| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
২. সমুদ্দৰগ্গো
2. Samuddavaggo
১. লাবুলতঙ্গপঞ্হো
1. Lābulataṅgapañho
১. ‘‘ভন্তে নাগসেন, ‘লাবুলতায একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, লাবুলতা তিণে ৰা কট্ঠে ৰা লতায ৰা সোণ্ডিকাহি আলম্বিত্ৰা তস্সূপরি ৰড্ঢতি, এৰমেৰ খো, মহারাজ, যোগিনা যোগাৰচরেন অরহত্তে অভিৰড্ঢিতুকামেন মনসা আরম্মণং আলম্বিত্ৰা অরহত্তে অভিৰড্ঢিতব্বং। ইদং, মহারাজ, লাবুলতায একং অঙ্গং গহেতব্বং। ভাসিতম্পেতং, মহারাজ, থেরেন সারিপুত্তেন ধম্মসেনাপতিনা –
1. ‘‘Bhante nāgasena, ‘lābulatāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, lābulatā tiṇe vā kaṭṭhe vā latāya vā soṇḍikāhi ālambitvā tassūpari vaḍḍhati, evameva kho, mahārāja, yoginā yogāvacarena arahatte abhivaḍḍhitukāmena manasā ārammaṇaṃ ālambitvā arahatte abhivaḍḍhitabbaṃ. Idaṃ, mahārāja, lābulatāya ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘যথা লাবুলতা নাম, তিণে কট্ঠে লতায ৰা।
‘‘‘Yathā lābulatā nāma, tiṇe kaṭṭhe latāya vā;
আলম্বিত্ৰা সোণ্ডিকাহি, ততো ৰড্ঢতি উপ্পরি॥
Ālambitvā soṇḍikāhi, tato vaḍḍhati uppari.
‘‘‘তথেৰ বুদ্ধপুত্তেন, অরহত্তফলকামিনা।
‘‘‘Tatheva buddhaputtena, arahattaphalakāminā;
আরম্মণং আলম্বিত্ৰা, ৰড্ঢিতব্বং অসেক্খফলে’’’তি॥
Ārammaṇaṃ ālambitvā, vaḍḍhitabbaṃ asekkhaphale’’’ti.
লাবুলতঙ্গপঞ্হো পঠমো।
Lābulataṅgapañho paṭhamo.
