| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၀. ကောကာလိကသုတ္တဝဏ္ဏနာ
10. Kokālikasuttavaṇṇanā
၁၈၁. ဒ္ဝေ ကောကာလိကနာမကာ ဘိက္ခူ, တတော ဣဓ အဓိပ္ပေတံ နိဒ္ဓာရေတ္ဝာ ဒသ္သေတုံ – ‘‘ကော အယံ ကောကာလိကော’’တိ? ပုစ္ဆာ။ သုတ္တသ္သ အဋ္ဌုပ္ပတ္တိံ ဒသ္သေတုံ – ‘‘ကသ္မာ စ ဥပသင္ကမီ’’တိ? ပုစ္ဆာ ။ အယံ ကိရာတိအာဒိ ယထာက္ကမံ တာသံ ဝိသ္သဇ္ဇနံ။ ဝိဝေကဝာသံ ဝသိတုကာမတ္တာ အပ္ပိစ္ဆတာယ စ မာ ကသ္သစိ။ပေ.။ ဝသိံသု။
181. Dve kokālikanāmakā bhikkhū, tato idha adhippetaṃ niddhāretvā dassetuṃ – ‘‘ko ayaṃ kokāliko’’ti? Pucchā. Suttassa aṭṭhuppattiṃ dassetuṃ – ‘‘kasmā ca upasaṅkamī’’ti? Pucchā . Ayaṃ kirātiādi yathākkamaṃ tāsaṃ vissajjanaṃ. Vivekavāsaṃ vasitukāmattā appicchatāya ca mā kassaci…pe… vasiṃsu.
ပက္ကမိသ္သန္တီတိ အာဃာတံ ဥပ္ပာဒေသိ အတ္တနော ဣစ္ဆာဝိဃာတနတော။ ထေရာ ဘိက္ခုသင္ဃသ္သ နိယ္ယာဒယိံသု ပယုတ္တဝာစာယ အကတတ္တာ ထေရေဟိ စ အဒီပိတတ္တာ။ ပုဗ္ဗေပိ။ပေ.။ မညေတိ ဣမိနာ ထေရာနံ ကောဟညေ ဌိတဘာဝံ အာသင္ကတိ အဝဏေ ဝဏံ ပသ္သန္တော ဝိယ, သုဒ္ဓေ အာဒာသတလေ လေခံ ဥဋ္ဌာပေန္တော ဝိယ စ။
Pakkamissantīti āghātaṃ uppādesi attano icchāvighātanato. Therā bhikkhusaṅghassa niyyādayiṃsu payuttavācāya akatattā therehi ca adīpitattā. Pubbepi…pe… maññeti iminā therānaṃ kohaññe ṭhitabhāvaṃ āsaṅkati avaṇe vaṇaṃ passanto viya, suddhe ādāsatale lekhaṃ uṭṭhāpento viya ca.
အပရဇ္ဈိတ္ဝာတိ ဘဂဝတော သမ္မုခာ ‘‘ပာပဘိက္ခူ ဇာတာ’’တိ ဝတ္ဝာ။ အာဟ ‘‘သဒ္ဓာယ အာကရော ပသာဒာဝဟော’’တိ။ ပဝတ္တသဒ္ဓာယိကော ဝာတိ အတ္ထောတိ အာဟ ‘‘သဒ္ဓာတဗ္ဗဝစနော’’တိ။
Aparajjhitvāti bhagavato sammukhā ‘‘pāpabhikkhū jātā’’ti vatvā. Āha ‘‘saddhāya ākaro pasādāvaho’’ti. Pavattasaddhāyiko vāti atthoti āha ‘‘saddhātabbavacano’’ti.
ပီဠကာ နာမ ဗာဟိရတော ပဋ္ဌာယ အဋ္ဌိံ ဘိန္ဒတိ, ဣမာ ပန ပဌမံယေဝ အဋ္ဌိံ ဘိန္ဒိတ္ဝာ ဥဂ္ဂတာ။ တရုဏဗေလုဝမတ္တိယောတိ တရုဏဗိလ္လဖလမတ္တိယော။ ဝိသဂိလိတောတိ ခိတ္တပဟရဏော။ တဉ္စ ဗဠိသံ ဝိသသမညာ လောကေ။ ‘‘အာရက္ခဒေဝတာနံ သုတ္ဝာ’’တိ ပဒံ အာနေတ္ဝာ သမ္ဗန္ဓော။
Pīḷakā nāma bāhirato paṭṭhāya aṭṭhiṃ bhindati, imā pana paṭhamaṃyeva aṭṭhiṃ bhinditvā uggatā. Taruṇabeluvamattiyoti taruṇabillaphalamattiyo. Visagilitoti khittapaharaṇo. Tañca baḷisaṃ visasamaññā loke. ‘‘Ārakkhadevatānaṃ sutvā’’ti padaṃ ānetvā sambandho.
မဂဓရဋ္ဌေ သံဝောဟာရတော မာဂဓကော ပတ္တော, တေန။ တိလသကဋံ တိလဝာဟာဧတိ ဝုတ္တော။ ပစ္စိတဗ္ဗဋ္ဌာနသ္သာတိ နိရယဒုက္ခေန ပစ္စိတဗ္ဗပဒေသသ္သ။ ဧတံ ‘‘အဗ္ဗုဒော’’တိ နာမံ။
Magadharaṭṭhe saṃvohārato māgadhako patto, tena. Tilasakaṭaṃ tilavāhāeti vutto. Paccitabbaṭṭhānassāti nirayadukkhena paccitabbapadesassa. Etaṃ ‘‘abbudo’’ti nāmaṃ.
ဝသ္သဂဏနာတိ ဧကတော ပဋ္ဌာယ ဒသဂုဏိတံ အဗ္ဗုဒအာယုမ္ဟိ, တတော ပရံ ဝီသတိဂုဏံ နိရဗ္ဗုဒာဒီသု ဝသ္သဂဏနာ ဝေဒိတဗ္ဗာ။ သဗ္ဗတ္ထာတိ အဗဗာဒီသု ပဒုမပရိယောသာနေသု သဗ္ဗေသု နိရယေသု။ ဧသေဝ နယောတိ ဟေဋ္ဌိမတော ဥပရိမသ္သ ဥပရိမသ္သ ဝီသတိဂုဏတံ အတိဒိသတိ။
Vassagaṇanāti ekato paṭṭhāya dasaguṇitaṃ abbudaāyumhi, tato paraṃ vīsatiguṇaṃ nirabbudādīsu vassagaṇanā veditabbā. Sabbatthāti ababādīsu padumapariyosānesu sabbesu nirayesu. Eseva nayoti heṭṭhimato uparimassa uparimassa vīsatiguṇataṃ atidisati.
ကောကာလိကသုတ္တဝဏ္ဏနာ နိဋ္ဌိတာ။
Kokālikasuttavaṇṇanā niṭṭhitā.
ပဌမဝဂ္ဂဝဏ္ဏနာ နိဋ္ဌိတာ။
Paṭhamavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. ကောကာလိကသုတ္တံ • 10. Kokālikasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. ကောကာလိကသုတ္တဝဏ္ဏနာ • 10. Kokālikasuttavaṇṇanā
