| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
2. கீ²ணாஸவபா⁴வபஞ்ஹோ
2. Khīṇāsavabhāvapañho
2. ‘‘ப⁴ந்தே நாக³ஸேன, தும்ஹே ப⁴ணத² ‘யோ கி³ஹீ அரஹத்தங் பத்தோ, த்³வே வாஸ்ஸ க³தியோ ப⁴வந்தி அனஞ்ஞா, தஸ்மிங் யேவ தி³வஸே பப்³ப³ஜதி வா பரினிப்³பா³யதி வா. ந ஸோ தி³வஸோ ஸக்கா அதிக்கமேது’ந்தி. ஸசே ஸோ, ப⁴ந்தே நாக³ஸேன, தஸ்மிங் தி³வஸே ஆசரியங் வா உபஜ்ஜா²யங் வா பத்தசீவரங் வா ந லபே⁴த², அபி நு கோ² ஸோ அரஹா ஸயங் வா பப்³ப³ஜெய்ய தி³வஸங் வா அதிக்கமெய்ய, அஞ்ஞோ கோசி அரஹா இத்³தி⁴மா ஆக³ந்த்வா தங் பப்³பா³ஜெய்ய வா பரினிப்³பா³யெய்ய வா’’தி? ‘‘ந ஸோ, மஹாராஜ, அரஹா ஸயங் பப்³ப³ஜெய்ய, ஸயங் பப்³ப³ஜந்தோ தெ²ய்யங் ஆபஜ்ஜதி, ந ச தி³வஸங் அதிக்கமெய்ய, அஞ்ஞஸ்ஸ அரஹந்தஸ்ஸ ஆக³மனங் ப⁴வெய்ய வா ந வா ப⁴வெய்ய, தஸ்மிங் யேவ தி³வஸே பரினிப்³பா³யெய்யா’’தி. ‘‘தேன ஹி, ப⁴ந்தே நாக³ஸேன, அரஹத்தஸ்ஸ ஸந்தபா⁴வோ விஜஹிதோ ஹோதி, யேன அதி⁴க³தஸ்ஸ ஜீவிதஹாரோ ப⁴வதீ’’தி.
2. ‘‘Bhante nāgasena, tumhe bhaṇatha ‘yo gihī arahattaṃ patto, dve vāssa gatiyo bhavanti anaññā, tasmiṃ yeva divase pabbajati vā parinibbāyati vā. Na so divaso sakkā atikkametu’nti. Sace so, bhante nāgasena, tasmiṃ divase ācariyaṃ vā upajjhāyaṃ vā pattacīvaraṃ vā na labhetha, api nu kho so arahā sayaṃ vā pabbajeyya divasaṃ vā atikkameyya, añño koci arahā iddhimā āgantvā taṃ pabbājeyya vā parinibbāyeyya vā’’ti? ‘‘Na so, mahārāja, arahā sayaṃ pabbajeyya, sayaṃ pabbajanto theyyaṃ āpajjati, na ca divasaṃ atikkameyya, aññassa arahantassa āgamanaṃ bhaveyya vā na vā bhaveyya, tasmiṃ yeva divase parinibbāyeyyā’’ti. ‘‘Tena hi, bhante nāgasena, arahattassa santabhāvo vijahito hoti, yena adhigatassa jīvitahāro bhavatī’’ti.
‘‘விஸமங், மஹாராஜ, கி³ஹிலிங்க³ங், விஸமே லிங்கே³ லிங்க³து³ப்³ப³லதாய அரஹத்தங் பத்தோ கி³ஹீ தஸ்மிங் யேவ தி³வஸே பப்³ப³ஜதி வா பரினிப்³பா³யதி வா. நேஸோ, மஹாராஜ, தோ³ஸோ அரஹத்தஸ்ஸ, கி³ஹிலிங்க³ஸ்ஸேவேஸோ தோ³ஸோ யதி³த³ங் லிங்க³து³ப்³ப³லதா.
‘‘Visamaṃ, mahārāja, gihiliṅgaṃ, visame liṅge liṅgadubbalatāya arahattaṃ patto gihī tasmiṃ yeva divase pabbajati vā parinibbāyati vā. Neso, mahārāja, doso arahattassa, gihiliṅgasseveso doso yadidaṃ liṅgadubbalatā.
‘‘யதா², மஹாராஜ, போ⁴ஜனங் ஸப்³ப³ஸத்தானங் ஆயுபாலகங் ஜீவிதரக்க²கங் விஸமகொட்ட²ஸ்ஸ மந்த³து³ப்³ப³லக³ஹணிகஸ்ஸ அவிபாகேன ஜீவிதங் ஹரதி. நேஸோ, மஹாராஜ, தோ³ஸோ போ⁴ஜனஸ்ஸ, கொட்ட²ஸ்ஸேவேஸோ தோ³ஸோ யதி³த³ங் அக்³கி³து³ப்³ப³லதா. ஏவமேவ கோ², மஹாராஜ, விஸமே லிங்கே³ லிங்க³து³ப்³ப³லதாய அரஹத்தங் பத்தோ கி³ஹீ தஸ்மிங் யேவ தி³வஸே பப்³ப³ஜதி வா பரினிப்³பா³யதி வா. நேஸோ, மஹாராஜ, தோ³ஸோ அரஹத்தஸ்ஸ, கி³ஹிலிங்க³ஸ்ஸேவேஸோ தோ³ஸோ யதி³த³ங் லிங்க³து³ப்³ப³லதா.
‘‘Yathā, mahārāja, bhojanaṃ sabbasattānaṃ āyupālakaṃ jīvitarakkhakaṃ visamakoṭṭhassa mandadubbalagahaṇikassa avipākena jīvitaṃ harati. Neso, mahārāja, doso bhojanassa, koṭṭhasseveso doso yadidaṃ aggidubbalatā. Evameva kho, mahārāja, visame liṅge liṅgadubbalatāya arahattaṃ patto gihī tasmiṃ yeva divase pabbajati vā parinibbāyati vā. Neso, mahārāja, doso arahattassa, gihiliṅgasseveso doso yadidaṃ liṅgadubbalatā.
‘‘யதா² வா பன, மஹாராஜ, பரித்தங் திணஸலாகங் உபரி க³ருகே பாஸாணே ட²பிதே து³ப்³ப³லதாய பி⁴ஜ்ஜித்வா பததி. ஏவமேவ கோ², மஹாராஜ, அரஹத்தங் பத்தோ கி³ஹீ தேன லிங்கே³ன அரஹத்தங் தா⁴ரேதுங் அஸக்கொந்தோ தஸ்மிங் யேவ தி³வஸே பப்³ப³ஜதி வா பரினிப்³பா³யதி வா.
‘‘Yathā vā pana, mahārāja, parittaṃ tiṇasalākaṃ upari garuke pāsāṇe ṭhapite dubbalatāya bhijjitvā patati. Evameva kho, mahārāja, arahattaṃ patto gihī tena liṅgena arahattaṃ dhāretuṃ asakkonto tasmiṃ yeva divase pabbajati vā parinibbāyati vā.
‘‘யதா² வா பன, மஹாராஜ, புரிஸோ அப³லோ து³ப்³ப³லோ நிஹீனஜச்சோ பரித்தபுஞ்ஞோ மஹதிமஹாரஜ்ஜங் லபி⁴த்வா க²ணேன பரிபததி பரித⁴ங்ஸதி ஓஸக்கதி, ந ஸக்கோதி இஸ்ஸரியங் தா⁴ரேதுங், ஏவமேவ கோ², மஹாராஜ, அரஹத்தங் பத்தோ கி³ஹீ தேன லிங்கே³ன அரஹத்தங் தா⁴ரேதுங் ந ஸக்கோதி , தேன காரணேன தஸ்மிங் யேவ தி³வஸே பப்³ப³ஜதி வா பரினிப்³பா³யதி வா’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Yathā vā pana, mahārāja, puriso abalo dubbalo nihīnajacco parittapuñño mahatimahārajjaṃ labhitvā khaṇena paripatati paridhaṃsati osakkati, na sakkoti issariyaṃ dhāretuṃ, evameva kho, mahārāja, arahattaṃ patto gihī tena liṅgena arahattaṃ dhāretuṃ na sakkoti , tena kāraṇena tasmiṃ yeva divase pabbajati vā parinibbāyati vā’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
கீ²ணாஸவபா⁴வபஞ்ஹோ து³தியோ.
Khīṇāsavabhāvapañho dutiyo.
