| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၅. ပပာတဝဂ္ဂော
5. Papātavaggo
၁. လောကစိန္တာသုတ္တဝဏ္ဏနာ
1. Lokacintāsuttavaṇṇanā
၁၁၁၁. ပဉ္စမသ္သ ပဌမေ သုမာဂဓာယ ပောက္ခရဏိယာတိ ဧဝံနာမိကာယ ပောက္ခရဏိယာ။ လောကစိန္တံ စိန္တေန္တောတိ, ‘‘ကေန နု ခော စန္ဒိမသူရိယာ ကတာ, ကေန မဟာပထဝီ, ကေန မဟာသမုဒ္ဒော, ကေန သတ္တာ ဥပ္ပာဒိတာ, ကေန ပဗ္ဗတာ, ကေန အမ္ဗတာလနာဠိကေရာဒယော’’တိ ဧဝရူပံ လောကစိန္တံ စိန္တေန္တော နိသီဒိ။
1111. Pañcamassa paṭhame sumāgadhāya pokkharaṇiyāti evaṃnāmikāya pokkharaṇiyā. Lokacintaṃ cintentoti, ‘‘kena nu kho candimasūriyā katā, kena mahāpathavī, kena mahāsamuddo, kena sattā uppāditā, kena pabbatā, kena ambatālanāḷikerādayo’’ti evarūpaṃ lokacintaṃ cintento nisīdi.
ဝိစေတောတိ ဝိဂတစိတ္တော ဝိက္ခိတ္တစိတ္တော ဝာ။ ဘူတံယေဝ အဒ္ဒသာတိ တေ ကိရ အသုရာ သမ္ဗရိမာယံ သမ္ပရိဝတ္တေတ္ဝာ ယထာ နေ သော ပုရိသော ဟတ္ထိအသ္သာဒီသု အာရုဟန္တေ ဥက္ခိပိတ္ဝာ, ဘိသမုဠာလစ္ဆိဒ္ဒေဟိ ပဝိသန္တေ ပသ္သတိ, ဧဝံ အဓိဋ္ဌဟိံသု။ တံ သန္ဓာယ သတ္ထာ ‘‘ဘူတံယေဝ အဒ္ဒသာ’’တိ အာဟ။ ဒေဝာနံယေဝ မောဟယမာနာတိ ဒေဝာနံ စိတ္တံ မောဟယန္တာ။ တသ္မာတိ ယသ္မာ လောကစိန္တံ စိန္တေန္တော ဥမ္မတ္တကောပိ ဟောတိ, တသ္မာ။
Vicetoti vigatacitto vikkhittacitto vā. Bhūtaṃyeva addasāti te kira asurā sambarimāyaṃ samparivattetvā yathā ne so puriso hatthiassādīsu āruhante ukkhipitvā, bhisamuḷālacchiddehi pavisante passati, evaṃ adhiṭṭhahiṃsu. Taṃ sandhāya satthā ‘‘bhūtaṃyeva addasā’’ti āha. Devānaṃyeva mohayamānāti devānaṃ cittaṃ mohayantā. Tasmāti yasmā lokacintaṃ cintento ummattakopi hoti, tasmā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. လောကစိန္တာသုတ္တံ • 1. Lokacintāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. လောကစိန္တာသုတ္တဝဏ္ဏနာ • 1. Lokacintāsuttavaṇṇanā
