| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
១៩. កុដជបុប្ផិយវគ្គោ
19. Kuṭajapupphiyavaggo
១. កុដជបុប្ផិយត្ថេរអបទានំ
1. Kuṭajapupphiyattheraapadānaṃ
១.
1.
‘‘សុវណ្ណវណ្ណំ សម្ពុទ្ធំ, សតរំសិំវ ឧគ្គតំ;
‘‘Suvaṇṇavaṇṇaṃ sambuddhaṃ, sataraṃsiṃva uggataṃ;
ទិសំ អនុវិលោកេន្តំ, គច្ឆន្តំ អនិលញ្ជសេ។
Disaṃ anuvilokentaṃ, gacchantaṃ anilañjase.
២.
2.
‘‘កុដជំ បុប្ផិតំ ទិស្វា, សំវិត្ថតសមោត្ថតំ;
‘‘Kuṭajaṃ pupphitaṃ disvā, saṃvitthatasamotthataṃ;
រុក្ខតោ ឱចិនិត្វាន, ផុស្សស្ស អភិរោបយិំ។
Rukkhato ocinitvāna, phussassa abhiropayiṃ.
៣.
3.
‘‘ទ្វេនវុតេ ឥតោ កប្បេ, យំ បុប្ផមភិរោបយិំ;
‘‘Dvenavute ito kappe, yaṃ pupphamabhiropayiṃ;
ទុគ្គតិំ នាភិជានាមិ, ពុទ្ធបូជាយិទំ ផលំ។
Duggatiṃ nābhijānāmi, buddhapūjāyidaṃ phalaṃ.
៤.
4.
‘‘ឥតោ សត្តរសេ កប្បេ, តយោ អាសុំ សុបុប្ផិតា;
‘‘Ito sattarase kappe, tayo āsuṃ supupphitā;
សត្តរតនសម្បន្នា, ចក្កវត្តី មហព្ពលា។
Sattaratanasampannā, cakkavattī mahabbalā.
៥.
5.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា កុដជបុប្ផិយោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā kuṭajapupphiyo thero imā gāthāyo abhāsitthāti.
កុដជបុប្ផិយត្ថេរស្សាបទានំ បឋមំ។
Kuṭajapupphiyattherassāpadānaṃ paṭhamaṃ.
