| Library / Tipiṭaka / තිපිටක • Tipiṭaka / අපදානපාළි • Apadānapāḷi |
19. කුටජපුප්ඵියවග්ගො
19. Kuṭajapupphiyavaggo
1. කුටජපුප්ඵියත්ථෙරඅපදානං
1. Kuṭajapupphiyattheraapadānaṃ
1.
1.
‘‘සුවණ්ණවණ්ණං සම්බුද්ධං, සතරංසිංව උග්ගතං;
‘‘Suvaṇṇavaṇṇaṃ sambuddhaṃ, sataraṃsiṃva uggataṃ;
දිසං අනුවිලොකෙන්තං, ගච්ඡන්තං අනිලඤ්ජසෙ.
Disaṃ anuvilokentaṃ, gacchantaṃ anilañjase.
2.
2.
‘‘කුටජං පුප්ඵිතං දිස්වා, සංවිත්ථතසමොත්ථතං;
‘‘Kuṭajaṃ pupphitaṃ disvā, saṃvitthatasamotthataṃ;
රුක්ඛතො ඔචිනිත්වාන, ඵුස්සස්ස අභිරොපයිං.
Rukkhato ocinitvāna, phussassa abhiropayiṃ.
3.
3.
‘‘ද්වෙනවුතෙ ඉතො කප්පෙ, යං පුප්ඵමභිරොපයිං;
‘‘Dvenavute ito kappe, yaṃ pupphamabhiropayiṃ;
දුග්ගතිං නාභිජානාමි, බුද්ධපූජායිදං ඵලං.
Duggatiṃ nābhijānāmi, buddhapūjāyidaṃ phalaṃ.
4.
4.
‘‘ඉතො සත්තරසෙ කප්පෙ, තයො ආසුං සුපුප්ඵිතා;
‘‘Ito sattarase kappe, tayo āsuṃ supupphitā;
සත්තරතනසම්පන්නා, චක්කවත්තී මහබ්බලා.
Sattaratanasampannā, cakkavattī mahabbalā.
5.
5.
‘‘පටිසම්භිදා චතස්සො, විමොක්ඛාපි ච අට්ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්ඤා සච්ඡිකතා, කතං බුද්ධස්ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්ථං සුදං ආයස්මා කුටජපුප්ඵියො ථෙරො ඉමා ගාථායො අභාසිත්ථාති.
Itthaṃ sudaṃ āyasmā kuṭajapupphiyo thero imā gāthāyo abhāsitthāti.
කුටජපුප්ඵියත්ථෙරස්සාපදානං පඨමං.
Kuṭajapupphiyattherassāpadānaṃ paṭhamaṃ.
