Only Dharma. Since 1992
Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya

૩. ખેત્તસુત્તં

3. Khettasuttaṃ

૮૪. ‘‘તીણિમાનિ, ભિક્ખવે, કસ્સકસ્સ ગહપતિસ્સ પુબ્બે કરણીયાનિ. કતમાનિ તીણિ? ઇધ, ભિક્ખવે, કસ્સકો ગહપતિ પટિકચ્ચેવ 1 ખેત્તં સુકટ્ઠં કરોતિ સુમતિકતં 2. પટિકચ્ચેવ ખેત્તં સુકટ્ઠં કરિત્વા સુમતિકતં કાલેન બીજાનિ પતિટ્ઠાપેતિ. કાલેન બીજાનિ પતિટ્ઠાપેત્વા સમયેન ઉદકં અભિનેતિપિ અપનેતિપિ. ઇમાનિ ખો, ભિક્ખવે, તીણિ કસ્સકસ્સ ગહપતિસ્સ પુબ્બે કરણીયાનિ.

84. ‘‘Tīṇimāni, bhikkhave, kassakassa gahapatissa pubbe karaṇīyāni. Katamāni tīṇi? Idha, bhikkhave, kassako gahapati paṭikacceva 3 khettaṃ sukaṭṭhaṃ karoti sumatikataṃ 4. Paṭikacceva khettaṃ sukaṭṭhaṃ karitvā sumatikataṃ kālena bījāni patiṭṭhāpeti. Kālena bījāni patiṭṭhāpetvā samayena udakaṃ abhinetipi apanetipi. Imāni kho, bhikkhave, tīṇi kassakassa gahapatissa pubbe karaṇīyāni.

‘‘એવમેવં ખો, ભિક્ખવે, તીણિમાનિ ભિક્ખુસ્સ પુબ્બે કરણીયાનિ. કતમાનિ તીણિ? અધિસીલસિક્ખાસમાદાનં, અધિચિત્તસિક્ખાસમાદાનં, અધિપઞ્ઞાસિક્ખાસમાદાનં – ઇમાનિ ખો, ભિક્ખવે, તીણિ ભિક્ખુસ્સ પુબ્બે કરણીયાનિ.

‘‘Evamevaṃ kho, bhikkhave, tīṇimāni bhikkhussa pubbe karaṇīyāni. Katamāni tīṇi? Adhisīlasikkhāsamādānaṃ, adhicittasikkhāsamādānaṃ, adhipaññāsikkhāsamādānaṃ – imāni kho, bhikkhave, tīṇi bhikkhussa pubbe karaṇīyāni.

‘‘તસ્માતિહ, ભિક્ખવે, એવં સિક્ખિતબ્બં – ‘તિબ્બો નો છન્દો ભવિસ્સતિ અધિસીલસિક્ખાસમાદાને, તિબ્બો નો છન્દો ભવિસ્સતિ અધિચિત્તસિક્ખાસમાદાને, તિબ્બો નો છન્દો ભવિસ્સતિ અધિપઞ્ઞાસિક્ખાસમાદાને’તિ. એવઞ્હિ વો, ભિક્ખવે, સિક્ખિતબ્બ’’ન્તિ. તતિયં.

‘‘Tasmātiha, bhikkhave, evaṃ sikkhitabbaṃ – ‘tibbo no chando bhavissati adhisīlasikkhāsamādāne, tibbo no chando bhavissati adhicittasikkhāsamādāne, tibbo no chando bhavissati adhipaññāsikkhāsamādāne’ti. Evañhi vo, bhikkhave, sikkhitabba’’nti. Tatiyaṃ.




Next: ૪. વજ્જિપુત્તસુત્તં • 4. Vajjiputtasuttaṃ




Footnotes:
1. પટિગચ્ચેવ (સી॰ પી॰)
2. સુમત્તિકતં (ક॰), એત્થ મતિસદ્દો કટ્ઠખેત્તસ્સ સમીકરણસાધને દારુભણ્ડે વત્તતીતિ સક્કતઅભિધાનેસુ આગતં. તં ‘‘મતિયા સુટ્ઠુ સમીકત’’ન્તિ અટ્ઠકથાય સમેતિ
3. paṭigacceva (sī. pī.)
4. sumattikataṃ (ka.), ettha matisaddo kaṭṭhakhettassa samīkaraṇasādhane dārubhaṇḍe vattatīti sakkataabhidhānesu āgataṃ. taṃ ‘‘matiyā suṭṭhu samīkata’’nti aṭṭhakathāya sameti



Related texts:



અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૩. ખેત્તસુત્તવણ્ણના • 3. Khettasuttavaṇṇanā

ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧-૫. સમણસુત્તાદિવણ્ણના • 1-5. Samaṇasuttādivaṇṇanā


© 1991-2026 Titi Tudorancea Yoga Bulletin | Titi Tudorancea® is a Registered Trademark | Terms of use and privacy policy
Contact