| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೪. ಖೇತ್ತಙ್ಗಪಞ್ಹೋ
4. Khettaṅgapañho
೪. ‘‘ಭನ್ತೇ ನಾಗಸೇನ, ‘ಖೇತ್ತಸ್ಸ ತೀಣಿ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ತೀಣಿ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಖೇತ್ತಂ ಮಾತಿಕಾಸಮ್ಪನ್ನಂ ಹೋತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸುಚರಿತವತ್ತಪ್ಪಟಿವತ್ತಮಾತಿಕಾಸಮ್ಪನ್ನೇನ ಭವಿತಬ್ಬಂ। ಇದಂ, ಮಹಾರಾಜ, ಖೇತ್ತಸ್ಸ ಪಠಮಂ ಅಙ್ಗಂ ಗಹೇತಬ್ಬಂ।
4. ‘‘Bhante nāgasena, ‘khettassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, khettaṃ mātikāsampannaṃ hoti, evameva kho, mahārāja, yoginā yogāvacarena sucaritavattappaṭivattamātikāsampannena bhavitabbaṃ. Idaṃ, mahārāja, khettassa paṭhamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಖೇತ್ತಂ ಮರಿಯಾದಾಸಮ್ಪನ್ನಂ ಹೋತಿ, ತಾಯ ಚ ಮರಿಯಾದಾಯ ಉದಕಂ ರಕ್ಖಿತ್ವಾ ಧಞ್ಞಂ ಪರಿಪಾಚೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸೀಲಹಿರಿಮರಿಯಾದಾಸಮ್ಪನ್ನೇನ ಭವಿತಬ್ಬಂ, ತಾಯ ಚ ಸೀಲಹಿರಿಮರಿಯಾದಾಯ ಸಾಮಞ್ಞಂ ರಕ್ಖಿತ್ವಾ ಚತ್ತಾರಿ ಸಾಮಞ್ಞಫಲಾನಿ ಗಹೇತಬ್ಬಾನಿ। ಇದಂ, ಮಹಾರಾಜ, ಖೇತ್ತಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, khettaṃ mariyādāsampannaṃ hoti, tāya ca mariyādāya udakaṃ rakkhitvā dhaññaṃ paripāceti, evameva kho, mahārāja, yoginā yogāvacarena sīlahirimariyādāsampannena bhavitabbaṃ, tāya ca sīlahirimariyādāya sāmaññaṃ rakkhitvā cattāri sāmaññaphalāni gahetabbāni. Idaṃ, mahārāja, khettassa dutiyaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಖೇತ್ತಂ ಉಟ್ಠಾನಸಮ್ಪನ್ನಂ ಹೋತಿ, ಕಸ್ಸಕಸ್ಸ ಹಾಸಜನಕಂ ಅಪ್ಪಮ್ಪಿ ಬೀಜಂ ವುತ್ತಂ ಬಹು ಹೋತಿ, ಬಹು ವುತ್ತಂ ಬಹುತರಂ ಹೋತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಉಟ್ಠಾನಸಮ್ಪನ್ನೇನ ವಿಪುಲಫಲದಾಯಿನಾ ಭವಿತಬ್ಬಂ, ದಾಯಕಾನಂ ಹಾಸಜನಕೇನ ಭವಿತಬ್ಬಂ, ಯಥಾ ಅಪ್ಪಂ ದಿನ್ನಂ ಬಹು ಹೋತಿ, ಬಹು ದಿನ್ನಂ ಬಹುತರಂ ಹೋತಿ। ಇದಂ, ಮಹಾರಾಜ, ಖೇತ್ತಸ್ಸ ತತಿಯಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಉಪಾಲಿನಾ ವಿನಯಧರೇನ –
‘‘Puna caparaṃ, mahārāja, khettaṃ uṭṭhānasampannaṃ hoti, kassakassa hāsajanakaṃ appampi bījaṃ vuttaṃ bahu hoti, bahu vuttaṃ bahutaraṃ hoti, evameva kho, mahārāja, yoginā yogāvacarena uṭṭhānasampannena vipulaphaladāyinā bhavitabbaṃ, dāyakānaṃ hāsajanakena bhavitabbaṃ, yathā appaṃ dinnaṃ bahu hoti, bahu dinnaṃ bahutaraṃ hoti. Idaṃ, mahārāja, khettassa tatiyaṃ aṅgaṃ gahetabbaṃ. Bhāsitampetaṃ, mahārāja, therena upālinā vinayadharena –
‘‘‘ಖೇತ್ತೂಪಮೇನ ಭವಿತಬ್ಬಂ, ಉಟ್ಠಾನವಿಪುಲದಾಯಿನಾ।
‘‘‘Khettūpamena bhavitabbaṃ, uṭṭhānavipuladāyinā;
ಏಸ ಖೇತ್ತವರೋ ನಾಮ, ಯೋ ದದಾತಿ ವಿಪುಲಂ ಫಲ’’’ನ್ತಿ॥
Esa khettavaro nāma, yo dadāti vipulaṃ phala’’’nti.
ಖೇತ್ತಙ್ಗಪಞ್ಹೋ ಚತುತ್ಥೋ।
Khettaṅgapañho catuttho.
