| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༩༨. ཀུཀྐུཙྩཔཀཏཔནྣརསཀཾ
98. Kukkuccapakatapannarasakaṃ
༡༧༥. ཨིདྷ པན, བྷིཀྑཝེ, ཨཉྙཏརསྨིཾ ཨཱཝཱསེ ཏདཧུཔོསཐེ སམྦཧུལཱ ཨཱཝཱསིཀཱ བྷིཀྑཱུ སནྣིཔཏནྟི ཙཏྟཱརོ ཝཱ ཨཏིརེཀཱ ཝཱ། ཏེ ཛཱནནྟི ‘‘ཨཏྠཉྙེ ཨཱཝཱསིཀཱ བྷིཀྑཱུ ཨནཱགཏཱ’’ཏི། ཏེ ‘‘ཀཔྤཏེཝ ཨམྷཱཀཾ ཨུཔོསཐོ ཀཱཏུཾ ནཱམྷཱཀཾ ན ཀཔྤཏཱི’’ཏི, ཀུཀྐུཙྩཔཀཏཱ ཨུཔོསཐཾ ཀརོནྟི, པཱཏིམོཀྑཾ ཨུདྡིསནྟི། ཏེཧི ཨུདྡིསྶམཱནེ པཱཏིམོཀྑེ, ཨཐཉྙེ ཨཱཝཱསིཀཱ བྷིཀྑཱུ ཨཱགཙྪནྟི བཧུཏརཱ། ཏེཧི, བྷིཀྑཝེ, བྷིཀྑཱུཧི པུན པཱཏིམོཀྑཾ ཨུདྡིསིཏབྦཾ། ཨུདྡེསཀཱནཾ ཨཱཔཏྟི དུཀྐཊསྶ།
175. Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ uposatho kātuṃ nāmhākaṃ na kappatī’’ti, kukkuccapakatā uposathaṃ karonti, pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti bahutarā. Tehi, bhikkhave, bhikkhūhi puna pātimokkhaṃ uddisitabbaṃ. Uddesakānaṃ āpatti dukkaṭassa.
ཨིདྷ པན, བྷིཀྑཝེ, ཨཉྙཏརསྨིཾ ཨཱཝཱསེ ཏདཧུཔོསཐེ སམྦཧུལཱ ཨཱཝཱསིཀཱ བྷིཀྑཱུ སནྣིཔཏནྟི ཙཏྟཱརོ ཝཱ ཨཏིརེཀཱ ཝཱ། ཏེ ཛཱནནྟི ‘‘ཨཏྠཉྙེ ཨཱཝཱསིཀཱ བྷིཀྑཱུ ཨནཱགཏཱ’’ཏི། ཏེ ‘‘ཀཔྤཏེཝ ཨམྷཱཀཾ ཨུཔོསཐོ ཀཱཏུཾ ནཱམྷཱཀཾ ན ཀཔྤཏཱི’’ཏི, ཀུཀྐུཙྩཔཀཏཱ ཨུཔོསཐཾ ཀརོནྟི, པཱཏིམོཀྑཾ ཨུདྡིསནྟི། ཏེཧི ཨུདྡིསྶམཱནེ པཱཏིམོཀྑེ, ཨཐཉྙེ ཨཱཝཱསིཀཱ བྷིཀྑཱུ ཨཱགཙྪནྟི སམསམཱ། ཨུདྡིཊྛཾ སུཨུདྡིཊྛཾ, ཨཝསེསཾ སོཏབྦཾ། ཨུདྡེསཀཱནཾ ཨཱཔཏྟི དུཀྐཊསྶ།
Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ uposatho kātuṃ nāmhākaṃ na kappatī’’ti, kukkuccapakatā uposathaṃ karonti, pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti samasamā. Uddiṭṭhaṃ suuddiṭṭhaṃ, avasesaṃ sotabbaṃ. Uddesakānaṃ āpatti dukkaṭassa.
ཨིདྷ པན, བྷིཀྑཝེ, ཨཉྙཏརསྨིཾ ཨཱཝཱསེ ཏདཧུཔོསཐེ སམྦཧུལཱ ཨཱཝཱསིཀཱ བྷིཀྑཱུ སནྣིཔཏནྟི ཙཏྟཱརོ ཝཱ ཨཏིརེཀཱ ཝཱ། ཏེ ཛཱནནྟི ‘‘ཨཏྠཉྙེ ཨཱཝཱསིཀཱ བྷིཀྑཱུ ཨནཱགཏཱ’’ཏི། ཏེ ‘‘ཀཔྤཏེཝ ཨམྷཱཀཾ ཨུཔོསཐོ ཀཱཏུཾ, ནཱམྷཱཀཾ ན ཀཔྤཏཱི’’ཏི, ཀུཀྐུཙྩཔཀཏཱ ཨུཔོསཐཾ ཀརོནྟི, པཱཏིམོཀྑཾ ཨུདྡིསནྟི། ཏེཧི ཨུདྡིསྶམཱནེ པཱཏིམོཀྑེ, ཨཐཉྙེ ཨཱཝཱསིཀཱ བྷིཀྑཱུ ཨཱགཙྪནྟི ཐོཀཏརཱ། ཨུདྡིཊྛཾ སུཨུདྡིཊྛཾ, ཨཝསེསཾ སོཏབྦཾ། ཨུདྡེསཀཱནཾ ཨཱཔཏྟི དུཀྐཊསྶ།
Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ uposatho kātuṃ, nāmhākaṃ na kappatī’’ti, kukkuccapakatā uposathaṃ karonti, pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti thokatarā. Uddiṭṭhaṃ suuddiṭṭhaṃ, avasesaṃ sotabbaṃ. Uddesakānaṃ āpatti dukkaṭassa.
ཨིདྷ པན, བྷིཀྑཝེ , ཨཉྙཏརསྨིཾ ཨཱཝཱསེ ཏདཧུཔོསཐེ སམྦཧུལཱ ཨཱཝཱསིཀཱ བྷིཀྑཱུ སནྣིཔཏནྟི ཙཏྟཱརོ ཝཱ ཨཏིརེཀཱ ཝཱ། ཏེ ཛཱནནྟི ‘‘ཨཏྠཉྙེ ཨཱཝཱསིཀཱ བྷིཀྑཱུ ཨནཱགཏཱ’’ཏི། ཏེ ‘‘ཀཔྤཏེཝ ཨམྷཱཀཾ ཨུཔོསཐོ ཀཱཏུཾ ནཱམྷཱཀཾ ན ཀཔྤཏཱི’’ཏི, ཀུཀྐུཙྩཔཀཏཱ ཨུཔོསཐཾ ཀརོནྟི, པཱཏིམོཀྑཾ ཨུདྡིསནྟི། ཏེཧི ཨུདྡིཊྛམཏྟེ པཱཏིམོཀྑེ,…པེ॰… ཨཝུཊྛིཏཱཡ པརིསཱཡ…པེ॰… ཨེཀཙྩཱཡ ཝུཊྛིཏཱཡ པརིསཱཡ…པེ॰… སབྦཱཡ ཝུཊྛིཏཱཡ པརིསཱཡ, ཨཐཉྙེ ཨཱཝཱསིཀཱ བྷིཀྑཱུ ཨཱགཙྪནྟི བཧུཏརཱ…པེ॰… སམསམཱ …པེ॰… ཐོཀཏརཱ། ཨུདྡིཊྛཾ སུཨུདྡིཊྛཾ, ཏེསཾ སནྟིཀེ པཱརིསུདྡྷི ཨཱརོཙེཏབྦཱ། ཨུདྡེསཀཱནཾ ཨཱཔཏྟི དུཀྐཊསྶ།
Idha pana, bhikkhave , aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ uposatho kātuṃ nāmhākaṃ na kappatī’’ti, kukkuccapakatā uposathaṃ karonti, pātimokkhaṃ uddisanti. Tehi uddiṭṭhamatte pātimokkhe,…pe… avuṭṭhitāya parisāya…pe… ekaccāya vuṭṭhitāya parisāya…pe… sabbāya vuṭṭhitāya parisāya, athaññe āvāsikā bhikkhū āgacchanti bahutarā…pe… samasamā …pe… thokatarā. Uddiṭṭhaṃ suuddiṭṭhaṃ, tesaṃ santike pārisuddhi ārocetabbā. Uddesakānaṃ āpatti dukkaṭassa.
ཀུཀྐུཙྩཔཀཏཔནྣརསཀཾ ནིཊྛིཏཾ།
Kukkuccapakatapannarasakaṃ niṭṭhitaṃ.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཨནཱཔཏྟིཔནྣརསཀཱདིཀཐཱ • Anāpattipannarasakādikathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༩༥. ཨནཱཔཏྟིཔནྣརསཀཱདིཀཐཱ • 95. Anāpattipannarasakādikathā
