| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
១២. កោសិយត្ថេរគាថា
12. Kosiyattheragāthā
៣៧០.
370.
‘‘យោ វេ គរូនំ វចនញ្ញុ ធីរោ, វសេ ច តម្ហិ ជនយេថ បេមំ;
‘‘Yo ve garūnaṃ vacanaññu dhīro, vase ca tamhi janayetha pemaṃ;
សោ ភត្តិមា នាម ច ហោតិ បណ្ឌិតោ, ញត្វា ច ធម្មេសុ វិសេសិ អស្ស។
So bhattimā nāma ca hoti paṇḍito, ñatvā ca dhammesu visesi assa.
៣៧១.
371.
‘‘យំ អាបទា ឧប្បតិតា ឧឡារា, នក្ខម្ភយន្តេ បដិសង្ខយន្តំ;
‘‘Yaṃ āpadā uppatitā uḷārā, nakkhambhayante paṭisaṅkhayantaṃ;
សោ ថាមវា នាម ច ហោតិ បណ្ឌិតោ, ញត្វា ច ធម្មេសុ វិសេសិ អស្ស។
So thāmavā nāma ca hoti paṇḍito, ñatvā ca dhammesu visesi assa.
៣៧២.
372.
‘‘យោ វេ សមុទ្ទោវ ឋិតោ អនេជោ, គម្ភីរបញ្ញោ និបុណត្ថទស្សី;
‘‘Yo ve samuddova ṭhito anejo, gambhīrapañño nipuṇatthadassī;
អសំហារិយោ នាម ច ហោតិ បណ្ឌិតោ, ញត្វា ច ធម្មេសុ វិសេសិ អស្ស។
Asaṃhāriyo nāma ca hoti paṇḍito, ñatvā ca dhammesu visesi assa.
៣៧៣.
373.
‘‘ពហុស្សុតោ ធម្មធរោ ច ហោតិ, ធម្មស្ស ហោតិ អនុធម្មចារី;
‘‘Bahussuto dhammadharo ca hoti, dhammassa hoti anudhammacārī;
សោ តាទិសោ នាម ច ហោតិ បណ្ឌិតោ, ញត្វា ច ធម្មេសុ វិសេសិ អស្ស។
So tādiso nāma ca hoti paṇḍito, ñatvā ca dhammesu visesi assa.
៣៧៤.
374.
‘‘អត្ថញ្ច យោ ជានាតិ ភាសិតស្ស, អត្ថញ្ច ញត្វាន តថា ករោតិ;
‘‘Atthañca yo jānāti bhāsitassa, atthañca ñatvāna tathā karoti;
អត្ថន្តរោ នាម ស ហោតិ បណ្ឌិតោ, ញត្វា ច ធម្មេសុ វិសេសិ អស្សា’’តិ។
Atthantaro nāma sa hoti paṇḍito, ñatvā ca dhammesu visesi assā’’ti.
… កោសិយោ ថេរោ…។
… Kosiyo thero….
បញ្ចកនិបាតោ និដ្ឋិតោ។
Pañcakanipāto niṭṭhito.
តត្រុទ្ទានំ –
Tatruddānaṃ –
រាជទត្តោ សុភូតោ ច, គិរិមានន្ទសុមនា;
Rājadatto subhūto ca, girimānandasumanā;
វឌ្ឍោ ច កស្សបោ ថេរោ, គយាកស្សបវក្កលី។
Vaḍḍho ca kassapo thero, gayākassapavakkalī.
វិជិតោ យសទត្តោ ច, សោណោ កោសិយសវ្ហយោ;
Vijito yasadatto ca, soṇo kosiyasavhayo;
សដ្ឋិ ច បញ្ច គាថាយោ, ថេរា ច ឯត្ថ ទ្វាទសាតិ។
Saṭṭhi ca pañca gāthāyo, therā ca ettha dvādasāti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ១២. កោសិយត្ថេរគាថាវណ្ណនា • 12. Kosiyattheragāthāvaṇṇanā
