4. Kuṇḍadhānavaggo

1. Kuṇḍadhānattheraapadānaṃ

1.

‘‘Sattāhaṃ paṭisallīnaṃ, sayambhuṃ aggapuggalaṃ;

Pasannacitto sumano, buddhaseṭṭhaṃ upaṭṭhahiṃ.

2.

‘‘Vuṭṭhitaṃ kālamaññāya, padumuttaraṃ mahāmuniṃ;

Mahantiṃ kadalīkaṇṇiṃ, gahetvā upagacchahaṃ.

3.

‘‘Paṭiggahetvā ³ bhagavā, sabbaññū ⁴ lokanāyako;

Mama cittaṃ pasādento, paribhuñji mahāmuni.

4.

‘‘Paribhuñjitvā sambuddho, satthavāho anuttaro;

Sakāsane nisīditvā, imā gāthā abhāsatha.

5.

‘‘‘Ye ca santi samitāro ⁶, yakkhā imamhi pabbate;

Araññe bhūtabhabyāni ⁸, suṇantu vacanaṃ mama’.

6.

‘‘Yo so buddhaṃ upaṭṭhāsi, migarājaṃva kesariṃ ¹⁰;

Tamahaṃ kittayissāmi, suṇātha mama bhāsato.

7.

‘‘‘Ekādasañcakkhattuṃ, so ¹² devarājā bhavissati;

Catutiṃsatikkhattuñca, cakkavattī bhavissati.

8.

‘‘‘Kappasatasahassamhi, okkākakulasambhavo;

Gotamo nāma gottena, satthā loke bhavissati.

9.

‘‘‘Akkositvāna samaṇe, sīlavante anāsave;

Pāpakammavipākena, nāmadheyyaṃ labhissati ¹⁴.

10.

‘‘‘Tassa dhammesu dāyādo, oraso dhammanimmito;

Kuṇḍadhānoti nāmena, sāvako so bhavissati’.

11.

‘‘Pavivekamanuyutto, jhāyī jhānarato ahaṃ;

Tosayitvāna satthāraṃ, viharāmi anāsavo.

12.

‘‘Sāvakehi ¹⁶ parivuto, bhikkhusaṅghapurakkhato;

Bhikkhusaṅghe nisīditvā, salākaṃ gāhayī jino.

13.

‘‘Ekaṃsaṃ cīvaraṃ katvā, vanditvā lokanāyakaṃ;

Vadataṃ varassa purato, paṭhamaṃ aggahesahaṃ.

14.

‘‘Tena kammena bhagavā, dasasahassīkampako;

Bhikkhusaṅghe nisīditvā, aggaṭṭhāne ṭhapesi maṃ.

15.

‘‘Vīriyaṃ me dhuradhorayhaṃ, yogakkhemādhivāhanaṃ;

Dhāremi antimaṃ dehaṃ, sammāsambuddhasāsane.

16.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā kuṇḍadhāno thero imā gāthāyo abhāsitthāti.

Kuṇḍadhānattherassāpadānaṃ paṭhamaṃ.