| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
4. லோகே நத்தி²பா⁴வபஞ்ஹோ
4. Loke natthibhāvapañho
4. ‘‘ப⁴ந்தே நாக³ஸேன, தி³ஸ்ஸந்தி லோகே பு³த்³தா⁴, தி³ஸ்ஸந்தி பச்சேகபு³த்³தா⁴, தி³ஸ்ஸந்தி ததா²க³தஸ்ஸ ஸாவகா, தி³ஸ்ஸந்தி சக்கவத்திராஜானோ, தி³ஸ்ஸந்தி பதே³ஸராஜானோ, தி³ஸ்ஸந்தி தே³வமனுஸ்ஸா, தி³ஸ்ஸந்தி ஸத⁴னா, தி³ஸ்ஸந்தி அத⁴னா, தி³ஸ்ஸந்தி ஸுக³தா, தி³ஸ்ஸந்தி து³க்³க³தா, தி³ஸ்ஸதி புரிஸஸ்ஸ இத்தி²லிங்க³ங் பாதுபூ⁴தங், தி³ஸ்ஸதி இத்தி²யா புரிஸலிங்க³ங் பாதுபூ⁴தங், தி³ஸ்ஸதி ஸுகதங் து³க்கதங் கம்மங், தி³ஸ்ஸந்தி கல்யாணபாபகானங் கம்மானங் விபாகூபபோ⁴கி³னோ ஸத்தா, அத்தி² லோகே ஸத்தா அண்ட³ஜா ஜலாபு³ஜா ஸங்ஸேத³ஜா ஓபபாதிகா, அத்தி² ஸத்தா அபதா³ த்³விபதா³ சதுப்பதா³ ப³ஹுப்பதா³, அத்தி² லோகே யக்கா² ரக்க²ஸா கும்ப⁴ண்டா³ அஸுரா தா³னவா க³ந்த⁴ப்³பா³ பேதா பிஸாசா, அத்தி² கின்னரா மஹோரகா³ நாகா³ ஸுபண்ணா ஸித்³தா⁴ விஜ்ஜாத⁴ரா, அத்தி² ஹத்தீ² அஸ்ஸா கா³வோ மஹிங்ஸா 1 ஒட்டா² க³த்³ரபா⁴ அஜா ஏளகா மிகா³ ஸூகரா ஸீஹா ப்³யக்³கா⁴ தீ³பீ அச்சா² கோகா தரச்சா² ஸோணா ஸிங்கா³லா, அத்தி² ப³ஹுவிதா⁴ ஸகுணா, அத்தி² ஸுவண்ணங் ரஜதங் முத்தா மணி ஸங்கோ² ஸிலா பவாளங் லோஹிதங்கோ மஸாரக³ல்லங் வேளுரியோ வஜிரங் ப²லிகங் காளலோஹங் தம்ப³லோஹங் வட்டலோஹங் கங்ஸலோஹங், அத்தி² கோ²மங் கோஸெய்யங் கப்பாஸிகங் ஸாணங் ப⁴ங்க³ங் கம்ப³லங், அத்தி² ஸாலி வீஹி யவோ கங்கு³ குத்³ரூஸோ வரகோ கோ³தூ⁴மோ முக்³கோ³, மாஸோ திலங் குலத்த²ங், அத்தி² மூலக³ந்தோ⁴ ஸாரக³ந்தோ⁴ பெ²க்³கு³க³ந்தோ⁴ தசக³ந்தோ⁴ பத்தக³ந்தோ⁴ புப்ப²க³ந்தோ⁴ ப²லக³ந்தோ⁴ ஸப்³ப³க³ந்தோ⁴, அத்தி² திண லதா க³ச்ச² ருக்க² ஓஸதி⁴ வனப்பதி நதீ³ பப்³ப³த ஸமுத்³த³ மச்ச²கச்ச²பா ஸப்³ப³ங் லோகே அத்தி². யங், ப⁴ந்தே, லோகே நத்தி², தங் மே கதே²ஹீ’’தி.
4. ‘‘Bhante nāgasena, dissanti loke buddhā, dissanti paccekabuddhā, dissanti tathāgatassa sāvakā, dissanti cakkavattirājāno, dissanti padesarājāno, dissanti devamanussā, dissanti sadhanā, dissanti adhanā, dissanti sugatā, dissanti duggatā, dissati purisassa itthiliṅgaṃ pātubhūtaṃ, dissati itthiyā purisaliṅgaṃ pātubhūtaṃ, dissati sukataṃ dukkataṃ kammaṃ, dissanti kalyāṇapāpakānaṃ kammānaṃ vipākūpabhogino sattā, atthi loke sattā aṇḍajā jalābujā saṃsedajā opapātikā, atthi sattā apadā dvipadā catuppadā bahuppadā, atthi loke yakkhā rakkhasā kumbhaṇḍā asurā dānavā gandhabbā petā pisācā, atthi kinnarā mahoragā nāgā supaṇṇā siddhā vijjādharā, atthi hatthī assā gāvo mahiṃsā 2 oṭṭhā gadrabhā ajā eḷakā migā sūkarā sīhā byagghā dīpī acchā kokā taracchā soṇā siṅgālā, atthi bahuvidhā sakuṇā, atthi suvaṇṇaṃ rajataṃ muttā maṇi saṅkho silā pavāḷaṃ lohitaṅko masāragallaṃ veḷuriyo vajiraṃ phalikaṃ kāḷalohaṃ tambalohaṃ vaṭṭalohaṃ kaṃsalohaṃ, atthi khomaṃ koseyyaṃ kappāsikaṃ sāṇaṃ bhaṅgaṃ kambalaṃ, atthi sāli vīhi yavo kaṅgu kudrūso varako godhūmo muggo, māso tilaṃ kulatthaṃ, atthi mūlagandho sāragandho pheggugandho tacagandho pattagandho pupphagandho phalagandho sabbagandho, atthi tiṇa latā gaccha rukkha osadhi vanappati nadī pabbata samudda macchakacchapā sabbaṃ loke atthi. Yaṃ, bhante, loke natthi, taṃ me kathehī’’ti.
‘‘தீணிமானி, மஹாராஜ, லோகே நத்தி². கதமானி தீணி? ஸசேதனா வா அசேதனா வா அஜராமரா லோகே நத்தி², ஸங்கா²ரானங் நிச்சதா நத்தி², பரமத்தே²ன ஸத்தூபலத்³தி⁴ நத்தி², இமானி கோ², மஹாராஜ, தீணி லோகே நத்தீ²’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Tīṇimāni, mahārāja, loke natthi. Katamāni tīṇi? Sacetanā vā acetanā vā ajarāmarā loke natthi, saṅkhārānaṃ niccatā natthi, paramatthena sattūpaladdhi natthi, imāni kho, mahārāja, tīṇi loke natthī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
லோகே நத்தி²பா⁴வபஞ்ஹோ சதுத்தோ².
Loke natthibhāvapañho catuttho.
Footnotes:
