| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
3. கீ²ணாஸவஸதிஸம்மோஸபஞ்ஹோ
3. Khīṇāsavasatisammosapañho
3. ‘‘ப⁴ந்தே நாக³ஸேன, அத்தி² அரஹதோ ஸதிஸம்மோஸோ’’தி? ‘‘விக³தஸதிஸம்மோஸா கோ², மஹாராஜ, அரஹந்தோ, நத்தி² அரஹந்தானங் ஸதிஸம்மோஸோ’’தி. ‘‘ஆபஜ்ஜெய்ய பன, ப⁴ந்தே, அரஹா ஆபத்தி’’ந்தி? ‘‘ஆம, மஹாராஜா’’தி. ‘‘கிஸ்மிங் வத்து²ஸ்மி’’ந்தி? ‘‘குடிகாரே, மஹாராஜ, ஸஞ்சரித்தே, விகாலே காலஸஞ்ஞாய, பவாரிதே அப்பவாரிதஸஞ்ஞாய, அனதிரித்தே அதிரித்தஸஞ்ஞாயா’’தி.
3. ‘‘Bhante nāgasena, atthi arahato satisammoso’’ti? ‘‘Vigatasatisammosā kho, mahārāja, arahanto, natthi arahantānaṃ satisammoso’’ti. ‘‘Āpajjeyya pana, bhante, arahā āpatti’’nti? ‘‘Āma, mahārājā’’ti. ‘‘Kismiṃ vatthusmi’’nti? ‘‘Kuṭikāre, mahārāja, sañcaritte, vikāle kālasaññāya, pavārite appavāritasaññāya, anatiritte atirittasaññāyā’’ti.
‘‘ப⁴ந்தே நாக³ஸேன, தும்ஹே ப⁴ணத² ‘யே ஆபத்திங் ஆபஜ்ஜந்தி, தே த்³வீஹி காரணேஹி ஆபஜ்ஜந்தி அனாத³ரியேன வா அஜானநேன வா’தி. அபி நு கோ², ப⁴ந்தே, அரஹதோ அனாத³ரியங் ஹோதி, யங் அரஹா ஆபத்திங் ஆபஜ்ஜதீ’’தி? ‘‘ந ஹி, மஹாராஜா’’தி.
‘‘Bhante nāgasena, tumhe bhaṇatha ‘ye āpattiṃ āpajjanti, te dvīhi kāraṇehi āpajjanti anādariyena vā ajānanena vā’ti. Api nu kho, bhante, arahato anādariyaṃ hoti, yaṃ arahā āpattiṃ āpajjatī’’ti? ‘‘Na hi, mahārājā’’ti.
‘‘யதி³, ப⁴ந்தே நாக³ஸேன, அரஹா ஆபத்திங் ஆபஜ்ஜதி, நத்தி² ச அரஹதோ அனாத³ரியங், தேன ஹி அத்தி² அரஹதோ ஸதிஸம்மோஸோ’’தி? ‘‘நத்தி², மஹாராஜ, அரஹதோ ஸதிஸம்மோஸோ, ஆபத்திஞ்ச அரஹா ஆபஜ்ஜதீ’’தி.
‘‘Yadi, bhante nāgasena, arahā āpattiṃ āpajjati, natthi ca arahato anādariyaṃ, tena hi atthi arahato satisammoso’’ti? ‘‘Natthi, mahārāja, arahato satisammoso, āpattiñca arahā āpajjatī’’ti.
‘‘தேன ஹி, ப⁴ந்தே, காரணேன மங் ஸஞ்ஞாபேஹி, கிங் தத்த² காரண’’ந்தி? ‘‘த்³வேமே, மஹாராஜ, கிலேஸா லோகவஜ்ஜங் பண்ணத்திவஜ்ஜஞ்சாதி. கதமங், மஹாராஜ, லோகவஜ்ஜங்? த³ஸ அகுஸலகம்மபதா², இத³ங் வுச்சதி லோகவஜ்ஜங். கதமங் பண்ணத்திவஜ்ஜங்? யங் லோகே அத்தி² ஸமணானங் அனநுச்ச²விகங் அனநுலோமிகங், கி³ஹீனங் அனவஜ்ஜங். தத்த² ப⁴க³வா ஸாவகானங் ஸிக்கா²பத³ங் பஞ்ஞபேதி ‘யாவஜீவங் அனதிக்கமனீய’ந்தி. விகாலபோ⁴ஜனங், மஹாராஜ, லோகஸ்ஸ அனவஜ்ஜங், தங் ஜினஸாஸனே வஜ்ஜங். பூ⁴தகா³மவிகோபனங், மஹாராஜ, லோகஸ்ஸ அனவஜ்ஜங், தங் ஜினஸாஸனே வஜ்ஜங். உத³கே ஹஸ்ஸத⁴ம்மங், மஹாராஜ, லோகஸ்ஸ அனவஜ்ஜங், தங் ஜினஸாஸனே வஜ்ஜங். இதி ஏவரூபானி ஏவரூபானி, மஹாராஜ , ஜினஸாஸனே வஜ்ஜானி, இத³ங் வுச்சதி பண்ணத்திவஜ்ஜங்.
‘‘Tena hi, bhante, kāraṇena maṃ saññāpehi, kiṃ tattha kāraṇa’’nti? ‘‘Dveme, mahārāja, kilesā lokavajjaṃ paṇṇattivajjañcāti. Katamaṃ, mahārāja, lokavajjaṃ? Dasa akusalakammapathā, idaṃ vuccati lokavajjaṃ. Katamaṃ paṇṇattivajjaṃ? Yaṃ loke atthi samaṇānaṃ ananucchavikaṃ ananulomikaṃ, gihīnaṃ anavajjaṃ. Tattha bhagavā sāvakānaṃ sikkhāpadaṃ paññapeti ‘yāvajīvaṃ anatikkamanīya’nti. Vikālabhojanaṃ, mahārāja, lokassa anavajjaṃ, taṃ jinasāsane vajjaṃ. Bhūtagāmavikopanaṃ, mahārāja, lokassa anavajjaṃ, taṃ jinasāsane vajjaṃ. Udake hassadhammaṃ, mahārāja, lokassa anavajjaṃ, taṃ jinasāsane vajjaṃ. Iti evarūpāni evarūpāni, mahārāja , jinasāsane vajjāni, idaṃ vuccati paṇṇattivajjaṃ.
‘‘லோகவஜ்ஜங் அப⁴ப்³போ³ கீ²ணாஸவோ தங் அஜ்ஜா²சரிதுங், யங் கிலேஸங் பண்ணத்திவஜ்ஜங், தங் அஜானந்தோ ஆபஜ்ஜெய்ய. அவிஸயோ, மஹாராஜ, ஏகச்சஸ்ஸ அரஹதோ ஸப்³ப³ங் ஜானிதுங், ந ஹி தஸ்ஸ ப³லங் அத்தி² ஸப்³ப³ங் ஜானிதுங். அனஞ்ஞாதங், மஹாராஜ, அரஹதோ இத்தி²புரிஸானங் நாமம்பி கொ³த்தம்பி, மக்³கோ³பி தஸ்ஸ மஹியா அனஞ்ஞாதோ; விமுத்திங் யேவ, மஹாராஜ, ஏகச்சோ அரஹா ஜானெய்ய; ச²ளபி⁴ஞ்ஞோ அரஹா ஸகவிஸயங் ஜானெய்ய; ஸப்³ப³ஞ்ஞூ, மஹாராஜ, ததா²க³தோவ ஸப்³ப³ங் ஜானாதீ’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Lokavajjaṃ abhabbo khīṇāsavo taṃ ajjhācarituṃ, yaṃ kilesaṃ paṇṇattivajjaṃ, taṃ ajānanto āpajjeyya. Avisayo, mahārāja, ekaccassa arahato sabbaṃ jānituṃ, na hi tassa balaṃ atthi sabbaṃ jānituṃ. Anaññātaṃ, mahārāja, arahato itthipurisānaṃ nāmampi gottampi, maggopi tassa mahiyā anaññāto; vimuttiṃ yeva, mahārāja, ekacco arahā jāneyya; chaḷabhiñño arahā sakavisayaṃ jāneyya; sabbaññū, mahārāja, tathāgatova sabbaṃ jānātī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
கீ²ணாஸவஸதிஸம்மோஸபஞ்ஹோ ததியோ.
Khīṇāsavasatisammosapañho tatiyo.
