ஸத்தோ ஜாதியா புப்³ப³ந்தவா’’தி வத³ந்தி. அனந்தவாதி அப்பமாணகஸிணலாபீ⁴னங். ஸஸ்ஸதவாதி³னோ பன ‘‘புப்³ப³ந்தாபரந்தா நத்தி², தேன அனந்தவா’’தி வத³ந்தி. அதி⁴ச்சஸமுப்பன்னிகா ‘‘அபரந்தேன அனந்தவா’’தி வத³ந்தி.
147.Attā ca loko cāti so eva attā ca ālokanaṭṭhena loko cāti attho. Sassatoti sassatavādānaṃ diṭṭhi. Asassatoti ucchedavādānaṃ. Sassato ca asassato cāti ekaccasassatikānaṃ. Neva sassato nāsassatoti amarāvikkhepikānaṃ. Antavāti parittakasiṇalābhīnaṃ takkikānañca nigaṇṭhājīvikānañca. Atha vā ucchedavādino ‘‘satto jātiyā pubbantavā, maraṇena aparantavā’’ti vadanti. Adhiccasamuppannikā ‘‘satto jātiyā pubbantavā’’ti vadanti. Anantavāti appamāṇakasiṇalābhīnaṃ. Sassatavādino pana ‘‘pubbantāparantā natthi, tena anantavā’’ti vadanti. Adhiccasamuppannikā ‘‘aparantena anantavā’’ti vadanti.
அந்தவா ச அனந்தவா சாதி உத்³த⁴மதோ⁴ அவட்³டி⁴த்வா திரியங் வட்³டி⁴தகஸிணானங். நேவ அந்தவா ந அனந்தவாதி அமராவிக்கே²பிகானங்.
Antavāca anantavā cāti uddhamadho avaḍḍhitvā tiriyaṃ vaḍḍhitakasiṇānaṃ. Neva antavā na anantavāti amarāvikkhepikānaṃ.
லோகவாத³படிஸங்யுத்ததி³ட்டி²னித்³தே³ஸவண்ணனா நிட்டி²தா.
Lokavādapaṭisaṃyuttadiṭṭhiniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 14. லோகவாத³படிஸங்யுத்ததி³ட்டி²னித்³தே³ஸோ • 14. Lokavādapaṭisaṃyuttadiṭṭhiniddeso
