| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
২. পদুমঙ্গপঞ্হো
2. Padumaṅgapañho
২. ‘‘ভন্তে নাগসেন, ‘পদুমস্স তীণি অঙ্গানি গহেতব্বানী’তি যং ৰদেসি, কতমানি তানি তীণি অঙ্গানি গহেতব্বানী’’তি ? ‘‘যথা, মহারাজ, পদুমং উদকে জাতং উদকে সংৰদ্ধং অনুপলিত্তং উদকেন, এৰমেৰ খো, মহারাজ, যোগিনা যোগাৰচরেন কুলে গণে লাভে যসে সক্কারে সম্মাননায পরিভোগপচ্চযেসু চ সব্বত্থ অনুপলিত্তেন ভৰিতব্বং। ইদং, মহারাজ, পদুমস্স পঠমং অঙ্গং গহেতব্বং।
2. ‘‘Bhante nāgasena, ‘padumassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti ? ‘‘Yathā, mahārāja, padumaṃ udake jātaṃ udake saṃvaddhaṃ anupalittaṃ udakena, evameva kho, mahārāja, yoginā yogāvacarena kule gaṇe lābhe yase sakkāre sammānanāya paribhogapaccayesu ca sabbattha anupalittena bhavitabbaṃ. Idaṃ, mahārāja, padumassa paṭhamaṃ aṅgaṃ gahetabbaṃ.
‘‘পুন চপরং, মহারাজ, পদুমং উদকা অচ্চুগ্গম্ম ঠাতি। এৰমেৰ খো, মহারাজ, যোগিনা যোগাৰচরেন সব্বলোকং অভিভৰিত্ৰা অচ্চুগ্গম্ম লোকুত্তরধম্মে ঠাতব্বং। ইদং, মহারাজ, পদুমস্স দুতিযং অঙ্গং গহেতব্বং।
‘‘Puna caparaṃ, mahārāja, padumaṃ udakā accuggamma ṭhāti. Evameva kho, mahārāja, yoginā yogāvacarena sabbalokaṃ abhibhavitvā accuggamma lokuttaradhamme ṭhātabbaṃ. Idaṃ, mahārāja, padumassa dutiyaṃ aṅgaṃ gahetabbaṃ.
‘‘পুন চপরং, মহারাজ, পদুমং অপ্পমত্তকেনপি অনিলেন এরিতং চলতি। এৰমেৰ খো, মহারাজ, যোগিনা যোগাৰচরেন অপ্পমত্তকেসুপি কিলেসেসু সংযমো করণীযো, ভযদস্সাৰিনা ৰিহরিতব্বং। ইদং, মহারাজ, পদুমস্স ততিযং অঙ্গং গহেতব্বং। ভাসিতম্পেতং, মহারাজ, ভগৰতা দেৰাতিদেৰেন ‘অণুমত্তেসু ৰজ্জেসু ভযদস্সাৰী সমাদায সিক্খতি সিক্খাপদেসূ’তি।
‘‘Puna caparaṃ, mahārāja, padumaṃ appamattakenapi anilena eritaṃ calati. Evameva kho, mahārāja, yoginā yogāvacarena appamattakesupi kilesesu saṃyamo karaṇīyo, bhayadassāvinā viharitabbaṃ. Idaṃ, mahārāja, padumassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena ‘aṇumattesu vajjesu bhayadassāvī samādāya sikkhati sikkhāpadesū’ti.
পদুমঙ্গপঞ্হো দুতিযো।
Padumaṅgapañho dutiyo.
