| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৭. কূপঙ্গপঞ্হো
7. Kūpaṅgapañho
৭. ‘‘ভন্তে নাগসেন, ‘কূপস্স একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, কূপো রজ্জুঞ্চ ৰরত্তঞ্চ লঙ্কারঞ্চ ধারেতি, এৰমেৰ খো, মহারাজ, যোগিনা যোগাৰচরেন সতিসম্পজঞ্ঞসমন্নাগতেন ভৰিতব্বং, অভিক্কন্তে পটিক্কন্তে আলোকিতে ৰিলোকিতে সমিঞ্জিতে পসারিতে সঙ্ঘাটিপত্তচীৰরধারণে অসিতে পীতে খাযিতে সাযিতে উচ্চারপস্সাৰকম্মে গতে ঠিতে নিসিন্নে সুত্তে জাগরিতে ভাসিতে তুণ্হীভাৰে সম্পজানকারিনা ভৰিতব্বং। ইদং, মহারাজ, কূপস্স একং অঙ্গং গহেতব্বং। ভাসিতম্পেতং, মহারাজ, ভগৰতা দেৰাতিদেৰেন ‘সতো, ভিক্খৰে, ভিক্খু ৰিহরেয্য সম্পজানো, অযং ৰো অম্হাকং অনুসাসনী’’’তি।
7. ‘‘Bhante nāgasena, ‘kūpassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, kūpo rajjuñca varattañca laṅkārañca dhāreti, evameva kho, mahārāja, yoginā yogāvacarena satisampajaññasamannāgatena bhavitabbaṃ, abhikkante paṭikkante ālokite vilokite samiñjite pasārite saṅghāṭipattacīvaradhāraṇe asite pīte khāyite sāyite uccārapassāvakamme gate ṭhite nisinne sutte jāgarite bhāsite tuṇhībhāve sampajānakārinā bhavitabbaṃ. Idaṃ, mahārāja, kūpassa ekaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena ‘sato, bhikkhave, bhikkhu vihareyya sampajāno, ayaṃ vo amhākaṃ anusāsanī’’’ti.
কূপঙ্গপঞ্হো সত্তমো।
Kūpaṅgapañho sattamo.
