| Library / Tipiṭaka / तिपिटक • Tipiṭaka / अपदानपाळि • Apadānapāḷi |
९. किंकणिकपुप्फियत्थेरअपदानं
9. Kiṃkaṇikapupphiyattheraapadānaṃ
४७.
47.
‘‘सुमङ्गलोति नामेन, सयम्भू अपराजितो।
‘‘Sumaṅgaloti nāmena, sayambhū aparājito;
पवना निक्खमित्वान, नगरं पाविसी जिनो॥
Pavanā nikkhamitvāna, nagaraṃ pāvisī jino.
४८.
48.
‘‘पिण्डचारं चरित्वान, निक्खम्म नगरा मुनि।
‘‘Piṇḍacāraṃ caritvāna, nikkhamma nagarā muni;
कतकिच्चोव सम्बुद्धो, सो वसी वनमन्तरे॥
Katakiccova sambuddho, so vasī vanamantare.
४९.
49.
‘‘किंकणिपुप्फं पग्गय्ह, बुद्धस्स अभिरोपयिं।
‘‘Kiṃkaṇipupphaṃ paggayha, buddhassa abhiropayiṃ;
पसन्नचित्तो सुमनो, सयम्भुस्स महेसिनो॥
Pasannacitto sumano, sayambhussa mahesino.
५०.
50.
‘‘चतुन्नवुतितो कप्पे, यं पुप्फमभिरोपयिं।
‘‘Catunnavutito kappe, yaṃ pupphamabhiropayiṃ;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
५१.
51.
‘‘छळासीतिम्हितो कप्पे, अपिलासिसनामको।
‘‘Chaḷāsītimhito kappe, apilāsisanāmako;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
५२.
52.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा किंकणिकपुप्फियो थेरो इमा गाथायो अभासित्थाति।
Itthaṃ sudaṃ āyasmā kiṃkaṇikapupphiyo thero imā gāthāyo abhāsitthāti.
किंकणिकपुप्फियत्थेरस्सापदानं नवमं।
Kiṃkaṇikapupphiyattherassāpadānaṃ navamaṃ.
