| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
15-16. ப⁴வவிப⁴வதி³ட்டி²னித்³தே³ஸவண்ணனா
15-16. Bhavavibhavadiṭṭhiniddesavaṇṇanā
148. ப⁴வவிப⁴வதி³ட்டீ²னங் யதா²வுத்ததி³ட்டி²தோ விஸுங் அபி⁴னிவேஸாபா⁴வதோ விஸுங் நித்³தே³ஸங் அகத்வா யதா²வுத்ததி³ட்டீ²னங்யேவ வஸேன ‘‘ஓலீயனங் அதிதா⁴வன’’ந்தி ஏகேகங் ஆகாரங் நித்³தி³ஸிதுங் புச்ச²ங் அகத்வா ச ஓலீயனாபி⁴னிவேஸோ ப⁴வதி³ட்டி², அதிதா⁴வனாபி⁴னிவேஸோ விப⁴வதி³ட்டீ²தி ஆஹ. தத்த² ‘‘ப⁴வனிரோதா⁴ய த⁴ம்மே தே³ஸியமானே சித்தங் ந பக்க²ந்த³தீ’’தி (இதிவு॰ 49) வுத்தஓலீயனாபி⁴னிவேஸோ, ஸஸ்ஸதஸஞ்ஞாய நிப்³பா³னதோ ஸங்கோசனாபி⁴னிவேஸோதி அத்தோ². ‘‘ப⁴வேனேவ கோ² பனேகே அட்டீயமானா ஹராயமானா ஜிகு³ச்ச²மானா விப⁴வங் அபி⁴னந்த³ந்தீ’’தி வுத்தஅதிதா⁴வனாபி⁴னிவேஸோ, உச்சே²த³ஸஞ்ஞாய நிரோத⁴கா³மினிபடிபதா³திக்கமனாபி⁴னிவேஸோதி அத்தோ².
148. Bhavavibhavadiṭṭhīnaṃ yathāvuttadiṭṭhito visuṃ abhinivesābhāvato visuṃ niddesaṃ akatvā yathāvuttadiṭṭhīnaṃyeva vasena ‘‘olīyanaṃ atidhāvana’’nti ekekaṃ ākāraṃ niddisituṃ pucchaṃ akatvā ca olīyanābhiniveso bhavadiṭṭhi, atidhāvanābhiniveso vibhavadiṭṭhīti āha. Tattha ‘‘bhavanirodhāya dhamme desiyamāne cittaṃ na pakkhandatī’’ti (itivu. 49) vuttaolīyanābhiniveso, sassatasaññāya nibbānato saṅkocanābhinivesoti attho. ‘‘Bhaveneva kho paneke aṭṭīyamānā harāyamānā jigucchamānā vibhavaṃ abhinandantī’’ti vuttaatidhāvanābhiniveso, ucchedasaññāya nirodhagāminipaṭipadātikkamanābhinivesoti attho.
இதா³னி தாவ ப⁴வவிப⁴வதி³ட்டி²யோ ஸப்³ப³தி³ட்டீ²ஸு யோஜெத்வா த³ஸ்ஸேதுங் அஸ்ஸாத³தி³ட்டி²யாதிஆதி³மாஹ. தத்த² யஸ்மா அஸ்ஸாத³தி³ட்டி²கா ஸஸ்ஸதங் வா உச்சே²த³ங் வா நிஸ்ஸாய ‘‘நத்தி² காமேஸு தோ³ஸோ’’தி க³ண்ஹந்தி, தஸ்மா பஞ்சதிங்ஸாகாராபி அஸ்ஸாத³தி³ட்டி²யோ ஸியா ப⁴வதி³ட்டி²யோ, ஸியா விப⁴வதி³ட்டி²யோதி வுத்தா. தத்த² யஸ்மா ஏகேகாபி தி³ட்டி²யோ ஸஸ்ஸதக்³கா³ஹவஸேன ப⁴வதி³ட்டி²யோ ப⁴வெய்யுங், உச்சே²த³க்³கா³ஹவஸேன விப⁴வதி³ட்டி²யோ ப⁴வெய்யுந்தி அத்தோ². அத்தானுதி³ட்டி²யா ரூபங் அத்ததோ ஸமனுபஸ்ஸதி, வேத³னங்… ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதீதி பஞ்சஸு ரூபாதி³தோ அத்தனோ அனஞ்ஞத்தா தேஸு உச்சி²ன்னேஸு அத்தா உச்சி²ன்னோதி க³ஹணதோ பஞ்ச விப⁴வதி³ட்டி²யோதி வுத்தங். ஸேஸேஸு பஞ்சத³ஸஸு டா²னேஸு ரூபாதி³தோ அத்தனோ அஞ்ஞத்தா தேஸு உச்சி²ன்னேஸுபி ‘‘அத்தா ஸஸ்ஸதோதி க³ஹணதோ பன்னரஸ ப⁴வதி³ட்டி²யோதி வுத்தங்.
Idāni tāva bhavavibhavadiṭṭhiyo sabbadiṭṭhīsu yojetvā dassetuṃ assādadiṭṭhiyātiādimāha. Tattha yasmā assādadiṭṭhikā sassataṃ vā ucchedaṃ vā nissāya ‘‘natthi kāmesu doso’’ti gaṇhanti, tasmā pañcatiṃsākārāpi assādadiṭṭhiyo siyā bhavadiṭṭhiyo, siyā vibhavadiṭṭhiyoti vuttā. Tattha yasmā ekekāpi diṭṭhiyo sassataggāhavasena bhavadiṭṭhiyo bhaveyyuṃ, ucchedaggāhavasena vibhavadiṭṭhiyo bhaveyyunti attho. Attānudiṭṭhiyā rūpaṃ attato samanupassati, vedanaṃ… saññaṃ… saṅkhāre… viññāṇaṃ attato samanupassatīti pañcasu rūpādito attano anaññattā tesu ucchinnesu attā ucchinnoti gahaṇato pañca vibhavadiṭṭhiyoti vuttaṃ. Sesesu pañcadasasu ṭhānesu rūpādito attano aññattā tesu ucchinnesupi ‘‘attā sassatoti gahaṇato pannarasa bhavadiṭṭhiyoti vuttaṃ.
மிச்சா²தி³ட்டி²யா ‘‘ஸப்³பா³வ தா விப⁴வதி³ட்டி²யோ’’தி உச்சே²த³வஸேன பவத்தத்தா அந்தவானந்தவாதி³ட்டீ²ஸு பரித்தாரம்மணஅப்பமாணாரம்மணஜா²னலாபி⁴னோ தி³ப்³ப³சக்கு²னா ரூபதா⁴துயா சவித்வா ஸத்தே அஞ்ஞத்த² உபபன்னே பஸ்ஸித்வா ப⁴வதி³ட்டி²ங் அபஸ்ஸித்வா விப⁴வதி³ட்டி²ங் க³ண்ஹந்தி. தஸ்மா தத்த² ஸியா ப⁴வதி³ட்டி²யோ, ஸியா விப⁴வதி³ட்டி²யோதி வுத்தங். ஹோதி ச ந ச ஹோதீதி எத்த² ஹோதி சாதி ப⁴வதி³ட்டி², ந ச ஹோதீதி விப⁴வதி³ட்டி². நேவ ஹோதி ந ந ஹோதீதி எத்த² நேவ ஹோதீதி விப⁴வதி³ட்டி², ந ந ஹோதீதி ப⁴வதி³ட்டி². தஸ்மா தத்த² ‘‘ஸியா’’தி வுத்தங்.
Micchādiṭṭhiyā ‘‘sabbāva tā vibhavadiṭṭhiyo’’ti ucchedavasena pavattattā antavānantavādiṭṭhīsu parittārammaṇaappamāṇārammaṇajhānalābhino dibbacakkhunā rūpadhātuyā cavitvā satte aññattha upapanne passitvā bhavadiṭṭhiṃ apassitvā vibhavadiṭṭhiṃ gaṇhanti. Tasmā tattha siyā bhavadiṭṭhiyo, siyāvibhavadiṭṭhiyoti vuttaṃ. Hoti ca na ca hotīti ettha hoti cāti bhavadiṭṭhi, na ca hotīti vibhavadiṭṭhi. Neva hoti na na hotīti ettha neva hotīti vibhavadiṭṭhi, na na hotīti bhavadiṭṭhi. Tasmā tattha ‘‘siyā’’ti vuttaṃ.
புப்³ப³ந்தானுதி³ட்டி²யா ஏகச்சஸஸ்ஸதிகா ஸஸ்ஸதஞ்ச பஞ்ஞபெந்தி, அஸஸ்ஸதஞ்ச பஞ்ஞபெந்தி. தஸ்மா ஸா ப⁴வதி³ட்டி² ச விப⁴வதி³ட்டி² ச ஹோதி. சத்தாரோ அந்தானந்திகா அந்தானந்தங் அத்தானங் பஞ்ஞபெந்தி . தஸ்மா ஸா அத்தானுதி³ட்டி²ஸதி³ஸா ப⁴வதி³ட்டி² ச விப⁴வதி³ட்டி² ச. சத்தாரோ அமராவிக்கே²பிகா ப⁴வதி³ட்டி²ங் வா விப⁴வதி³ட்டி²ங் வா நிஸ்ஸாய வாசாவிக்கே²பங் ஆபஜ்ஜந்தி, அவஸேஸா பன ப⁴வதி³ட்டி²யோவ. தஸ்மா தே தே ஸந்தா⁴ய ‘‘ஸியா’’தி வுத்தங். அபரந்தானுதி³ட்டி²யா ஸத்த உச்சே²த³வாதா³ விப⁴வதி³ட்டி²யோ, அவஸேஸா ப⁴வதி³ட்டி²யோ. தஸ்மா தே தே ஸந்தா⁴ய ‘‘ஸியா’’தி வுத்தங். ஸஞ்ஞோஜனிகதி³ட்டி²யா ஸப்³ப³தி³ட்டீ²னங் வஸேன ‘‘ஸியா’’தி வுத்தங். அஹந்தி மானவினிப³ந்தா⁴ய தி³ட்டி²யா சக்கா²தீ³னங் அஹந்தி க³ஹிதத்தா தேஸங் வினாஸே அத்தா வினட்டோ² ஹோதீதி ஸப்³பா³வ தா விப⁴வதி³ட்டி²யோதி வுத்தங். அத்தானுதி³ட்டி²யோ விய மமந்தி மானவினிப³ந்தா⁴ய தி³ட்டி²யா சக்கா²தி³தோ அத்தனோ அஞ்ஞத்தா தேஸங் வினாஸேபி அத்தா ந வினஸ்ஸதீதி ஸப்³பா³வ தா ப⁴வதி³ட்டி²யோதி வுத்தங். லோகவாத³படிஸங்யுத்தாய தி³ட்டி²யா ‘‘ஸஸ்ஸதோ அத்தா ச லோகோ சா’’திஆதி³னா (படி॰ ம॰ 1.147) நயேன வுத்தத்தா ப⁴வவிப⁴வதி³ட்டி² பாகடாயேவ. எத்தாவதா அஸ்ஸாத³தி³ட்டா²தி³கா விப⁴வதி³ட்டி²பரியோஸானா ஸோளஸ தி³ட்டி²யோ தீணிஸதஞ்ச தி³ட்டா²பி⁴னிவேஸா நித்³தி³ட்டா² ஹொந்தி. அத்தானுதி³ட்டி² ச ஸக்காயதி³ட்டி² ச அத்தவாத³படிஸஞ்ஞுத்தா தி³ட்டி² ச அத்த²தோ ஏகா பரியாயேன திவிதா⁴ வுத்தா. ஸஞ்ஞோஜனிகா பன தி³ட்டி² அவத்தா²பே⁴தே³ன ஸப்³பா³பி தி³ட்டி²யோ ஹொந்தி.
Pubbantānudiṭṭhiyā ekaccasassatikā sassatañca paññapenti, asassatañca paññapenti. Tasmā sā bhavadiṭṭhi ca vibhavadiṭṭhi ca hoti. Cattāro antānantikā antānantaṃ attānaṃ paññapenti . Tasmā sā attānudiṭṭhisadisā bhavadiṭṭhi ca vibhavadiṭṭhi ca. Cattāro amarāvikkhepikā bhavadiṭṭhiṃ vā vibhavadiṭṭhiṃ vā nissāya vācāvikkhepaṃ āpajjanti, avasesā pana bhavadiṭṭhiyova. Tasmā te te sandhāya ‘‘siyā’’ti vuttaṃ. Aparantānudiṭṭhiyā satta ucchedavādā vibhavadiṭṭhiyo, avasesā bhavadiṭṭhiyo. Tasmā te te sandhāya ‘‘siyā’’ti vuttaṃ. Saññojanikadiṭṭhiyā sabbadiṭṭhīnaṃ vasena ‘‘siyā’’ti vuttaṃ. Ahanti mānavinibandhāya diṭṭhiyā cakkhādīnaṃ ahanti gahitattā tesaṃ vināse attā vinaṭṭho hotīti sabbāva tā vibhavadiṭṭhiyoti vuttaṃ. Attānudiṭṭhiyo viya mamanti mānavinibandhāya diṭṭhiyā cakkhādito attano aññattā tesaṃ vināsepi attā na vinassatīti sabbāva tā bhavadiṭṭhiyoti vuttaṃ. Lokavādapaṭisaṃyuttāya diṭṭhiyā ‘‘sassato attā ca loko cā’’tiādinā (paṭi. ma. 1.147) nayena vuttattā bhavavibhavadiṭṭhi pākaṭāyeva. Ettāvatā assādadiṭṭhādikā vibhavadiṭṭhipariyosānā soḷasa diṭṭhiyo tīṇisatañca diṭṭhābhinivesā niddiṭṭhā honti. Attānudiṭṭhi ca sakkāyadiṭṭhi ca attavādapaṭisaññuttā diṭṭhi ca atthato ekā pariyāyena tividhā vuttā. Saññojanikā pana diṭṭhi avatthābhedena sabbāpi diṭṭhiyo honti.
இதா³னி ஸப்³பா³வ தா தி³ட்டி²யோ அஸ்ஸாத³தி³ட்டி²யோதிஆதி³ அஞ்ஞேன பரியாயேன யதா²யோக³ங் தி³ட்டி²ஸங்ஸந்த³னா. தத்த² ஸப்³பா³வ தா தி³ட்டி²யோதி யதா²வுத்தா அனவஸேஸா தி³ட்டி²யோ. தி³ட்டி²ராக³ரத்தத்தா தண்ஹாஸ்ஸாத³னிஸ்ஸிதத்தா ச அஸ்ஸாத³தி³ட்டி²யோ, அத்தஸினேஹானுக³தத்தா அத்தானுதி³ட்டி²யோ, விபரீதத³ஸ்ஸனத்தா மிச்சா²தி³ட்டி²யோ, க²ந்த⁴வத்து²கத்தா ஸக்காயதி³ட்டி²யோ, ஏகேகஸ்ஸ அந்தஸ்ஸ க³ஹிதத்தா அந்தக்³கா³ஹிகா தி³ட்டி²யோ, அனத்த²ஸங்யோஜனிகத்தா ஸஞ்ஞோஜனிகா தி³ட்டி²யோ, அத்தவாதே³ன யுத்தத்தா அத்தவாத³படிஸங்யுத்தா தி³ட்டி²யோதி இமா ஸத்த தி³ட்டி²யோ ஸப்³ப³தி³ட்டி²ஸங்கா³ஹிகா, ஸேஸா பன நவ தி³ட்டி²யோ ந ஸப்³ப³தி³ட்டி²ஸங்கா³ஹிகா.
Idāni sabbāva tā diṭṭhiyo assādadiṭṭhiyotiādi aññena pariyāyena yathāyogaṃ diṭṭhisaṃsandanā. Tattha sabbāva tā diṭṭhiyoti yathāvuttā anavasesā diṭṭhiyo. Diṭṭhirāgarattattā taṇhāssādanissitattā ca assādadiṭṭhiyo, attasinehānugatattā attānudiṭṭhiyo, viparītadassanattā micchādiṭṭhiyo, khandhavatthukattā sakkāyadiṭṭhiyo, ekekassa antassa gahitattā antaggāhikā diṭṭhiyo, anatthasaṃyojanikattā saññojanikā diṭṭhiyo, attavādena yuttattā attavādapaṭisaṃyuttādiṭṭhiyoti imā satta diṭṭhiyo sabbadiṭṭhisaṅgāhikā, sesā pana nava diṭṭhiyo na sabbadiṭṭhisaṅgāhikā.
இதா³னி வித்தா²ரதோ வுத்தா ஸப்³பா³வ தா தி³ட்டி²யோ த்³வீஸுயேவ தி³ட்டீ²ஸு ஸங்கி²பித்வா ஸத்தானங் தி³ட்டி²த்³வயனிஸ்ஸயங் த³ஸ்ஸெந்தோ ப⁴வஞ்ச தி³ட்டி²ந்திகா³த²மாஹ. ஸப்³பா³பி ஹி தா தி³ட்டி²யோ ப⁴வதி³ட்டீ² வா ஹொந்தி விப⁴வதி³ட்டீ² வா. ப⁴வஞ்ச தி³ட்டி²ங் விப⁴வஞ்ச தி³ட்டி²ந்தி எத்த² பன ச-ஸத்³தோ³ தி³ட்டி²மேவ ஸமுச்சினோதி, ந நிஸ்ஸயங். ந ஹி ஏகோ ப⁴வவிப⁴வதி³ட்டி²த்³வயங் நிஸ்ஸயதி. யதா²ஹ – ‘‘இதி ப⁴வதி³ட்டி²ஸன்னிஸ்ஸிதா வா ஸத்தா ஹொந்தி விப⁴வதி³ட்டி²ஸன்னிஸ்ஸிதா வா’’தி (படி॰ ம॰ 1.113). தக்கிகாதி தக்கேன வத³ந்தீதி தக்கிகா. தே ஹி தி³ட்டி²க³திகா ஸபா⁴வபடிவேத⁴பஞ்ஞாய அபா⁴வா கேவலங் தக்கேன வத்தந்தி. யேபி ச ஜா²னலாபி⁴னோ அபி⁴ஞ்ஞாலாபி⁴னோ வா தி³ட்டி²ங் க³ண்ஹந்தி, தேபி தக்கெத்வா க³ஹணதோ தக்கிகா ஏவ. நிஸ்ஸிதாஸேதி நிஸ்ஸிதாதி அத்தோ². ஏகமேவ பத³ங், ‘‘ஸே’’தி நிபாதமத்தங் வா. தேஸங் நிரோத⁴ம்ஹி ந ஹத்தி² ஞாணந்தி தி³ட்டி²னிஸ்ஸயஸ்ஸ காரணவசனமேதங். ஸக்காயதி³ட்டி²னிரோதே⁴ நிப்³பா³னே யஸ்மா தேஸங் ஞாணங் நத்தி², தஸ்மா ஏதங் தி³ட்டி²த்³வயங் நிஸ்ஸிதாதி அத்தோ². ‘‘ந ஹி அத்தி² ஞாண’’ந்தி எத்த² ஹி-காரோ காரணோபதே³ஸே நிபாதோ. யத்தா²யங் லோகோ விபரீதஸஞ்ஞீதி யத்த² ஸுகே² நிரோத⁴ம்ஹி அயங் ஸதே³வகோ லோகோ ‘‘து³க்க²’’மிதி விபரீதஸஞ்ஞீ ஹோதி, தஸ்மிங் நிரோத⁴ம்ஹி ந ஹத்தி² ஞாணந்தி ஸம்ப³ந்தோ⁴. து³க்க²மிதி விபரீதஸஞ்ஞிதாய இத³ங் ஸுத்தங் –
Idāni vitthārato vuttā sabbāva tā diṭṭhiyo dvīsuyeva diṭṭhīsu saṅkhipitvā sattānaṃ diṭṭhidvayanissayaṃ dassento bhavañca diṭṭhintigāthamāha. Sabbāpi hi tā diṭṭhiyo bhavadiṭṭhī vā honti vibhavadiṭṭhī vā. Bhavañca diṭṭhiṃ vibhavañca diṭṭhinti ettha pana ca-saddo diṭṭhimeva samuccinoti, na nissayaṃ. Na hi eko bhavavibhavadiṭṭhidvayaṃ nissayati. Yathāha – ‘‘iti bhavadiṭṭhisannissitā vā sattā honti vibhavadiṭṭhisannissitā vā’’ti (paṭi. ma. 1.113). Takkikāti takkena vadantīti takkikā. Te hi diṭṭhigatikā sabhāvapaṭivedhapaññāya abhāvā kevalaṃ takkena vattanti. Yepi ca jhānalābhino abhiññālābhino vā diṭṭhiṃ gaṇhanti, tepi takketvā gahaṇato takkikā eva. Nissitāseti nissitāti attho. Ekameva padaṃ, ‘‘se’’ti nipātamattaṃ vā. Tesaṃ nirodhamhi na hatthi ñāṇanti diṭṭhinissayassa kāraṇavacanametaṃ. Sakkāyadiṭṭhinirodhe nibbāne yasmā tesaṃ ñāṇaṃ natthi, tasmā etaṃ diṭṭhidvayaṃ nissitāti attho. ‘‘Na hi atthi ñāṇa’’nti ettha hi-kāro kāraṇopadese nipāto. Yatthāyaṃ loko viparītasaññīti yattha sukhe nirodhamhi ayaṃ sadevako loko ‘‘dukkha’’miti viparītasaññī hoti, tasmiṃ nirodhamhi na hatthi ñāṇanti sambandho. Dukkhamiti viparītasaññitāya idaṃ suttaṃ –
‘‘ரூபா ஸத்³தா³ ரஸா க³ந்தா⁴, ப²ஸ்ஸா த⁴ம்மா ச கேவலா;
‘‘Rūpā saddā rasā gandhā, phassā dhammā ca kevalā;
இட்டா² கந்தா மனாபா ச, யாவதத்தீ²தி வுச்சதி.
Iṭṭhā kantā manāpā ca, yāvatatthīti vuccati.
‘‘ஸதே³வகஸ்ஸ லோகஸ்ஸ, ஏதே வோ ஸுக²ஸம்மதா;
‘‘Sadevakassa lokassa, ete vo sukhasammatā;
யத்த² சேதே நிருஜ்ஜ²ந்தி, தங் நேஸங் து³க்க²ஸம்மதங்.
Yattha cete nirujjhanti, taṃ nesaṃ dukkhasammataṃ.
‘‘ஸுக²ந்தி தி³ட்ட²மரியேஹி, ஸக்காயஸ்ஸுபரோத⁴னங்;
‘‘Sukhanti diṭṭhamariyehi, sakkāyassuparodhanaṃ;
பச்சனீகமித³ங் ஹோதி, ஸப்³ப³லோகேன பஸ்ஸதங்.
Paccanīkamidaṃ hoti, sabbalokena passataṃ.
‘‘யங் பரே ஸுக²தோ ஆஹு, தத³ரியா ஆஹு து³க்க²தோ;
‘‘Yaṃ pare sukhato āhu, tadariyā āhu dukkhato;
யங் பரே து³க்க²தோ ஆஹு, தத³ரியா ஸுக²தோ விதூ³.
Yaṃ pare dukkhato āhu, tadariyā sukhato vidū.
‘‘பஸ்ஸ த⁴ம்மங் து³ராஜானங், ஸம்பமூள்ஹெத்த²வித்³த³ஸு;
‘‘Passa dhammaṃ durājānaṃ, sampamūḷhetthaviddasu;
நிவுதானங் தமோ ஹோதி, அந்த⁴காரோ அபஸ்ஸதங்.
Nivutānaṃ tamo hoti, andhakāro apassataṃ.
‘‘ஸதஞ்ச விவடங் ஹோதி, ஆலோகோ பஸ்ஸதாமிவ;
‘‘Satañca vivaṭaṃ hoti, āloko passatāmiva;
ஸந்திகே ந விஜானந்தி, மகா³ த⁴ம்மஸ்ஸகோவிதா³.
Santike na vijānanti, magā dhammassakovidā.
‘‘ப⁴வராக³பரேதேஹி, ப⁴வஸோதானுஸாரிபி⁴;
‘‘Bhavarāgaparetehi, bhavasotānusāribhi;
மாரதெ⁴ய்யானுபன்னேஹி, நாயங் த⁴ம்மோ ஸுஸம்பு³தோ⁴.
Māradheyyānupannehi, nāyaṃ dhammo susambudho.
‘‘கோ நு அஞ்ஞத்ர அரியேபி⁴, பத³ங் ஸம்பு³த்³து⁴மரஹதி;
‘‘Ko nu aññatra ariyebhi, padaṃ sambuddhumarahati;
யங் பத³ங் ஸம்மத³ஞ்ஞாய, பரினிப்³ப³ந்தி அனாஸவா’’தி. (ஸு॰ நி॰ 764-771);
Yaṃ padaṃ sammadaññāya, parinibbanti anāsavā’’ti. (su. ni. 764-771);
149. இதா³னி ஸப்³பா³ஸங் தி³ட்டீ²னங் தி³ட்டி²த்³வயபா⁴வங் தி³ட்டி²ஸமுக்³கா⁴தகஞ்ச ஸம்மாதி³ட்டி²ங் ஸுத்ததோ த³ஸ்ஸேதுகாமோ, த்³வீஹி பி⁴க்க²வேதி ஸுத்தங் ஆஹரி. தத்த² தே³வாதி ப்³ரஹ்மானோபி வுச்சந்தி. ஓலீயந்தீதி ஸங்குசந்தி. அதிதா⁴வந்தீதி அதிக்கமித்வா க³ச்ச²ந்தி. சக்கு²மந்தோதி பஞ்ஞவந்தோ. ச-ஸத்³தோ³ அதிரேகத்தோ². ப⁴வாராமாதி ப⁴வோ ஆராமோ அபி⁴ரமட்டா²னங் ஏதேஸந்தி ப⁴வாராமா. ப⁴வரதாதி ப⁴வே அபி⁴ரதா. ப⁴வஸம்முதி³தாதி ப⁴வேன ஸந்துட்டா². தே³ஸியமானேதி ததா²க³தேன வா ததா²க³தஸாவகேன வா தே³ஸியமானே. ந பக்க²ந்த³தீதி த⁴ம்மதே³ஸனங் வா ப⁴வனிரோத⁴ங் வா ந பவிஸதி. ந பஸீத³தீதி தத்த² பஸாத³ங் ந பாபுணாதி. ந ஸந்திட்ட²தீதி தத்த² ந பதிட்டா²தி. நாதி⁴முச்சதீதி தத்த² க⁴னபா⁴வங் ந பாபுணாதி. எத்தாவதா ஸஸ்ஸததி³ட்டி² வுத்தா.
149. Idāni sabbāsaṃ diṭṭhīnaṃ diṭṭhidvayabhāvaṃ diṭṭhisamugghātakañca sammādiṭṭhiṃ suttato dassetukāmo, dvīhi bhikkhaveti suttaṃ āhari. Tattha devāti brahmānopi vuccanti. Olīyantīti saṅkucanti. Atidhāvantīti atikkamitvā gacchanti. Cakkhumantoti paññavanto. Ca-saddo atirekattho. Bhavārāmāti bhavo ārāmo abhiramaṭṭhānaṃ etesanti bhavārāmā. Bhavaratāti bhave abhiratā. Bhavasammuditāti bhavena santuṭṭhā. Desiyamāneti tathāgatena vā tathāgatasāvakena vā desiyamāne. Na pakkhandatīti dhammadesanaṃ vā bhavanirodhaṃ vā na pavisati. Na pasīdatīti tattha pasādaṃ na pāpuṇāti. Na santiṭṭhatīti tattha na patiṭṭhāti. Nādhimuccatīti tattha ghanabhāvaṃ na pāpuṇāti. Ettāvatā sassatadiṭṭhi vuttā.
அட்டீயமானாதி து³க்க²ங் பாபுணமானா. ஹராயமானாதி லஜ்ஜங் பாபுணமானா. ஜிகு³ச்ச²மானாதி ஜிகு³ச்ச²ங் பாபுணமானா. விப⁴வங் அபி⁴னந்த³ந்தீதி உச்சே²த³ங் படிச்ச துஸ்ஸந்தி, உச்சே²த³ங் பத்த²யந்தீதி வா அத்தோ². கிராதி அனுஸ்ஸவனத்தே² நிபாதோ. போ⁴தி ஆலபனமேதங். ஸந்தந்தி நிப்³பு³தங். பணீதந்தி து³க்கா²பா⁴வதோ பணீதங், பதா⁴னபா⁴வங் நீதந்தி வா பணீதங். யாதா²வந்தி யதா²ஸபா⁴வங். எத்தாவதா உச்சே²த³தி³ட்டி² வுத்தா.
Aṭṭīyamānāti dukkhaṃ pāpuṇamānā. Harāyamānāti lajjaṃ pāpuṇamānā. Jigucchamānāti jigucchaṃ pāpuṇamānā. Vibhavaṃ abhinandantīti ucchedaṃ paṭicca tussanti, ucchedaṃ patthayantīti vā attho. Kirāti anussavanatthe nipāto. Bhoti ālapanametaṃ. Santanti nibbutaṃ. Paṇītanti dukkhābhāvato paṇītaṃ, padhānabhāvaṃ nītanti vā paṇītaṃ. Yāthāvanti yathāsabhāvaṃ. Ettāvatā ucchedadiṭṭhi vuttā.
இதா⁴தி இமஸ்மிங் ஸாஸனே. பூ⁴தந்தி ஹேதுதோ ஸஞ்ஜாதங் க²ந்த⁴பஞ்சகஸங்கா²தங் து³க்க²ங். பூ⁴ததோ பஸ்ஸதீதி இத³ங் பூ⁴தங் து³க்க²ந்தி பஸ்ஸதி. நிப்³பி³தா³யாதி விபஸ்ஸனத்தா²ய. விராகா³யாதி அரியமக்³க³த்தா²ய. நிரோதா⁴யாதி நிப்³பா³னத்தா²ய. படிபன்னோ ஹோதீதி தத³னுரூபங் படிபத³ங் படிபன்னோ ஹோதி. ஏவங் பஸ்ஸந்தீதி இமினா பகாரேன புப்³ப³பா⁴கே³ லோகியஞாணேன, படிவேத⁴காலே லோகுத்தரஞாணேன பஸ்ஸந்தி. எத்தாவதா ஸம்மாதி³ட்டி² வுத்தா.
Idhāti imasmiṃ sāsane. Bhūtanti hetuto sañjātaṃ khandhapañcakasaṅkhātaṃ dukkhaṃ. Bhūtato passatīti idaṃ bhūtaṃ dukkhanti passati. Nibbidāyāti vipassanatthāya. Virāgāyāti ariyamaggatthāya. Nirodhāyāti nibbānatthāya. Paṭipanno hotīti tadanurūpaṃ paṭipadaṃ paṭipanno hoti. Evaṃ passantīti iminā pakārena pubbabhāge lokiyañāṇena, paṭivedhakāle lokuttarañāṇena passanti. Ettāvatā sammādiṭṭhi vuttā.
இதா³னி த்³வீஹி கா³தா²ஹி தஸ்ஸா ஸம்மாதி³ட்டி²யா ஆனிஸங்ஸங் த³ஸ்ஸேதி. தத்த² யோ பூ⁴தங் பூ⁴ததோ தி³ஸ்வாதி து³க்க²ங் பரிஞ்ஞாபி⁴ஸமயேன அபி⁴ஸமெத்வாதி அத்தோ². பூ⁴தஸ்ஸ ச அதிக்கமந்தி நிரோத⁴ங் ஸச்சி²கிரியாபி⁴ஸமயேன அபி⁴ஸமெத்வாதி அத்தோ². யதா²பூ⁴தேதி⁴முச்சதீதி மக்³க³பா⁴வனாபி⁴ஸமயவஸேன யதா²ஸபா⁴வே நிரோதே⁴ ‘‘ஏதங் ஸந்தங், ஏதங் பணீத’’ந்தி அதி⁴முச்சதி. ப⁴வதண்ஹா பரிக்க²யாதி ஸமுத³யஸ்ஸ பஹானேனாதி அத்தோ². அஸதிபி செத்த² ஸச்சானங் நானாபி⁴ஸமயத்தே ‘‘தி³ஸ்வா’’தி புப்³ப³காலிகவசனங் ஸத்³தி⁴ங் புப்³ப³பா⁴க³படிபதா³ய வோஹாரவஸேன வுத்தந்தி வேதி³தப்³ப³ங். ந ஹி புப்³ப³ங் பஸ்ஸித்வா பச்சா² அதி⁴முச்சதி. சதுஸச்சாபி⁴ஸமயோ ஸமானகாலமேவ ஹோதி. ஸமானகாலேபி வா புப்³ப³காலிகானி பதா³னி ப⁴வந்தீதி ந தோ³ஸோ. ஸ வேதி ஏகங்ஸேன ஸோ அரஹங். பூ⁴தபரிஞ்ஞாதோதி து³க்க²ங் பரிஞ்ஞாதவா. வீததண்ஹோதி விக³ததண்ஹோ. ப⁴வாப⁴வேதி கு²த்³த³கே ச மஹந்தே ச ப⁴வே. வுத்³தி⁴அத்தே²பி ஹி அ-காரஸ்ஸ ஸம்ப⁴வதோ அப⁴வோதி மஹாப⁴வோ. ஸோ பன கு²த்³த³கமஹந்தபா⁴வோ உபாதா³யுபாதா³ய வேதி³தப்³போ³. அத² வா ப⁴வேதி ஸஸ்ஸதே. அப⁴வேதி உச்சே²தே³. தது³ப⁴யேபி தி³ட்டி²ராகா³பா⁴வேன வீததண்ஹோ. பூ⁴தஸ்ஸ விப⁴வாதி வட்டது³க்க²ஸ்ஸ ஸமுச்சே²தா³. நாக³ச்ச²தி புனப்³ப⁴வந்தி அரஹதோ பரினிப்³பா³னங் வுத்தங்.
Idāni dvīhi gāthāhi tassā sammādiṭṭhiyā ānisaṃsaṃ dasseti. Tattha yo bhūtaṃ bhūtato disvāti dukkhaṃ pariññābhisamayena abhisametvāti attho. Bhūtassa ca atikkamanti nirodhaṃ sacchikiriyābhisamayena abhisametvāti attho. Yathābhūtedhimuccatīti maggabhāvanābhisamayavasena yathāsabhāve nirodhe ‘‘etaṃ santaṃ, etaṃ paṇīta’’nti adhimuccati. Bhavataṇhā parikkhayāti samudayassa pahānenāti attho. Asatipi cettha saccānaṃ nānābhisamayatte ‘‘disvā’’ti pubbakālikavacanaṃ saddhiṃ pubbabhāgapaṭipadāya vohāravasena vuttanti veditabbaṃ. Na hi pubbaṃ passitvā pacchā adhimuccati. Catusaccābhisamayo samānakālameva hoti. Samānakālepi vā pubbakālikāni padāni bhavantīti na doso. Saveti ekaṃsena so arahaṃ. Bhūtapariññātoti dukkhaṃ pariññātavā. Vītataṇhoti vigatataṇho. Bhavābhaveti khuddake ca mahante ca bhave. Vuddhiatthepi hi a-kārassa sambhavato abhavoti mahābhavo. So pana khuddakamahantabhāvo upādāyupādāya veditabbo. Atha vā bhaveti sassate. Abhaveti ucchede. Tadubhayepi diṭṭhirāgābhāvena vītataṇho. Bhūtassa vibhavāti vaṭṭadukkhassa samucchedā. Nāgacchati punabbhavanti arahato parinibbānaṃ vuttaṃ.
150. தயோ புக்³க³லாதிஆதி³ மிச்சா²தி³ட்டி²கக³ரஹணத்த²ங் ஸம்மாதி³ட்டி²கபஸங்ஸனத்த²ங் வுத்தங். தத்த² விரூபபா⁴வங் பன்னா க³தா தி³ட்டி² ஏதேஸந்தி விபன்னதி³ட்டீ². ஸுந்த³ரபா⁴வங் பன்னா க³தா தி³ட்டி² ஏதேஸந்தி ஸம்பன்னதி³ட்டீ². தித்தி²யோதி தித்த²ங் வுச்சதி தி³ட்டி², தங் படிபன்னத்தா தித்தே² ஸாது⁴, தித்த²ங் யஸ்ஸ அத்தீ²தி வா தித்தி²யோ. இதோ ப³ஹித்³தா⁴ பப்³ப³ஜ்ஜூபக³தோ. தித்தி²யஸாவகோதி தேஸங் தி³ட்டா²னுக³திமாபன்னோ க³ஹட்டோ². யோ ச மிச்சா²தி³ட்டி²கோதி தது³ப⁴யபா⁴வங் அனுபக³ந்த்வா யாய காயசி தி³ட்டி²யா மிச்சா²தி³ட்டி²கோ.
150.Tayo puggalātiādi micchādiṭṭhikagarahaṇatthaṃ sammādiṭṭhikapasaṃsanatthaṃ vuttaṃ. Tattha virūpabhāvaṃ pannā gatā diṭṭhi etesanti vipannadiṭṭhī. Sundarabhāvaṃ pannā gatā diṭṭhi etesanti sampannadiṭṭhī. Titthiyoti titthaṃ vuccati diṭṭhi, taṃ paṭipannattā titthe sādhu, titthaṃ yassa atthīti vā titthiyo. Ito bahiddhā pabbajjūpagato. Titthiyasāvakoti tesaṃ diṭṭhānugatimāpanno gahaṭṭho. Yo ca micchādiṭṭhikoti tadubhayabhāvaṃ anupagantvā yāya kāyaci diṭṭhiyā micchādiṭṭhiko.
ததா²க³தோதி ஸம்மாஸம்பு³த்³தோ⁴. பச்சேகபு³த்³தோ⁴பி எத்தே²வ ஸங்க³ஹிதோ. ததா²க³தஸாவகோதி மக்³க³ப்பத்தோ ப²லப்பத்தோ ச. யோ ச ஸம்மாதி³ட்டி²கோதி தது³ப⁴யவினிமுத்தோ லோகியஸம்மாதி³ட்டி²யா ஸம்மாதி³ட்டி²கோ.
Tathāgatoti sammāsambuddho. Paccekabuddhopi ettheva saṅgahito. Tathāgatasāvakoti maggappatto phalappatto ca. Yo ca sammādiṭṭhikoti tadubhayavinimutto lokiyasammādiṭṭhiyā sammādiṭṭhiko.
கா³தா²ஸு கோத⁴னோதி யோ அபி⁴ண்ஹங் குஜ்ஜ²தி, ஸோ. உபனாஹீதி தமேவ கோத⁴ங் வட்³டெ⁴த்வா உபனந்த⁴னஸீலோ. பாபமக்கீ²தி லாமகபூ⁴தமக்க²வா. மாயாவீதி கதபாபபடிச்சா²த³னவா. வஸலோதி ஹீனஜச்சோ. விஸுத்³தோ⁴தி ஞாணத³ஸ்ஸனவிஸுத்³தி⁴யா விஸுத்³தோ⁴. ஸுத்³த⁴தங் க³தோதி மக்³க³ப²லஸங்கா²தங் ஸுத்³த⁴பா⁴வங் க³தோ. மேதா⁴வீதி பஞ்ஞவா. இமாய கா³தா²ய லோகுத்தரஸம்மாதி³ட்டி²ஸம்பன்னோ ஏவ தோ²மிதோ.
Gāthāsu kodhanoti yo abhiṇhaṃ kujjhati, so. Upanāhīti tameva kodhaṃ vaḍḍhetvā upanandhanasīlo. Pāpamakkhīti lāmakabhūtamakkhavā. Māyāvīti katapāpapaṭicchādanavā. Vasaloti hīnajacco. Visuddhoti ñāṇadassanavisuddhiyā visuddho. Suddhataṃ gatoti maggaphalasaṅkhātaṃ suddhabhāvaṃ gato. Medhāvīti paññavā. Imāya gāthāya lokuttarasammādiṭṭhisampanno eva thomito.
விபன்னதி³ட்டி²யோ ஸம்பன்னதி³ட்டி²யோதி புக்³க³லவோஹாரங் பஹாய த⁴ம்மமேவ க³ரஹந்தோ தோ²மெந்தோ ச ஆஹ. ஏதங் மமாதி தண்ஹாமஞ்ஞனவஸேன தி³ட்டி². ஏஸோஹமஸ்மீதி மானமஞ்ஞனமூலிகா தி³ட்டி². ஏஸோ மே அத்தாதி தி³ட்டி²மஞ்ஞனமேவ.
Vipannadiṭṭhiyo sampannadiṭṭhiyoti puggalavohāraṃ pahāya dhammameva garahanto thomento ca āha. Etaṃ mamāti taṇhāmaññanavasena diṭṭhi. Esohamasmīti mānamaññanamūlikā diṭṭhi. Eso me attāti diṭṭhimaññanameva.
ஏதங் மமாதி கா தி³ட்டீ²திஆதீ³ஹி திஸ்ஸன்னங் விபன்னதி³ட்டீ²னங் விபா⁴க³ஞ்ச க³ணனஞ்ச காலஸங்க³ஹஞ்ச புச்சி²த்வா விஸ்ஸஜ்ஜனங் கதங். தத்த² கா தி³ட்டீ²தி அனேகாஸு தி³ட்டீ²ஸு கதமா தி³ட்டீ²தி அத்தோ². கதமந்தானுக்³க³ஹிதாதி புப்³ப³ந்தாபரந்தஸங்கா²தகாலத்³வயே கதமேன காலேன அனுக்³க³ஹிதா, அனுப³த்³தா⁴தி அத்தோ². யஸ்மா ‘‘ஏதங் மமா’’தி பராமஸந்தோ ‘‘ஏதங் மம அஹோஸி, ஏவங் மம அஹோஸி, எத்தகங் மம அஹோஸீ’’தி அதீதங் வத்து²ங் அபதி³ஸித்வா பராமஸதி, தஸ்மா புப்³ப³ந்தானுதி³ட்டி² ஹோதி. புப்³ப³ந்தானுக்³க³ஹிதா ச தா தி³ட்டி²யோ ஹொந்தி. யஸ்மா ‘‘ஏஸோஹமஸ்மீ’’தி பராமஸந்தோ ‘‘இமினாஹங் ஸீலேன வா வதேன வா தபேன வா ப்³ரஹ்மசரியேன வா ஏஸொஸ்மி விஸுஜ்ஜி²ஸ்ஸாமீ’’தி அனாக³தப²லங் உபாதா³ய பராமஸதி, தஸ்மா அபரந்தானுதி³ட்டி² ஹோதி. அபரந்தானுக்³க³ஹிதா ச தா தி³ட்டி²யோ ஹொந்தி. யஸ்மா ‘‘ஏஸோ மே அத்தா’’தி பராமஸந்தோ அதீதானாக³தங் உபாதி³ன்னஸந்ததிங் உபாதா³ய ‘‘ஏஸோ மே அத்தா’’தி பராமஸதி, ஸக்காயதி³ட்டி²வஸேன ச பராமஸதி, தஸ்மா ஸக்காயதி³ட்டி² ஹோதி. புப்³ப³ந்தாபரந்தானுக்³க³ஹிதா ச தா தி³ட்டி²யோ ஹொந்தி. யஸ்மா பன ஸக்காயதி³ட்டி²ப்பமுகா²யேவ த்³வாஸட்டி² தி³ட்டி²யோ ஹொந்தி, ஸக்காயதி³ட்டி²ஸமுக்³கா⁴தேனேவ ச த்³வாஸட்டி² தி³ட்டி²யோ ஸமுக்³கா⁴தங் க³ச்ச²ந்தி, தஸ்மா ஸக்காயதி³ட்டி²ப்பமுகே²ன த்³வாஸட்டி² தி³ட்டி²க³தானீதி வுத்தா, ஸக்காயதி³ட்டி²ப்பமுகே²ன ஸக்காயதி³ட்டி²த்³வாரேன த்³வாஸட்டி² தி³ட்டி²க³தானி ஹொந்தீதி அத்தோ². ஸக்காயதி³ட்டி²ப்பமுகா²னீதி பாடோ² ஸுந்த³ரதரோ. ஸக்காயதி³ட்டி² பமுகா² ஆதி³ ஏதேஸந்தி ஸக்காயதி³ட்டி²ப்பமுகா²னி. கானி தானி? த்³வாஸட்டி² தி³ட்டி²க³தானி.
Etaṃmamāti kā diṭṭhītiādīhi tissannaṃ vipannadiṭṭhīnaṃ vibhāgañca gaṇanañca kālasaṅgahañca pucchitvā vissajjanaṃ kataṃ. Tattha kā diṭṭhīti anekāsu diṭṭhīsu katamā diṭṭhīti attho. Katamantānuggahitāti pubbantāparantasaṅkhātakāladvaye katamena kālena anuggahitā, anubaddhāti attho. Yasmā ‘‘etaṃ mamā’’ti parāmasanto ‘‘etaṃ mama ahosi, evaṃ mama ahosi, ettakaṃ mama ahosī’’ti atītaṃ vatthuṃ apadisitvā parāmasati, tasmā pubbantānudiṭṭhi hoti. Pubbantānuggahitā ca tā diṭṭhiyo honti. Yasmā ‘‘esohamasmī’’ti parāmasanto ‘‘imināhaṃ sīlena vā vatena vā tapena vā brahmacariyena vā esosmi visujjhissāmī’’ti anāgataphalaṃ upādāya parāmasati, tasmā aparantānudiṭṭhi hoti. Aparantānuggahitā ca tā diṭṭhiyo honti. Yasmā ‘‘eso me attā’’ti parāmasanto atītānāgataṃ upādinnasantatiṃ upādāya ‘‘eso me attā’’ti parāmasati, sakkāyadiṭṭhivasena ca parāmasati, tasmā sakkāyadiṭṭhi hoti. Pubbantāparantānuggahitā ca tā diṭṭhiyo honti. Yasmā pana sakkāyadiṭṭhippamukhāyeva dvāsaṭṭhi diṭṭhiyo honti, sakkāyadiṭṭhisamugghāteneva ca dvāsaṭṭhi diṭṭhiyo samugghātaṃ gacchanti, tasmā sakkāyadiṭṭhippamukhena dvāsaṭṭhi diṭṭhigatānīti vuttā, sakkāyadiṭṭhippamukhena sakkāyadiṭṭhidvārena dvāsaṭṭhi diṭṭhigatāni hontīti attho. Sakkāyadiṭṭhippamukhānīti pāṭho sundarataro. Sakkāyadiṭṭhi pamukhā ādi etesanti sakkāyadiṭṭhippamukhāni. Kāni tāni? Dvāsaṭṭhi diṭṭhigatāni.
‘‘கா தி³ட்டீ²’’தி புச்சா²ய வீஸதிவத்து²கா அத்தானுதி³ட்டி², வீஸதிவத்து²கா ஸக்காயதி³ட்டீ²தி விஸ்ஸஜ்ஜனங். ‘‘கதி தி³ட்டி²யோ’’தி புச்சா²ய ஸக்காயதி³ட்டி²ப்பமுகா²னி த்³வாஸட்டி² தி³ட்டி²க³தானீதி விஸ்ஸஜ்ஜனங். ஸாயேவ பன ஸக்காயதி³ட்டி² ‘‘ஏஸோ மே அத்தா’’தி வசனஸாமஞ்ஞேன அத்தானுதி³ட்டீ²தி வுத்தா. தஸ்ஸா வுத்தாய அத்தவாத³படிஸஞ்ஞுத்தா தி³ட்டி²பி வுத்தாயேவ ஹோதி.
‘‘Kā diṭṭhī’’ti pucchāya vīsativatthukā attānudiṭṭhi, vīsativatthukā sakkāyadiṭṭhīti vissajjanaṃ. ‘‘Kati diṭṭhiyo’’ti pucchāya sakkāyadiṭṭhippamukhāni dvāsaṭṭhi diṭṭhigatānīti vissajjanaṃ. Sāyeva pana sakkāyadiṭṭhi ‘‘eso me attā’’ti vacanasāmaññena attānudiṭṭhīti vuttā. Tassā vuttāya attavādapaṭisaññuttā diṭṭhipi vuttāyeva hoti.
151. யே கேசி, பி⁴க்க²வேதிஆதி³ஸுத்தாஹரணங் ஸம்பன்னதி³ட்டி²புக்³க³லஸம்ப³ந்தே⁴ன ஸம்பன்னதி³ட்டி²புக்³க³லவிபா⁴க³த³ஸ்ஸனத்த²ங் கதங். தத்த² நிட்ட²ங் க³தாதி மக்³க³ஞாணவஸேன ஸம்மாஸம்பு³த்³தோ⁴ ப⁴க³வாதி நிச்ச²யங் க³தா, நிப்³பே³மதிகாதி அத்தோ². நிட்டா²க³தாதி பாடோ² ஸமாஸபத³ங் ஹோதி, அத்தோ² பன ஸோயேவ. தி³ட்டி²ஸம்பன்னாதி தி³ட்டி²யா ஸுந்த³ரபா⁴வங் க³தா. இத⁴ நிட்டா²தி இமிஸ்ஸா காமதா⁴துயா பரினிப்³பா³னங். இத⁴ விஹாய நிட்டா²தி இமங் காமப⁴வங் விஜஹித்வா ஸுத்³தா⁴வாஸப்³ரஹ்மலோகே பரினிப்³பா³னங். ஸத்தக்க²த்துபரமஸ்ஸாதி ஸத்தக்க²த்துங்பரமா ஸத்தவாரபரமா ப⁴வூபபத்தி அத்தபா⁴வக்³க³ஹணங் அஸ்ஸ, ததோ பரங் அட்ட²மங் ப⁴வங் நாதி³யதீதி ஸத்தக்க²த்துபரமோ. தஸ்ஸ ஸத்தக்க²த்துபரமஸ்ஸ ஸோதாபன்னஸ்ஸ. கோலங்கோலஸ்ஸாதி குலதோ குலங் க³ச்ச²தீதி கோலங்கோலோ. ஸோதாபத்திப²லஸச்சி²கிரியதோ ஹி பட்டா²ய நீசே குலே உபபத்தி நாம நத்தி², மஹாபோ⁴க³குலேஸுயேவ நிப்³ப³த்ததீதி அத்தோ². தஸ்ஸ கோலங்கோலஸ்ஸ ஸோதாபன்னஸ்ஸ. ஏகபீ³ஜிஸ்ஸாதி க²ந்த⁴பீ³ஜங் நாம கதி²தங். யஸ்ஸ ஹி ஸோதாபன்னஸ்ஸ ஏகங்யேவ க²ந்த⁴பீ³ஜங் அத்தி², ஏகங் அத்தபா⁴வக்³க³ஹணங், ஸோ ஏகபீ³ஜீ நாம. தஸ்ஸ ஏகபீ³ஜிஸ்ஸ ஸோதாபன்னஸ்ஸ. ப⁴க³வதா க³ஹிதனாமவஸேனேவேதானி ஏதேஸங் நாமானி. எத்தகஞ்ஹி டா²னங் க³தோ ஸத்தக்க²த்துபரமோ நாம ஹோதி, எத்தகங் கோலங்கோலோ, எத்தகங் ஏகபீ³ஜீதி ப⁴க³வதா ஏதேஸங் நாமங் க³ஹிதங். ப⁴க³வா ஹி ‘‘அயங் எத்தகங் டா²னங் க³மிஸ்ஸதி, அயங் எத்தகங் டா²னங் க³மிஸ்ஸதீ’’தி ஞத்வா தேஸங் தானி தானி நாமானி அக்³க³ஹேஸி. முது³பஞ்ஞோ ஹி ஸோதாபன்னோ ஸத்த ப⁴வே நிப்³ப³த்தெந்தோ ஸத்தக்க²த்துபரமோ நாம, மஜ்ஜி²மபஞ்ஞோ பரங் ச²ட்ட²ங் ப⁴வங் நிப்³ப³த்தெந்தோ கோலங்கோலோ நாம , திக்க²பஞ்ஞோ ஏகங் ப⁴வங் நிப்³ப³த்தெந்தோ ஏகபீ³ஜீ நாம. தங் பனேதங் தேஸங் முது³மஜ்ஜி²மதிக்க²பஞ்ஞதங் புப்³ப³ஹேது நியமேதி. இமே தயோபி ஸோதாபன்னா காமப⁴வவஸேன வுத்தா, ரூபாரூபப⁴வே பன ப³ஹுகாபி படிஸந்தி⁴யோ க³ண்ஹந்தி. ஸகதா³கா³மிஸ்ஸாதி படிஸந்தி⁴வஸேன ஸகிங் காமப⁴வங் ஆக³ச்ச²தீதி ஸகதா³கா³மீ. தஸ்ஸ ஸகதா³கா³மிஸ்ஸ. தி³ட்டே²வ த⁴ம்மே அரஹாதி இமஸ்மிங்யேவ அத்தபா⁴வே அரஹா. அரஹந்திபி பாடோ². இத⁴ நிட்டா²தி காமப⁴வங் ஸங்ஸரந்தேயேவ ஸந்தா⁴ய வுத்தங். ரூபாரூபப⁴வே உப்பன்னா பன அரியா காமப⁴வே ந உப்பஜ்ஜந்தி, தத்தே²வ பரினிப்³பா³யந்தி.
151.Ye keci, bhikkhavetiādisuttāharaṇaṃ sampannadiṭṭhipuggalasambandhena sampannadiṭṭhipuggalavibhāgadassanatthaṃ kataṃ. Tattha niṭṭhaṃ gatāti maggañāṇavasena sammāsambuddho bhagavāti nicchayaṃ gatā, nibbematikāti attho. Niṭṭhāgatāti pāṭho samāsapadaṃ hoti, attho pana soyeva. Diṭṭhisampannāti diṭṭhiyā sundarabhāvaṃ gatā. Idha niṭṭhāti imissā kāmadhātuyā parinibbānaṃ. Idha vihāya niṭṭhāti imaṃ kāmabhavaṃ vijahitvā suddhāvāsabrahmaloke parinibbānaṃ. Sattakkhattuparamassāti sattakkhattuṃparamā sattavāraparamā bhavūpapatti attabhāvaggahaṇaṃ assa, tato paraṃ aṭṭhamaṃ bhavaṃ nādiyatīti sattakkhattuparamo. Tassa sattakkhattuparamassa sotāpannassa. Kolaṃkolassāti kulato kulaṃ gacchatīti kolaṃkolo. Sotāpattiphalasacchikiriyato hi paṭṭhāya nīce kule upapatti nāma natthi, mahābhogakulesuyeva nibbattatīti attho. Tassa kolaṃkolassa sotāpannassa. Ekabījissāti khandhabījaṃ nāma kathitaṃ. Yassa hi sotāpannassa ekaṃyeva khandhabījaṃ atthi, ekaṃ attabhāvaggahaṇaṃ, so ekabījī nāma. Tassa ekabījissa sotāpannassa. Bhagavatā gahitanāmavasenevetāni etesaṃ nāmāni. Ettakañhi ṭhānaṃ gato sattakkhattuparamo nāma hoti, ettakaṃ kolaṃkolo, ettakaṃ ekabījīti bhagavatā etesaṃ nāmaṃ gahitaṃ. Bhagavā hi ‘‘ayaṃ ettakaṃ ṭhānaṃ gamissati, ayaṃ ettakaṃ ṭhānaṃ gamissatī’’ti ñatvā tesaṃ tāni tāni nāmāni aggahesi. Mudupañño hi sotāpanno satta bhave nibbattento sattakkhattuparamo nāma, majjhimapañño paraṃ chaṭṭhaṃ bhavaṃ nibbattento kolaṃkolo nāma , tikkhapañño ekaṃ bhavaṃ nibbattento ekabījī nāma. Taṃ panetaṃ tesaṃ mudumajjhimatikkhapaññataṃ pubbahetu niyameti. Ime tayopi sotāpannā kāmabhavavasena vuttā, rūpārūpabhave pana bahukāpi paṭisandhiyo gaṇhanti. Sakadāgāmissāti paṭisandhivasena sakiṃ kāmabhavaṃ āgacchatīti sakadāgāmī. Tassa sakadāgāmissa. Diṭṭheva dhamme arahāti imasmiṃyeva attabhāve arahā. Arahantipi pāṭho. Idha niṭṭhāti kāmabhavaṃ saṃsaranteyeva sandhāya vuttaṃ. Rūpārūpabhave uppannā pana ariyā kāmabhave na uppajjanti, tattheva parinibbāyanti.
அந்தராபரினிப்³பா³யிஸ்ஸாதி ஆயுவேமஜ்ஜ²ஸ்ஸ அந்தராயேவ கிலேஸபரினிப்³பா³னேன பரினிப்³பா³யனதோ அந்தராபரினிப்³பா³யீ. ஸோ பன உப்பன்னஸமனந்தரா பரினிப்³பா³யீ, ஆயுவேமஜ்ஜ²ங் அப்பத்வா பரினிப்³பா³யீ, ஆயுவேமஜ்ஜ²ங் பத்வா பரினிப்³பா³யீதி திவிதோ⁴ ஹோதி. தஸ்ஸ அந்தராபரினிப்³பா³யிஸ்ஸ அனாகா³மினோ. உபஹச்சபரினிப்³பா³யிஸ்ஸாதி ஆயுவேமஜ்ஜ²ங் அதிக்கமித்வா வா காலகிரியங் உபக³ந்த்வா வா கிலேஸபரினிப்³பா³னேன பரினிப்³பா³யந்தஸ்ஸ அனாகா³மினோ. அஸங்கா²ரபரினிப்³பா³யிஸ்ஸாதி அஸங்கா²ரேன அப்பயோகே³ன அதி⁴மத்தப்பயோக³ங் அகத்வாவ கிலேஸபரினிப்³பா³னேன பரினிப்³பா³யனத⁴ம்மஸ்ஸ அனாகா³மினோ. ஸஸங்கா²ரபரினிப்³பா³யிஸ்ஸாதி ஸஸங்கா²ரேன து³க்கே²ன கஸிரேன அதி⁴மத்தப்பயோக³ங் கத்வாவ கிலேஸபரினிப்³பா³னேன பரினிப்³பா³யனத⁴ம்மஸ்ஸ அனாகா³மினோ. உத்³த⁴ங்ஸோதஸ்ஸ அகனிட்ட²கா³மினோதி உத்³த⁴ங்வாஹிபா⁴வேன உத்³த⁴மஸ்ஸ தண்ஹாஸோதங் வட்டஸோதங் வாதி உத்³த⁴ங்ஸோதோ, உத்³த⁴ங் வா க³ந்த்வா படிலபி⁴தப்³ப³தோ உத்³த⁴மஸ்ஸ மக்³க³ஸோதந்தி உத்³த⁴ங்ஸோதோ, அகனிட்ட²ங் க³ச்ச²தீதி அகனிட்ட²கா³மீ. தஸ்ஸ உத்³த⁴ங்ஸோதஸ்ஸ அகனிட்ட²கா³மினோ அனாகா³மிஸ்ஸ. அயங் பன அனாகா³மீ சதுப்பபே⁴தோ³ – யோ அவிஹதோ பட்டா²ய சத்தாரோ ப்³ரஹ்மலோகே ஸோதெ⁴த்வா அகனிட்ட²ங் க³ந்த்வா பரினிப்³பா³யதி, அயங் உத்³த⁴ங்ஸோதோ அகனிட்ட²கா³மீ நாம. யோ ஹெட்டா² தயோ ப்³ரஹ்மலோகே ஸோதெ⁴த்வா ஸுத³ஸ்ஸீப்³ரஹ்மலோகே ட²த்வா பரினிப்³பா³யதி, அயங் உத்³த⁴ங்ஸோதோ ந அகனிட்ட²கா³மீ நாம. யோ இதோ அகனிட்ட²மேவ க³ந்த்வா பரினிப்³பா³யதி, அயங் ந உத்³த⁴ங்ஸோதோ அகனிட்ட²கா³மீ நாம. யோ ஹெட்டா² சதூஸு ப்³ரஹ்மலோகேஸு தத்த² தத்தே²வ பரினிப்³பா³யதி, அயங் ந உத்³த⁴ங்ஸோதோ ந அகனிட்ட²கா³மீ நாமாதி. இமே பஞ்ச அனாகா³மினோ ஸுத்³தா⁴வாஸங் க³ஹெத்வா வுத்தா. அனாகா³மினோ பன ரூபராகா³ரூபராகா³னங் அப்பஹீனத்தா ஆகங்க²மானா ஸேஸரூபாரூபப⁴வேஸுபி நிப்³ப³த்தந்தி. ஸுத்³தா⁴வாஸே நிப்³ப³த்தா பன அஞ்ஞத்த² ந நிப்³ப³த்தந்தி. அவேச்சப்பஸன்னாதி அரியமக்³க³வஸேன ஜானித்வா பு³ஜ்ஜி²த்வா அசலப்பஸாதே³ன பஸன்னா. ஸோதாபன்னாதி அரியமக்³க³ஸோதங் ஆபன்னா. இமினா ஸப்³பே³பி அரியப²லட்டா² புக்³க³லா க³ஹிதாதி.
Antarāparinibbāyissāti āyuvemajjhassa antarāyeva kilesaparinibbānena parinibbāyanato antarāparinibbāyī. So pana uppannasamanantarā parinibbāyī, āyuvemajjhaṃ appatvā parinibbāyī, āyuvemajjhaṃ patvā parinibbāyīti tividho hoti. Tassa antarāparinibbāyissa anāgāmino. Upahaccaparinibbāyissāti āyuvemajjhaṃ atikkamitvā vā kālakiriyaṃ upagantvā vā kilesaparinibbānena parinibbāyantassa anāgāmino. Asaṅkhāraparinibbāyissāti asaṅkhārena appayogena adhimattappayogaṃ akatvāva kilesaparinibbānena parinibbāyanadhammassa anāgāmino. Sasaṅkhāraparinibbāyissāti sasaṅkhārena dukkhena kasirena adhimattappayogaṃ katvāva kilesaparinibbānena parinibbāyanadhammassa anāgāmino. Uddhaṃsotassa akaniṭṭhagāminoti uddhaṃvāhibhāvena uddhamassa taṇhāsotaṃ vaṭṭasotaṃ vāti uddhaṃsoto, uddhaṃ vā gantvā paṭilabhitabbato uddhamassa maggasotanti uddhaṃsoto, akaniṭṭhaṃ gacchatīti akaniṭṭhagāmī. Tassa uddhaṃsotassa akaniṭṭhagāmino anāgāmissa. Ayaṃ pana anāgāmī catuppabhedo – yo avihato paṭṭhāya cattāro brahmaloke sodhetvā akaniṭṭhaṃ gantvā parinibbāyati, ayaṃ uddhaṃsoto akaniṭṭhagāmī nāma. Yo heṭṭhā tayo brahmaloke sodhetvā sudassībrahmaloke ṭhatvā parinibbāyati, ayaṃ uddhaṃsoto na akaniṭṭhagāmī nāma. Yo ito akaniṭṭhameva gantvā parinibbāyati, ayaṃ na uddhaṃsoto akaniṭṭhagāmī nāma. Yo heṭṭhā catūsu brahmalokesu tattha tattheva parinibbāyati, ayaṃ na uddhaṃsoto na akaniṭṭhagāmī nāmāti. Ime pañca anāgāmino suddhāvāsaṃ gahetvā vuttā. Anāgāmino pana rūparāgārūparāgānaṃ appahīnattā ākaṅkhamānā sesarūpārūpabhavesupi nibbattanti. Suddhāvāse nibbattā pana aññattha na nibbattanti. Aveccappasannāti ariyamaggavasena jānitvā bujjhitvā acalappasādena pasannā. Sotāpannāti ariyamaggasotaṃ āpannā. Iminā sabbepi ariyaphalaṭṭhā puggalā gahitāti.
ப⁴வவிப⁴வதி³ட்டி²னித்³தே³ஸவண்ணனா நிட்டி²தா.
Bhavavibhavadiṭṭhiniddesavaṇṇanā niṭṭhitā.
ஸத்³த⁴ம்மப்பகாஸினியா படிஸம்பி⁴தா³மக்³க³ட்ட²கதா²ய
Saddhammappakāsiniyā paṭisambhidāmaggaṭṭhakathāya
தி³ட்டி²கதா²வண்ணனா நிட்டி²தா.
Diṭṭhikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 15-16. ப⁴வ-விப⁴வதி³ட்டி²னித்³தே³ஸோ • 15-16. Bhava-vibhavadiṭṭhiniddeso
