| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
২. খীণাসৰভাৰপঞ্হো
2. Khīṇāsavabhāvapañho
২. ‘‘ভন্তে নাগসেন, তুম্হে ভণথ ‘যো গিহী অরহত্তং পত্তো, দ্ৰে ৰাস্স গতিযো ভৰন্তি অনঞ্ঞা, তস্মিং যেৰ দিৰসে পব্বজতি ৰা পরিনিব্বাযতি ৰা। ন সো দিৰসো সক্কা অতিক্কমেতু’ন্তি। সচে সো, ভন্তে নাগসেন, তস্মিং দিৰসে আচরিযং ৰা উপজ্ঝাযং ৰা পত্তচীৰরং ৰা ন লভেথ, অপি নু খো সো অরহা সযং ৰা পব্বজেয্য দিৰসং ৰা অতিক্কমেয্য, অঞ্ঞো কোচি অরহা ইদ্ধিমা আগন্ত্ৰা তং পব্বাজেয্য ৰা পরিনিব্বাযেয্য ৰা’’তি? ‘‘ন সো, মহারাজ, অরহা সযং পব্বজেয্য, সযং পব্বজন্তো থেয্যং আপজ্জতি, ন চ দিৰসং অতিক্কমেয্য, অঞ্ঞস্স অরহন্তস্স আগমনং ভৰেয্য ৰা ন ৰা ভৰেয্য, তস্মিং যেৰ দিৰসে পরিনিব্বাযেয্যা’’তি। ‘‘তেন হি, ভন্তে নাগসেন, অরহত্তস্স সন্তভাৰো ৰিজহিতো হোতি, যেন অধিগতস্স জীৰিতহারো ভৰতী’’তি।
2. ‘‘Bhante nāgasena, tumhe bhaṇatha ‘yo gihī arahattaṃ patto, dve vāssa gatiyo bhavanti anaññā, tasmiṃ yeva divase pabbajati vā parinibbāyati vā. Na so divaso sakkā atikkametu’nti. Sace so, bhante nāgasena, tasmiṃ divase ācariyaṃ vā upajjhāyaṃ vā pattacīvaraṃ vā na labhetha, api nu kho so arahā sayaṃ vā pabbajeyya divasaṃ vā atikkameyya, añño koci arahā iddhimā āgantvā taṃ pabbājeyya vā parinibbāyeyya vā’’ti? ‘‘Na so, mahārāja, arahā sayaṃ pabbajeyya, sayaṃ pabbajanto theyyaṃ āpajjati, na ca divasaṃ atikkameyya, aññassa arahantassa āgamanaṃ bhaveyya vā na vā bhaveyya, tasmiṃ yeva divase parinibbāyeyyā’’ti. ‘‘Tena hi, bhante nāgasena, arahattassa santabhāvo vijahito hoti, yena adhigatassa jīvitahāro bhavatī’’ti.
‘‘ৰিসমং, মহারাজ, গিহিলিঙ্গং, ৰিসমে লিঙ্গে লিঙ্গদুব্বলতায অরহত্তং পত্তো গিহী তস্মিং যেৰ দিৰসে পব্বজতি ৰা পরিনিব্বাযতি ৰা। নেসো, মহারাজ, দোসো অরহত্তস্স, গিহিলিঙ্গস্সেৰেসো দোসো যদিদং লিঙ্গদুব্বলতা।
‘‘Visamaṃ, mahārāja, gihiliṅgaṃ, visame liṅge liṅgadubbalatāya arahattaṃ patto gihī tasmiṃ yeva divase pabbajati vā parinibbāyati vā. Neso, mahārāja, doso arahattassa, gihiliṅgasseveso doso yadidaṃ liṅgadubbalatā.
‘‘যথা, মহারাজ, ভোজনং সব্বসত্তানং আযুপালকং জীৰিতরক্খকং ৰিসমকোট্ঠস্স মন্দদুব্বলগহণিকস্স অৰিপাকেন জীৰিতং হরতি। নেসো, মহারাজ, দোসো ভোজনস্স, কোট্ঠস্সেৰেসো দোসো যদিদং অগ্গিদুব্বলতা। এৰমেৰ খো, মহারাজ, ৰিসমে লিঙ্গে লিঙ্গদুব্বলতায অরহত্তং পত্তো গিহী তস্মিং যেৰ দিৰসে পব্বজতি ৰা পরিনিব্বাযতি ৰা। নেসো, মহারাজ, দোসো অরহত্তস্স, গিহিলিঙ্গস্সেৰেসো দোসো যদিদং লিঙ্গদুব্বলতা।
‘‘Yathā, mahārāja, bhojanaṃ sabbasattānaṃ āyupālakaṃ jīvitarakkhakaṃ visamakoṭṭhassa mandadubbalagahaṇikassa avipākena jīvitaṃ harati. Neso, mahārāja, doso bhojanassa, koṭṭhasseveso doso yadidaṃ aggidubbalatā. Evameva kho, mahārāja, visame liṅge liṅgadubbalatāya arahattaṃ patto gihī tasmiṃ yeva divase pabbajati vā parinibbāyati vā. Neso, mahārāja, doso arahattassa, gihiliṅgasseveso doso yadidaṃ liṅgadubbalatā.
‘‘যথা ৰা পন, মহারাজ, পরিত্তং তিণসলাকং উপরি গরুকে পাসাণে ঠপিতে দুব্বলতায ভিজ্জিত্ৰা পততি। এৰমেৰ খো, মহারাজ, অরহত্তং পত্তো গিহী তেন লিঙ্গেন অরহত্তং ধারেতুং অসক্কোন্তো তস্মিং যেৰ দিৰসে পব্বজতি ৰা পরিনিব্বাযতি ৰা।
‘‘Yathā vā pana, mahārāja, parittaṃ tiṇasalākaṃ upari garuke pāsāṇe ṭhapite dubbalatāya bhijjitvā patati. Evameva kho, mahārāja, arahattaṃ patto gihī tena liṅgena arahattaṃ dhāretuṃ asakkonto tasmiṃ yeva divase pabbajati vā parinibbāyati vā.
‘‘যথা ৰা পন, মহারাজ, পুরিসো অবলো দুব্বলো নিহীনজচ্চো পরিত্তপুঞ্ঞো মহতিমহারজ্জং লভিত্ৰা খণেন পরিপততি পরিধংসতি ওসক্কতি, ন সক্কোতি ইস্সরিযং ধারেতুং, এৰমেৰ খো, মহারাজ, অরহত্তং পত্তো গিহী তেন লিঙ্গেন অরহত্তং ধারেতুং ন সক্কোতি , তেন কারণেন তস্মিং যেৰ দিৰসে পব্বজতি ৰা পরিনিব্বাযতি ৰা’’তি। ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি।
‘‘Yathā vā pana, mahārāja, puriso abalo dubbalo nihīnajacco parittapuñño mahatimahārajjaṃ labhitvā khaṇena paripatati paridhaṃsati osakkati, na sakkoti issariyaṃ dhāretuṃ, evameva kho, mahārāja, arahattaṃ patto gihī tena liṅgena arahattaṃ dhāretuṃ na sakkoti , tena kāraṇena tasmiṃ yeva divase pabbajati vā parinibbāyati vā’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
খীণাসৰভাৰপঞ্হো দুতিযো।
Khīṇāsavabhāvapañho dutiyo.
