| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৩. খীণাসৰসতিসম্মোসপঞ্হো
3. Khīṇāsavasatisammosapañho
৩. ‘‘ভন্তে নাগসেন, অত্থি অরহতো সতিসম্মোসো’’তি? ‘‘ৰিগতসতিসম্মোসা খো, মহারাজ, অরহন্তো, নত্থি অরহন্তানং সতিসম্মোসো’’তি। ‘‘আপজ্জেয্য পন, ভন্তে, অরহা আপত্তি’’ন্তি? ‘‘আম, মহারাজা’’তি। ‘‘কিস্মিং ৰত্থুস্মি’’ন্তি? ‘‘কুটিকারে, মহারাজ, সঞ্চরিত্তে, ৰিকালে কালসঞ্ঞায, পৰারিতে অপ্পৰারিতসঞ্ঞায, অনতিরিত্তে অতিরিত্তসঞ্ঞাযা’’তি।
3. ‘‘Bhante nāgasena, atthi arahato satisammoso’’ti? ‘‘Vigatasatisammosā kho, mahārāja, arahanto, natthi arahantānaṃ satisammoso’’ti. ‘‘Āpajjeyya pana, bhante, arahā āpatti’’nti? ‘‘Āma, mahārājā’’ti. ‘‘Kismiṃ vatthusmi’’nti? ‘‘Kuṭikāre, mahārāja, sañcaritte, vikāle kālasaññāya, pavārite appavāritasaññāya, anatiritte atirittasaññāyā’’ti.
‘‘ভন্তে নাগসেন, তুম্হে ভণথ ‘যে আপত্তিং আপজ্জন্তি, তে দ্ৰীহি কারণেহি আপজ্জন্তি অনাদরিযেন ৰা অজাননেন ৰা’তি। অপি নু খো, ভন্তে, অরহতো অনাদরিযং হোতি, যং অরহা আপত্তিং আপজ্জতী’’তি? ‘‘ন হি, মহারাজা’’তি।
‘‘Bhante nāgasena, tumhe bhaṇatha ‘ye āpattiṃ āpajjanti, te dvīhi kāraṇehi āpajjanti anādariyena vā ajānanena vā’ti. Api nu kho, bhante, arahato anādariyaṃ hoti, yaṃ arahā āpattiṃ āpajjatī’’ti? ‘‘Na hi, mahārājā’’ti.
‘‘যদি, ভন্তে নাগসেন, অরহা আপত্তিং আপজ্জতি, নত্থি চ অরহতো অনাদরিযং, তেন হি অত্থি অরহতো সতিসম্মোসো’’তি? ‘‘নত্থি, মহারাজ, অরহতো সতিসম্মোসো, আপত্তিঞ্চ অরহা আপজ্জতী’’তি।
‘‘Yadi, bhante nāgasena, arahā āpattiṃ āpajjati, natthi ca arahato anādariyaṃ, tena hi atthi arahato satisammoso’’ti? ‘‘Natthi, mahārāja, arahato satisammoso, āpattiñca arahā āpajjatī’’ti.
‘‘তেন হি, ভন্তে, কারণেন মং সঞ্ঞাপেহি, কিং তত্থ কারণ’’ন্তি? ‘‘দ্ৰেমে, মহারাজ, কিলেসা লোকৰজ্জং পণ্ণত্তিৰজ্জঞ্চাতি। কতমং, মহারাজ, লোকৰজ্জং? দস অকুসলকম্মপথা, ইদং ৰুচ্চতি লোকৰজ্জং। কতমং পণ্ণত্তিৰজ্জং? যং লোকে অত্থি সমণানং অননুচ্ছৰিকং অননুলোমিকং, গিহীনং অনৰজ্জং। তত্থ ভগৰা সাৰকানং সিক্খাপদং পঞ্ঞপেতি ‘যাৰজীৰং অনতিক্কমনীয’ন্তি। ৰিকালভোজনং, মহারাজ, লোকস্স অনৰজ্জং, তং জিনসাসনে ৰজ্জং। ভূতগামৰিকোপনং, মহারাজ, লোকস্স অনৰজ্জং, তং জিনসাসনে ৰজ্জং। উদকে হস্সধম্মং, মহারাজ, লোকস্স অনৰজ্জং, তং জিনসাসনে ৰজ্জং। ইতি এৰরূপানি এৰরূপানি, মহারাজ , জিনসাসনে ৰজ্জানি, ইদং ৰুচ্চতি পণ্ণত্তিৰজ্জং।
‘‘Tena hi, bhante, kāraṇena maṃ saññāpehi, kiṃ tattha kāraṇa’’nti? ‘‘Dveme, mahārāja, kilesā lokavajjaṃ paṇṇattivajjañcāti. Katamaṃ, mahārāja, lokavajjaṃ? Dasa akusalakammapathā, idaṃ vuccati lokavajjaṃ. Katamaṃ paṇṇattivajjaṃ? Yaṃ loke atthi samaṇānaṃ ananucchavikaṃ ananulomikaṃ, gihīnaṃ anavajjaṃ. Tattha bhagavā sāvakānaṃ sikkhāpadaṃ paññapeti ‘yāvajīvaṃ anatikkamanīya’nti. Vikālabhojanaṃ, mahārāja, lokassa anavajjaṃ, taṃ jinasāsane vajjaṃ. Bhūtagāmavikopanaṃ, mahārāja, lokassa anavajjaṃ, taṃ jinasāsane vajjaṃ. Udake hassadhammaṃ, mahārāja, lokassa anavajjaṃ, taṃ jinasāsane vajjaṃ. Iti evarūpāni evarūpāni, mahārāja , jinasāsane vajjāni, idaṃ vuccati paṇṇattivajjaṃ.
‘‘লোকৰজ্জং অভব্বো খীণাসৰো তং অজ্ঝাচরিতুং, যং কিলেসং পণ্ণত্তিৰজ্জং, তং অজানন্তো আপজ্জেয্য। অৰিসযো, মহারাজ, একচ্চস্স অরহতো সব্বং জানিতুং, ন হি তস্স বলং অত্থি সব্বং জানিতুং। অনঞ্ঞাতং, মহারাজ, অরহতো ইত্থিপুরিসানং নামম্পি গোত্তম্পি, মগ্গোপি তস্স মহিযা অনঞ্ঞাতো; ৰিমুত্তিং যেৰ, মহারাজ, একচ্চো অরহা জানেয্য; ছল়ভিঞ্ঞো অরহা সকৰিসযং জানেয্য; সব্বঞ্ঞূ, মহারাজ, তথাগতোৰ সব্বং জানাতী’’তি। ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি।
‘‘Lokavajjaṃ abhabbo khīṇāsavo taṃ ajjhācarituṃ, yaṃ kilesaṃ paṇṇattivajjaṃ, taṃ ajānanto āpajjeyya. Avisayo, mahārāja, ekaccassa arahato sabbaṃ jānituṃ, na hi tassa balaṃ atthi sabbaṃ jānituṃ. Anaññātaṃ, mahārāja, arahato itthipurisānaṃ nāmampi gottampi, maggopi tassa mahiyā anaññāto; vimuttiṃ yeva, mahārāja, ekacco arahā jāneyya; chaḷabhiñño arahā sakavisayaṃ jāneyya; sabbaññū, mahārāja, tathāgatova sabbaṃ jānātī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
খীণাসৰসতিসম্মোসপঞ্হো ততিযো।
Khīṇāsavasatisammosapañho tatiyo.
