| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
2. அபே⁴ஜ்ஜவக்³கோ³
2. Abhejjavaggo
1. கு²த்³தா³னுகு²த்³த³கபஞ்ஹோ
1. Khuddānukhuddakapañho
1. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘அபி⁴ஞ்ஞாயாஹங், பி⁴க்க²வே, த⁴ம்மங் தே³ஸேமி நோ அனபி⁴ஞ்ஞாயா’தி. புன ச வினயபஞ்ஞத்தியா ஏவங் ப⁴ணிதங் ‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனதூ’தி. கிங் நு கோ², ப⁴ந்தே நாக³ஸேன, கு²த்³தா³னுகு²த்³த³கானி ஸிக்கா²பதா³னி து³ப்பஞ்ஞத்தானி, உதா³ஹு அவத்து²ஸ்மிங் அஜானித்வா பஞ்ஞத்தானி, யங் ப⁴க³வா அத்தனோ அச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனாபேதி? யதி³, ப⁴ந்தே நாக³ஸேன, ப⁴க³வதா ப⁴ணிதங் ‘அபி⁴ஞ்ஞாயாஹங், பி⁴க்க²வே, த⁴ம்மங் தே³ஸேமி நோ அனபி⁴ஞ்ஞாயா’தி, தேன ஹி ‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனதூ’தி யங் வசனங், தங் மிச்சா². யதி³ ததா²க³தே வினயபஞ்ஞத்தியா ஏவங் ப⁴ணிதங் ‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனதூ’தி தேன ஹி ‘அபி⁴ஞ்ஞாயாஹங், பி⁴க்க²வே, த⁴ம்மங் தே³ஸேமி நோ அனபி⁴ஞ்ஞாயா’தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ ஸுகு²மோ நிபுணோ க³ம்பீ⁴ரோ ஸுக³ம்பீ⁴ரோ து³ன்னிஜ்ஜா²பயோ, ஸோ தவானுப்பத்தோ, தத்த² தே ஞாணப³லவிப்பா²ரங் த³ஸ்ஸேஹீ’’தி.
1. ‘‘Bhante nāgasena, bhāsitampetaṃ bhagavatā ‘abhiññāyāhaṃ, bhikkhave, dhammaṃ desemi no anabhiññāyā’ti. Puna ca vinayapaññattiyā evaṃ bhaṇitaṃ ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhanatū’ti. Kiṃ nu kho, bhante nāgasena, khuddānukhuddakāni sikkhāpadāni duppaññattāni, udāhu avatthusmiṃ ajānitvā paññattāni, yaṃ bhagavā attano accayena khuddānukhuddakāni sikkhāpadāni samūhanāpeti? Yadi, bhante nāgasena, bhagavatā bhaṇitaṃ ‘abhiññāyāhaṃ, bhikkhave, dhammaṃ desemi no anabhiññāyā’ti, tena hi ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhanatū’ti yaṃ vacanaṃ, taṃ micchā. Yadi tathāgate vinayapaññattiyā evaṃ bhaṇitaṃ ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhanatū’ti tena hi ‘abhiññāyāhaṃ, bhikkhave, dhammaṃ desemi no anabhiññāyā’ti tampi vacanaṃ micchā. Ayampi ubhato koṭiko pañho sukhumo nipuṇo gambhīro sugambhīro dunnijjhāpayo, so tavānuppatto, tattha te ñāṇabalavipphāraṃ dassehī’’ti.
‘‘பா⁴ஸிதம்பேதங், மஹாராஜ, ப⁴க³வதா ‘அபி⁴ஞ்ஞாயாஹங், பி⁴க்க²வே, த⁴ம்மங் தே³ஸேமி நோ அனபி⁴ஞ்ஞாயா’தி, வினயபஞ்ஞத்தியாபி ஏவங் ப⁴ணிதங் ‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனதூ’தி, தங் பன, மஹாராஜ, ததா²க³தோ பி⁴க்கூ² வீமங்ஸமானோ ஆஹ ‘உக்கலெஸ்ஸந்தி 1 நு கோ² மம ஸாவகா மயா விஸ்ஸஜ்ஜாபீயமானா மமச்சயேன கு²த்³தா³னுகு²த்³த³கானி ஸிக்கா²பதா³னி, உதா³ஹு ஆதி³யிஸ்ஸந்தீ’தி.
‘‘Bhāsitampetaṃ, mahārāja, bhagavatā ‘abhiññāyāhaṃ, bhikkhave, dhammaṃ desemi no anabhiññāyā’ti, vinayapaññattiyāpi evaṃ bhaṇitaṃ ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhanatū’ti, taṃ pana, mahārāja, tathāgato bhikkhū vīmaṃsamāno āha ‘ukkalessanti 2 nu kho mama sāvakā mayā vissajjāpīyamānā mamaccayena khuddānukhuddakāni sikkhāpadāni, udāhu ādiyissantī’ti.
‘‘யதா², மஹாராஜ, சக்கவத்தீ ராஜா புத்தே ஏவங் வதெ³ய்ய ‘அயங் கோ², தாதா, மஹாஜனபதோ³ ஸப்³ப³தி³ஸாஸு ஸாக³ரபரியந்தோ, து³க்கரோ, தாதா, தாவதகேன ப³லேன தா⁴ரேதுங், ஏத² தும்ஹே, தாதா, மமச்சயேன பச்சந்தே பச்சந்தே தே³ஸே பஜஹதா²’தி. அபி நு கோ² தே, மஹாராஜ, குமாரா பிதுஅச்சயேன ஹத்த²க³தே ஜனபதே³ ஸப்³பே³ தே பச்சந்தே பச்சந்தே தே³ஸே முஞ்செய்யு’’ந்தி? ‘‘ந ஹி ப⁴ந்தே, ராஜதோ 3, ப⁴ந்தே, லுத்³த⁴தரா 4 குமாரா ரஜ்ஜலோபே⁴ன தது³த்தரிங் தி³கு³ணதிகு³ணங் ஜனபத³ங் பரிக்³க³ண்ஹெய்யுங் 5, கிங் பன தே ஹத்த²க³தங் ஜனபத³ங் முஞ்செய்யு’’ந்தி? ‘‘ஏவமேவ கோ², மஹாராஜ, ததா²க³தோ பி⁴க்கூ² வீமங்ஸமானோ ஏவமாஹ ‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனதூ’தி. து³க்க²பரிமுத்தியா, மஹாராஜ, பு³த்³த⁴புத்தா த⁴ம்மலோபே⁴ன அஞ்ஞம்பி உத்தரிங் தி³யட்³ட⁴ஸிக்கா²பத³ஸதங் கோ³பெய்யுங், கிங் பன பகதிபஞ்ஞத்தங் ஸிக்கா²பத³ங் முஞ்செய்யு’’ந்தி?
‘‘Yathā, mahārāja, cakkavattī rājā putte evaṃ vadeyya ‘ayaṃ kho, tātā, mahājanapado sabbadisāsu sāgarapariyanto, dukkaro, tātā, tāvatakena balena dhāretuṃ, etha tumhe, tātā, mamaccayena paccante paccante dese pajahathā’ti. Api nu kho te, mahārāja, kumārā pituaccayena hatthagate janapade sabbe te paccante paccante dese muñceyyu’’nti? ‘‘Na hi bhante, rājato 6, bhante, luddhatarā 7 kumārā rajjalobhena taduttariṃ diguṇatiguṇaṃ janapadaṃ pariggaṇheyyuṃ 8, kiṃ pana te hatthagataṃ janapadaṃ muñceyyu’’nti? ‘‘Evameva kho, mahārāja, tathāgato bhikkhū vīmaṃsamāno evamāha ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhanatū’ti. Dukkhaparimuttiyā, mahārāja, buddhaputtā dhammalobhena aññampi uttariṃ diyaḍḍhasikkhāpadasataṃ gopeyyuṃ, kiṃ pana pakatipaññattaṃ sikkhāpadaṃ muñceyyu’’nti?
‘‘ப⁴ந்தே நாக³ஸேன, யங் ப⁴க³வா ஆஹ ‘கு²த்³தா³னுகு²த்³த³கானி ஸிக்கா²பதா³னீ’தி, எத்தா²யங் ஜனோ ஸம்மூள்ஹோ விமதிஜாதோ அதி⁴கதோ ஸங்ஸயபக்க²ந்தோ³. கதமானி தானி கு²த்³த³கானி ஸிக்கா²பதா³னி, கதமானி அனுகு²த்³த³கானி ஸிக்கா²பதா³னீதி? து³க்கடங், மஹாராஜ, கு²த்³த³கங் ஸிக்கா²பத³ங், து³ப்³பா⁴ஸிதங் அனுகு²த்³த³கங் ஸிக்கா²பத³ங், இமானி த்³வே கு²த்³தா³னுகு²த்³த³கானி ஸிக்கா²பதா³னி, புப்³ப³கேஹிபி, மஹாராஜ, மஹாதே²ரேஹி எத்த² விமதி உப்பாதி³தா, தேஹிபி ஏகஜ்ஜ²ங் ந கதோ த⁴ம்மஸண்டி²திபரியாயே ப⁴க³வதா ஏஸோ பஞ்ஹோ உபதி³ட்டோ²தி. சிரனிக்கி²த்தங், ப⁴ந்தே நாக³ஸேன, ஜினரஹஸ்ஸங் அஜ்ஜேதரஹி லோகே விவடங் பாகடங் கத’’ந்தி.
‘‘Bhante nāgasena, yaṃ bhagavā āha ‘khuddānukhuddakāni sikkhāpadānī’ti, etthāyaṃ jano sammūḷho vimatijāto adhikato saṃsayapakkhando. Katamāni tāni khuddakāni sikkhāpadāni, katamāni anukhuddakāni sikkhāpadānīti? Dukkaṭaṃ, mahārāja, khuddakaṃ sikkhāpadaṃ, dubbhāsitaṃ anukhuddakaṃ sikkhāpadaṃ, imāni dve khuddānukhuddakāni sikkhāpadāni, pubbakehipi, mahārāja, mahātherehi ettha vimati uppāditā, tehipi ekajjhaṃ na kato dhammasaṇṭhitipariyāye bhagavatā eso pañho upadiṭṭhoti. Ciranikkhittaṃ, bhante nāgasena, jinarahassaṃ ajjetarahi loke vivaṭaṃ pākaṭaṃ kata’’nti.
கு²த்³தா³னுகு²த்³த³கபஞ்ஹோ பட²மோ.
Khuddānukhuddakapañho paṭhamo.
Footnotes:
