| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
2. அப்³யாகரணீயபஞ்ஹோ
2. Abyākaraṇīyapañho
2. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘நத்தா²னந்த³ ததா²க³தஸ்ஸ த⁴ம்மேஸு ஆசரியமுட்டீ²’தி, புன ச தே²ரேன மாலுக்யபுத்தேன 1 பஞ்ஹங் புட்டோ² ந ப்³யாகாஸி. ஏஸோ கோ², ப⁴ந்தே நாக³ஸேன, பஞ்ஹோ த்³வயந்தோ 2 ஏகந்தனிஸ்ஸிதோ ப⁴விஸ்ஸதி அஜானநேன வா கு³ய்ஹகரணேன வா. யதி³, ப⁴ந்தே நாக³ஸேன, ப⁴க³வதா ப⁴ணிதங் ‘நத்தா²னந்த³ ததா²க³தஸ்ஸ த⁴ம்மேஸு ஆசரியமுட்டீ²’தி, தேன ஹி தே²ரஸ்ஸ மாலுக்யபுத்தஸ்ஸ அஜானந்தேன ந ப்³யாகதங். யதி³ ஜானந்தேன ந ப்³யாகதங், தேன ஹி அத்தி² ததா²க³தஸ்ஸ த⁴ம்மேஸு ஆசரியமுட்டி². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
2. ‘‘Bhante nāgasena, bhāsitampetaṃ bhagavatā ‘natthānanda tathāgatassa dhammesu ācariyamuṭṭhī’ti, puna ca therena mālukyaputtena 3 pañhaṃ puṭṭho na byākāsi. Eso kho, bhante nāgasena, pañho dvayanto 4 ekantanissito bhavissati ajānanena vā guyhakaraṇena vā. Yadi, bhante nāgasena, bhagavatā bhaṇitaṃ ‘natthānanda tathāgatassa dhammesu ācariyamuṭṭhī’ti, tena hi therassa mālukyaputtassa ajānantena na byākataṃ. Yadi jānantena na byākataṃ, tena hi atthi tathāgatassa dhammesu ācariyamuṭṭhi. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, ப⁴க³வதா ‘நத்தா²னந்த³ ததா²க³தஸ்ஸ த⁴ம்மேஸு ஆசரியமுட்டீ²’தி, அப்³யாகதோ ச தே²ரேன மாலுக்யபுத்தேன புச்சி²தோ பஞ்ஹோ, தஞ்ச பன ந அஜானந்தேன ந கு³ய்ஹகரணேன. சத்தாரிமானி, மஹாராஜ, பஞ்ஹப்³யாகரணானி. கதமானி சத்தாரி? ஏகங்ஸப்³யாகரணீயோ பஞ்ஹோ விப⁴ஜ்ஜப்³யாகரணீயோ பஞ்ஹோ படிபுச்சா²ப்³யாகரணீயோ பஞ்ஹோ ட²பனீயோ பஞ்ஹோதி.
‘‘Bhāsitampetaṃ, mahārāja, bhagavatā ‘natthānanda tathāgatassa dhammesu ācariyamuṭṭhī’ti, abyākato ca therena mālukyaputtena pucchito pañho, tañca pana na ajānantena na guyhakaraṇena. Cattārimāni, mahārāja, pañhabyākaraṇāni. Katamāni cattāri? Ekaṃsabyākaraṇīyo pañho vibhajjabyākaraṇīyo pañho paṭipucchābyākaraṇīyo pañho ṭhapanīyo pañhoti.
‘‘கதமோ ச, மஹாராஜ, ஏகங்ஸப்³யாகரணீயோ பஞ்ஹோ? ‘ரூபங் அனிச்ச’ந்தி ஏகங்ஸப்³யாகரணீயோ பஞ்ஹோ, ‘வேத³னா அனிச்சா’தி…பே॰… ‘ஸஞ்ஞா அனிச்சா’தி…பே॰… ‘ஸங்கா²ரா அனிச்சா’தி…பே॰… ‘விஞ்ஞாணங் அனிச்ச’’ந்தி ஏகங்ஸப்³யாகரணீயோ பஞ்ஹோ, அயங் ஏகங்ஸப்³யாகரணீயோ பஞ்ஹோ.
‘‘Katamo ca, mahārāja, ekaṃsabyākaraṇīyo pañho? ‘Rūpaṃ anicca’nti ekaṃsabyākaraṇīyo pañho, ‘vedanā aniccā’ti…pe… ‘saññā aniccā’ti…pe… ‘saṅkhārā aniccā’ti…pe… ‘viññāṇaṃ anicca’’nti ekaṃsabyākaraṇīyo pañho, ayaṃ ekaṃsabyākaraṇīyo pañho.
‘‘கதமோ விப⁴ஜ்ஜப்³யாகரணீயோ பஞ்ஹோ? ‘அனிச்சங் பன ரூப’ந்தி விப⁴ஜ்ஜப்³யாகரணீயோ பஞ்ஹோ, ‘அனிச்சா பன வேத³னா’தி…பே॰… ‘அனிச்சா பன ஸஞ்ஞா’தி…பே॰… ‘அனிச்சா பன ஸங்கா²ரா’தி…பே॰… ‘அனிச்சங் பன விஞ்ஞாண’ந்தி விப⁴ஜ்ஜப்³யாகரணீயோ பஞ்ஹோ, அயங் விப⁴ஜ்ஜப்³யாகரணீயோ பஞ்ஹோ.
‘‘Katamo vibhajjabyākaraṇīyo pañho? ‘Aniccaṃ pana rūpa’nti vibhajjabyākaraṇīyo pañho, ‘aniccā pana vedanā’ti…pe… ‘aniccā pana saññā’ti…pe… ‘aniccā pana saṅkhārā’ti…pe… ‘aniccaṃ pana viññāṇa’nti vibhajjabyākaraṇīyo pañho, ayaṃ vibhajjabyākaraṇīyo pañho.
‘‘கதமோ படிபுச்சா²ப்³யாகரணீயோ பஞ்ஹோ? ‘கிங் நு கோ² சக்கு²னா ஸப்³ப³ங் விஜானாதீ’தி அயங் படிபுச்சா²ப்³யாகரணீயோ பஞ்ஹோ.
‘‘Katamo paṭipucchābyākaraṇīyo pañho? ‘Kiṃ nu kho cakkhunā sabbaṃ vijānātī’ti ayaṃ paṭipucchābyākaraṇīyo pañho.
‘‘கதமோ ட²பனீயோ பஞ்ஹோ? ‘ஸஸ்ஸதோ லோகோ’தி ட²பனீயோ பஞ்ஹோ, ‘அஸஸ்ஸதோ லோகோ’தி. ‘அந்தவா லோகோ’தி. ‘அனந்தவா லோகோ’தி. ‘அந்தவா ச அனந்தவா ச லோகோ’தி. ‘நேவந்தவா நானந்தவா லோகோ’தி. ‘தங் ஜீவங் தங் ஸரீர’ந்தி. ‘அஞ்ஞங் ஜீவங் அஞ்ஞங் ஸரீர’ந்தி. ‘ஹோதி ததா²க³தோ பரங் மரணா’தி. ‘ந ஹோதி ததா²க³தோ பரங் மரணா’தி. ‘ஹோதி ச ந ச ஹோதி ததா²க³தோ பரங் மரணா’தி. ‘நேவ ஹோதி ந ந ஹோதி ததா²க³தோ பரங் மரணா’தி ட²பனீயோ பஞ்ஹோ, அயங் ட²பனீயோ பஞ்ஹோ.
‘‘Katamo ṭhapanīyo pañho? ‘Sassato loko’ti ṭhapanīyo pañho, ‘asassato loko’ti. ‘Antavā loko’ti. ‘Anantavā loko’ti. ‘Antavā ca anantavā ca loko’ti. ‘Nevantavā nānantavā loko’ti. ‘Taṃ jīvaṃ taṃ sarīra’nti. ‘Aññaṃ jīvaṃ aññaṃ sarīra’nti. ‘Hoti tathāgato paraṃ maraṇā’ti. ‘Na hoti tathāgato paraṃ maraṇā’ti. ‘Hoti ca na ca hoti tathāgato paraṃ maraṇā’ti. ‘Neva hoti na na hoti tathāgato paraṃ maraṇā’ti ṭhapanīyo pañho, ayaṃ ṭhapanīyo pañho.
‘‘ப⁴க³வா, மஹாராஜ, தே²ரஸ்ஸ மாலுக்யபுத்தஸ்ஸ தங் ட²பனீயங் பஞ்ஹங் ந ப்³யாகாஸி. ஸோ பன பஞ்ஹோ கிங் காரணா ட²பனீயோ? ந தஸ்ஸ தீ³பனாய ஹேது வா காரணங் வா அத்தி², தஸ்மா ஸோ பஞ்ஹோ ட²பனீயோ. நத்தி² பு³த்³தா⁴னங் ப⁴க³வந்தானங் அகாரணமஹேதுகங் கி³ரமுதீ³ரண’’ந்தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Bhagavā, mahārāja, therassa mālukyaputtassa taṃ ṭhapanīyaṃ pañhaṃ na byākāsi. So pana pañho kiṃ kāraṇā ṭhapanīyo? Na tassa dīpanāya hetu vā kāraṇaṃ vā atthi, tasmā so pañho ṭhapanīyo. Natthi buddhānaṃ bhagavantānaṃ akāraṇamahetukaṃ giramudīraṇa’’nti. ‘‘Sādhu, bhante nāgasena, evametaṃ tathā sampaṭicchāmī’’ti.
அப்³யாகரணீயபஞ்ஹோ து³தியோ.
Abyākaraṇīyapañho dutiyo.
Footnotes:
