| Library / Tipiṭaka / तिपिटक • Tipiṭaka / जातकपाळि • Jātakapāḷi |
३५७. लटुकिकजातकं (५-१-७)
357. Laṭukikajātakaṃ (5-1-7)
३९.
39.
वन्दामि तं कुञ्जर सट्ठिहायनं, आरञ्ञकं यूथपतिं यसस्सिं।
Vandāmi taṃ kuñjara saṭṭhihāyanaṃ, āraññakaṃ yūthapatiṃ yasassiṃ;
पक्खेहि तं पञ्जलिकं करोमि, मा मे वधी पुत्तके दुब्बलाय॥
Pakkhehi taṃ pañjalikaṃ karomi, mā me vadhī puttake dubbalāya.
४०.
40.
वन्दामि तं कुञ्जर एकचारिं, आरञ्ञकं पब्बतसानुगोचरं।
Vandāmi taṃ kuñjara ekacāriṃ, āraññakaṃ pabbatasānugocaraṃ;
पक्खेहि तं पञ्जलिकं करोमि, मा मे वधी पुत्तके दुब्बलाय।
Pakkhehi taṃ pañjalikaṃ karomi, mā me vadhī puttake dubbalāya;
४१.
41.
वमिस्सामि ते लटुकिके पुत्तकानि, किं मे तुवं काहसि दुब्बलासि।
Vamissāmi te laṭukike puttakāni, kiṃ me tuvaṃ kāhasi dubbalāsi;
सतं सहस्सानिपि तादिसीनं, वामेन पादेन पपोथयेय्यं॥
Sataṃ sahassānipi tādisīnaṃ, vāmena pādena papothayeyyaṃ.
४२.
42.
न हेव सब्बत्थ बलेन किच्चं, बलञ्हि बालस्स वधाय होति।
Na heva sabbattha balena kiccaṃ, balañhi bālassa vadhāya hoti;
करिस्सामि ते नागराजा अनत्थं, यो मे वधी पुत्तके दुब्बलाय॥
Karissāmi te nāgarājā anatthaṃ, yo me vadhī puttake dubbalāya.
४३.
43.
काकञ्च पस्स लटुकिकं, मण्डूकं नीलमक्खिकं।
Kākañca passa laṭukikaṃ, maṇḍūkaṃ nīlamakkhikaṃ;
एते नागं अघातेसुं, पस्स वेरस्स वेरिनं।
Ete nāgaṃ aghātesuṃ, passa verassa verinaṃ;
तस्मा हि वेरं न कयिराथ, अप्पियेनपि केनचीति॥
Tasmā hi veraṃ na kayirātha, appiyenapi kenacīti.
लटुकिकजातकं सत्तमं।
Laṭukikajātakaṃ sattamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [३५७] ७. लटुकिकजातकवण्णना • [357] 7. Laṭukikajātakavaṇṇanā
