| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
១៤. ចុទ្ទសមវគ្គោ
14. Cuddasamavaggo
១. កុសលាកុសលបដិសន្ទហនកថាវណ្ណនា
1. Kusalākusalapaṭisandahanakathāvaṇṇanā
៦៨៦-៦៩០. ឥទានិ កុសលាកុសលបដិសន្ទហនកថា នាម ហោតិ។ តត្ថ កុសលំ វា អកុសលស្ស, អកុសលំ វា កុសលស្ស អនន្តរា ឧប្បជ្ជនកំ នាម នត្ថីតិ តេសំ អញ្ញមញ្ញំ បដិសន្ធានំ ន យុជ្ជតិ។ យេ បន យស្មា ឯកវត្ថុស្មិញ្ញេវ រជ្ជតិ វិរជ្ជតិ ច, តស្មា តំ អញ្ញមញ្ញំ បដិសន្ទហតីតិ លទ្ធិំ គហេត្វា ឋិតា, សេយ្យថាបិ មហាសង្ឃិកា; តេ សន្ធាយ បុច្ឆា សកវាទិស្ស; បដិញ្ញា ឥតរស្ស។ អាវដ្ដនា បណិធីតិ ឧភយំ អាវជ្ជនស្សេវ នាមំ។ តញ្ហិ ភវង្គំ អាវដ្ដេតីតិ អាវដ្ដនា។ ភវង្គារម្មណតោ អញ្ញស្មិំ អារម្មណេ ចិត្តំ បណិទហតិ ឋបេតីតិ បណិធិ។ កុសលំ អនាវដ្ដេន្តស្សាតិ យំ តំ អកុសលានន្តរំ បដិសន្ទហន្តំ កុសលំ ឧប្បជ្ជតិ, តំ អនាវដ្ដេន្តស្ស ឧប្បជ្ជតីតិ បុច្ឆតិ។ ឥតរោ បន វិនា អាវជ្ជនេន កុសលស្ស ឧប្បត្តិំ អបស្សន្តោ បដិក្ខិបតិ។ កុសលំ អយោនិសោ មនសិករោតោតិ ឥទំ យទិ អកុសលានន្តរំ កុសលំ ឧប្បជ្ជេយ្យ, អកុសលស្សេវ អាវជ្ជនេន អយោនិសោ មនសិករោតោ ឧប្បជ្ជេយ្យាតិ ចោទនត្ថំ វុត្តំ។ សេសំ យថាបាឡិមេវ និយ្យាតិ។ ននុ យស្មិំយេវ វត្ថុស្មិន្តិ វចនំ ឯការម្មណេ សរាគវិរាគុប្បត្តិំ ទីបេតិ, ន កុសលាកុសលានំ អនន្តរតំ, តស្មា អសាធកន្តិ។
686-690. Idāni kusalākusalapaṭisandahanakathā nāma hoti. Tattha kusalaṃ vā akusalassa, akusalaṃ vā kusalassa anantarā uppajjanakaṃ nāma natthīti tesaṃ aññamaññaṃ paṭisandhānaṃ na yujjati. Ye pana yasmā ekavatthusmiññeva rajjati virajjati ca, tasmā taṃ aññamaññaṃ paṭisandahatīti laddhiṃ gahetvā ṭhitā, seyyathāpi mahāsaṅghikā; te sandhāya pucchā sakavādissa; paṭiññā itarassa. Āvaṭṭanā paṇidhīti ubhayaṃ āvajjanasseva nāmaṃ. Tañhi bhavaṅgaṃ āvaṭṭetīti āvaṭṭanā. Bhavaṅgārammaṇato aññasmiṃ ārammaṇe cittaṃ paṇidahati ṭhapetīti paṇidhi. Kusalaṃ anāvaṭṭentassāti yaṃ taṃ akusalānantaraṃ paṭisandahantaṃ kusalaṃ uppajjati, taṃ anāvaṭṭentassa uppajjatīti pucchati. Itaro pana vinā āvajjanena kusalassa uppattiṃ apassanto paṭikkhipati. Kusalaṃ ayoniso manasikarototi idaṃ yadi akusalānantaraṃ kusalaṃ uppajjeyya, akusalasseva āvajjanena ayoniso manasikaroto uppajjeyyāti codanatthaṃ vuttaṃ. Sesaṃ yathāpāḷimeva niyyāti. Nanu yasmiṃyeva vatthusminti vacanaṃ ekārammaṇe sarāgavirāguppattiṃ dīpeti, na kusalākusalānaṃ anantarataṃ, tasmā asādhakanti.
កុសលាកុសលបដិសន្ទហនកថាវណ្ណនា។
Kusalākusalapaṭisandahanakathāvaṇṇanā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (១៣៦) ១. កុសលាកុសលបដិសន្ទហនកថា • (136) 1. Kusalākusalapaṭisandahanakathā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១. កុសលាកុសលបដិសន្ទហនកថាវណ្ណនា • 1. Kusalākusalapaṭisandahanakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ១. កុសលាកុសលបដិសន្ទហនកថាវណ្ណនា • 1. Kusalākusalapaṭisandahanakathāvaṇṇanā
